2020-10-25 算命仙改行做牧師

 

        葉明翰綴師傅學命學、算命，也有出名；總是命學無法度改變伊大「剋星」的「命」。當伊著癌症想欲自殺，伊向小漢的時所bat的上帝祈禱，彼時有光照伊，伊就醒悟、悔改。
        葉明翰講：當伊給家己交互上帝，伊一生的命運就改變啦。悔改以後伊無閣給人算命，認真讀聖經，參加教會聚會、事奉。婦女會會長和一個老姊妹鼓勵伊獻身做主的工，婦女會準備全額的獎學金互伊。老姊妹講：聖神感動阮，一定也會感動你。
        伊呣愛做傳道人，講：「這個以外、我甘心做任何事奉。」總是，老姊妹的話一直佇伊心內。為了確定這是上帝的旨意，佇禱告中，伊給上帝要求五個憑據：(1)家己的胃病得著醫治 (2)老母贊同 (3)上帝供應厝裡的需要 (4)做兵緩期 (5)有學校通讀。
        結果：(1)第二日胃就袂痛 (2)老母鼓勵伊，講：伊小漢洗禮的時，已經給伊奉獻互主 (3)上帝用奇妙的方法供應厝裡的生活 (4)有老師來探訪，互伊答案：因為伊著飼家、小弟閣小漢，通延到十幾年後才做兵 (5)有揣著長老教會聖經學院通讀。
        五個憑據攏得著回應，伊心內充滿感恩，將一生奉獻互主。1970年葉明翰受按立做牧師。伊有心去向海外的台灣人宣教，1975年受差派去巴西、巴拉圭、阿根廷及美國擔任宣教師。2006年退休以後，猶原常常去世界逐所在，巡迴培靈和佈道。
        2015年葉明翰牧師倒去台灣蹛，佇伊甸基金會逐冬有欲百場的活動。其他民間的節日、清明、肉粽節等等，伊也攏會去佈道傳福音。歸個台灣，伊走透透，小、偏僻的教會，伊攏去！
        葉牧師對聖經的角度，掀開民間的算命、風水、撿日等等風俗的神秘面殼，互民俗不但呣是傳福音的阻礙，反轉成做傳福音的橋梁。葉牧師有寫《祭祖與輪迴》、《禁忌與沖煞》、《好風好水何處覓》等等的冊，幫贊人了解民間的信仰。
        2020年葉牧師煞地上的日子，伊不但改變家己的命，閣互濟濟人得著新的性命。咱也因為伊，通卡清楚民間的信仰，卡知咱袂信的同鄉的想法，知影怎樣和in對話。