Taigi 讀聖經

        耶穌捌(bat)為著咱的罪，受釘；閣為著咱通稱做義，伊死閣活(羅4:25)。 1 舊約講：犯著罪著死，總是，通獻無瑕疵的動物，替咱死，這是替贖。 2 耶穌擔當咱的罪，互人釘死，伊的血洗清咱的罪，互咱得著稱義。 3上帝互伊閣活，亦是為著互咱得著稱做義，因為咱欲得著新的、義的性命。 4 耶穌將伊閣活以後的新性命分互咱，欲互上帝看咱親像看基督。 5 以前的罪，咱得著基督為咱洗清。行頭前的路，咱著穿主閣活的性命。         耶穌擔咱的罪、死，互咱稱做義，是欲成上帝的救贖計畫。 1 罪的代價是死，耶穌無罪，才通替咱來死，才會得著上帝的接納。 2 罪的代價是死，耶穌無罪，才會贏過死亡，上帝互伊閣活。 3 亞當受引誘犯罪，死進入世界，上帝應允拍破魔鬼的計謀。舊約聖經記載用動物來替贖，新約的基督擔當所有人的罪，家己做替贖，互人免受罪苦楚。 4 主耶穌佇十字架頂，最後講：「事明白啦！」表示罪的替贖已經得著成。 5 咱若相信主的替贖，伊已經洗清咱的罪，就呣通注目佇罪，互良心苦楚，反轉著放落重擔，注目佇主的恩典，過新的生活。         主耶穌閣活，互咱稱做義，帶互咱永遠活的向望。 1 罪無閣掌權：對亞當墮落，人就互罪、死管轄。主閣活，伊剪除死亡的權勢。 2 罪得著赦免：伊做咱的中保，伊閣活來證明：咱的罪，伊已經為咱洗清。 3 閣活的向望：伊應允的閣活，伊本身代先實現。綴伊的人，亦欲佇後日閣活。 4 四配的行為：主閣活，互咱新的性命，咱著褪去舊衫，行代誌及反悔的心相合。 5 人生的終點：掃墓提醒咱，咱攏著死。covid瘟疫提醒咱，死亡離咱遐近。總是，主閣活，互咱知，死亡呣是人生的終點，閣活才是，閣咱通有這款的向望。 6 上帝是全能：上帝的神互耶穌閣活，伊亦欲幫贊你的家庭、事業脫離死蔭的山谷。信基督的人雖然死，欲閣活，得著永遠的活命。 7 主永踮佇咱：對咱來講，閣活的主踮咱裡面；對上帝的角度，伊看咱親像基督。 8 永遠的祖家：閣活的主為咱備辦厝宅(chhù-the̍h)，踮佇伊，咱就通到遐。         魔鬼是世界的王，總是，閣活的主，已經贏過世界！主耶穌為咱死、為咱閣活，互咱得著新性命、得著稱義、有閣活和永遠活的向望！

          主耶穌在世最後一禮拜叫做聖週。第一日禮拜日是棕(chang)樹枝主日，拜四設立聖餐，拜五受審判、受難，拜六埋佇(tâi tī)墳墓，禮拜日閣活。下腳是前五日的記事。         棕樹枝主日，主耶穌騎驢(lû)仔入耶路撒冷。屬世的猶太國和上帝國佇遮相拄(tú)。 1 屬世的猶太國：猶太人對舊約聖經知，欲來的彼個，是大闢的囝孫，是爭戰、有大權能的彌賽亞，期待伊騎馬、帶來大闢的國度、權柄。 2 屬上帝的國：主宣布伊來是欲背人的重擔、困苦。伊教咱著相服事，無佇怨仇、暴力中過生活，伊帶來和平，所以伊騎一隻恬恬無聲的驢仔入城。         拜一，伊趕出殿內做買賣的，對法利賽人和祭司，用譬喻責備𪜶。伊捙(chhia)倒換錢的及賣粉鳥的人的桌椅；講：聖殿是萬邦祈禱的厝，呣是賊岫(siü)。         拜二主耶穌有濟濟教示，閣設譬喻 (可11:20-12:44)。 1 有經學士講：疼上帝及厝邊贏過祭祀。伊講：你離上帝國無遠啦(可12:28-34)。 2 主耶穌講散赤寡婦所獻的真濟，因為伊獻伊生活所需要的全部 (可12:41-44)。 3 主耶穌謳咾帶香油來抹伊的，伊體貼主的心意，將上好的獻互主(約12:1-8)。 4 差囝去做工的譬喻。伊謳咾彼個願意悔改、聽老父的話的(太21:28-31)。 5 葡萄園佃戶的譬喻。伊譴責佃戶拍、刣園主的奴僕，刣園主的囝(太21:33-44)。 6 人君為囝辦婚筵的譬喻。人客呣來的受剪除，無穿禮服的受趕出(太22:1-14)。         拜二主耶穌佇橄欖山，讖語(chhàm-gú)聖殿咧(teh)欲受毀壞(可13:1-2)，末期以前的兆頭(可13:3-13)，大災難(可13:14-23)，閣人子再臨(可13:24-37)。 1 交託奴僕錢銀的譬喻，表明耶穌再臨是欲審判，顯明上帝的公義(太25:14-30)。 2 分別綿羊、山羊的譬喻，表明上帝的義包含律法正義及社會正義(太25:31-46)。 稱做義人，因為𪜶關心耶穌所關心的：出外人，佇監裡、破病、枵餓的人… 對人和人的關係，引出人和上帝的關係，通過疼厝邊來實現對上帝的疼。         拜三無特別的教示。拜四主耶穌設立聖餐。 1 伊宣佈伊來這個世界的目的：獻伊的身軀、為世間人流血。 2 佇最後晚餐的時，伊給學生洗腳，擘餅、捧杯，宣告家己咧欲受死。 3 佇客

       約 15:13-15講主耶穌佇最後的晚餐對學生講，我叫恁做朋友。 1 人為著朋友獻性命，疼無有比這個卡大的(15:13)。 2 恁若行我所命令恁的，就是我的朋友(15:14)。 3 今了後，我無叫恁做奴僕，因為奴僕呣知伊的主人的所行。若是我已經叫恁做朋友；因為我對父所聽見的，攏有給恁講(15:15)。         上帝稱呼一寡人做朋友，因為𪜶明白上帝的心意。 1 上帝親嘴講亞伯拉罕是伊的朋友(賽41:8)，接受伊的款待、請求。   上帝無向亞伯拉罕隱囥，欲滅亡所多瑪城的代誌(創18:17-21)。   上帝欲滅無的所多瑪城，亞伯拉罕為著𪜶向上帝求(創18::22-33)。 2 耶和華及摩西面對面講話，親像人及朋友講話一般樣(出33:11)。   上帝講摩西是忠心的人，做人溫柔，贏過世上的眾人(民12:3)。   上帝為摩西伸冤，因為米利暗及亞倫怨妒摩西，嫌伊娶古實查某。   上帝對摩西講明的，無用臆的，閣互摩西看見伊的形容(民12)。         主耶穌佇受難的前一日對學生講，𪜶是伊的朋友。 1 學生綴耶穌三冬外，到最後，耶穌才給這個新的身份互學生。 2 主講：恁中間愛做大的…愛做頭的，欲做恁的奴僕(太20:26, 27)。 3主耶穌表現出伊就是主，伊奉待人，做眾人的差用、奴僕。 4 主講著為朋友賠命，暗示伊己經準備好，欲為人、伊的朋友賠命。 5 主耶穌一向對咱親像朋友，伊無否認伊是歹人的朋友(路7:34)。 6 主佇地上三年，做濟濟人的朋友，伊只有稱呼11個學生做朋友。 7 主用嘴、用行為，見證家己，互學生認bat伊的、天父的代誌。 8 學生成做耶穌的朋友，是因為，今𪜶知耶穌的代誌，確實的身分。         人怎樣做上帝的朋友？咱著怎樣對待咱的朋友？ 1 亞伯拉罕信上帝，就算做義。閣得著稱做上帝的朋友(雅2:23)。 2 亞伯拉罕和上帝相知，所多瑪的代誌，伊聽亞伯拉罕的想法。 3 信心是需要行為，亞伯拉罕相信上帝，他亦用行動表現 。 4 親像耶穌對咱，咱的朋友亦著知咱是基督徒，也知咱向𪜶傳福音。