Taigi 讀聖經

          弗4:25-5:2通做咱佇受氣的時，及時的幫贊。 1 著除去白賊，逐人及厝邊講真實，因為咱相共(kāng)做一體(4:25) 2 受氣，呣通犯罪；呣通到日落，互魔鬼有縫(phāng)通入(4:26,27) 3 呣通講垃墋話，著講好話，回應人的欠缺，互人得著造就(4:29) 4 莫得互上帝的聖神憂悶；伊給恁勘印，直到贖回的日(4:30)。 5著除去苦毒、怨恨、受氣、喧嚷、誹謗，和一切的惡毒(4:31)。 6 仁慈相款待，憐憫的心相赦免，親像上帝佇基督捌赦免恁(4:32) 7 做上帝所疼的囝，著學上帝。行仁愛，親像基督捌疼恁 (5:1,2)       抵著相爭、受氣的時，四個參考的原則 。 1 講真實的話：人看袂著咱的內心，著講出來，呣通囥心內(4:25) 2受氣呣通累積：著敨(tháu)放，也呣通互魔鬼激、來受氣(4:26,27) 3 對代誌無對人：揣出問題來解決，無用負面態度攻擊人(4:29,31) 4 基本態度：學上帝憐憫人、赦免人，學基督行仁愛 (4:32，5:1,2)         聖經無講“莫受氣” ，是講，著受氣不義的，這是公義的憤慨。 1 上帝是公義的審判司，亦是日日發出受氣的上帝 (詩7:11)。 2 先知拿單講，有好額人搶喪鄉人的羊仔，大衛為這受氣(撒下12) 3 法利賽人欲告耶穌安息日醫病人，伊因為人的心硬受氣(可3:5) 4 猶太人給聖殿做市場、作賊岫(siū)，耶穌為這來受氣(約2:14-16) 5得救呣是靠守吃物的規矩，保羅責備彼得無照真理行(加2:11-14)         講話著慢，受氣也著慢 (雅 1:19)。受氣呣通犯罪(弗4:26)，表示有相爭的時，著小心，呣通受氣，免得陷入魔鬼的計謀。 1有時受氣就是替別人擔過失，甚至火燒到親人、閣四周圍的人。 2 魔鬼引誘咱做歹，當咱頭腦清楚的時，咱知上帝無歡喜，袂去做 3 人受氣的時，親像酒醉，互鬼附著，失去理性，無站節(chat)。 4 魔鬼刺激咱受氣，互咱袂記得上帝的話，失去疼心，陷佇罪惡中 5 上帝知咱的軟弱，命令咱受氣呣通到日落，無帶受氣去睏。 6 受氣的時，著求聖神幫贊，拍花(hoa)彼腹火 (提前2:8)。

      約翰13章講主耶穌佇最後晚餐以後的教示。 1 我用新的誡命互恁，就是恁著相疼；我疼恁，恁亦著相疼(13:34) 2 恁若相疼，眾人欲對按呢知，恁是我的學生(13:35)。     主耶穌互咱新的誡命就是相疼 。和合本聖經講，這是「新命令」 1 主用「命令」的方式、愛咱守「相疼」的誡命。 2 相疼是命令，是強制、無例外；相疼是責任，逐人攏著擔的。 3 上帝是疼的源頭(I約4:8)。咱若和上帝分開，欲失去疼的動力。 4 和上帝分開，咱的疼是有限的、暫時的、狹的、自私的。 5 主耶穌知影人的需要、軟弱，命令咱著相疼，才會有平安、喜樂。 6 疼會互人改變。疼是寬容、慈悲...，疼互人和人的袂合消融。 7 教會欲產生力量，著愛合一，合一著愛藉著「相疼」。 8 教會發出「相疼」的芳味，欲互眾人對按呢來捌(bat)主(約12:45)。     主互咱大使命 ：去招萬百姓來做學生，給𪜶行洗禮，歸佇父、子、聖神的名(太28:19)。我所有命令恁的，著教示𪜶守(太28:20)。 1 大使命呣是干單(kan-nā)𤆬人去教會，給𪜶行洗禮，互 𪜶 做信徒。 2 大使命呣是干單鼓勵咱用各種的方法，搝(khiú)人去教會若定。 3 重要的是，照主所命令的，教示𪜶、守「相疼」的教示。     相疼是「舊閣永新」的誡命 ，是「舊閣永新」的命令。 1 摩西律法講「呣通…」，嚴嚴禁止以色列人，做犯罪的代誌。 2 律法呣是疼心的動力來源，伊是一面鏡，互人知有罪 (羅3:20) 3 主謙卑給學生洗腳，閣為全人類的罪來死，顯出上帝的疼。 4 人疼伊想欲疼的，總是當咱感受上帝先疼咱，咱會改變(I約4:19) 5 新的誡命愛咱著積極、主動去疼人，呣是等別人來表示(路6:31) 6 有疼心的人，欲入永遠活，若無，欲入永遠的刑罰(太25:31-46)。     疼主的人著注目看耶穌 ，信靠伊的話、順趁伊的命令(約14:21)。主有安慰，萬事相及來，無論咱成功抑是失敗，攏是欲互咱疼上帝的人，得著利益(羅8:28)。

      上帝通過立約，實現伊的恩典和公義 。上先的兩個約是 1埃甸樂園的約：人著生湠真多，治理上帝創造的世界(創1:26-28) 2 亞當的約：應允彌賽亞來拯救，刣贏蛇 (魔鬼)的權勢(創3:14-19)       上帝和亞伯拉罕立約，應允賞賜土地、國家和祝福(創12章)。 1 耶和華對亞伯蘭講：你著離開本地，去我所欲指示你的地(12:1) 2 我欲互你成做大國。你欲做大，你亦欲互人得著福氣(12:2)。 3祝福你的我賜福，咒詛你的我責罰。萬族欲因為你得福氣(12:3)     上帝佇挪亞以後和人立的約 。 1 挪亞的約：無閣用大水滅無活物、土地(創9:1-17)。 2 西乃山的約：律法的約，趁上帝的話，就欲受祝福(出19:5-8)。 3 迦南的約：無聽耶和華的話，拜別個上帝，欲滅無(申29-30章) 4 大衛的約：上帝應允大衛，伊的國欲堅固，到永遠(撒下7:4-17) 5 以色列人的新約：律法欲刻佇心，捌上帝，罪得赦免(來8:6-13) 6 聖餐的新約：耶穌用伊的血，互上帝赦免咱的罪(林前11:23-25)     上帝主動和人立約，來顯明伊的疼及公義，伊堅守所應允的 。 1上帝愛人守誡命，學伊的款式，管理伊的創造、作忠心的管家。 2人佇物質的世界，受著試驗，上帝的約約束咱、免得迷失。 3 亞當和夏娃無通過考驗，互人類陷入罪裡面。 4 挪亞的時，人所想的攏是歹，上帝用大水滅𪜶，只有留挪亞一家 5人類起巴別塔，抵擋上帝(創11:4)。亞伯蘭信上帝，得著揀選。 6 佇西乃山，上帝開條件，摩西做中人，百姓同意遵守，才成約。 7 咧(teh)欲入迦南地，上帝提醒𪜶，呣通歪斜，才會得祝福。 8 以色列人無法度守約，上帝應允賞賜新的心、新的神，性命的法 9 耶穌為人贖罪，做中保，互人和上帝閣和，守伊誡命，欲受祝福        咱接受洗禮決心綴主，這是起點，呣是終點 。親像以色列人出埃及、過紅海，到西乃山及上帝立約，續接著褪去舊的行做，穿新的人，日日換新得著知識，照創造咱的主(西3:9,10)。

        雅1:18-25講，著聽道理、行道理。 1上帝用真理的道生咱，著聽、著追求，才會得著新性命(1:18,19) 2 聽道理著愛準備，清氣心，除去攏總腌臢及惡毒(1:21)。 3 著積極，用謙卑、溫柔的態度，來接納種佇內面的道理 (1:21)。 4 著老實來思考，將所聽著的道理實在去行，呣通騙家己(1:22)。 5 照鏡的目的，是欲看家己的穿插，是呣是有抵(tú)好(1:23-25)。 6 干單聽道理，無去行，就親像鏡照了，甚麼攏無做 (1:23-25)。      著聽心內面的聲，著聽上帝的話，著聽真道 。 1到上帝的厝，著近前來聽，贏過戇人獻祭，𪜶無離開歹(傳5:1)。 2咱著近前來聽，因為信是出佇聽，就是聽基督的言語 (羅10:17) 3 人無聽內心的聲，所想的念頭逐日攏是歹，互上帝憂悶(創6:5,6) 4 馬利亞坐佇主的腳下聽講道。主講伊揀著好的福分(路10:39,42) 5 真正聽道理的人：有準備心，有想、有明白，謙卑願意接受真道 6 綴主的教示，主講：有耳孔通聽的，著謹慎來聽！ (可4:23,24) 7 聽道，才會捌真理，真理欲互咱自由(約8:32)，無做罪的奴才。 8 聽道，欲得著智慧、聰明(箴4:5)，心神得著保守，得著活命。        雅各講，道理著聽，亦著照聽著的去行 。 1 聽道理親像照鏡，會知影家己的缺點，知影了，也著愛有行動。 2聽主的話來行的，欲比並智識的人，起伊的厝佇石磐頂(太7:24) 3 疼主的人，聽主的命令閣守伊；主欲疼伊，向伊顯明(約14:21) 4 撒該有聽入主的話，分所有的一半給喪鄉人，騙來的，還四倍。 5聽閣行的人的特點：疼惜人的性命，殷勤學習道理、來幫贊人。 6 聽閣行的人的態度：會誠實來思考、檢查所聽的，踏實去做。 7 聽閣實在去行的人，欲因為伊的所做，得著福氣(雅1:25)。       行真道並無困難 。咱知上帝所愛的是 - 行公義，心存憐憫，謙卑及伊相及行(彌6:8)。主耶穌也講：我心內溫柔謙遜，恁背我的擔(tàⁿ)，來對我學；就恁的心神會得著安歇(太11:29)。

      我欲用新的心賞賜恁，也欲用新的神下佇恁的內面，閣欲對恁的肉體中除去親像石的心，賞賜恁親像肉的心。我欲將我的神下佇恁的內面，互恁順趁我的律例，守我的法度來行伊(結36:26-27)。     懇求上帝佇新的一年換新咱的心 。猶太國悖逆上帝，國家滅亡。上帝啟示以西結，𪜶欲得著救，只有願意接受上帝所賞賜新的心。 1 舊的人的心是親像石的心，互私慾所引誘，致到敗壞(弗4:22)。 2 親像石頭的心是碇的、固執的、殘忍的、冷閣死的心。 3 上帝賞賜新的心、親像肉的心，是軟的、有感覺的。 4 肉的心是疼的心，互咱對人體貼、溫柔，閣有感情。 5 上帝的神(聖神)佇咱裡面，感動、改變咱的心，互咱的心換新。 6 新的心是少年人的心，清氣的、活潑的、充滿向望的。     懇求上帝佇新的一年換新咱的神 (華語的靈)。 1 上帝造人，歕(pûn)活的氣入伊的鼻孔，活氣是人的神(創2:7)。 2 咱用神、也用心思(understanding)來祈禱、吟詩(林前14:15)。 3 上帝賞賜咱無驚惶的神，是權能、仁愛、守己的心(提後1:7)。 4 心思黑暗，心剛硬，隔斷上帝所賜的活命(活命=神)(弗4:18)。 5 咱用神來敬拜、朝覲上帝，深知、體會上帝的旨意(約4:24)。 6 上帝的神(聖神)佇咱內面，和咱的神聯合做一個(林前6:17)。 7 聖神佇咱內面，贊咱順趁上帝的律例、法度，閣去行(結36:27)。     咱的神是咱的良心、直覺 ，通過聖神的感動和祈禱，咱的神會直接迵(thàng)到上帝。 1 神是咱的良心，互咱分別是非，無受心思、智識來影響。 2 神是咱直覺、直接的領受，呣是心思、感情、意志相幫贊產生的。 3 只有通過咱的神，藉著祈禱，才會當和上帝直接來交陪。     通過聖神的幫贊，咱的心、咱的神欲活起來 。聖神感動咱的心，開擴咱的疼心，續互咱裡面的神活起來，會曉細膩聽良心的聲，感受頂面來的教導，敬拜獨一真的上帝。

        源起頭，上帝創造天及地 (創1:1)，「源起頭」表明上帝是「時間」的創造者。天裡的穹蒼著有發光的體，來分別日暝，亦通做兆頭，四季、日、年(創1:14)，表明上帝設定時間，閣年月日的輪番。     著疼惜時間，因為時間屬佇上帝，伊將時間交互咱來管理 。 1 著保惜機會，因為當今的時勢邪惡(弗5:16)。機會、光陰著保握，過有意義的人生，呣通受引誘。 2 你欲睏到底時？閣睏霎(tia̍p)仔久...你的喪鄉欲親像賊來(箴6: 9-11)。貧憚、呣儆醒，等你發覺的時，你已經失去所有的。 3 日時著做工；暝時，就無人會做工(約9:4)。把握做工的時機。 4 你著佇少年的日，記念創造你的主，就是患難的日猶未到(傳 12:1)。趁勇壯的時，著信靠創造的主，安排人生，莫等到老。 5 求你教示阮怎樣算家己的日子，互阮得著智慧的心(詩90:12)。求主幫助咱，賞賜智慧的心，知影怎樣安排、過地上的日子。     著𠢕(gâu)用時間，做好的工，因為上帝無愛咱荏(lám)爛 。 1 因為咱是伊所做成的...來行好事(弗2:10)。因為咱信基督，上帝將伊的生命，賞賜咱，互咱有新的心志，愛行伊的旨意。 2 通收成的是多，做工的是少(路10:2)。咱受召，是欲和主鬥做工。 3 上帝將時間、才調、金錢託咱來管理；到彼日，咱著向上帝交代；若無好好運用，欲受趕出，到時就袂赴啦(太25:14-30)。     著給上帝的心意囥佇心內 。總是，呣是逐人著去做傳道師。 1 對心內面遵守上帝的旨意，就是事奉(弗6:6-7)。 2 出佇信心來做，就會互上帝歡喜(來11：6)。 3 願意照上帝的旨意來行，無論佇教會內、教會外，佇職場、厝內，攏是事奉；無論是做啥物，也攏著出佇對伊的信心來做。    " 恁著專心歸向耶和華，佇這時，恁著決心 "，這是約書亞對進入迦南地的以色列人講的，(書24:1-27)。佇這年初，現準時，咱也著按呢來立志。  

      亞蘭和北國以色列聯軍拍猶太，以賽亞講讖語 (賽7:14-16)。 1 主欲互恁兆頭，有在室女欲懷孕生囝，號名叫以馬內 (lōe)利(7:14)。 2 到伊會曉得放拺(sak)歹揀好的時，伊才欲食奶油及蜜(7:15)。 3 佇這代先，你所驚的彼二個王的地欲抵著放拺(7:16)。     上帝藉以賽亞傳安慰及審判的信息，閣以馬內利欲來到 。 1 上帝藉以賽亞第一個囝的名(偆[chhun]的百姓欲倒來)，傳安慰的消息：𪜶雖然悖逆、受上帝刑罰、著受掠離開故鄉，猶原會閣倒來(7:3) 2 上帝互猶太王兆頭，在室女欲生囝，來確定欲成的事，亦傳上帝其實猶原及(kap)𪜶佇啲(tī-teh)(以馬內利)(7:14)，若準𪜶悔改。 3 以賽亞講的時，可能伊猶袂和女先知結婚。以賽亞和女先知的囝，應驗在室女生囝，囡仔的名(刣掠緊到) (7:15, 16；8:3)。 4 囡仔會曉判斷好歹，約略12歲。讖語講，12冬後，戰爭互猶太的城及種作的田攏受毀壞，百姓靠大自然生產的奶油及蜜來活(7:14)。佇猶太國受毀滅以前，來攻擊的聯軍欲受剪除，時間佇囡仔會曉叫爸母以前，約略2歲(7:16; 8:4)。     "以馬內利"的讖語，佇新約第二擺應驗 。馬太福音記載，天使佇約瑟的眠夢中給伊講：著娶你的某馬利亞過門，因為伊所懷的是對聖神。你著叫伊的名做耶穌，這個事是欲應驗主託先知所講的，在室女欲娠孕(sin-īn)生囝；人欲叫伊的名做以馬內利。(太1:18-23)     耶穌的角色有以馬內利 、奇妙的謀士、和平的人君...。 1 以馬內利(上帝及咱佇啲)有兩層意思：上帝成做人、及咱同蹛。 2 耶穌互咱知上帝怎樣踮咱中間，伊的思考、感受、判斷和疼。伊若無向咱啟示，咱袂會捌伊。看著耶穌，就是看著天父。 3 摩西極其謙虛溫柔，贏過世上的眾人(民12:3)，伊會當𤆬(chhoā)以色列人佇曠野40冬，因為上帝親身及伊去，伊心安(出33:14)。今仔日，上帝的神佇咱內面，暝日照顧，減采抵著困難擔重擔，伊會遮閘(jia-cha̍h)保護，咱著隨時提醒家己：以馬內利、上帝及咱佇啲。

       11/25教會慶祝基督出世 ，全世界亦佇仝(kâng)一日慶祝世俗化的聖誕節。1990年，Solon, Ohio學校董事會禁止佇學校財產頂面有耶穌出世及聖誕節的景緻，𪜶認為宗教袂使進入學校。最後法院裁決聖誕節和馬槽景緻超越宗教、是世界性的文化，馬槽裝飾若用來表示節日的來源，無宣傳教會，就無違背政教分離的原則。     聖誕節是世俗人慶祝的假期 ，1870年美國定做國定假日。 1 西元313年羅馬帝國宣布基督教合法，380年做國教，440年將12/25慶祝日頭神生日的農神節(Saturnalia)換做慶祝耶穌生日。 2 宗教改革以後，長老會、浸信會等反對聖經無講的慶祝活動。 3 猶太人佇𨃟 (pôaⁿ ) 過節前後(3月到4月)放羊去野外吃草，雨季開始的時(10月到11月)給羊趕倒去。冬季冷、下雨，袂放羊出去。耶穌出世的時，顧羊的暝時守更顧羊群(路2:8)，所以袂佇12月。 4 聖經只有提到兩個王慶祝生日：約瑟時的法老，和刣約翰的希律。聖經無講耶穌佇佗一日出世，伊只有講著紀念伊的死。      聖誕老公仔 (Santa Claus, St. Nicholas)是紀念天主教的主教。 1 St. Nicholas是第三世紀的希臘主教。熱心慈善，送物互需要的人。歐洲國家訂12月初6 St. Nicholas節，送禮物互囡仔。 2 十六世紀宗教改革，天主教傳統受棄捨，送禮物互兒童的日徙去聖誕節。總是，荷蘭移民帶St. Nicholas的傳統去美國。 3 1823年美國詩人Clement Moor寫" St. Nicholas來拜訪"，描寫大箍(kho͘ )，白喙(chhùi)鬚，快樂、有笑神的Nicholas，穿皮衫，佇平安暝坐8隻鹿搝( giú )的雪車，佇天頂飛，人對煙筒入來，送囡仔耍的禮物。 4 1863年當美國內戰，Thomas Nast為著安慰戰場的軍人和家屬，根據Moore的詩，連續24冬佇《Harper週刊》畫聖誕老公仔。 5 1931年Haddon Sundblum修改做今仔日聖誕老公仔的款，紅色的衫和紅色的軟的帽子，白色的毛邊、黑色的腰帶和鞋仔。 6 呣通為私慾守節日、傳統，尤其聖經無講的。(加4:10,11)

      彌賽亞是上帝所應允 ， 降世來拯救世間人的 。 1 上帝創造的人受引誘，無照上帝的吩咐行，受趕出埃甸樂園。 2 上帝應允拯救，揀以色列做選民，彌賽亞欲對大闢的後裔出。 3 上帝賞賜聖囝耶穌做彌賽亞，替人死、贖罪，互人稱義。     耶穌就是彌賽亞 ，有關彌賽亞上清楚、上重要的讖語有： 1 有關耶穌的出世 (1)猶太人和亞哈斯王呣承認列祖的上帝，耶和華欲互𪜶一個兆頭：上帝欲和𪜶同徛起，對在室女懷孕生出來(賽7:14) (2)彌賽亞是古早就佇啲的上帝，欲佇伯利恆出世(彌5: 2) (3)彌賽亞是和平的君王，有大權能，永遠佇啲的天父(賽9:6) 2 有關耶穌的事工及死 (1)彌賽亞欲降臨，伊溫柔騎驢仔，伊是公義欲拯救以色列脫離撒但的權勢(亞9:9) (2)惡人鑿(chha̍k)彌賽亞的手、腳，拈鬮(liam-khau)分伊的衫(詩22:16-18)。 3 有關耶穌替人贖罪。彌賽亞雖然受迫害，伊猶原替罪犯祈禱，擔當濟濟人的罪，用伊的性命做贖罪的祭，互人得著稱做義。伊無行強暴，總是受取去，伊的死及歹人、富人同墓。(賽53)     路加福音講耶穌是關心弱勢的彌賽亞 ，伊欲敨放受掠、受壓制的，醫治青瞑的，福音到佇喪鄉人，禧年已經到啦(路4:18,19) 1 佇禧年，賣地、賣家己的人，通收回、倒去伊的地(產業)、伊的厝。亞當犯罪以後，全人類攏已經失去上帝做𪜶的產業，閣賣自己做罪的奴僕。彌賽亞來是欲宣報咱會得著敨放、得自由。 2 主耶穌帶念散赤的人，𪜶互人看輕。伊寶貴守寡的喪鄉人淡薄的奉獻；福音亦欲互心內喪鄉、謙卑揣上帝的人(太5:3)。 3 耶穌醫治目睭青瞑的, 亦醫治心神青瞑的。承認家己欠缺屬靈的眼光，閣來求主的，欲得著看見，自高的反看袂清楚(約9:39) 4 色情、網絡、冤仇會掠牢、壓制咱(約8:34)，主來揣失落的來救伊(路19:10)，主的真理欲互咱自由(約8:32)，脫離罪的束縛。 5 耶穌互行洗禮約翰知伊就是彌賽亞：伊互青瞑的看見...(路7:22)  

        囝兒是上帝的產業 ，上帝的賞賜，上帝託咱的。 1 厝宅若呣是耶和華起造，起造伊的人就空空著磨；城池若呣是耶和華顧守，就顧守的人空空警醒(詩127:1)。 2 囝兒是耶和華賞賜的產業；懷孕的胎是伊互伊的報賞(詩127:3)。 3 少年的時所生的囝，親像勇士手中的箭。伊的箭袋充滿的人有福氣；𪜶佇城門口及對敵講話，的確不致見誚。 (詩127:4,5)。     著負起養育囝兒的責任 ，榮光上帝，成做爸母的祝福。 1 囝兒是上帝所託的產業，產業是傳落來的，既然上帝託互咱，著用心顧守，呣通給責任捒(sak)互別人，著付出時間、精神閣管教，保握𪜶的心事、興趣、功課、社交、信仰…等。 2 囝兒是上帝的禮物，爸母著負起養育的責任，互𪜶成做有價值的產業。成做利箭、有出脫的囡仔，可能是掔(kiān)乖、歹教。 3 爸母上了解囝兒，藉著爸母的陪伴，幫贊𪜶開拓人生，來完成上帝對𪜶一生的計畫，來榮光上帝(詩139)。咱做人爸母，照上帝的心意來𤆬𪜶，就欲成做真正的賞賜及祝福。 4 咱的生活、個性、習慣、價值觀…，性命的一切，逐日攏真實排列佇囝兒的面前，著活出基督的樣式，來引𤆬𪜶。咱因為囝兒，咱的個性亦著改變，這亦是上帝的恩賜！     互主做家庭的主 ，來建立家庭，才袂空空著磨。 1 照主的話來教示囝兒，亦著行出來，互囝兒綴咧做。無論是爸母對待囝兒，抑是爸母互相對待，著顯出上帝的憐憫和疼痛。 2 爸母除了佇囝兒需要的時，提供幫贊，艱難的時鼓勵，平常時亦著用心建立親密的關係 (1)及囝兒做伙耍、跳舞、畫圖、聽音樂、做勞作、讀冊互囝兒聽 (2)陪伴𪜶，和𪜶談人生、信仰、朋友、功課等 (3)囝兒有歹習慣，著好喙(chhuì)來講，表示爸母是疼閣關心。爸母的鼓勵、支持、肯定，會增加互相的信任。 3 教養囡仔，著用合宜的法，就伊到老也無歪斜(chho̍ah)(箴22:6)。

       若準人疼咱但是無了解咱，這雖然是表面的疼，嘛是一種安慰；了解咱，總是無疼咱，咱感覺受傷害；完全了解咱閣真正疼咱，這就親像上帝疼咱；互上帝知閣互上帝疼，是咱上大的福氣     大闢的一生有受濟濟苦閣犯罪 ，伊敢是互上帝棄捨？ 1 伊佇厝內是ㄧ個無受重視的尾囝，細漢就互人安排去顧羊。 2 伊盡忠國家和君王，勇敢拼命，立戰功、互人謳咾，結果互頂司怨妒，受逼害、追殺，四界逃閃，甚至著假癲狂。 3 伊管理國家，無閒管顧囝兒，致到囝爭權、背叛，傷伊的心。 4 伊雖然是敬虔的人，亦犯著淫亂、殺人、驕傲的罪。     大闢有勇氣面對逼害及家己的失敗 ，閣徛起來，因為伊知，上帝捌伊閣疼伊。大闢佇詩歌中，充分回應上帝對伊的疼。 1 大闢敬畏上帝的大權能。伊早時佇曠野顧羊，逐日所看的，日時是天，暝時月和星，伊對上帝的創造，有大大的感動(詩8:3)。 2 大闢深知上帝的心。伊講：上帝看咱是寶貝，媠閣善良(詩16:3)。 3 伊倚靠上帝(詩16:1)，無論逃去外邦，覕(bih)山洞，來逃閃追殺。 4 伊尊上帝做主，相信上帝，閣交託一切(詩16:2)。 5 困苦、犯罪的時屈低、祈禱上帝。掃羅差人埋伏佇伊的厝欲刣伊，伊祈禱對敵受報應(詩59)，假癲狂來脫離迦特王亞吉的時感謝(詩34)，犯淫亂、殺人的罪的時，伊的心憂傷痛悔、懇求上帝赦罪(詩51)，逃閃他的囝押沙龍的時懇求上帝拯救(詩3)。     上帝講，大闢是合伊心意的人 (撒上13:14)。 1 大闢講，上帝知影伊的每一個念頭(詩139:1-4)。 2 大闢用上帝的眼光看自己、看苦難、看環境、看敵人。 3 大闢感謝上帝講，無論伊叨去，上帝攏及伊佇啲。伊懇求上帝鑑察伊、試驗伊，𤆬伊行永活的路。(詩 139:23-24)。 4 咱的行做亦著求上帝鑒察，互上帝知咱、疼咱，閣懇求上帝賞賜智慧、勇氣和能力，受塑造成做卡合上帝心意的人。