Taigi 讀聖經

           希2:5-12講上帝施恩佇人，閣為𪜶的墮落安排拯救。 1啲欲來的世界，上帝互人管、無互伊降服佇天使(2:5)。 2 詩篇講：你數念人，看顧人的囝。你互人略(lio̍h)仔卡輸天使，賜伊榮光尊貴，佇受造的的頂面，閣互萬物降服伊(2:6-8)。 3對上帝的恩，耶穌為著眾人受死贖罪，今得著榮光是合宜(2:9,10) 4互人成聖的耶穌，及得著成聖的信徒，攏對仝一個上帝出(2:11) 5 耶穌講：我欲報揚上帝的名佇我的兄弟，謳咾伊佇會中(2:12)      上帝的拯救計畫，通過耶穌的受難，為人贖罪，得著完全。 1 NIV聖經講，耶穌的贖罪是前無人做過的(pioneer)(2:10)。 2 只有主耶穌才會堪得，伊是無瑕疵，上帝的囝，上帝接受的。 3 亞當犯罪，受上帝刑罰以後，上帝就開始伊的拯救計畫。 4 以色列人受揀，𪜶的歷史顯出人的罪性，需要上帝的救贖。 5 上帝藉著以色列的先知，宣布彌賽亞的降世，拯救欲到全人類。      主耶穌佇地面上所做、所教示的，濟濟是𤆬頭的(pioneering)。 1 著相疼，這是命令(約15:12)，無按呢行，欲受刑罰(太25:40-46) 2 尊重人：伊無責備無清氣、患血漏的查某人、摸伊的衫。 3 謙卑：學生爭做大，伊洗𪜶的腳，講：恁著照我的模樣來行 。       甚物是上帝的國(天國)？怎樣才會入去？只有主給咱講清楚！ 1 天國：是上帝掌權、閣人順服的所在，是未來、閣是佇現此時。 2 人著對水、聖神來洗，才會入上帝的國(約3:5)。因為咱對洗禮、悔改，罪得赦免(徒2:38)，閣聖靈給咱勘印(弗1:13) 3 淫亂的、貪心的…不義的人袂會承接上帝的國 (林前6:9,10) 4 主講：我若靠上帝的神趕鬼，就上帝的國已經到恁 (太12:28) ， 將魔鬼對世界趕走，互世界歸屬上帝，這就是上帝的國降臨。 5 當咱願意順服、互上帝掌管，上帝的國就佇咱的心內(路17:21)         主耶穌做先知，敨(tháu)放天國的奧(ò)秘；宣布上帝拯救世間人的計畫；宣布有疼心的人，才會做天國的國民。 

         可10:35-45講著雅各及約翰的要求，愛佇主榮耀的國度坐高位。 1 雅各及約翰對耶穌講：見若阮所對你求的，愛你給阮行伊(10:35) 2 伊就給𪜶講：愛我給恁行甚麼啊？(10:36) 3 𪜶應講：准阮佇你的榮光，一個坐你的正旁，一個坐倒旁(10:37)。 4 耶穌講：恁所求的恁呣知。我飲的杯，我受的洗，恁會堪得嗎？ 5 講：會。伊講：我飲的杯，恁欲飲；我受的洗，恁欲受；坐我的兩旁，呣是我會通互人，是為甚麼人備辦的，就互伊(10:39,40)。 6 十個學生聽見，就受氣雅各及約翰(10:41)。 7 耶穌講：外邦做人君的，做主來治理，𪜶的大人管轄𪜶。恁中間愛做大的，欲做恁的差用；做頭的，欲做眾人的奴僕(10:42-44)。 8 人子到，呣是欲差用人，是欲互人差用，閣獻生命來贖回濟濟人。        耶穌欲上耶路撒冷，濟濟人認為民眾會迎伊做王。 1 雅各及約翰bat佇山頂看著榮耀的耶穌，認為耶穌啲欲做王。 2 𪜶對耶穌做王的想法，𨃟過伊會受苦、受刣的讖語。 3 𪜶認為耶穌會建立彌賽亞國，在榮耀中作王，𪜶也欲有份。 4杯是上帝受氣的杯(耶25:15)，洗是用水淹，攏是受苦。 5 12個學生欲審判12支派(太19:28)，總是逐人的賞賜在佇上帝。 6 十個學生受氣雅各及約翰，表示這個團體已經佇相爭，搶權勢。 7 耶穌對學生強調領袖是做奴僕、互人差用，呣是用權勢來領導。       主講，做大的著做奴僕，洗學生的腳，呣若教示若定。做領袖著 1 關心：關心逐人所面對的問題，做好的聽眾，互人感覺溫暖。 2 幫贊：引𤆬、幫贊人解決問題，分享所經歷的，互相成長。 3 接納：尊重、接受逐人無像的所在，無勉強。 4 了解環境：斟酌環境特殊性、限制，做適當的回應。 5 管理：設定目標，照逐人的特長，確定代誌的輕重，適當的安排。        聖經講，坐大位的人是欲事奉人，總是第一優先是先體貼及成上帝的旨意，然後才滿足人的需要。

          腓3:8-16講保羅無掠家己做已經得著，反盡力來追求。 1我看萬事做損害，因為我掠bat主基督耶穌做第一好。我為著伊bat損失一切，也看做糞埽(pùn-sò)，是愛得著基督 (3:8) 。 2 踮佇伊，呣是因為家己守律法的義，反是信基督的義，因為信、上帝賞賜的(3:9)，互我bat伊，及伊閣活的權能，以及有份佇伊的受苦，來學伊的死，看會得著、對死人中的閣活(3:10, 11) 。 3 呣是講我已經得著，抑是已經完全；獨獨走進前，看會通達到基督耶穌愛我做的(3:12)。我無掠家己做已經得著，獨獨專務一項，就是袂記得後面的事，致意頭前的事，向所插的標(pio)來走，到得著上帝通過基督耶穌召咱來得的賞(3:13, 14)。 4 咱見若做完全的，著存這個心志；若佇啥(siáⁿ)事存別樣的心志，上帝也欲用這個來指示。若是咱所已經到的，著照這個來行 (3:15, 16)          諾貝爾文學獎的海明威用自殺結束人生。伊認為伊所想欲做的伊攏做到啦！他有名聲、有錢；四界旅行，去非洲拍獅仔，去南太平洋釣魚，他感覺人生無新的目標，活落去，只有拖時間。         保羅對人生追求有完全無仝(kâng)的態度。 1 伊學習律法，世間的智識，總是認為基督的義，卡大過遮個。 2 伊看萬項事做損害，做糞埽，愛得著基督，全心綴基督。 3 為著見證基督的受苦、死、閣活，伊放空一切、懇求聖神啟示。 4 伊是行動者、實踐者、永遠的追求者，無掠家己做已經得著。 5 伊無停佇已經完成的，伊為家己設一個標，繼續向前跑走。 6 伊愛咱存這款的心志，致意頭前，日日才會(chiah-oē)若接近完全。 7 伊關心人，伊講”上帝會指示”，安慰行歪斜(chho̍ah)的。 8 伊鼓勵行佇追求的路的，無論緊、慢，免失志，著繼續。         咱著學習保羅，無去追想過去的事，只有致意頭前。伊有失敗(掠基督徒)、受傷害(提後1:15)、軟弱(林後12章)、成功，這攏袂阻擋伊繼續揣求上帝的心意，跟綴主耶穌做人生的目標。

          哥羅西3:12-17講教會的團體生活。 1 上帝所揀所疼聖潔的人，著”穿”憐憫 仁慈 謙卑 溫柔 吞愞(3:12)。 2 設使有挾(hia̍p)嫌，著相寬容，相赦免；親像主bat赦免咱(3:13)。 3 佇遮個的頂面，著”穿”仁愛，就是完全的結聯 (3:14) 。 4 互基督的和平佇咱心內做主；咱為這受召做一體，著感謝(3:15)。 5 著互基督的道理充滿咱的心，用逐樣的智慧、詩、歌、神的賦(hù)，相教示，相苦勸，心感受恩典來吟，謳咾上帝(3:16) 。 6 凡所做的，著佇主耶穌的名，閣通過伊來感謝父上帝(3:17) 。         佇教會內，著怎樣才會和人和諧 。 1 咱著用憐憫 仁慈 謙卑 溫柔 吞愞遮個好德行，給咱”包”起來。 2 做伙做代誌，若有無像的看法，就會有衝突、誤會，著相寬容。 3 別人無完全正確的話和聯想，無好的口氣，著寬容、相赦免。 4 無寬容罪，總是著互人有反悔的機會。 5 有疼心，才會互相包容，才會有出佇內心的好德行 (3:14) 。 6 逐項的行做，逐遍的決定，著祈禱來交託，心內平安(和平)才做。 7 基督徒著互相來起造，用上帝的話，相教導、相勸勉。 8 咱的行做，著看敢有合主的教示、無傷主的名，閣著榮光上帝。 9 著存疼心，所做無失去平安(和平)，閣常常感謝父上帝。         新年著換新，著給聖經的教示，應用到逐日的生活 。 1 對無合意的人，也著誠心交陪，無看無伊一切的行做 (太5:46)。 2 著仁慈、溫柔、同情、吞愞，棄捒對家己和別人無實在的期待。 3 無自高，無因為家己有造就、有特長，看輕欠缺的人(太23:12)。 4 著謙卑屈低，求天父賞賜恩典，咱也著按呢互人恩惠。 5 著腿去舊的衫，給家己用仁愛和寬容的新衫”包”起來。 6 囥基督的和平佇咱心，閣順趁聖神的引𤆬，咱就欲得著平安。         上帝所賞賜的新衫有三項媠 ：有”疼心”，顯出溫柔；有”平安”，做選擇的準繩(chîn)；有”感謝”，心安然。

  羅馬兵燒耶路撒冷城了留落來的。          上帝應允賞賜迦南地互亞伯拉罕和伊的囝孫。 1直到摩西才𤆬(chhōa)以色列人出埃及，約書亞𤆬𪜶(in)進入迦南地。 2 大闢王設立耶路撒冷做首都，所羅門佇遐(hia)起聖殿來敬拜上帝。 3 以後拆做南北兩國。大闢的後裔佇南國猶太做王，管轄耶路撒冷 4 北國以色列對頭到尾，全國拜金牛，閣拜迦南假神。南國也有濟濟王，𤆬百姓拜石頭、拜星辰、看兆頭，比迦南人閣卡歹(pháiⁿ)。 5 𪜶無聽上帝的先知的警告。上帝互亞述滅北國，巴比倫滅南國。 6 巴比倫人三遍圍耶路撒冷城，掠走貴族、有才調的人，搶聖殿的金銀寶物。最後一遍，燒聖殿、王宮和城內一切的厝，拆四圍的城牆，掠猶太王、城內所偆的百姓去巴比倫(王下25:8-12)。         上帝應允猶太人，雖然受巴比倫滅無，70冬後𪜶會當倒去。 1 所羅巴伯𤆬𪜶倒去重起聖殿，尼希米修城牆。總是𪜶無國家。 2 佇耶穌以前，𪜶只有佇希臘統治期間，有百年家己建立國家。         耶路撒冷閣拋荒，親像主耶穌所讖語(chhàm-gú)(路21:20)。 1 羅馬時代，大希律王重修理聖殿，規模和媠(súi)超過所羅門聖殿。 2 66 AD猶太人發動反羅馬戰爭，70AD 羅馬兵攻入耶路撒冷，燒聖殿、刣(thâi)猶太人百萬，歸個城受黜平(thuh-pîⁿ)，18個世紀攏拋荒(pha-hng)。         上帝對以色列人的警告、刑罰。 1 上帝通過摩西講，𪜶若呣趁伊的話， 𪜶欲四散到逐國(申28:36)。 2 主耶穌是彌賽亞，約翰福音記載伊提出的證據：行洗禮約翰的見證(5:33)，伊的行做(5:36)，天頂來的聲(5:37)，聖經的讖語(5:39)。 3 猶太人拒絕遮個見證。致到上帝互𪜶目睭青瞑、心硬(約12:40)。         根據聯合國決議，猶太人佇1948建立以色列國。 1 𪜶受四圍阿拉伯國家攻擊，1948、1967兩遍戰爭反轉收回聖城。 2 猶太人建國，是出佇錫安主義運動，到今𪜶只有接受摩西律法。         耶路撒冷拋荒，是因為猶太人硬心，一遍閣一遍拒絕先知的警告。待降節期第三個主日紀念這個事件，也是對咱的警告。

           馬太24章講耶穌出聖殿，佇橄欖山談論伊閣來以前的兆頭。 1 學生問：底時有遮個代誌？你閣來，及世界的結局有啥兆頭(3) 2 應講：欲有濟濟人用我的名，講：我是基督，來迷惑濟濟人(5) 3 恁欲聽見交戰及交戰的風聲，總是末期猶袂到(6) 。 4 百姓攻擊百姓，國攻擊國，有飢荒、地動。這是苦痛的起頭(7,8) 5人欲陷恁佇患難，刣恁；為我的名怨恨恁。人欲相怨恨(9,10) 。 6 有假先知迷惑人，不法加添，人的疼冷淡，著吞愞到路尾(11-13) 7天國的福音傳到通天下，干證佇萬邦，末期就到(14) 。 8 欲有大患難，獨獨為著揀的百姓，遐個日欲減少(21,22) 9 欲有假基督，假先知，行神跡及兆頭，連揀的百姓也受迷惑(24) 10 遮個患難了後，日欲黑暗，月無光，星磕(kha̍p)落，天象振動(29)。 11 人子的兆頭欲出現佇天，地的族類欲啼哭。伊欲坐雲臨到(30) 12 伊欲差天使，用號頭，對四方，聚集伊所揀的百姓(31) 。 13 彼日，彼時，人呣知，天使呣知，囝呣知，獨獨父知(36) 。 14人子閣來的時，二人佇園，一個取去，一個留啲(37-41) 。         著要有遮個重大事件發生，基督才會閣來。 1  天國的福音傳到通天下，做干證佇萬邦，末期就欲到(太24:14) 對逐所在，濟濟人及亞伯拉罕佇天國坐桌(太8:11) 外邦人著得救 2等外邦人數額滿，通以色列欲得救(羅11:25-30) 以色列人著信主 上帝無棄拺伊的百姓，總是獨獨受揀的有得著恩典(羅11:1,7) 。 3第五印拍開，祭壇下有聖徒的靈魂(啟6:9-11)。著經過大災難。 4有對敵基督的，對教會出去，獨獨呣是屬教會(約壹2:18-22) 。 主臨到以前，欲有背教的事，出現罪惡的人、沈淪的人。伊是做對敵，自高，掠家己超越一切的上帝及受敬拜的(帖後2:1-4) 。 5有假基督、假先知，行神跡及兆頭，受揀的也受迷惑(太24:24)         當咱唱”Ha-le-lu-iah, 主降生”來迎接聖誕，也著警醒，準備主閣來。咱著愛有信心，囥向望，忍耐到路尾，就欲得救。  

  道成肉體(incarnation)                 待降節期(advent)，對聖誕節前的第四個禮拜日開始，也是教會曆一年節期的開始。四個主日紀念：主的道成肉體、主的死、耶路撒冷的毀壞，以及基督的再臨。今仔日是待降節期第一個禮拜日。         約1:14講(1)道成肉體，(2)徛起佇咱中間，(3)有恩典及真理滿滿。(4)阮bat看見伊的榮光，親像獨生的囝對父所得的榮光。         (1)耶穌基督就是道，道成肉體，就是上帝成做人。 1耶穌對起頭就佇啲(tī teh)，伊一直是上帝，形體上伊是一個人。 2 耶穌成做人，伊猶原是上帝；伊佇地上，猶原閣佇天頂(約3:13) 3 耶穌有人和神兩個本性。伊有人的性情，受肉體的限制，伊會枵 (iau)、會憂傷；總是伊猶原保持神性，有時顯出上帝的權柄，伊無呣知的、無做袂(bōe)到的、伊支配一切。         (2)伊踮(tiàm)世間，活活顯出上帝的慈愛，聖潔，公義，善良 1 耶穌基督搭一個布棚(pîⁿ) (原文的意思)，蹛(tòa)佇咱中間。 2 布棚(會幕)是上帝暫時徛(khiā)起、和人相見的所在(出33:7)。 3 耶穌基督蹛佇人的中間，體貼人的需要，帶互人恩典及真理。         (3)伊顯明上帝的心意：恩典及真理。伊本身就是恩典及真理。 1伊的言行、教示、神跡(jiah)、替人贖罪，顯明伊出佇真理的疼。 2 伊願意賜活水互撒瑪利亞婦仁人，總是無妥協伊犯罪的生活。 3對行姦淫、互人掠著的婦仁人講：我無定你的罪，以後莫得閣犯。       (4)伊是上帝獨生的囝，對父得著榮光，也佇地上顯出伊的榮光。 1 耶和華是聖潔榮光的上帝，無人看見伊的面也會活(出33:20)。 2 基督用人的身軀遮蓋家己，總是伊猶原是彼個聖閣榮光的。 3 耶穌基督醫病、趕鬼、命令大自然，彰顯伊的權能、榮光。 4 伊佇山頂改變形像，顯出伊的榮光，閣有聲講：這是我的囝。         感謝耶穌基督降臨世間，伊(1)顯明上帝的榮光  (2) 成亞當犯罪以後、上帝的救恩計畫 (3)做上帝及人中間的中保 (4)做大祭司為咱祈求憐憫 (5)做世間人在世生活的模樣。  

        祭司犯罪，著獻無瑕疵的牛牨(káng)仔(就是公的牛)。                   利未記第四章講人若犯罪，著獻贖罪祭，求聖潔的上帝赦免。 1 百姓中若有人錯誤犯罪，行耶和華所命令呣通行的，到家己知，著為所犯的罪，牽一隻無瑕疵的山羊母，做禮物(利4:27, 28)。 2 Hōaⁿ 伊的手佇贖罪精牲的頭殼頂，佇燒祭的所在刣(thâi)伊(4:29)。 3 祭司著提淡薄羊血，抹佇壇許(hiah)個角，所有的血著摒(piàⁿ)佇壇腳(4:30)         贖罪祭的儀式，有特別的意義，講怎樣回復和上帝的關係。 1 無小心犯罪，抑是呣知所做是犯罪，知以後，著獻贖罪祭。 2 犯罪的人hōaⁿ手佇羊仔，表示羊仔的性命，今就是人的性命，替犯罪的人死。贖罪祭就是講”替贖”。 3 壇是上帝臨到的所在，祭司給淡薄羊血(罪人的新性命)抹佇壇，表示人及上帝今得著親近。佇舊約，血代表人的性命(創9:4)。 4 贖罪的儀式，表示人的罪受替贖，成做新的人，日日和上帝生活做伙。呣是獻祭了，就無代誌，猶原做舊的人，過舊的生活。 5 抹佇壇的血是人的新性命，偆(chhun)的血摒佇壇腳是舊性命，著棄捒(sak)。         耶穌就是贖罪的羊羔，互咱成做新的人，通徛佇上帝面前。 1 憐憫慈悲的上帝，也是公義的， 無掠有罪的做無罪(出34:7) 。 2 犯罪著付出代價，主耶穌就是替贖、無瑕疵的羊羔(约1:29) 。 3 主做上帝和人中間的中保，除去咱的罪，和上帝閣和 (提前2:5)         聖經讖(chhàm)語拯救者欲來，為咱出世、死，互咱回復受造的款。 1 亞當墮落以後，上帝安排救恩的計畫，互咱通贏過魔鬼(創3:15) 2 但以理為同胞祈禱，異像中知”受抹油的”欲來，閣受剪除(但9) 3 君王、祭司、先知攏受抹油來設立，希伯來文”受抹油的”發音就是彌(bí)賽亞，”受抹油的”希臘文翻做christos，以後叫Christ, 基督。 4 以賽亞讖語拯救欲到，有王、上帝、和平的人君欲出世(賽9:1-7) 5 以賽亞53章讖語拯救者的一生，伊擔當咱的罪，為咱死。         待降節期第二個主日紀念主的死。伊的死，除去咱的罪，閣安排聖神保惠師暝日照顧，互咱通踮(tiàm)佇上帝的恩典，及上帝同行。