Taigi 讀聖經

      約翰福音3:1-15記載尼哥底某來和耶穌談道。 1 有一個法利賽人，名尼哥底某，是猶太人的官(3:1)。 2 暝時來就近耶穌，對伊講：拉比，阮知你做先生是對上帝來的；因為若呣是上帝及你佇啲，你就袂會行遮個神跡(3:2)。 3 應講：我實實給你講，人若無重頭生，就袂看見上帝的國(3:3)。 4 閣問：人已經老，汰會重頭生？豈閣入老母的腹肚來生嗎(3:4)。 5 應講：我實實講，若無對水對聖神來生，就袂入上帝的國(3:5)。 6 對肉體生的是肉體；對神生的是神(3:6)。恁的確著重頭生，你莫得掠做奇怪(3:7)。風出在意思來吹，你聽見伊的聲，呣知伊對叨落來，叨落去；見若對神生的，亦是按呢(3:8)。 7 問講：怎樣會按呢啊？(3:9) 8 耶穌應伊講：你做以色列的先生，也呣知這嗎？(3:10) 9 我實實給你講，阮講阮知的；干證所看見的；若是恁呣接納阮的干證(3:11)。地上的事，恁猶呣信，何況天頂的事(3:12)。 10 無人捌(bat)上天，只有佇天裡的人子，對天降落的若定。(3:13) 11 閣親像摩西舉起蛇佇曠野，人子亦的確著按呢受舉起(3:14)，互見若信的人踮佇伊有永活(3:15)。     耶穌重視人的性命，講，著重頭生，才會得永活(3:3,15)。 1 尼哥底某(簡稱N)知，耶穌的教示、行的神跡，和上帝有關(3:2)。 2 N袂理解，猶太人是上帝的選民，為什麼著重頭生才算(3:4)。 3 耶穌講，重頭生是通過水和聖神，清氣人的外口和裡面(3:5)。 4 聖神佇人裏面做工，互咱成做新人，就是對聖神生(3:5,6)。 5 對聖神生的人，聖神影響伊親像風影響人。聖神照伊的意思施落恩典，人看袂著伊、伊無受控制，總是咱知伊的影響(3:8)。 6 N是先生，總是聖神的作為，超過N所經歷過的(3:9,10)。 7 猶太人呣信重頭生，呣信耶穌就是對天降落的人子(3:3,13)。 8 耶穌講到銅蛇醫好以色列人，讖語伊會按呢來救人性命(3:15)。

                        約翰福音2:13-17講耶穌出來傳道的第一項代誌，清氣聖殿。 1 猶太人的過節近啦，耶穌上耶路撒冷。(約2:13) 2 佇殿裡抵著有賣牛、羊、鴿仔，亦有換錢的咧坐，(約2:14) 3 耶穌用索做鞭，趕𪜶及羊牛攏出殿，閣捙倒換錢的人的錢，反輾轉(péng-lìn-tńg )𪜶的桌，閣給賣chíⁿ仔的講：帶遮個物去！呣通互我的父的厝變做買賣的厝。(約2:15, 16) 4 學生記得聖經有講：我為著你的厝，心內親像火𤏸(to̍h)。(約2:17)     頂面的經文講，聖殿已經變做世俗的所在，上帝已經無佇遐。 1 約翰福音講耶穌水變做酒的第一項神跡了後，就寫耶穌清氣聖殿。 2 水變酒顯明耶穌的疼心和權能，清氣聖殿講伊宣揚公義和審判。 3 人佇聖殿祈禱、謳咾上帝，亦佇遐獻祭，懇求上帝赦罪。 4 聖殿的外邦人院是欲互外邦人佇遐敬拜真神，聖殿掌權的互伊變做生理場，生理人佇遐做換錢、買賣獻祭的精牲的生理。耶穌看見聖殿變做菜市仔，受氣，連鞭採取行動。 5 伊捙倒換錢的人的錢，𪜶的桌，給生裡人以及牛、羊趕出聖殿。 6 學生想起聖經的話：我為著你的厝，心內親像火𤏸(to̍h) (詩69:9)。 7 因為溫柔的耶穌為著上帝的榮光、公義，佇這時大受氣，挑戰社會風俗，以及掌權的(祭司、經學士、長老)，伊無妥協。 8 另外三本福音書的尾尾，亦記載耶穌清氣聖殿(第二遍？)。 9 祭司互猶太人方便，叫生理人佇聖殿提供獻祭需要的。𪜶和生理人鬥空，求利益。佇這三本冊，耶穌講𪜶互聖殿變賊岫(siū)。 10 𪜶受責備，閣眾人趁耶穌的教示，致到當權的愛欲滅伊(可11:18)     耶穌時代的聖殿掌權者，表面上照禮儀，總是𪜶無照公義行。 1 聖殿是萬民祈禱的所在，人和上帝佇遮相見，無容允不法的路用。 2 教會是上帝的殿，殿若受人毀壞，上帝欲毀壞伊(林前3:16,17)。 3 個人亦是聖神的殿，著保持清氣，榮光上帝(林前6:19,20)。 4 基督徒呣通只有外表，著愛有屬靈的內容，才袂受棄捨。

       路加福音24章有記載、去以馬忤(ngó͘)的路上發生的代誌。 1 二個學生去以馬忤，路上談論所經過的事(24:13, 14)。 2 耶穌近倚，二人袂認得伊。耶穌問𪜶辯論甚麼(24:15-17)？ 3 講：就是拿撒勒人耶穌，伊是先知，所講所行有權能。(24:19) 4 祭司頭及阮的序大掠伊，定伊死罪，釘伊佇十字架(24:20)。 5 阮平素向望伊贖回以色列。今伊死已經三日啦(24:21)。 6 幾若個婦仁人去墓裡，只有看見天使，講伊閣活啦(24:22, 23)。 7 耶穌講：無知的人，先知所講的話，恁怎樣許僫(oh)信(24:25) 8 就對摩西及眾先知，聖經中指伊的，攏給𪜶解明(24:27)。 9 日落，坐桌，主提餅祝謝，𪜶的目睭開，就認得伊(24:29-31)。 10 隨時倒去耶路撒冷，給學生及佇遐的講：主果然閣活(24:33-35)     對頂面以馬忤的記事，咱知學生 1 失望：有權能、救贖以色列的主，今已經離開𪜶。 2 困擾：所期待的救主、已經死，但是聽著、天使講伊閣活。 3 僥疑：主講伊會受害死、三日後閣活；總是無看著伊。 4 無知：知影、閣有經歷主做伙，總是心硬、心鈍，無接受。 5 轉機：耶穌知影𪜶著傷的心，陪伴𪜶、聽𪜶、閣教示𪜶。 6 心竅開：耶穌開拆聖經，講明上帝的救贖，點𤏸𪜶的信心。 7 經歷閣活的主：恢復信心，馬上行動，見證主閣活。 8 咱呣通做柴頭人：著拍開心門、墾求聖神，啟示聖經的真理。 9 咱行公義，是及主同行。咱若偏離正路，主及咱同行，挽回咱。     對以馬忤的事件，咱知咱的主 1 決斷陪伴咱一生的路途：咱若行離耶路撒冷，伊欲𤆬咱倒轉。 2 會敁(tháu)開咱的鬱卒：拔摩島的約翰，心憂悶，主啟示伊。 3 關心咱的性命：學生歸暝掠無魚，主問：恁有物配無？     閣活的主幫贊咱改變性命，用正面、積極的態度看人生。閣咱學主、好款待人，就欲體會及閣活的主同行。  

    主耶穌三遍問彼得：你疼我嗎？講：飼我的羊仔囝(約21:15-17) 主是好牧者；好的牧者為著羊放拺生命 (約10:11)。咱著學伊。 1 為著保護羊仔，好牧者願意放拺性命。伊看重家己的羊。 2 伊做頭行，羊也綴伊，因為羊認得伊的聲。𪜶有親密的關係。 3 做倩(chhiàⁿ)工的，看見豺狼來，放拺羊就逃走，放互豺狼咬羊。     (路10)講去耶利哥的路，有人互賊拍到半死，撒瑪利亞人經過 1 用酒斟佇著傷的所在，包伊，將精牲互伊騎，𤆬到客店來照顧。 2 隔日伊提銀互店主，講：照顧這人，所費若卡加，我倒轉會來還。     好的撒瑪利亞人、無佇客店陪伴受傷的人，伊 1 放一個身軀、心神攏需要照顧、陪伴的人佇客店，互別人照顧。 2 做好安排以後，就離開。因為家己有閣卡重要的代誌著做。 3 耶穌講：你去照按呢來行。     主耶穌佇世上、拯救人的生命，總是伊無去逐所在，醫治所有靈魂憂傷和身軀破病的；伊的優先選擇是：完成伊佇地上的使命。     歷史上，上帝為著照顧伊的囝兒，興起真濟領袖，遮個領袖 1 領導上帝的百姓、及𪜶做伙生活，總是僫得建立親密的關係。 2 雖然按呢，𪜶知影𪜶的責任，是宣揚上帝的誡命、律例、法度 摩西著是按呢。伊牧養上帝的百姓以色列人，伊的同胞。伊 1 無保留伊的疼，願意為百姓犧牲，及上帝的百姓建立關係。 2 無求回報，也無得著回報；因為百姓埋怨、攪吵、背叛。 3 無親密的朋友，來分擔憂愁；真正的朋友，也只有上帝若定。     使徒保羅，得著非比、百基拉、亞居拉的幫贊。最後除了路加，其他的人攏離開，主是伊最後的力量(提後4:11, 16, 17)。     人和人的交往，雖然親密、也會保留個人的空間；牧者主動、無私心的付出是應該，欲和羊群做親密的朋友，有時減采是僫(oh)。咱逐人是牧者也是羊仔，有責任關心四周圍的人，咱家己也受著人的照顧。呣通心冷，有主做咱的力量，咱欲放心向前行

      撒上16章講上帝棄拺(sak)掃羅，另外揀大衛做以色列王。 1 耶和華給撒母耳講：你揀伯利恆人耶西的一個囝做王(16:1)。 2 撒母耳驚掃羅聽見，會刣伊。耶和華講：你通帶牛仔去獻祭(16:2) 3 撒母耳互耶西及伊許個囝清氣，叫𪜶來赴祭祀(16:5)。 4 耶西大囝入，耶和華給撒母耳講：人看外貌；耶和華看心內(16:7) 5 耶和華無互撒母耳揀耶西𤆬來的七個囝(16:10)。 6 耶西另外差人導尾囝大闢來。耶和華講：你給伊抹油(16:12)。 7 撒母耳用油抹大闢。對彼日起，耶和華的神臨到大闢(16:13)。     頂面聖經節講，撒母耳照上帝的吩咐，完全相信上帝。 1 上帝愛撒母耳為以色列揣新國王，撒母耳並無提出問題。 2 上帝替撒母耳揣出路，教伊用獻祭做理由，去探訪耶西。 3 上帝一個一個拒絕耶西的囝，撒母耳並無問為啥物。     撒母耳並呣知，耶西的囝大闢，欲實現彌賽亞的讖語：對耶西的樹頭欲發一支芛(íⁿ)；伊的根所生的枝欲結果子。果子就是耶穌。     上帝講著大闢：伊合(ha̍h)我的心，凡事遵趁我的旨意(徒13:22)。伊攻擊敵人的時，逃閃掃羅的追殺的時，伊求叫上帝；佇犯罪的時，伊的心艱苦流目屎。伊追求上帝的旨意，也得著上帝的回應。     主耶穌講：我欲對父求，伊欲用保惠師互恁，永遠及恁蹛，就是真理的神，世間所袂接納的，獨獨恁捌(bat)伊(約14:16-17)。 1 新約時代的聖神，隨時佇咱身軀邊，教示咱，𤆬咱進入真理。 2 伊是咱的保惠師、咱的顧問、助理，和咱鬥相共(kāng)、替咱求。 3 佇咱成長的過程，伊照上帝對咱的計畫，引𤆬咱。     咱著學習上帝的話語，藉著祈禱，操練感受聖神對咱講話。伊有應允：我欲互恁專一的心，亦欲將新的神下佇恁的內面，閣欲對恁的肉體中除去親像石的心，賞賜恁親像肉的心(結11:19)。     親像撒母耳、大闢，𪜶完全順趁上帝，咱也欲完全順趁聖神，互伊佇咱內面掌管，就欲成上帝佇咱的計畫。

      可4:35-41記載，主耶穌及學生暝時佇船頂，抵著大風湧。 1 彼暗，耶穌落船，及學生欲過去彼旁岸(4:35-36)。 2 颶(Pò)頭風(忽然起的風)大起，湧潑入船，致到船欲滿(4:37)。 3 伊倒咧睏。學生叫伊醒，講：先生！阮欲無命(可4:38)。 4 伊醒，責備風，給海講：著靜靜！風就煞，也大平定(可4:39)。 5 伊講：恁啥事許驚？恁猶未有信嗎(可4:40)？ 6 𪜶大驚，講：此個是甚麼人，連風及海攏順伊(可4:41 )。     頂面的聖經節講，𪜶上船以後，風湧大起，船頂滿滿是水。 1 恁欲承接的地就是有山、谷、雨水潤澤(jūn te̍k)的地(申11:11)。 2 主帶領咱所行的路，呣是平地，是有山、有谷、崎嶇無平的路。 3 世間的風雨：受氣、家庭不和、社會紛爭、戰爭，是對私慾來。 4 主講：佇世間，恁有苦難；踮佇我，恁有平安(約16:33)。     耶穌佇船尾，倒佇枕頭睏。伊心中平靜、安穩。 1 彼得關佇監裡，伊無驚惶，安然睏佇二個兵的中間(徒12:6)。 2 主耶穌佇船頂安穩歇睏，伊給自己完全交託互上帝。 3 起大風湧的時，學生靠自己的力，及風、湧奮鬥。 4 船欲沉落去，學生才叫醒耶穌。人的終點，就是上帝的起點。     耶穌醒，責備風，給海講：著靜靜！風就煞，也大平定。 1 當主和學生坐船過海，空中的墮落天使，水裡的鬼就來阻擋。 2 主佇地面上，猶原有神性的權柄，風和海接受主耶穌的命令。     耶穌講：恁啥事許驚？恁猶未有信嗎？ 1 驚惶及呣信是相連的，因為呣信就會有驚惶。 2 彼得講：主啊！是你，就命令我行水面就近你(太14:22-32)。 3 彼得會當行佇海面，是伊的信心。伊沉落，是伊的僥疑小信。 4 專心仰望主，就無看風湧的大小，愈注目佇風湧，愈會驚惶。 5 基督徒所過的是：信心的生活，無注目佇憂傷、掛慮、驚惶。 6 著祈禱、懇求，就欲揣著原因，除去驚惶(腓4:6)。

      可5:22-43記載，主耶穌醫好血漏的婦仁人，閣互囡仔閣活。 1 一個管會堂的叫Gâi魯，求耶穌救伊欲死的查某囝(5:22-23)。 2 去的路上，一個血漏12年的婦仁人，對後面摸伊的衫(5:24-27)。 3 婦仁人想：我摸伊的衫，就會好。對按呢血漏連鞭止(5:28-29)。 4 耶穌知有權能對伊出，愛知摸伊的衫的婦仁人(5:30--32)。 5 婦仁人出來仆啲，照實講。耶穌講：你的信已經救你(5:33-34)。 6 Gâi魯厝內人來講：查某囡仔死啦！伊講：莫得驚，著信(5:35-36) 7 耶穌𤆬幾個學生去，到就講：囡仔呣是死，是睏若定(5:37-39)。 8 趕眾人出去，牽囡仔的手，講：查某囡仔，我命令你起來(5:40-41) 9 查某囡仔連鞭起來行。耶穌嚴嚴禁戒，莫得互人知(5:42-43)。     真心適的是，一個有名望的人，和一個無名的人，仝時出現。 1 管會堂的，求耶穌用手hōaⁿ佇伊的查某囝，伊就會得救，來活 2 一個名無記載、著血漏的婦仁人，相信干單摸耶穌的衫，就會好 3 耶穌宣告婦仁人的病全然好，是救伊的全部，包含互社會接納 4 醫婦仁人是欲加強Gâi魯的信心，萬一不幸的代誌發生(囡仔死) 5 婦仁人愛匿，醫好了人人知。會堂管家的經歷，反成做暗靜的。 6 這二個奇跡，受考驗的人，攏是存著大信心，大膽囥向望佇主。     這款大膽的向望，佇人看是無理性，也無保證必然會成功。這二個人存遮大的信心，是因為𪜶知上帝有應允：1)主的確無永遠棄拺人 2)主雖然互人憂悶，猶久欲照伊百般的慈愛，發出憐憫 3)伊互人受苦憂悶，呣是伊所甘心 (哀歌3:31-33)。     無疫情的時，咱佇教會聚會，疫情來，咱參加網路禮拜，今疫情開始退，失業的人著愛去揣空課，關店的，減采無閣重新開業，教會亦考慮恢復聚會，總是偌濟人會倒來？咱平素有祈禱、讀聖經、吟詩，總是咱敢有信心？咱著學得著醫好血漏的婦仁人，以及查某囝閣活的Gâi魯，大膽向主求，相信伊欲引𤆬，欲恢復伊所創造的世界；咱著徛起來，綴伊，和伊同工。

       林後12:1-10講著保羅上第三層天、樂園，閣伊身軀有一隻刺。 1 保羅講起異象及啟示(12:1)，是欲互哥林多信徒知，伊是真使徒。 2 異象：一人去第三層天；閣一人去樂園，聽見呣通講的話(12:2-4) 3 保羅講，異象中的人是通誇口，總是伊誇口家己的軟弱(12:5)。 4 14冬保羅無講遮個，是無愛高舉家己，無愛人看伊傷(siuⁿ)過頭(12:6,7) 5 保羅講伊肉體內有刺，是欲免得伊自高，因為伊得著大啟示(12:7) 6 保羅三擺求主，互刺離開。總是主講：有我的恩你就夠額(12:8,9) 7 保羅誇口伊的軟弱，因為軟弱的時，主的氣力就蹛佇伊(12:9,10)     哥林多後書的最後，保羅講起伊過去無講的經歷，因為： 1 假使徒入教會，講異象及啟示，稱呼家己"上等使徒" (12:11) 2 教會出現問題：相爭、怨妒、結黨、誹謗、講尻脊後話、紛亂(12:20) 3 假使徒比保羅閣卡𠢕(gâu)講、有吸引力，信徒無選擇保羅。 4 保羅行兆頭、神蹟、權能，總是哥林多信徒無接納伊做使徒(12:12) 5 保羅佇哥林多蹛1冬半，人看伊並呣是萬能，也無遐互人感動。 6 為著顧守主的見證，閣辯解伊的使徒身分，保羅選擇講伊的經歷     保羅無驚軟弱、閣誇口伊的軟弱，掠欠缺、困迫做歡喜，因為 1 伊軟弱的時，是欲互伊知家己的有限，呣通自高，著倚靠主。 2 伊軟弱的時，主欲遮閘(jia-cha̍h)保護，互伊免驚惶。 3 伊軟弱的時，主欲顯出能力、榮耀，互伊反轉有氣力。     有才調親像保羅，也互哥林多信徒嫌，這通做咱的警戒。 1 承認家己有欠缺、弱點，認捌(bat)家己無夠額的所在。 2 聯合別人的特長，來補足家己所欠的，建立同伴的關係。 3 了解無像的觀點，無放捒聖經的教示，無用相爭處理問題。 4 受召做主的工，並呣是一開始，就會完全做好。 5 用誠實的態度對待家己、團體、上帝，就會做上好的事奉。 6 著確認受召來事奉的職分，閣確認家己的弱點，就欲得著氣力。 7 建立事奉的團隊，聯合受召有恩賜的人，成做一體。

      摩7:7-15主耶和華互阿摩司看著異象，伊欲審判以色列。 1 異象：阿摩司看著繩線，用來起牆，也欲用來量以色列(7:7,8) 2 主講：北國的山頭壇、聖所欲廢無，刀欲攻擊以色列王(7:9)。 3 伯特利的祭司向以色列王投告，阿摩司咒懺以色列滅無(7:10,11) 4 祭司欲趕阿摩司倒去猶大做先知，呣通佇北國講先知話(7:12,13) 5 阿摩司講：我本呣是先知，耶和華揀召我來以色列傳講(7:14,15)     阿摩司時代的北國以色列，極其富裕。 1 阿摩司佇這個平順繁華的社會，竟然發表嚴轄(hat)批評的讖語。 2 人相信𪜶會堪得、得著這一切，認為這是上帝回應𪜶的。 3 上帝召阿摩司去提醒、訂正，𪜶對家己的印像是無正確。 4 對外，𪜶只有靠軍隊的力量，社會無正義、無道德，敬拜清彩。 5 祭司也無贊同，講：伊計謀攻擊王，以色列袂容得伊的話。     上帝袂互無公義、無憐憫的代誌繼續發生，伊欲究勘。 1 阿摩司宣揚社會正義，譴責社會對一部分人的壓迫。 2 特權無歡喜阿摩司嚴轄的口氣，呣聽、呣悔改，上帝無欲閣寬恕。 3 美國有濟濟族群、皮膚色各樣，有人刁工，放大來製造擾亂。 4 佇亞洲，中共利用民族主義，欲吞食台灣，威脅世界。 5 上帝審判：歹的、無人性的做法，只有敗壞家己，家己取滅無。     咱的所行、所做，敢會達到上帝的標準？伊的標準佇佗落？ 1 舊約先知，不但傳上帝的責備、審判，閣傳安慰、應允的信息。 2 上帝為咱定的標準：敬畏伊，謹慎守伊的誡命(傳12:13)。 3 上帝愛咱怎樣做？行公義，心存憐憫，謙卑及上帝相及行(彌6:8) 4 主耶穌講：你著盡心、盡性、盡意、盡力疼主─你的上帝。另外，著疼厝邊親像家己(可12:30,31)。 5 咱的肉體順服罪惡的法，致到有時達袂到上帝的標準(羅7:25) 6 咱若心神痛悔，謙卑認罪，上帝就欲算咱無罪(賽57:15)。 7 咱通深信，咱的拍拼，上帝永遠會記得(希6:10)

       使徒結束第一遍差遣，倒來給耶穌講𪜶所做，可6:31-34記載： 1 主耶穌愛學生和伊去曠野歇睏，因為𪜶無閒到袂顧得食(6:31)。 2 𪜶暗靜(chīⁿ)坐船去曠野，通佇遐歇睏(6:32)，無受人攪吵。 3 有濟濟人知影𪜶，就順湖邊行，代先𪜶到(6:33)。 4 耶穌看見歸大陣人，憐憫𪜶，就用濟濟項教示𪜶(6:34)。     綴𪜶的人濟，𪜶傷無閒，學生閣倒來，主愛和𪜶去曠野歇睏。 1 為著欲和學生單獨做伙，耶穌和𪜶坐船，互眾人綴袂著。 2 學生出去傳道，倒來以後，減采人真忝(thiám)，抑是開始自高。 3 主愛𤆬(chhōa)𪜶去曠野，離開眾人，互𪜶冷靜落來。 4 佇歇睏的時，主通鼓勵𪜶，教示𪜶，互𪜶得著氣力，重新出發。     人受造，是欲和上帝同著磨。做工著及時，暗暝就無人會做工。 1 上帝創造亞當以後，就愛伊替萬物號名，管理埃甸(ai-tiān)樂園。 2 人犯罪以後，閣卡著拍拼做工，因為土地亦受咒詛。 3 耶穌看見歸大陣人來，憐憫𪜶，袂顧得歇睏，閣開始空課。     主耶穌有同情心，伊醫病、教示眾人，伊亦知影人需要歇睏。 1 上帝創造世界的時，逐日講"有下昏，有早起"，愛人暗時著歇睏。 2 上帝制定安歇(hioh)日的規矩，彼日主人、奴僕、精牲攏著歇睏。 3 上帝定著安歇年，土地種作6冬，第7冬著歇，互伊自然生湠。 4 上帝定著禧年的律例，土地佇第50年也著歇，呣通做穡(sit)。 5 主認為咱著照顧家己，尤其是因為責任、袂當歇的人。    安歇是睏一下？看閒書？參加舞會、音樂會，旅行，抑是...？ 1 睏是肉體的歇，音樂互精神敁(tháu)放，有時遮個互咱得安歇。 2 靈性上的安歇，是安靜咱的心，聽候聖神的啟示，重新得著氣力。 3 著定定(安靜)，著會知伊是上帝，是逃閃的所在及氣力(詩46:1,10)。     呣通荏(lám)爛，猶(iáu)是日時，著做工；暝時到，就無人會做工(約9:4)。咱是上帝的殿，著家己照顧，忝著歇，就欲精英。閣咱恬恬(tiām)的時，欲對聖神得著氣力。  

     約6:5-13，記載耶穌栽培學生，互𪜶成做羊群的好牧者。 1 濟濟人就近耶穌，伊試腓力：咱欲對叨落買餅來互𪜶食(6:5,6)？ 2 腓力應講：用二百個銀仔買餅，亦無夠互逐人得著淡薄(6:7)。 3 安得烈講：有一個囡仔帶5個餅、2尾魚，總是人濟無夠食(6:8,9) 4 耶穌講：恁教許個人坐。提餅、魚，祝謝了，就分互眾人(6:10,11) 5 食飽。耶穌講：拾食剩的餅碎，免得拍損。𪜶拾滿十二筐(6:12,13)     主耶穌利用機會教育，互腓力看著伊家己，無積極、無信心。 1 耶穌看遐的百姓，親像羊無牧者，憐憫𪜶的精神及肉體的欠缺。 2 天烏，耶穌知影眾人枵餓，問腓力，通對叨落買餅互眾人吃？ 3 主試驗腓力，敢有用信心，頂(tíng)真來處理代誌，服事眾人。 4 腓力巧閣實在，伊估計人數，算出偌濟銀，也無夠逐人食淡薄。 5 腓力只有看著現實的困難，伊認為無論偌濟錢，攏袂解決問題。 6 安得烈的做法，互腓力知，著用信心面對問題、解決問題。     囡仔的5個餅、2尾魚，主耶穌祝謝了，分互眾人，𪜶攏食飽。 1 甘單5個餅、2尾魚無夠食；安得烈相信，主耶穌會解決問題。 2 囡仔無保留，奉獻所有，主藉著這，成大大的代誌。 3 上帝寶惜咱的奉獻，無論時間、才調、金錢，抑是人看是小的。 4 濟濟人有蹛食物，只有囡仔挈(khe̍h)出來，有聽入主的教示。 5 囡仔照伊的感動做，心無詭詐、掩勘，也袂白賊，比大人真實。 6 主耶穌講，若無越轉，做親像細漢囡仔，決斷袂入天國(太18:3) 7 著欣慕上帝的祝福：眾人捌(bat)三日無食物，聽耶穌的教示(太15) 8 著惜上帝的祝福：拾偆的有12筐。著惜主的賞賜，呣通拍損。 9 著𠢕用上帝的祝福：傳出去，互別人也會體會、閣享受著。 10著仰望上帝的祝福：伊祝福咱的付出，閣運用，超出咱的想像。     教宗方濟各[Francis]講，這個神跡有憐憫、分享、感恩的意思： 1 憐憫、和人分享，若家己有欠缺。看著有欠缺的，頭無越走。 2 感謝主耶穌贖回咱。著趁伊的命令疼厝邊，若無，欲受棄絕。  

      早期的基督教受羅馬帝國的逼害，第一世紀閣開始有異端，為著安慰眾信徒，閣抵當異端，教會有四個信經(creed)，闡明基督教的信仰，互人知正確、得救的路，其中上簡單的是使徒信經。     使徒信經分做12句，講三個確信：我信創造我的父上帝(1)、我信救贖我的上帝的囝(2-7)、我信互我成聖的聖神(8-12)： 1我信上帝，全能的父，創造天、地的主宰。 2我信耶穌基督，上帝的獨生囝，咱的主。3伊對聖神投胎，對在室女馬利亞出世，4佇本丟彼拉多任內受苦，釘十字架，死，埋葬，落陰府，5第三日對死人中閣(koh)活，6上(chiūⁿ)天，今(taⁿ)坐佇全能的父上帝的大旁，7伊欲對遐(hia)閣來審判活人及死人。8我信聖神，9聖閣公同的教會，聖徒的相通，10罪的赦免，11肉體的閣活，12永遠的活命。A-men。     下面是對照：無合聖經的看法 <-->使徒信經 (頂面信1-12) 1 物質是歹，上帝袂去創造充滿邪惡的世界<--> 信1 2 認為有兩個上帝，舊約和新約的上帝：一個是創造者，亦是律法和公義的上帝，另外一個是恩典及救贖的上帝。<-->信1,2,8 3 否認三位(persons)一體上帝：認為上帝只有一個。<-->信1,2,8 4 否定耶穌是完全的神：認為耶穌是人，就袂當是神。認為基督的神(靈)進入耶穌，只有佇耶穌受洗禮到伊死以前。<-->信2,3,6 5 否定基督成做完全的人：上帝袂道成肉體，聖潔的上帝袂去踮人裡面。否定馬利亞對聖神懷孕。<-->信2-6 6 認為人死就死，亦無死以後的審判。<-->信6,7,10-12     另外三款信經，對以上的問題，有進一步的說明。其他說明基本教義的，有信仰告白(confession of faith)，教理問(būn)答[catechism]。猶原講袂清楚的，就是奧秘，無應該去臆。     馬丁路德認為使徒信經對三方面講上帝是慈愛和憐憫，伊為著人類創造世界，為著人類犯罪賞賜贖罪，閣引𤆬人過成聖的生活。