Taigi 讀聖經

      申6:1-9記載上帝因為疼，降福氣互以色列，也愛in守伊的命令。 1 這是耶和華─恁的上帝所命令教示恁的誡命、律例、法度，互恁佇恁所欲過去得著做業的地來行伊，(6:1) 2 你及你的子孫一生著敬畏耶和華你的上帝，執守伊一切的律例、誡命。就是我所命令你的，互你的日子得著久長。(6:2) 3 以色列啊，你著聽，著執守來行，互你佇彼個流奶及蜜的地得著享福，人額加添，親像耶和華─你列祖的上帝所應允你的(6:3) 4  以色列啊，你著聽！耶和華─咱的上帝是獨一的耶和華。你著盡心、盡性、盡力疼耶和華─你的上帝。(6:4,5) 5 我今仔日命令你個話著記佇你的心， 也著用這勤勤教示你的囝兒。無論你坐佇厝內，佇路裡，睏抑是起來，攏著講論(6:6,7)。 6也著縛佇你的手做記號，戴佇你二蕊目睭的中央做紀念；閣著寫佇你的厝的門徛(khiā)，以及你的門。(6:8.9)       上帝藉摩西給以色列人講，著怎樣守伊的誡命、律例、法度。 1 上帝向望以色列人進入迦南地以後，有適當的道德規矩來遵守。 2 上帝應允in享福，蹛佇媠的土地，長歲壽、生湠濟濟。 3 為著享受上帝所賞賜的，in著順趁上帝。摩西互in實際的指示。 4 佇拜多神的迦南地，in著見證上帝是獨一的真神，閣完全順服。 5 In著遵趁伊的誡命，閣著佇厝裡實行宗教教育，教示囝兒來守。 6 律法的條文縛佇手、戴佇頭殼額(hia̍h)、寫佇門徛、門，表示佇生活中，逐時陣、逐所在攏著思考，閣照律法的條文去行。       著回應上帝的疼，行動(手)，閣願意遵守律法(頭殼額)。 1 生命中心：上帝的誡命著記佇心內，是對待人、做代誌的標準。 2 養育囝兒：父母得照上帝的話去行，也著照按呢教示囝兒。 3 逐時陣：上帝的教示著暗記、閣思考，做生活的習慣和價值觀。 4 逐所在：無論佇教會、厝裡，抑是社會，攏著照上帝的話去行。 5 思想行為：手所做的、頭所想的，攏著合上帝的教示。

       可10:46-52記載耶穌抵著睛暝人巴底買 1 耶穌出耶利哥，看著睛暝做乞食的巴底買，坐佇路邊 (10:46) 2 伊聽見是拿撒勒人耶穌，講：大衛的後裔耶穌！可憐我(10:47) 3 濟濟人教伊靜靜。伊益發大聲叫：大衛的後裔，可憐我(10:48) 4 耶穌叫伊來，問伊：愛我給你做甚麼？應講：我愛得著看見。 5 耶穌講：你的信有救你。伊連鞭得著看見，就綴耶穌(10:52)     睛暝人巴底買得著醫好，佇馬太、馬可、路加福音攏有記載 1 巴底買坐佇耶利哥城外的土腳。伊的世界就是土砂粉、黑暗。 2 伊是社會的弱勢、互人看輕、徙去邊邊仔的一群人的一個。 4 伊佇眾人的施捨中過日，一日閣一日，活佇憂愁和無希望中。 3 聽著耶穌這個人，伊講相疼、同情和赦免，伊醫治、行神跡。 5 伊相信耶穌會帶互伊希望，做完整的人、無閣倚(óa)賴別人。 6 伊相信伊活佇這世界，呣若是黑暗，應該有閣卡大的目的。 7 耶穌來到了耶利哥，伊等著機會，大聲喉叫，懇求憐憫。 8 眾人稱呼耶穌是拿撒勒人，伊叫伊大衛的後裔，以色列的救主 9 耶穌問伊：愛我給你做甚麼？表示，你講，我就給你成。 10 伊愛看見，伊看著家己真正的需要，解決伊根本的問題。 11 耶穌謳咾伊的信心，醫好伊的目睭，伊歸榮光上帝(路18:43) 12 伊bat失望，有期待，然後得著醫好，綴耶穌，見證、祝福人     耶穌問：愛我給你做甚麼？伊問巴底買，閣雅各和約翰。 1 巴底買請求耶穌互伊通看見，伊真清楚他生命中所欠缺的。 2 伊有信心，雖然受責備，教伊恬恬，伊求憐憫，求醫治。結果伊的黑暗變光明，乞食變學生，喉叫變謳咾，受憐憫變祝福人 3 雅各和約翰請求永遠就近耶穌、得著尊貴，受耶穌拒絕(10:36) 4 兩個學生無了解主講的天國，也呣知作學生的代價和報賞。    懇求踮佇咱裡面的聖神，啟示咱，互咱明白，有啥物無合主的教示，知影家己靈魂的散赤，閣知咱若求，就欲得著成。

    可10:35-45講著雅各及約翰的要求，愛佇主榮耀的國度坐高位。 1 雅各及約翰對耶穌講：見若阮所對你求的，愛你給阮行伊(10:35) 2 伊就給in講：愛我給恁行甚麼啊？(10:36) 3 In應講：准阮佇你的榮光，一個坐你的正旁，一個坐倒旁(10:37) 4 耶穌講：恁所求的恁呣知。我飲的杯，我受的洗，恁會堪得嗎？ 5 講：會。伊講：我飲的杯，恁欲飲；我受的洗，恁欲受；坐我的兩旁，呣是我會通互人，是為甚麼人備辦的，就互伊(10:39,40) 6 十個學生聽見，就受氣雅各及約翰(10:41)。 7 耶穌講：外邦做人君的，做主來治理，in的大人管轄in。恁中間愛做大的，欲做恁的差用；做頭的，欲做眾人的奴僕(10:42-44) 8 人子到，呣是欲差用人，是欲互人差用，閣獻生命來贖回濟濟人     耶穌欲上耶路撒冷，濟濟人認為民眾會迎伊做王。 1 雅各及約翰bat佇山頂看著榮耀的耶穌，認為耶穌啲欲做王。 2 In對耶穌做王的想法，pôaⁿ過伊會受苦、受刣的讖語。 3 In認為耶穌會建立彌賽亞國，在榮耀中作王，in也欲有份。 4 杯是上帝受氣的杯(耶25:15)，洗是淹無去，攏是受苦，in攏有份 5 12個學生欲審判12支派(太19:28)，總是逐人的賞賜在佇上帝。 6 十個學生受氣雅各及約翰，表示這個團體已經佇相爭，搶權勢。 7 耶穌對學生強調領袖是做奴僕、互人差用，呣是用權勢來領導。       基督講，做大的著做奴僕，洗學生的腳，呣若教示。做領袖著 1 關心：關心逐人所面對的問題，做好的聽眾，互人感覺溫暖。 2 幫贊：引𤆬、幫贊人解決問題，分享所經歷的，互相成長。 3 接納：尊重、接受逐人無像的所在，無勉強。 4 了解環境：斟酌環境特殊性、限制，做適當的回應。 5 管理：設定目標，照逐人的特長，確定代誌的輕重，適當的安排        聖經講，坐大位的人是欲事奉人，總是第一優先是先體貼及成上帝的旨意，然後才滿足人的需要。      

         希2:5-12講上帝施恩佇人，閣為in的墮落安排拯救。 1 啲欲來的世界，上帝互人管、無互伊降服佇天使(2:5)。 2 詩篇講：你數念人，看顧人的囝。你互人略(lio̍h)仔卡輸天使，賜伊榮光尊貴，佇受造的的頂面，閣互萬物降服伊(2:6-8)。 3 對上帝的恩，耶穌為著眾人受死贖罪，今得著榮光是合宜(2:9,10) 4 互人成聖的耶穌，及得著成聖的信徒，攏對仝一個上帝出(2:11) 5 耶穌講：我欲報揚上帝的名佇我的兄弟，謳咾伊佇會中(2:12)      上帝的拯救計畫，通過耶穌的受難，為人贖罪，得著完全。 1 NIV聖經講，耶穌的贖罪是前無人做的(pioneer)(2:10)。 2 只有主耶穌才會堪得，伊是無瑕疵，上帝的囝，上帝接受的。 3 亞當犯罪，受上帝刑罰以後，上帝就開始伊的拯救計畫。 4 以色列人受揀，in的歷史顯出人的罪性，需要上帝的救贖。 5 上帝藉著以色列的先知，宣布彌賽亞的降世，拯救欲到全人類。      主耶穌佇地面上所做、所教示的，濟濟是𤆬頭的(pioneering)。 1 著相疼，這是命令(約15:12)，無按呢行，欲受刑罰(太25:40-46) 2 尊重人：伊無責備無清氣、患血漏的查某人、摸伊的衫。 3 謙卑：學生爭做大，伊洗in的腳，講：恁著照我的模樣來行 。       甚物是上帝的國(天國)？怎樣才會入去？只有主給咱講清楚！ 1 天國：是上帝掌權、閣人順服的所在，是未來、閣是佇現此時。 2 人著對水、聖神來洗，才會入上帝的國(約3:5)。因為咱對洗禮、悔改，罪得赦免(徒2:38)，閣聖靈給咱勘印(弗1:13) 3 淫亂的、貪心的…不義的人袂會承接上帝的國 (林前6:9,10) 4 主講：我若靠上帝的神趕鬼，就上帝的國已經到恁 (太12:28) ， 將魔鬼對世界趕走，互世界歸屬上帝，這就是上帝的國降臨。 5 當咱願意順服、互上帝掌管，上帝的國就佇咱的心內(路17:21)        主耶穌做先知，敨(tháu)放天國的奧(ò)秘；宣布上帝拯救世間人的計畫；宣布有疼心的人，才會做天國的國民。  

     出18:13-24講摩西的丈人去揣伊，教伊怎樣管理以色列人。 1 摩西對早起到下昏(ê-hng)無閒審判百姓，丈人就問伊(18:13,14) 2 伊講：我給百姓判斷，閣教in上帝的律例及法度(18:15,16) 3 丈人講：按呢呣好。恁會損(sńg)身；這代誌你一人做袂來。你著將百姓案件問上帝，教示in；閣對百姓中間揀有才能的人，就是敬畏上帝、誠實無濫糝、怨恨不義的錢彼號人，設立in做百姓的序大，分別管一千人、一百人、五十人、十人(18:17-21 ) 4 互in照時審判百姓，大事到你遮，小事in家己審判。按呢，你就卡減輕，in也通及你相及擔當。百姓也安然倒去(18:22,23 ) 5 上帝若也按呢吩咐，你就會堪得。摩西照伊所講去行(18:23,24 )        上帝欲用摩西，對伊小漢就訓練伊，用80冬來訓練伊。 1 埃及公主拜託伊的老母，對嬰仔飼伊，伊得著認bat伊的民族。 2 佇王宮，伊學埃及人攏總的學問，有講話行代誌的才調(徒7:22) 3 到40歲，伊替受屈的以色列人伸冤，拍死欺負人的埃及人。 4 後來伊欲調解相拍的族人，欺負人的驚會互伊拍死，講出伊刣人。 5 代誌爆發，伊逃走，佇曠野飼羊四十冬，志氣、熱情攏磨了了。 6 到80歲，上帝互伊看著火燒的刺柿(phè)，伊感受著受苦的同胞 7 上帝賜伊能力，同胞信伊，上帝閣安排亞倫替伊講話。 8 上帝互伊行奇事，降十個災厄佇埃及，法老才放以色列人離開 9 上帝藉著伊互紅海分開，用雲柱閘埃及兵，in平安離開埃及。 10 上帝贊伊行奇事，苦水變甜，降嗎哪，拍贏亞瑪力人等等。 11 上帝借著伊的丈人，教伊著將權力分落去，分階層、擔責任。 12 佇西乃山，上帝將律法交互伊，互in成做有律法的民族。 13 40冬佇曠野，伊忍受不時吐氣、埋怨的百姓，閣有攻擊伊的。        上帝欲用你，伊會訓練你。聖經講摩西：伊做人極其溫柔，贏過世上的眾人(民12:3)，無先知親像伊，伊是耶和華面對面所bat的(申34:10)，主耶穌盡忠，親像摩西佇上帝的家一樣(來3:2) 

        可9:30-37記載兩個事件，學生無應答耶穌的話。 1 耶穌和學生對遐去，經過加利利；耶穌呣愛人知(9:30)。 2 耶穌講：人子欲受掠，人欲害死伊；了後，三日欲閣活 (9:31) 。 3 學生袂曉悟這個話，也呣敢問伊(9:32)。 4 學生佇路裡爭論啥人最大，到厝內耶穌問，in靜靜(9:33,34) 5 耶穌講：做代先的，著做眾人的路尾，也做眾人的差用 (9:35) 。 6 耶穌閣導一個囡仔，互伊徛佇中間，續抱伊 (9:36) 7 講：見若為著我的名接納一個親像此號的囡仔的，就是接納我；見若接納我的，呣是接納我，是接納差我的(9:37)       對頂面的經節看出，學生並無真正了解主的教示。 1 耶穌講伊會受掠、害死；三日後閣活。學生袂曉悟，呣敢問。 2 可8,9章記載耶穌2遍讖語伊的受難，第一遍彼得強烈回應，受耶穌責備(8:30-33)，這遍學生恬恬(tiām)，呣敢問。 3 馬可記載，在早，學生無明白的時，就問耶穌(4:10, 7:17, 9:11) 4 對馬可8章起，學生對種種事件，包含主的身份、讖語受死、山頂改變形像， 啞口(é-káu)囡仔得著醫治，in袂理解主的話、作為。 5 魔鬼激起人的本性，人對權勢的慾望，使弄學生爭論啥人最大。 6 耶穌問in啥事？In知影主的教示，但是無遵守。In見笑、靜靜、呣敢講出。 7 耶穌及時阻擋魔鬼的試探，停止in的爭論。教in甚物是作大：作大是作奴僕、互人差用，甚至事奉無名、無身分的人。       聖經閣有2位記載，學生認為天國就欲來，相諍，愛欲作大。 1 耶穌第3遍讖語受難和閣活，學生求欲坐耶穌的兩旁(10:35-40) 2 主講，世間的王管百姓，恁做頭的，反是眾人的奴僕(10:42-44) 3 最後的晚餐，學生閣啲相爭，看in中間甚麼人最大(路22:24)。         著謙卑親像細漢囡仔，才會入天國。主續講，無互信主的人跋倒，閣決心除去家己的歹，反是咱著上關心的。(太18:1-9)