2020-12-27 感恩的2020年

        2020對TTPC是ㄧ個真特別的一年。教會無牧者，閣抵著武漢肺炎，疫情續到年底攏無煞(soah)。感謝天父帶領，一切攏得著平安經過。
        今年，雖然無牧師，總是大家分擔教會的空課(khang-khòe)，互敬拜、牧養、關懷繼續來進行。禮拜日的敬拜，請附近教會的牧師輪流來證道；成人主日學，請來講道的牧師和教會有志，輪流主講；週間的查經，請佇咱教會聚會的退休牧師、蔡牧師主持。聖歌隊佇原來的指揮、伴奏帶領，繼續練習，閣佇禮拜獻詩。
        三月中，因為武漢肺炎愈(lú)來愈嚴重，教會停止聚會。這時南加州的台灣長老教會(TPC, Taiwanese Presbyterian Church)聯合，提供聯合網路禮拜。以後漸漸加入成人主日學，週間的拉比食堂，和山姆(san ḿ)的聖詩音樂。參加聯合禮拜的教會的牧師，擔任禮拜日講道和主日學，各教會輪流擔任音樂事奉。咱教會無牧師，只有提供音樂事奉。因為咱教會聖歌隊停止聚會，獻詩用過去聖歌隊主日唱的歌的錄影，加歌詞和圖片。感謝過去為這錄影的兄姐，佇今仔日，in的勞苦，互咱通和衆教會分享所唱的詩歌，作伙來敬拜。
        教會停止聚會期間，眾兄姐除了佇網路做伙禮拜，佇教會Line群組報平安以外，藉著電子批、電話閣家庭拜訪，大家互相請安。
        教會逐禮拜的週報，藉著網(bāng)路傳送，提供互相的聯絡和關懷。週報的分享部分，有真濟篇用白話字來寫，對照有中文；閣有用台語文來寫的。今仔日的網路真發達，會當揣(chhoē)著真濟台語文的資源，咱教會網站也有收集真濟資料。佇首頁有「Other Links 其他連結」，入去以後點「Memory of Taiwanese台文記憶」，就會看著。
        聘牧的空課對舊年就開始進行。聘牧廣告上先刊佇角聲月刊，佇台灣、美國長老教會相關網站，也請牧者介紹；今年繼續進行，向望明年會揣著有受呼召的牧師來牧會。
        保羅講：萬項事相及來，互疼上帝的人得著利益(羅8:28)。困難的一冬攏經過啦，相信閣來的一年，會是平安年。

**本教會是指Tustin台灣基督長老教會(TTPC, Tustin Taiwanese Presbyterian Church)。