Taigi 讀聖經

         仁愛著佇日常的生活中活出來 。(林前13:4-7) 1 仁愛是𠢕(gâu)寬容、慈悲；仁愛是無怨妒；仁愛無誇口，無品捧(phóng)，無行見笑的事，無求家己的利益，無快受氣，無記得人的歹，無歡喜不義，是及真理相及歡喜；(13:4-6) 2 凡事忍受，凡事相信，凡事向望，凡事吞忍(lún)。(13:7)         生活中，無疼心的行做 ；無張持(tî)、抑是刁(tiau)工做的 。 1怨妒：不滿別人有、家己無，就受氣，甚至攻擊，若冤仇人。 怨妒希望家己無的，別人也無；甚至家己有的，別人袂使有。 2 誇口：歕家己偌爾(loā-nī)𠢕，欲引起別人注意，期待別人謳咾。 誇口的人認為家己比別人巧，自高、驕傲，天使因為按呢墮落。 3 品捧： 痟(siáu)狂、膨(phòng)風，講話過頭佇真正的家己。 看無別人，講大聲話，歕(pûn)牛皮，總是若歕風的雞胿(kui)仔。 4 行見笑的事：做了無應該做、歹勢講的代誌 。 做了粗魯、無禮貌、無尊重人、無合宜的代誌。 5 求家己的利益：為著家己的好，堅持、無相讓。 堅持家己的看法，看重家己的權利，無放棄應該得的。 6 快受氣：感覺得家己是對，別人呣對，閣袂當忍受。 袂當忍受受委屈、受刺激、代誌超出家己的原則的。 7 記得人的歹：抾(khioh)恨，給別人所做的歹代記椆椆(tiâu)。 給別人犯的錯誤(檢采是家己的看法)，逐件攏囥(khǹg)佇心內。 8 歡喜不義：掠"做歹"做快樂。家己行歹，也歡喜別人行歹。 挖別人的見笑的事，私人的事，閣四界傳。         勇敢面對別人無疼心的行為，因為聖神用疼灌沃咱 (羅5:5)。 1 歡喜忍受、作伙背重擔，做伙面對問題，呣是去四界傳。 2 相信對方、正面看代誌，無隨便定人的罪，想辦法揣出問題。 3 囥向望、相信上帝的攝裡，面對問題，代誌上尾會得著解決。 4 吞忍、總是心亦著放互開，因為這一切攏欲過去。

         約2:1-11記載主耶穌給(kā)水變做酒的神跡。 1加利利的迦拿有婚宴，耶穌的老母佇遐(hia)，伊和學生也去(2:1, 2) 2 酒用了，耶穌的老母對伊講：無酒啦。耶穌講：老母啊，我及你甚麼干涉？我的時猶未到。(2:3, 4) 3 伊的老母給遮(chia)個差用的講：凡若伊給恁講的，恁著去行。(2:5) 4 照猶太人洗清氣的例，遐有六個石甕(àng)，逐個會貯(té)二三桶水。耶穌吩咐差用的互甕滿水，叫𪜶舀(iúⁿ) 互管筵桌的(2:6, 7, 8)。 5 水變做酒，管筵桌的試啉(lim)，呣知對叨(toh)落來，獨獨舀水的知(2:9)。 6 管筵桌的叫新囝婿(sài )來，講：人攏是代先排好酒，到人飲濟濟，才用卡次的，獨獨你留好酒到此霎(tia̍p)！(2:9, 10) 7 這是耶穌頭一擺神跡(jiah)，顯出伊的榮光；學生就信伊(2:11)。         佇迦拿，約翰福音點出主耶穌的身分，閣伊佇地面的使命。 1 彼時”敬虔的”的猶太領袖，𪜶守"棄絕慾望"的生活、和社會隔離。 2 主耶穌進入到社會，參加人的婚禮，甚至去接近受看輕、弱勢的族群，親像抽餉(hiòng)的、妓女、殘障的，致到受誤解、指責和批評。 3 耶穌的老母和婚宴主家有關係，伊有管酒，也差教差用的。 4 為著無酒的問題，伊為耶穌做準備，吩咐差用的著照主的話去做。 5 佇原文，耶穌稱呼伊的老母”婦仁人”，閣講”我及你甚麼干涉”，是欲互老母知，伊是彌賽亞、上帝的囝，呣是甘單馬利亞的囝。 6 主講” 我的時猶未到”，是指彌賽亞”死、閣活、得榮光”的時未到。 7 馬利亞經歷天使的顯現、約翰的老母有身孕(路1:26-56) 、以及囡(gín)仔耶穌上聖殿的事，相信耶穌是出佇至高的，伊欲做大。 8 主給水變酒，伊也會改變咱，互咱無閣歹性地，人生有向望。         當咱接受主耶穌做性命的主，閣咱行伊的教示，咱的性命會改變，若水漸漸變做酒。彼坩(khaⁿ)水，今成做有救恩、有永遠活命的酒，伊的芳味，到這陣猶原吸引濟濟人來跟綴耶穌，得著卡豐盛的性命，閣日日經歷上帝的恩典和引𤆬(chhōa)。

        可7:24-29講耶穌醫好一個外邦(迦南)婦仁人的查某囝。 1 耶穌去到推羅、西頓的交界，入一間厝，人隨探聽著(7:24) 2一個外邦婦仁人，聽見耶穌的事，就來仆佇伊的腳下(7:25,26) 3 婦仁人的查某囝互邪神附身，伊求耶穌給鬼趕出 (7:25,26) 4 耶穌講：著互囡仔代先食飽，因為提囡仔的餅互狗是呣好(7:27) 5 婦仁人應講：主啊，是啦；總是桌腳的狗也食細囝的餅碎(7:28) 6 耶穌講：因為這句話，你通倒去；鬼已經離開你的查某囝(7:29) 7 耶穌謳咾婦仁人的信，現彼時，伊的查某囝得著醫好(太15:28)       佇耶穌的時代，猶太人認為家己是上帝的囝兒，外邦人是狗。這個外邦的婦仁人，心內明白、有信心、有智慧。伊 1 頭腦清楚、好膽認主。伊喉叫：主啊！大衛的後裔(太15:22)。 2 堅持愛得憐憫。 伊喉叫、仆(phak)佇耶穌腳下，求主憐憫伊 (太15:22) 3 無惜面子、勇敢求討。求主憐憫伊，閣趕出附身查某囝的鬼。 4 忍受試煉。(1)耶穌恬恬(tiām)，後來講，伊就近以色列家若定(太15:23,24) (2) 閣講：著互囡仔代先食飽。意思是救恩(餅)著先到以色列 (3) 閣講：提囡仔的餅互狗是呣好。就是救恩無應該互外邦人 (4)耶穌講外邦人是狗。 5 注目佇向望。伊聴著”救恩(餅)”，無看”狗” 的歹名(無分佇救恩) 6 掠牢機會。伊認為，主講餅互外邦人”無好”，並呣是完全拒絶。 7 永無放棄。婦仁人講：狗仔也食主人交落(ka-la̍uh)的餅幼(iù)(太15:27)。既然猶太人無愛恩典(餅幼落土跤(kha))，通互外邦人。        聖經有講著這款的信，閣實在去行的人，咱通學習。 1 信就是所向望的的實在，及袂看見的事的憑準 (希11:1)。 2 患血漏的婦仁人，相信干單摸耶穌的衫仔，就會得好(可25-34) 3 管會堂的求主醫查某囝，厝的人來講伊已經死，伊猶原囥向望。 4 迦百農的百總，相信甘單主允准，伊的奴僕就得醫好(太8:5-13) 5 迦南婦仁人深信所信靠的、閣交託，會得保守 (提後1:12) 

       雅3:1-12對真濟方面，講舌的厲害，愛咱真小心咱的舌。 1 呣通濟濟人做先生，因為𪜶欲受卡重的審判(3:1)。 2 咱佇濟濟項跋倒；講話無跋倒，就是完全的人，也𪜶約束通身軀(3:2) 3下馬咬韁(kiuⁿ)佇馬的嘴， 𪜶就順趁咱，咱就管𪜶通身軀(3:3)。 4 船雖罔大，大風掃伊，舵公用細細的舵(tāi)，就會互伊轉越(3:4) 5 舌是細細的體，猶久講大話。小可的火，燒樹木濟濟(3:5)！ 6 舌就是火，不義的世界，拍拉饞 (la-sâm)通身軀，一生的行動互火點𤏸(toh)燒去，對地獄點的(3:6)。 7走獸、飛鳥受人制壓，舌是無歇的歹物，死的毒，無人會制壓(3:7,8)。 8 咱用舌謳咾主，閣用伊咒詛人，對仝一個嘴出，是呣應該(3:9,10) 9  水泉袂對像一孔流出甜的苦的，無花果樹袂生草橄(kan)仔，葡萄樹袂生無花果，對鹹的也袂流出汫(chiáⁿ)的 (3:11,12) 。    舌有大大的功效、能力，舌若水，會當行船，也會反(péng)船。 1 舌會教示、指示正路、鼓勵、安慰、同情人，是世上上好的物。 2 舌有控制的力量，親像船的舵，馬的馬咬韁，血管的架仔。 3 舌有滅無的能力，親像病毒會互人死，野火給樹林(nâ)燒去。 4 約束家己的舌，就會約束通身軀，這是完全的人。      雅各警告咱，咱的舌著細膩，雖然是細細的體，猶久講大話。 1 舌是燄火、毒、歹物、汙穢全身軀、不義的世界、地獄來的。 2 和合本聖經講，生命的輦(lián)仔向前走無停，舌會給伊燒去(3:6) 3 地獄的火，是拍袂滅(hoa)的，對舌出的話，也欲四界傳袂煞。    主教示，是著講是；呣是著講呣是， 閣卡加，是對彼個歹的出(太5:37)。所以，應該講、著講，清楚閣正確講出所知的，無加味素。欲互人相信你所講的，在佇平素的行做，咒誓(chōa)袂會幫贊    雅各強調舌佇歹的一面，愛咱呣通講歹話、閒仔話、白賊、作孽(gia̍t)的話，主耶穌講，所講的閒仔話，佇審判日，逐句著講清楚；對你的話欲稱你做義，抑是擬(gí)你有罪(太12:36,37)。

          路3:15-17 講到行洗禮約翰的洗禮，和主耶穌的洗禮。 1 百姓啲向望的時，眾人心內啲(teh)議論約翰減采(kiám-chhái)是基督。(3:15) 2 約翰講：我用水給恁行洗禮，獨獨有一個比我卡有權能的欲來，就若敨(tháu)伊的鞋帶我也袂(bōe)堪得。 伊欲用聖神及火給恁洗(3:16)。 3伊的手提簸箕(pòa-ki)，欲將伊彼場一盡簸，收麥入伊的倉，若是麥仔糠就用袂hoa的火燒伊( 3: 17) 。         水的洗禮，以及聖神和火的洗。 1 約翰催逼猶太人接受水的洗禮，認罪悔改，歸向上帝 (路3:7-9)。 2 行洗禮的約翰傳反悔的洗禮，也講著信後尾來的耶穌(徒19:4) 。 3 基督徒水的洗禮，表示舊的我，已經及基督同死、同埋葬，今咱及基督同閣活，有“活命的新款” ，得愛有生命的改變(羅6:3-8) 。 4 欲經歷主踮(tiàm)佇咱裡面，閣對伊得著氣力，著經過聖神及火的洗。 5 聖神的洗，意思是浸佇聖神，就是領受聖神。 6 徒2:37-41講互聖神感動、心刺鑿(chha̍k)，悔改、認罪、信主，閣領受所賜的聖神，就是徒11:15-16所講聖神的洗，一世人只有一遍。 7 火的洗，洗去歹的部分，親像給栗(chhek)仔殼燒掉，閣不時去洗。         「聖神充滿」是一生常常會經歷的。 1 聖神就是真理(約壹5:7)。當咱專心追求真理、伊就會來充滿咱。 2 專心佇靈魂的得救、耶穌的教示、福音的傳報、上帝國的臨到、上帝的榮耀，等等，攏是追求真理。 3 聖神充滿就是受聖神的感化，顯出好的態度和德行，親像巴拿巴 (徒11:24)，有肚量、歡喜著磨、智慧充滿、堅持真理等等。 4 聖神也會照逐時準的環境，指示咱，增加咱的能力，智慧，喜樂等等，這也是聖神充滿。親像司提反 (徒7:55)， 彼得(徒4:8)。         咱的生命需要不時的換新。 經過水的洗，罪得洗清，咱無閣活佇舊的我；經過聖神的洗，伊入來咱內面，咱欲經歷靈性的醒悟；經過火的洗，咱欲愈(lú)來愈成(sêng)鍛煉的金，愈接近主。