Taigi 讀聖經

           路13:1-9記載加利利人受刣(thâi)，和塔硩(teh)死人的代誌。 1 有人給耶穌講，彼拉多互加利利人的血摻(chham)佇牲(seng)禮(13:1)。 2 耶穌應講：遮個加利利人受害，恁拍算𪜶比眾加利利人卡有罪嗎？呣(m̄)是！恁若無反悔，攏欲親像按呢滅無！(13:2, 3) 3 西羅亞的塔倒落來，硩(teh)死十八人；恁拍算𪜶比耶路撒冷的人犯罪卡重嗎？呣是！恁若無反悔，攏欲按呢滅無！(13:4, 5) 4 伊就講一個譬喻(phì-jū)：某人有一欉(châng)無花果樹栽佇伊的葡萄園。伊去彼欉揣無果子，就對管園的講：你看，我連連三年來對此欉無花果樹揣(chhōe)果子，揣無，著給伊剉(chhò)落來，免鎮(tìn)所在(13:6,7)。 5 應講：主啊，今年請閣容允伊，聽候我四圍掘鬆(ku̍t-sang)，壅(èng)肥；後來若結果子就好，若無，你才(chiah)給伊剉(chhò)起來。(13:8, 9)          苦難 vs. 罪 vs. 上帝的刑罰。 1 以色列人認為抵(tú)著痛苦、苦難的人(互人刣死，抑是塔硩死)，是因為𪜶的、抑是祖先的罪，受著上帝的刑罰(民14:18) 。 2 對苦難：受害的可能有罪，無代表其他的無罪，悔改就免受審判。 3 對罪：主耶穌教示咱，呣通看著別人受苦抑是死亡，就講𪜶犯罪。 4 呣通推論講別人有罪。著講實在話，是，就是；呣是，就呣是；遮個以外是對歹的出(太5:37)。 5 主提醒咱：肉體性命的死亡，是人一切的結束。悔改著及時。 6 對上帝的治理：伊講，上帝呣是獨裁者。伊無用威脅和刑罰來統治，反轉，伊互咱一遍閣一遍的機會，來反悔，結好果子。 7 無花果樹種佇葡萄園的好土，講咱是得著上帝大恩典的族群。 8 園主連續三冬，等無花果樹結果子，表示上帝寬容咱，等咱悔改。 9 給樹邊的土掘鬆、壅肥，閣等一冬，表示上帝忍耐咱呣是無限。 10 顧園的辛苦所種的，可能會結果子，亦可能袂(bōe)。傳福音亦按呢。 11 顧園的揣原因、加強照顧無結果子的樹。咱亦呣通隨便放棄。 12 啥事互這款的無花果樹鎮(tìn)所在。無結果子，就會受剪除 。

            Lent中文翻譯做大齋(chai)期(齋，素食)，是主閣活前的40日。 1 初期教會常常佇閣活節前舉行洗禮，通互𪜶佇閣活主日領受聖餐。 2 洗禮前有信仰班，互𪜶學習純正的信仰，過佇教會的新生活，閣準備心，通來經歷及主同死、同活。 3 尼西亞會議將準備期定做四旬(40日)，著是今仔日的大齋節期。 4 四旬(40日)的準備期，是參考主佇曠野受試探禁食的日子。 5 到6世紀，大齋期成做信徒禁食、懺悔的節期，無專門為新信徒。 6 無算閣活主日，40日的第一日是五個禮拜前的拜三，叫聖灰日。 7 穿麻衫，糝(sám)火烌(hu)是表示真深的哀傷，亦是為罪讖悔。 8 大齋節期安排簡單吃食，操練無重慾望，學習主贏過試探的祕訣。         抵著重大的代誌，通借著長時間的禁食來準備。 1 禁食的目的是藉著簡單啉(lim)食，誠心認罪，迎接頭前欲行的路。 2 上帝無看重禁食，除非咱是為著罪憂傷、痛悔、求上帝幫贊。 3 加爾文反對佇大齋期表面上學耶穌、摩西、以利亞40日的禁食。 4 耶穌禁食，是欲藉祈禱來得著力量，接受試探，亦思考宣教事工 5 摩西40日禁食，是為著準備領受上帝的律法。 6 以利亞認為只有伊忠心。伊為主受性命的威脅，逃走，閣求死。 上帝互以利亞吃飽睏飽，以後伊40日無食，去到上帝的山。 以利亞吐氣(khùi)、埋怨，上帝先補充伊肉體的需要，繼續安慰伊的心。 上帝互伊知伊有安排忠心的人，閣互伊體會上帝佇伊身上的權能。         主對待咱親像朋友(約15:15)，佇這節期，咱通按呢回應。 1 回想：咱一生抵著的代誌，負面的(憂愁、受氣…)，正面的… 2 感恩：主若朋友，佇這一切代誌頂面引𤆬(chhōa)，咱著獻感謝。 3 祈求：求主醫治、赦免、賞賜氣(khùi)力，除去負面的意念、作為。 4 放空：思考咱所經歷的，祈求聖神的啟示，體會上帝善良、通歡喜、純全的旨意，得著心志換新、變化家己(羅12:1, 2)。 5 回應：疼主疼人，互佇地裡親像佇天裡(太6:10)。

          路4:1-13講耶穌佇曠野，受魔鬼的試。 1 耶穌受聖神充滿，對約但河倒來，聖神導伊去曠野，四十日久互魔鬼試。遮個日的中間無食甚麼物；後來，就枵。(4:1, 2) 2 魔鬼給伊講：你若是上帝的囝，著教這個石變做餅。耶穌應伊講：有記載講：『人的活呣若倚靠餅。』(4:3, 4) 3 魔鬼閣導伊絔(peh)上高，一目𥍉(nih)久用天下萬國互伊看，講：這一切的權，及𪜶的榮光，我欲互你，因為這個已經交互我，出在我欲互甚麼人。所以你若拜佇我的面前，就攏總是你的。耶穌應講：有記載講：著拜主─你的上帝，獨獨服事伊若定。(4:5-8) 4 閣𤆬伊到耶路撒冷，互伊徛佇殿的尾溜，給伊講：你若是上帝的囝，著對遮家己趒(tiô)落去；因為有記載講：伊欲為著你命令伊的天使保護你；閣講：𪜶欲用手扶你，免得你的腳觸(tak)著石。耶穌應伊講：有講：『莫得試主─你的上帝。』(4:9-12) 5 魔鬼已經盡逐項的試，就暫時離開伊。(4:13)          耶穌抵著的三個試探，也是咱一生所會抵著的(約壹 2:16)。 1 第一個是肉體的私慾，身體的慾望，親像吃物。伊用申8:3 回答 2 第二是目睭的私慾，拜魔鬼就會得榮華富貴，伊用申6:13 回答 魔鬼提供一條近的路，免受難，就會做彌賽亞，得著世界。 魔鬼已經控制世界的國(弗 2:2)，伊欲用這換耶穌拜伊。 3 第三個是人生的驕傲，就是咱的能力和信心，伊用申6:16 回答 魔鬼引用聖經節來挑戰(詩 91:11-12)，主講濫摻使用權力是呣對         咱若互私慾、驕傲來掌管，上帝的疼就無踮佇咱(約壹 2:15) 1 上帝互人有吃、啉(lim)、性的欲望，總是著佇伊設的界限內面 2 主受試探、受苦，伊體貼人的軟弱，伊會幫贊咱 (希 2:18. 4:15) 3 上帝袂互試過頭佇咱所會當，伊會開脫出的路，互咱當會起(林前10:13)，閣賞賜聖神的劍，伊的話，通倒頭槌魔鬼 (弗 6:17) 4 遮個刺提醒咱有伊的恩就夠額，咱著向伊求討(林後12:9) 

      耶穌紲(soà)接舊約先知，完成上帝的救贖計畫 。伊的一生：降世、受洗、受試探、變貌、受難、閣活、上天；山頂變貌是大宣告。 1 佇山頂，伊的面貌有各樣，衫白若光，伊欲參加交接典禮。 2 摩西出現，伊傳上帝的律法，犯罪的著獻無瑕疵的精牲來贖罪。 3 以利亞出現，伊代表先知，傳上帝的審判、憐憫，講拯救者欲來 4 摩西和以利亞的出現表示，上帝互怹的任務，今欲交互主。主欲替有罪的世間人，成做贖罪的羊羔，成上帝的公義；主欲做拯救者，傳活閣新的道，互人有新的心、新的神；主互律法得著完全 5 主著(tio̍h)是上帝救贖計畫中，拍破魔鬼權勢的(創3:15)。     耶穌在世，用三年久來訓練學生，為著改變怹(in)的想法 。 1 學生看主醫病、趕鬼、行神跡、傳天國的福音，知影伊是真特別。 2 主三遍讖語伊的受難、閣活，第一遍彼得苦勸，第二遍學生憂悶。 3 主問學生：恁講我是啥人？彼得有回答，8日後，耶穌和怹上山。 4 佇山頂，彼得看著主和摩西、以利亞做伙。摩西和以利亞攏是領袖人物，彼得講欲搭三間寮仔，表示伊認為主是政治上、軍事上的主，認為以色列國就是上帝國。 5 經歷主的受難、閣活以後，彼得第二遍閣倒去掠魚。 6 閣活的主啲欲上天的時，使徒閣問：你欲佇這時復倒以色列嗎？     主佇山頂顯出榮光，是欲堅定學生的信心，承接伊的空課 。 1 上山的前8日，主講：佇遮的，有人猶袂死，欲看見上帝的國。 2 佇山頂，怹看著主的榮光，怹看伊和以色列人上尊重的摩西和以利亞講話，怹看著上帝的權能。 3 彼得昂愕(gông-ngia̍h)，講欲搭三間寮仔，這時怹互雲罩(tà)，閣有聲講：此個是我的囝，我所揀的，恁著聽伊。 4 上帝啟示怹，耶穌是聖囝，超越摩西、以利亞。 5 怹親目經歷遮個，著驚，永永記牢(約1:14,  彼後1:16-18) 。 6 主愛你、我和伊同工，伊和聖神暝日和咱做伙，堅固咱。 相關題目： 夯十字架、除歹代