22-5-8 老母若聖神咧顧囝

 

 

 

 

 

        聖經裡面記載，老母為囝兒受著逐款的壓力：  
1 無囝的壓力：撒母耳的老母哈拿求囝，猶大新婦他瑪為著有後代妝做妓女，路得互波阿斯盡親情(chhin-chiâⁿ)的責任。
2 生產的危險：年老生囝(亞伯拉罕的某撒拉、行洗禮約翰的老母 以利沙白)，雅各的某拉結生便雅憫。
3 政治的壓力：摩西的老母約基別藏嬰仔摩西三個月，希律王欲殺欲做猶太人的王的耶穌，所羅門的老母拔示巴為伊確認王位。
4 經濟的壓力：以利亞及以利沙幫贊寡婦，耶穌一家逃去埃及的生活。
5 死亡的壓力：路得的大家(ta-ke) 拿俄米失去翁和二個囝，耶穌的老母馬利亞看伊互人殘忍處死。  
6 教囝的壓力：夏娃(該隱刣亞伯)，利百加(以掃和雅各爭名分)，約基別飼大摩西，友妮基教提摩太。
7 養飼的壓力：迦南婦仁人為查某囝求耶穌醫治(太15: 21-28)。
8 經營家庭的壓力：天才的老母(箴言31) 。
        老母若聖神，對伊的囝兒，逐日逐時咧顧。猶太人講，上帝袂當佇逐時逐所在照顧逐個人，伊創造母親來做。伊是
1 牽教者：對學行路、學講話起，到長成，陪伴囝兒上濟的是老母，老母用家己的行做來教，用疼來教。
2 幫贊者：老母𤆬囝兒學樂器、學語言、顧學業，𤆬出𤆬入，提供囝兒安全、無煩惱的環境， 互𪜶有自信，產生對人的信心。
3 安慰者：囝兒成長的過程，跋倒、考試無好、互人欺負，抑是大漢以後事業無順利，老母總是佇邊仔安慰和鼓勵。
4 協談者：老母顧囝兒到大，上了解囝兒的需要，伊聽、閣苦勸。
5 代禱者：老母袂當替囝兒做、抑是準備所有的代誌，伊掛心伊的細囝，常常為𪜶向上帝祈禱，懇求上帝引𤆬𪜶。
        上帝創造人，欲互人生湠(thòaⁿ)真濟，充滿佇地上，管理地上(創1:27, 28)，囝兒亦是上帝賞賜，交托互父母的產業(詩 127:3)，所以，母親佇上帝的計畫中，有真重要的角色。