Taigi 讀聖經

  以利亞手提刀，腳踏一個巴力的先知 迦密山修道院(Monastery of Muhraqa)          亞哈王是北國以色列上歹的王，拜金牛，起巴力、亞舍拉的廟。 1 以利亞對亞哈講，這幾年我若無祈禱，欲無露水，無雨；然後上帝指示伊走去匿(bih)。第三年伊倒來，欲證明耶和華是真的上帝。 2 伊和亞哈王、以色列眾人，以及850個巴力、亞舍拉的先知去迦密山，佇遐，伊和巴力的先知逐人獻祭互家己的神。 3 只有以利亞獻的祭，有火對天降落，燒了祭物、柴、及四圍的水。 4 眾百姓看見，就仆(phak)落，講：耶和華是上帝！閣刣所有巴力的先知。 5 以利亞祈禱到第7擺，風及雲就起，天轉黑暗，落大雨。         王后耶洗別欲刣以利亞，伊逃走閣求死。上帝出手救伊。 1上帝互伊睏飽、吃飽，有氣力行40暝日，到上帝的山。 2 伊入洞內，向上帝吐氣講：只有伊一人向耶和華，今伊欲失去性命。耶和華叫伊出來，欲互伊看著伊的權能，除去伊心內的結。 3 耶和華經過，有大閣透的風，破裂遮個山，拍碎遮個石；風了後有地動，地動了有火。(王上19:11,12) 4 上帝互伊知，伊有氣力保護和看顧以利亞，伊隨時攏通用大風、地動和火，除去追殺伊的人和無忠心上帝的人。 5 耶和華無佇大風、地動、火的中間，伊呣是風神、土神、火神，伊是一切大自然的掌權者。上帝互以利亞看清楚。 6 火了後有細閣輕的聲。以利亞聽見，用外衫罩(tà)面，出去徛佇洞口。有聲問伊，為啥物佇遐？以利亞閣一遍講伊心內的結。 7 上帝已經顯出伊的大權能，回答以利亞，雖然伊一時袂曉悟。 8 若準大風、地動、火表示上帝的權能、受氣，細閣輕的聲代表伊的憐憫、體貼和慈愛。伊互以利亞吐氣，除去心內的結。 9 耶和華繼續復倒以利亞的信心，講：倒去曠野，用油抹新的亞蘭王、以色列王，歹的亞哈政權欲受除去。伊有留700個屬伊的人，呣是只有以利亞一人。閣用油抹以利沙，來續接伊。         咱有時會厭𤺪(ià-siān)、失志，上帝聽咱吐氣，閣欲贊咱、復倒信心。

          耶穌閣活以後50日，聖神降臨，開始「教會的時代」。 1 耶穌在世3冬傳天國的福音，閣𤆬 12個使徒，用心教𪜶。 2 閣活的耶穌，用濟濟證據，互使徒看見，續講論上帝國的事，開𪜶的心竅，互𪜶閣卡明白聖經，伊應允聖神欲來到(徒1:3-5) 。 3 主最後吩咐，著傳福音到地極。閣活40日後，有雲接伊上天。 4 主耶穌應允的聖神，佇伊上天10日後降臨(徒2:1-4) 。 5 借著聖神，學生得著能力，四界傳福音，開始「教會的時代」。          佇五旬節，耶穌的學生得著聖神充滿(徒2:14-36)。 1 耶穌上天以後，學生聚集祈禱，聽(thèng)候聖神降臨。 2 五旬節的期，對天有聲，親像大風吹，聖神若火的舌，歇佇逐人的頂面。𪜶攏受聖神充滿，開嘴講別樣的腔(khiuⁿ)口(徒2:4) 。 3 真理的聖神充滿彼得，感動伊對守節的猶太人講，這是先知約珥講的聖神降臨，閣耶穌是大闢的詩所講，上帝互伊閣活的救主。 4 彼得苦勸眾人，著救家己脫離這個邪的世代。         彼時，彼得受聖神感動，徛起來對外國倒來的猶太人按呢講： 1 𪜶用遐個猶太人的土腔講上帝的事，呣是酒醉，是應驗先知約珥(jíⁿ)講的：我的神降落…恁的查某囝欲做先知講話…(珥2:28-32)。 2 猶太人攏知耶穌行逐款的權能、奇事，及神蹟，其實是出佇上帝。 3 耶穌的死，是因為上帝的旨意，以及人的歹，攏是上帝代先定著。 4 大闢的詩有讖(chhàm)語耶穌閣活：伊無將我的靈魂放下佇陰間；亦伊的肉體無抵著朽爛(詩16:10)。 5 大闢的詩亦讖語耶穌上天：主給我的主講：你坐我的大旁，聽候我互你的對敵做你的腳踏椅(詩10:1)。 6 猶太人所釘佇十字架的耶穌，上帝已經設立伊做主，做基督。         遐個猶太人心刺鑿，彼得給𪜶講：”著反悔。受洗禮、互罪得赦免、閣受聖神。”世間人佇五旬節得著的上大禮物是聖神，伊欲踮人的內面，互人順趁上帝的律例和法度，無趁世俗(結36:27)。