2022-10-2 倒旁喙䫌(chhuì-phoé)互你搧

 

 

    太5:38-44講咱抵著暴力，著擒(khîⁿ)牢真理，閣無恬恬(tiām)。
1 「恁捌(bat)聽見有話講：目睭賠目睭，喙(chhuì)齒賠喙齒。(5:38)
2 若是我給恁講，莫得及歹抵敵。若有人搧(siàn)你正旁的喙䫌 (phoé)，倒旁的亦越互伊；(5:39)
3 有人愛告你，提你的內衫，外衫亦放互伊；(5:40)
4 有人勉強你行一里，就及伊行二里；(5:41)
5 對你求的，互伊；欲給你借的，莫得越走。」(5:42)
6 恁捌(bat)聽見有話講：著疼你的厝邊，怨恨你的對敵。(5:43)
7 若是我給恁講，對敵恁的著疼𪜶，窘逐恁的著替𪜶祈禱。(5:44)
    用正面的態度看"目睭賠目睭，喙齒賠喙齒"(出21:23-25)。
1 這條律法呣是互個人來報仇(利19:18)，伸冤、報應在佇上帝(申32:35)。這句話是互審判官參考，呣通過頭判刑。
2 傷害者：人因為我失去目睭，我用我的目睭去幫贊，互伊看見。
3 受傷害者：呣通報復，呣通用歹佇傷害我的人(太5:39)
    耶穌提出三個例，互咱知萬事著出佇疼、靈巧運用。
1 根據猶太人的文化，用正手搧對方正旁的喙䫌(手勢無順)，是欲給對方洗面、侮辱。對象是奴才、囡仔、弱勢的婦女。
2 倒旁喙䫌越互伊搧，是欲互伊知，抵抵(tú)伊搧正旁，及對象攏呣對。
3 人用衫去當，日落著還伊，互伊通蓋(kah)咧睏(申24:12-13)，散赤(sàn-chhiah)的猶太人的外衫，亦是暝時崁(khàm)身軀的被。
4 放棄外衫，是欲互對方知，伊若提去，就違背猶太人的律法。
5 羅馬政府的官和兵，有權命令猶太人替𪜶提裝備行一里路。
6 人袂當抵擋政府，"行二里路"是欲互𪜶(in)知，𪜶的權有限制。
7 咱無去和歹人、政府對敵，著有智慧，佇不義的環境中，用非暴力的態度、方法，轉踅(se̍h)世界，顯出上帝的公義。
    怨恨對敵，是猶太人傳的，呣是聖經的教示。佇豺狼的中間，著有智識若蛇(太10:16)，呣是若羊無抵抗。總是做啥物，攏著有疼。