Taigi 讀聖經

      倫理學是用來討論善惡的道德原則，"無講白賊"和"講白賊"來救人是互相衝突的道德問題，下面是處理衝突的六種方法。 1 無原則論：完全個人主觀做決定，"講白賊"無對、抑是呣對。 2 一般論：無講白賊是原則，呣是絕對真理，為著救人通講白賊 3 處境論：只有一個道德原則"疼"，若出佇疼"講白賊"，就是對。 4 無條件絕對論："講白賊"就呣對，設使會"救人"，也袂使。 5 相抵絕對論："講白賊"來救人和"無講白賊"的道德原則相衝突，莫守卡輕的"無講白賊"的原則，著"講白賊"來救人(雖然犯罪)。 6 分級絕對論："無講白賊"和"救人"的道德原則攏著守，衝突的時，守卡高的原則"救人"，犯著"講白賊"卡低的原則算無罪。     無條件絕對論，就是完全順趁真道，普遍受基督教界接受 。 1 咱若有一遍講白賊，以後別人呣知敢通信任咱。因為上帝是聖潔，無講白賊，咱才會相信伊，伊也要求咱著老實(利11:45)。 2 莫得講白賊(西3:9)是論說性(講道理、命令、規定)的經文，是真理、著守；總是故事，歷史、事件記錄，袂當看做真理。     用無條件絕對論的"著守所有的道德律"，來解讀歷史事件 。 1 但以理祈禱上帝，伊的三個朋友呣拜金像，𪜶趁上帝的律法，無守王的命令。𪜶盡本分，其他交託上帝，上帝有救𪜶。 2 亞伯拉罕驚人為著搶伊的媠某來刣伊，二遍講撒萊是伊的小妹。伊無白賊，對無相關的人只有講部分的事實。 3 撒母耳藉獻祭的機會去膏大闢，互掃羅無起僥疑。對歹人，伊猶原無講白賊，亦無必要將所有的代誌傳出。 4 產婆敬畏上帝，無照法老王的命令，互希伯來查甫嬰仔死，上帝好款待𪜶。法老問，𪜶應講：猶未到，嬰仔已經生啦。上帝袂贊同白賊，總是產婆憐憫人，上帝因為按呢亦憐憫𪜶。     上帝的法度著完全守 。倫理學提供判斷善惡的方法，懇求聖神賞賜智慧，互咱對現今的倫理問題，行出上帝看做善的。

      奧古斯丁(Augustine)一生若保羅，伊接受主以前並無心安。 1 伊真巧、有才情，綴主以前順趁肉體的情慾，過奢華的生活 。 2 伊受著一本哲學冊的影響，決心一生欲揣求智慧，追求真理。 3 上先摩尼教吸引伊，𪜶認為善惡是對立的萬世原則，靈魂對善來，肉體對惡來，犯罪對惡的原則來，人無需要負道德責任。 4 影響上大的Plato學派講，惡善攏是非物質，上帝是善的本源。 5 最後伊到米蘭，抵著一個有才調、學術飽、虔誠正直、𠢕講道的天主教主教Ambrose，伊聽伊講道，亦開始研究聖經。 6 聖經解除伊對宇宙、善惡、罪的疑問，閣上帝是袂變的真理。 7 佇朋友米蘭的花園，伊得著完全的改變。當時伊和朋友作伙讀聖經，伊的心忽然受感動，目屎直直流，伊去仆倒佇一叢無花果樹腳。伊的嘴重複念：主啊，欲等到抵時？求你無記念我過去的不義，除去我一切的罪。忽然伊聽見囡仔的聲重複講"提起來念！提起來念！"伊想，這是主的指示。伊翻開聖經，看著羅馬書13:13-14："所行著端正，莫得放縱酒醉...著穿主耶穌基督，莫得為著肉體圖謀..."這就是伊的狀況和互伊的藥方。 8 得著上帝的光照，伊決心綴耶穌。伊倒去非洲開修道會、寫冊。佇思想上，伊是對保羅到馬丁路得中間，上有影響力的人。     今仔日，咱比奧古斯丁抵著閣卡濟的引誘，亦僫(oh)得安歇 。   1 猶原重視肉體的享受，親像情慾、娛樂、宴會。 2 為著滿足慾望和安全感，拼命追求地位，積貯財富。 3 時間用佇電子批、社交媒體、好耍的程式、發布消息、分享。     咱著守主安歇的命令，伊是安歇日的主 (太12:8)。奧古斯丁佇主內面得著安歇，重新出發，咱亦著學習安歇的功課 (1)無論抵時，通揣時間歇睏，抑是一禮拜至少歇一日，放落空課，做互靈魂得著精英，性命恢復活力的代誌 (2)佇這時間，感謝上帝的賞賜，享受吃物，和親人做伴、朋友相交陪，重新得著氣力。

        上帝是疼，無疼的，呣捌上帝 (約壹4:8) 1 聖神給上帝的疼灌沃咱的心(羅5:5)，除非上帝先疼咱，咱無可能去疼伊(約壹4:19)。疼是上帝的恩典，呣免去買。 2 上帝疼不義的，除去𪜶的不義；疼病人，互𪜶得康健(結 33:11) 3 上帝疼咱：伊將獨生囝賞賜咱，為咱死，互咱得著永活(約3:16) 4 無疼上帝的，就是外人，是對敵基督，有可能就佇教會內。     有疼，然後做你想欲做的 (聖奧古斯丁約壹4:4-12的講章) 1 有疼，閣會做歹人，是無可能的。 2 有疼的根佇你內面，你干單會出好果子，袂產生歹的。 3 若準你是出佇疼，你通保持恬靜；仝款，你通對人嚴肅、苦勸別人、和人分享、抑是喉叫，若準你是出佇愛。 4 疼心的行為著主動，呣通驚驚呣敢做，抑是認為是見笑的事。 5 呣通認為無責罰奴僕就是疼伊，無管教就是疼囝，無責備就是疼厝邊；這呣是疼，是軟弱(希12:6)。疼人，呣是吞忍錯誤。 6 著疼上帝創造的，呣是人造出來的。     咱敢看會著疼 ？ 1 呣捌有人看過上帝(約壹4:12)。伊是看未著的，著用心目去看。 2 清氣心肝的人有福氣，𪜶欲看見上帝(太5:8)；人的心目常常互世間茫霧遮閘，只有心清，才會看見上帝的榮光和伊的作為。 3 咱僫得想像上帝的形象，伊是全知、全能，超越時間、空間，遍滿全宇宙。減采咱通按呢講：上帝就是疼。 4 咱欲怎樣去形容疼？真歹形容！總是，疼有腳，伊給人𤆬到教會；疼有手，伊援助散赤人；疼有目睭，伊互咱看著有欠缺的人；疼有耳仔，伊互咱聽著福音；有疼的人會看著這全部。     有疼，然後做你歡喜的 ；這是佇上帝的疼內面享受的自由，你所做的會利益人，閣榮光上帝。受過上帝的疼感化的靈魂，袂去傷害互你疼的人，你會去幫贊𪜶、保護𪜶，閣歡喜去做。

        弗4:2-16講，信徒著佇聖神內面合一。 1 互相謙遜、溫柔、吞愞、寬容、和平，佇聖神內面合一(4:2,3)。 2 教會、聖神、向望、主、信、洗禮、上帝，攏只有一個(4:4-6)。 3 逐人所得著的恩典，是照基督量互咱、恩賜咱的份量(4:7)。傳福音的、牧師、先生 (1)互聖徒齊備，起造基督的身體 (2)互眾人合一，信上帝的囝，做完全人，得著基督的充滿 (3)眾人無閣互異教的教示，人的詭計，離經的法術來欺騙(4:11-14)。 4 踮仁愛、講話真實，佇萬項漸漸長大，到佇咱的頭基督(4:15)。 5 做完全人，咱會和眾人相結合、相接應，佇仁愛家己起造(4:16)     信徒會當合一，因為咱有相仝的信仰基礎，閣主踮佇咱內面 。 1 基礎：有仝(kâng)款的主、洗禮、上帝等，閣只有一個。 2 各人修養：有仁愛、和平、謙遜等等的好德性(合一的疼)。 3 需要學習：上帝設立先生等等，來幫贊，互信徒齊備。 4 著繼續生長：踮佇仁愛，講話真實，學基督，日日進步。 5 老練：逐項照聖經的教示，百體相應答，佇仁愛相起造。     著分別呣信的、假信徒，無仝的性命袂當合佇一個身軀 (弗4:3) 1 著和呣信的分別，因為義和不義，光和暗，並無相通(林後6:14-17) 2 信徒著持(tî)防假先知(太7:15)、假先生(彼後2:1)、假兄弟(加2:4)     著照聖經的教示，佇基督的內面合一，呣是組織上的合一 。 1 天主教和其他教派合一並無適當。天主教真濟教義並呣是出佇聖經，親像拜基督受苦和瑪利亞的像，向聖徒祈禱，算珠唸經滅罪，告解(神父給懺悔的赦罪)，積功德赦罪，煉獄受苦贖罪等。 2 天主教想欲和Islam合一不可取。因為著放棄基督教的真道，親像上帝為人備辦救贖，基督是上帝和人中間唯一的中保等。     合一呣是給教會無仝的教派統一起來 ，教派猶原通保持特殊的看法，總是佇聖神內面合一。當咱互性命的真理來引𤆬，活出主的心意，就欲得著主所賞賜的完全和合一，親像天父及聖囝合一。

       人若清氣家己 (清潔)，脫離遮個( 悔 改)，就欲做貴器的器具(換新)，成聖(重頭生)，合佇主人的路用(無瑕疵)，便便(準備好)通做逐項好的事(榮光上帝)(提後2:21)。 1 著閃避私慾來清氣家己(提後2:22)，親像肉體的、目睭的私慾，及人生的驕傲(約壹2:15-17)，脫離遮個就欲成做貴重的器具。 2 成做下賤抑是貴重的器具是在佇家己。 3 咱著做貴重的器具，聖潔，合主用，隨時聽候，互主用。 4 便便通做逐項好的事，表示準備妥當，隨時把握機會來行動。     著學習聖經，做好的準備，才會做好的工 。 1 聖經是上帝默示，有利益佇教示、督責、互人歸正、引𤆬人學義理，互服事上帝的人練達，便便來行攏總的好事(提後3:16,17) 2 教示：正確的教訓，出對聖經上帝的話，教會著重視教育，學習聖經才會捌真理；親像嬰仔聽父母講話，才會曉講。 3 督責：上帝的話是一面鏡，照出人的錯誤；聽趁活命的責備的，欲有智慧(箴15:31)。著謙卑，領受聖經的責備。 4 歸正：正路只有一條，呣知正路，就會行斜，也袂當引𤆬人。 5 義理："學習"公義，就袂受迷惑，閣應用來"行義"(約壹3:7,10) 6 有利益：聖經的話有時刺鑿咱的心，這攏是對咱好閣有功效。 7 練達：悔改歸正的人，著通過逐日的行動，才會成做習慣，成做品格、本能。聖經互咱建立信心及得救的智慧(提後3:15)。 8 行好事：好事呣若鋪橋造路，是守上帝的誡命，做伊看做正的事，就是替眾人求、祈禱、感恩、祝謝(提前2:1)；無論得時不得時，著專務傳道理；用百般的寬容、教示，來責備、警戒、勸勉(提後4:2)。無傳別號的教，無愛聽無影跡的話(提前1:3,4)     著逐日用聖經來裝備家己 。學習真理，就會明白咱的錯誤、看出咱的罪性，來督責家己，來歸正，過公義的生活。按呢掠聖經做咱行事的準則，就欲練達，便便來行攏總的好事。

        公義互邦國升高；見有罪惡的，百姓受凌辱(箴14：34)。國家若遵守上帝的法度，欲得著興旺；公義著實現佇司法、經濟、民生、生命和自由的人權等等。國家若無行公義，百姓袂免得會受苦。     2020年到今，美國出現真濟亂象 。極端份子偃倒美國歷史人物的雕刻像、放火、撞破店面、搶劫，法院無照公義審理案件，代表人民的國會竟然需要金屬籬笆、兵仔顧守，無仝的聲音受媒體封殺，政治對手受逼害。傳統價值受挑戰，政府、人民失去互相信任。     聖經講，政治權力對上帝來，上帝欲照公義、審判世間人 。 1 萬物攏出佇上帝，倚靠伊，歸佇伊(羅11:36)，權力也攏出佇伊。 2 有權柄的、攏是對上帝出(羅13:1)，得照上帝的真理及公義行。 3 掌權的受上帝差用，伸冤、刑罰歹人(羅13:4)，來維持社會秩序。 4 著順趁上帝過頭佇順趁人(使5:29)。因為世間權力無攏是公義。 5 上帝欲照公義、審判世界，照伊的正直、審判列邦(詩98:9)。     基督徒、教會對政治應該有的態度、看法 ： 1 好的政治：是認捌(bat)、相信、順趁上帝的真理來行。 2 關心、參與政治是人的責任：上帝互人治理地上萬物(創1:28)。 3 基督徒有責任：因為𪜶卡明白上帝的真理，閣政治影響人上大。 4 魔鬼是世間的王：控制地面政權，甚至上帝的百姓(約壹5:19)。 5 基督徒的團體：袂當代表教會，咱也無義務支持基督徒政治家。 6 基督徒參與政治是服務：呣是欲改換人的心、拯救靈魂、傳福音。     建立公義的政治，教會和基督徒通採取的做法 ： 1 做無通指責、有見證的基督徒：佇逐個職場，見證閣利益社會。 2 傳講、保護人性價值及性命的真理：互伊成做社會基層文化。 3 給公義寫入國家的法律及制度：為國家社會帶來實質的改變。     照上帝的法度，才會建立公義的邦國 。民主政治是照上帝的法度來制訂，用憲法、選舉的制度，來保障人民有平安、自由、財產、生活的基本權利；總是，執政者著有"疼"，人民才會得幸福。

            約6:5-13記載 眾人 跟綴耶穌上山，伊問學生怎樣互𪜶吃飽。 1 濟濟人就近耶穌，伊試腓力：咱欲對叨落買餅來互𪜶食(6:5,6)？ 2 腓力應講：用二百個銀仔買餅，亦無夠互逐人得著淡薄(6:7)。 3 安得烈講：有一個囡仔帶5個餅、2尾魚，總是人濟無夠食(6:8,9) 4 耶穌講：恁教許個人坐。提餅、魚，祝謝了，就分互眾人(6:10,11) 5 食飽。耶穌講：拾食剩的餅碎，免得拍損。𪜶拾滿十二筐(6:12,13)     主耶穌利用機會，互學生相學習 ，做代誌著積極、有信心。 1 耶穌看遐的百姓，親像羊無牧者，憐憫𪜶的精神及肉體的欠缺。 2 天烏，耶穌知影眾人枵餓，問腓力，通對叨落買餅互眾人吃？ 3 主試驗腓力，敢有用信心，頂(tíng)真來處理代誌，服事眾人。 4 腓力巧閣實在，伊估計人數，算出偌濟銀，也無夠逐人食淡薄。 5 腓力只有看著現實的困難，伊認為無論偌濟錢，攏袂解決問題。 6 安得烈的做法，互腓力知，著用信心面對問題、解決問題。     主耶穌用囡仔的5個餅2尾魚，互 五千人 攏食飽 。 1 甘單5個餅、2尾魚；安得烈相信，主耶穌會解決問題。 2 囡仔無保留，奉獻所有，主藉著這，成大大的代誌。 3 上帝寶惜咱的奉獻，無論時間、才調、金錢，抑是人看是細的。 4 濟濟人有蹛食物，只有囡仔挈(khe̍h)出來，有聽入主的教示。 5 囡仔照伊的感動做，心無詭詐、掩勘，無保留，比大人真實。 6 主耶穌講，若無越轉，做親像細漢囡仔，決斷袂入天國(太18:3) 7 著欣慕上帝的話：眾人捌三日無食物，聽耶穌的教示(太15) 8 著惜上帝的賞賜：偆的拾12筐，教示咱著惜主的賞賜，無拍損。 9 著傳上帝的福音：分享福音，互別人通領受、得著救。 10著仰望上帝的祝福：伊祝福咱的付出，閣運用，超出咱的想像。     5個餅2尾魚雖然少，但是出佇憐憫、分享、感恩，主無看輕 。 1 看著有欠缺的，頭無越走，憐憫相分享，若家己有欠缺，這是疼。 2 回應主耶穌的疼，憐憫和人分享，無論大小，主欲互伊有大功效。  

      「忽略的罪」就是無去做應該做的代誌 ，和作歹相仝是邪惡。無給邪惡認定做邪惡，咱就是祝福伊、認定伊是善良！     上帝責罰以利的家 。以利做以色列人的祭司，伊的兩個囝濫摻使用祭司的權力，所以上帝另外設立撒母耳做先知(撒上2-4章)。 1 伊的囝搶百姓獻互耶和華的禮物，閣私通會幕前做工的婦仁人。 2 以利責備伊的囝，互耶和華的百姓犯罪，總是也無禁止𪜶。 3 上帝講：我bat講你的家欲永遠佇我面前；總是今我決斷呣按呢。 4 以色列人戰輸非利士人，以利兩個囝攏死，伊跋倒、頷頸折就死。     以利犯著忽略的罪 。伊知影著「約束」家己的囝，但是無去阻擋，所以上帝追究𪜶的責任。聖經另外有講犯著忽略的罪的例。 1 綿羊、山羊譬喻中，無提供食物和水互枵、嘴乾的人(太5:31-46)。 2 好的撒瑪利亞人故事中的牧師和利未人(路10:30-37)。     為啥物「應該做的」咱無去做 。「忽略咱的責任」？ 1 認為罪只是個人和上帝中間的「私事」，和其他的代誌無關聯。 2 認為聖經所講的使命，干單是𤆬人信耶穌若定！ 3 對舊約聖經中，上帝要求先知宣布的社會公義，理解不足。 4 無了解上帝的救恩是全面的，包含政治、經濟、社會及屬靈上。 5 對個人以外的公共事務，無關心、無行動。 6 驚個人、家庭受著困擾、威脅，因為社會邪惡的勢力。 7 認為這是系統性、社會構造的問題；親像流浪的人、種族主義等。     主耶穌責備掌權閣濫糝使用權力的猶太人 ，追究𪜶的責任。 1 今仔日，掌權的媒體、政治家、宗教機構，攏著承擔責任。 2 教會著做見證人，互公、私機構和宗教領導者對使用權力負責。    呣對的代誌，知影閣去做，就是刁工犯罪 ，親像同性戀、離婚。注心佇個人得救，無其他的行動，閣向望會轉化社會，是噁(oh)的。有佈道、無社會行動，抑是倒反，攏是做一半，或者攏犯著「忽略的罪」。上帝看人的內心，咱留互上帝來做決斷。

                                                                感謝Trump為正義出力     中共是全人類的威脅 。二戰結束，刣贏太平洋戰爭的美軍，委託蔣介石接受台灣的日本兵投降，蔣介石政府趁這機會佔領台灣。舊金山對日本和約，日本放棄台灣主權，但是無說明台灣歸屬。2020年起，中共為著佔領台灣，派出軍機、船艦威脅，愈來愈嚴重。中共閣威脅全世界，佇逐國偷技術、搶資源，控制別國的經濟、政治。     主耶穌講著為真裡來戰 。伊佇山頂寶訓強調受苦、忍耐、及世俗分離，無暴力，無條件、犧牲的疼，來化解冤仇。伊也講： 1 我來就是㧒(hiat)落刀劍(太10:34-36)。真理來、欲有衝突。 2 有利劍通用來拍列邦(啟19:15)。欲進入千禧年，會有戰爭。     對舊約中的記載來看，基督教並呣是反對戰爭： 1 約書亞佇上帝的直接帶領，攻佔耶利哥城，最後佔領迦南地。 2 詩篇有真濟是為戰爭的祈禱，祈求上帝引𤆬及勝利(詩 144:1)。 3 上帝互以色列人佇戰爭中，對遐個充滿罪惡的國家施行審判。 4 當以色列拜偶像、社會無公義，上帝興起軍兵來攻擊𪜶。     奧古斯丁認為戰爭是為著和平及公義 ，「正義的戰爭」著愛有： 1 正當性：是和平和自衛，呣是侵占、報復、種族冤仇、經濟搶奪。 2 戰前的努力：外交談判、經濟制裁、聯盟催逼等攏失敗，才通用。 3 合法的發動者：只有政府有權，其他個人和組織攏無權發動。 4 解決問題的信心：確定會達成目標，好處超過戰爭帶來的痛苦。 5 合理的手段：無搶奪、屠殺、燒厝、傷害非軍事人員和平民。     有今仔日的世界，是因為有為著正義、和平、人權來戰 。 1 歐洲人若無抵擋穆罕默德的軍兵，受征服，基督教就滅無。 2 新教徒無對抗羅馬天主教、異端裁判的迫害，新教就滅無。 3 美國殖民地住民無為自己的權利來戰，就永遠袂得著獨立。 4 第一、二次世界大戰，美國上尾也加入，戰爭才收煞。     和平是爭取、奮鬥得著的 。和平呣是吞忍，甘願做奴才、受刣。欲抵擋殘忍的強權，全民認同和軍事實力是必需的。

        PC(USA)簡略信仰說明：佇這破碎閣通驚惶的世界，聖神互咱勇氣，掀開教會和文化中的偶像崇拜，為正義、自由及和平拍拚。     主耶穌佇福音書的角色、及宣教的就任式 ：(1)馬太福音：有權威的先生、山頂的教示開始 (2)路加福音：滿滿的同情心、宣布敁(tháu)放受掠、受壓制的來開始 (3)約翰福音：互人豐富的性命、對迦拿的婚禮筵席開始 (4)馬可福音：宣教、迦百農的會堂開始。     主耶穌佇公開宣教以前，就和世界的王(魔鬼)爭戰 。馬可福音講，伊先去曠野，佇遐和壓迫、毀滅人類生活的撒但，進行真理和邪惡的鬥爭。公開宣教的就任式以後，抗爭馬上就來(可1:21-27)。 1 主耶穌佇安息日入會堂教示人(1:21)。 2 伊的教示有權柄(1:22) - 經學士干單用拉比的話、來顯權威。 3 會堂內，有一個患著鬼的喉(âu)叫(1:23) - 主講道受攪吵、阻擋。 4 你來欲滅阮嗎(1:24) - 主的權威，邪神感受著，伊的王國受威脅。 5 阮及你甚麼干涉(1:24) - 𪜶背叛上帝，無閣有關係，莫來插伊。 6 拿撒勒人耶穌...上帝的聖者(1:24) - 稱呼主的身分、來迷惑伊。 7 你著靜靜(1:25) - 主呣准邪神講靈界的代誌，命令伊嘴合起來。 8 邪神抽惙彼人，大聲叫，就出去(1:26) - 邪神呣甘願、也著走。 9 眾人卬愕...是新的教示(1:27) - 𪜶敬畏、驚惶、想法受轉踅(se̍h)。     有正義出現，邪神受壓迫，就欲有衝突、爭戰 。 1 倒反(péng)來講，有亂象，或者就是因為有正直、正義的出現。 2 連二冬，咱的健康受威脅，種族、政治問題浮出，真理受挑戰。 3 這亂象，减采就是邪惡勢力、驚惶會受剪除、所發出的倒彈。     求聖神賞賜咱氣力，來除去偶像崇拜 。偶像崇拜就是：看無別個族群、貪無正當的利益、無聽人民的聲(反正義)，採取暴力(反和平)，壓制言論、弱勢(反自由)。     雖然邪惡暫時縱橫，求主憐憫，互真理閣著現 ；也互這塊土地的住民，閣一遍醒悟，用基督的疼心、來相款待。

      行洗禮的約翰傳講悔改、認罪、赦罪的洗禮(可1:4)。伊 1 佇曠野大漢：無受文化、宗教、政治影響，是思考和準備的所在。 2 生活樸素：穿駱駝毛，腰縖皮帶，食草蜢及山野的蜜(可1:6)。 3 行洗禮："通猶太地"及"耶路撒冷"的衆人出來受洗、認罪(可1:5) 4 謙卑：講，一個慢我來、比我卡有權的，我敁伊的鞋帶也袂堪得。     行洗禮的約翰 親像舊約的先知 ，發出警告國家社會的聲。 1 伊猶未出世，聖神已經開始佇伊的生命作工(約1:39-44)。 2 主耶穌講：約翰就是欲來的以利亞(太11:14)。 3 約翰干證講：主耶穌是上帝的羊羔，擔當世間的罪的(約1:29)。 4 約翰干證講：主耶穌是上帝的囝、用聖神行洗禮的(約1:32-34)。 5 責備虛假：指責法利賽人和撒都該人，虛假的儀式、假的悔改。 6 譴責罪惡：責備希律娶伊的兄弟的某希羅底，致到受刣。     信仰自由，是早期美國移民所追求的 ；𪜶建立的國家，人民做主體、聽人民的聲。成做多元文化以後，繼續這款的精神，接受無像的見解(言論自由)，總是猶原堅持共同的傳統、價值觀，這是美國繼續向前走的活力和動力。     利益者、暗黑勢力不時圖謀控制這個社會 ，𪜶無照顧人民，若有正義者出來改革，伊會受迫害；總是伊的犧牲，會互人醒悟。     毀滅性的病毒改變咱的社會 。一冬來，這個病毒掀開社會受掩勘的現象、人性的黑暗面，種族、階層的偏見。暴力、貪心的利益者、黑暗勢力破壞咱共同的生活、閣上帝所創造、媠的事物。     約翰所傳的悔改、認罪的洗禮，今仔日猶原給咱講話 。 1 悔改，性命才會改變，影響、改變社會才有可能。 2 悔改，才會互性命重新歸向上帝，復倒到疼和正義。 3 懇求上帝賞賜勇氣，互咱和正義徛作伙，托(thuh)破歹人的計謀。     主耶穌謳咾行洗禮的約翰 。伊雖然無行過一件神跡(約10:41)，總是，婦仁人所生的，未有卡大佇伊(太11:11)。

    人啊，伊捌(bat)指示你甚麼是好 。耶和華愛你甚麼？獨獨愛你行公義，心存憐憫，謙卑及你的上帝相及行(彌6:8)。     彌迦書責備許個做頭的：𪜶怨恨公平，枉屈正直；首領和官長為賄賂來審判；祭司為著工錢來教示；先知為著銀來占卜。𪜶猶久倚靠耶和華，講：耶和華豈無佇咱中間嗎？災禍無臨到咱。     行公義是人回應上帝的指示。選舉就會出現奇怪的現象 ，2020年選舉就是。白宮顧問Peter Navarro根據幾若個州議會證人的證詞、法律中心和專家的分析、影片和相片，提出「六個選舉違法的行為」的報告。伊對六個搖動州(swing state)的犯法行為，整理出六類：投票作弊、無正確處理選票、程序無合州規定、違反平等保護法條、投票機做假和無正常算票。投票作piah包含大量出現假選票、烏絲、死人投票，重罪犯投票，一票多次計算。     大選有遮濟奇怪的代誌，司法系統呣願出面調查，國會也真少人出聲。國會、司法的超然、公正性、擔當性，互人憢疑。     美國採取政治、宗教分離的體制，信仰屬佇個人的代誌，公眾事務實施民主體制。美國早期移民信仰基督教，雖然政治、宗教分離，基督教信仰直接影響政治，促進社會公義的實現。     漸漸美國新移民增加，成做「多元文化」的國家。基督教也失去主流的地位，只有間接影響公眾事務。教會所主張的社會公義，也無互社會所有的人認同、接納，教會也理所當然無閣出聲。     2020年的選舉，是民主和社會主義的選擇 。投票煞，出現無正常的現象，總是教會保持中立的態度，恬恬無出聲，甚至反對憢疑選舉的正當性。只有一寡有正義的人，出來干證，講出發現的欺騙，也有人出力分析算票過程的記錄，來揣出真相，也有勇敢作汙點證人，閣有濟濟人出來和平遊行，要求國會、司法，主持公義、揣出真相。     美國是自由和民主的燈塔 ，總統的政策影響美國的未來，也影響整個世界。求上帝施恩，互公義行佇這塊土地。