2023-3-12 上帝的眷顧綴伊的旨意來

 

    上帝定著逐人一個計畫。伊應允咱一生有伊的眷顧、攝(liap)理(provision)相綴(tòe)，互咱有能力有才調，完成伊互逐人無像(siâng)的計畫。
1 咱猶未(iáu-bōe)出世，上帝已經給咱的計畫寫佇伊的冊(詩139:16)。
2 上帝的信實，欲成伊應允的計畫(詩100:5)。咱需要的特質，到時就造佇咱身上(詩139:13)，閣佇咱的一生，安排經歷的逐坎站(khám-chām)，安排受造就的機會，來成伊的計畫。
3 當咱順服、信靠伊，就欲成伊佇咱身上所計劃的。
    上帝揀選摩西，互伊𤆬(chhōa)以色列人，去到應允的迦南地。上帝互伊有才調通𤆬眾百姓，有智識通教怹(in)遵守上帝的律法。
1 40歲以前：摩西佇王宮受教育，學習埃及人攏總的學問，講話行代誌攏有才能。為著正義，伊拍死欺負希伯來奴才的埃及人。
2 以後40冬：伊佇山裡顧羊，培養著謙卑、溫柔的個性。等待伊的性地改變，上帝佇𤏸(to̍h)火的刺柿(phè)中，召伊出來救百姓(出3-4)。
3 最後40冬：𤆬以色列人離開埃及，40冬佇曠野，直到咧欲(teh-beh)進入迦南地。伊教怹守律法，設管理制度，做好入應允的地的準備。  
    上帝欲互世間人知，伊的念頭呣(m̄)是咱會測度(to̍k)(賽55:8-9)。約伯問"歹代汰會發生佇好人？"上帝講，伊有至高的主權(羅9:15)。
1 約伯好額，伊完全閣正直，敬畏上帝，離開歹代(伯1:1)。
2 忽然，佇一日內伊失去所有的財富、囡仔。雖然大扒腹(pek-pak)，伊深信一切是上帝賞賜，上帝有權提倒去(伯1:21)。
3 後來，伊對腳到頭生毒瘡受拖磨，伊的某講：棄絕你的上帝，來去死。伊回應：咱對上帝受福氣，豈無對伊受災禍嗎？(伯2:10)
4 伊的朋友和伊辯論，怹認為伊一定有犯罪才會受刑罰；伊相信上帝的信實，堅持家己無罪，總是愛知歹代汰會到佇伊(伯13:15)。
5 最後上帝給約伯講，伊造萬物，怹的性人閣呣知，何況(hó͘ng)其他的事(天頂的)，約伯謙卑講，伊講伊所呣知的代誌(伯40:15-42:6)。
6 上帝閣一遍賞賜伊財產、囝兒(伯42:10-16)。咱若順趁(thàn)上帝的旨意，佇試煉中信靠伊，就欲閣卡體會伊的大權能(伯42:5)。