2023-3-26 腓力的固執和轉變

 

    耶穌佇地上做三件非常重要的代誌：
1 傳福音：包含傳道、醫病、趕鬼，互地上體驗著天國的實際。
2 訓練學生：(1)呼(kho͘)做團契，傳授真理知識 (2)做互怹(in)看，互怹體驗真理 (3)實習，派學生出去宣教、醫病、趕鬼 (4)事後檢討。
3 為世間人贖罪：伊為咱死、閣活，互死無閣掌權。
    為著訓練學生續接伊傳天國的福音，耶穌用伊的行做互怹學。
1 認捌家己：伊知影家己降世的目的、身份和使命。
2 積極行動：伊無嫌苦，四界傳道、醫病、趕鬼；最後閣上十字架。遮個行動表明上帝對人的疼，也顯出上帝的權能和榮耀。
3 和人和睦：(1)伊拍開心門，和人分享伊的憂傷，互人感覺自在和信任 (2)伊坦白對四圍的人，無論是知識份子、貪官、妓女，怹攏歡喜來綴伊 (3)伊和怹做伴，為怹祈禱、服事怹。
    腓力是實用主義者。伊熱心，追求真理，無合理氣就無接受，致到受束縛(pa̍k)，有時躊躇，有時看著負面，無積極去解決問題。
1 耶穌抵(tú)出來傳道，抵著腓力，給伊講：綴我(約1:43)。
2 耶穌召伊做學生了後，伊隨去報伊的朋友拿但業。伊承認耶穌是應允的彌賽亞，總是不過是“約瑟的囝拿撒勒人耶穌”(約1:45)
3 耶穌行神跡互五千人食飽。伊有先問，欲對叨落買餅來互怹食？伊應講，用二百銀買餅，亦無夠互逐人得著淡薄(約6:1–14)。
4 有耶路撒冷的希臘人愛捌耶穌，伊去給安得烈講(約12:20-22)
5 最後的晚餐了，耶穌講伊會離開怹，會閣來接怹，閣講恁捌我，就亦捌爸，亦捌看見爸，腓力求耶穌用爸互怹看(約14:1-11)。
6 腓力是"水變酒"及"飼飽五千人"神跡的見證人，是耶穌主動召的，亦是三年中暝日做伙的。過頭謹慎，互伊的心目受掩勘(am-khàm)。

7 耶穌閣活的消息，將四散的學生閣呼做伙；伊閣出現佇怹中間，衝擊怹固執的心，一時曉悟主平素講的話。通過祈禱，以及聖神做工，怹攏轉變，勇敢續接先生，四界宣揚天國的福音。