2025-09-28 心合意合 上帝賜福

        保羅所歡喜的，是信徒同心合意。(腓2:2)
1 同心合意的理想境界：同心志，同仁愛，心神和合，心志專一。
2 同心合意的實際：逐人一切的心思意念袂攏相仝，重要的是，心思、意念向相仝的方向和目標。學習同心合意，是逐日的功課。
3 有2、3人同心，奉主的名聚集，天爸欲給𪜶成所求的(太18:19-20)
        逐人無綴(toè)世俗，才會同心合意(腓2:14-18)。

1 這個世界是邪僻橫逆(siâ-phiah-hêng-ge̍k)：世俗用自私的觀點來看一切的真理，引誘人行彎曲(khiau)閣悖(poē)逆的路。(2:15)

2 學習同心合意：逐人講的、做的會有偏徙，莫(mài)埋怨，爭辯、相爭。

3 著同心合意：心思、意念完全相仝是真困難，若保持相仝的方向、目標，向著性命真道，就袂空空跑走，空空著磨。(2:16)
4 保羅和信徒同心：信徒出佇信心的事奉，用信心做祭物，保羅亦歡喜陪伴，雖然著賠命，用家己的血做酒來祭，也甘心樂意(2:17)
5 關心是同心合意的表現：出佇對腓利比教會的關心，保羅差提摩太、以巴弗提就近𪜶。伊互其他教會的批信，攏會向濟濟人請安。
        信徒同心合意，得著祝福。兄弟姊妹相和好，教會成長。
1 耶穌的門徒同心合意：佇目的、疼心和事工頂面合一，認捌家己的身份，知影著做的代誌，疼上帝、疼人，催逼𪜶向前進。
2 耶穌上天了，伊的門徒聚集，同心專務祈禱。𪜶佇五旬節受聖神充滿，講外國語。彼得講道，約3千人信閣接受洗禮。(徒2:1-41)
3 聖神降臨了，信的人聚集，照使徒的教示，相交陪，擘(peh)餅，祈禱，所有的物公家用。謳咾上帝，得救的人日日加添。(徒 2:42-47)

4 尼希米倒去耶路撒冷，帶領百姓專心修理城牆、起城門，無分男、女、祭司、官員，逐個家族、逐款專業攏有份，閣逐人修理厝附近的城牆。雖罔對敵恥(thí)笑、攻擊，𪜶用52日給城牆修好。
        逐人著有基督耶穌的心做心，才會做到心意合一。基督耶穌的心就是，謙卑，順趁天爸，榮光爸上帝(腓2:5-8) 。所以咱著有謙遜的心，真實無假，無通嫌。