Taigi 讀聖經

       路12:49-53記載耶穌用無相仝(sio-kâng)的角度，講伊來世間所欲做的事。 1 我來是欲用火㧒(hiat)佇地裡，火若已經𤏸(to̍h)，我猶(iau)久愛甚麼(12:49)？ 2 我有應該受的洗，彼個洗猶未成，我迫切到怎樣？(12:50) 3 我來，是欲互地上和平嗎？我給恁講，呣是，反轉是冤家(12:51)。 4 今了後，一家五人欲冤家；三個及二個冤家，二個及三個冤家； 父及子，子及父；老母及查某囝，查某囝及老母；大家(ta-ke)及伊的新婦(sim-pū)，新婦及大家。怹(in)攏欲冤家。(12:52, 53)     主耶穌講伊㧒火佇地裡，閣講伊來會造成冤家。 1 火𤏸、閣造成冤家，表示主所傳的福音，挑戰舊的做法和價值觀，已經開始發揮影響力，閣改變是對厝內開始。(12:49, 51-53)。 2 福音和世俗的價值衝突，造成贊成和反對雙方的對立。(12: 51) 3 西面抱嬰仔耶穌，讖語耶穌是以色列人的拯救，閣講：這個嬰仔欲互人跋(po̍ah)倒、亦有人會起來，人欲顯出心內的念頭(路2:30, 34, 35)。 4 主安慰受拖磨的，挑戰權力者，建立地上天國，無和世俗妥協。 5 聖經講：著行公義，心存憐憫，謙卑及你的上帝相及行(彌6:8)。 6 社會有無公義、壓迫、凌辱、苦難，主愛咱徛(khiā)佇公義彼旁、出聲，若是保持中立、恬恬是支持、鼓勵迫害者，閣壓制受迫害的。 7 主呣是愛人放捒(sak)厝裡的親人來綴(tòe)伊，咱逐人著確認主佇咱性命中的地位，堅持追求真道，閣知影綴主著付出代價。     主耶穌講伊有彼個洗猶未成，洗是欲洗去犯的罪。 1 主所講除罪的洗，只有藉著伊的死，無瑕疵(hâ-chû)的獻祭，才(chiah)會達成。 2 耶穌將福音帶來世間，閣欲行十字架的苦路，除去世間人的罪。 3 耶穌最後佇十字架頂講：成啦(約19:30)，因為這兩項攏完成啦。     因為趁聖經的教示，咱減采和四周圍的人會有看法的衝突。 1 為著空課(khang-khòe)的保障，人際關係的和諧，有時咱保持恬恬、中立。 2 主耶穌徛佇真理，抵擋壓迫，伊無驚惶，伊和至微細的徛做伙。 3 靠著上帝的恩典，主耶穌的引?...

    摩西佇申30章勸以色列人，著選擇活命及福氣。 1 看啊，我今仔日有用活及福氣，死及災禍，排列佇你面前(30:15) 2 我今仔日命令你疼耶和華─你的上帝，行伊的道路，守伊的誡命、律例、法度，互你通活啲，加添人額，伊就賜福你欲去的地(30:16)。 3 設使你的心悖謬(pōe-biū)，呣聽趁，閣去拜別個上帝，我今仔日就明明給恁講，恁的確欲滅無；你的日子佇過約但的地，袂久長(30:17,18)。 4 我今仔日叫天叫地對恁做干證；我用生死祝福咒詛排列佇你的面前，所以你著揀活命，互你及你的後裔攏會活啲；(30:19) 5 疼耶和華你的上帝，聽伊的話；伊是你的活命，你的日子久長也在佇伊。互你通徛起佇伊對你的列祖咒誓、欲賞賜的地(30:20)。    以色列人佇曠野埋怨、犯罪，摩西勸新一代著怎樣做來得著活。 1 摩西 經歷 舊的 一代悖逆 ， 耶和華 的疼及責罰 ， 警戒 𪜶(in) 著 受教示 。 2 上帝就是活命，欲得著活命真簡單，就是守伊的誡命、行伊的路。 3 秘密的事屬上帝，總是伊明白啟示伊的律法，活命的路(申29:29)。     咱所揀選的，決定咱的人生。 1 追求物質、財富？權力、地位？性命的價值敢是按呢？ 2 命已經注定，袂當改變？黑暗社會若吼獅，放棄拍拼？ 3 死活是真分明，咱認為咱選著活，總是貪小可的利益敢對？ 4 人生不時會面對引誘、威脅、死亡的挑戰，時時著回應，做選擇。 5 摩西的苦勸，幾若遍用「今仔日」，表示揀選性命是迫切的代誌。 6 選擇在佇咱：亞當夏娃聽蛇的話，摩西愛以色列人揀活命，耶穌愛尼哥底某揀重頭生，約翰愛咱綴上帝的囝得活命(約壹5:12)。 7 埃甸園有活命樹和善惡樹，上帝愛亞當夏娃只有吃活命樹的果子。 8 啟示錄講：人最後呣是佇新耶路撒冷(永遠活)，就是入火湖(死亡)。         勞苦的做穯(sit)人，孤單的老人等等，遮個艱苦人感受著生活的壓力，想欲逃閃。上帝知影生活是艱難，伊安排充滿向望的土地，就佇咱絕望的邊仔，過河就到。伊愛咱的生活充滿向望，勇敢向前。

       約3:16-19記載上帝疼世間人，到佇無惜伊的囝。 1 因為上帝將獨生的囝賞賜世間，互見若信伊的人，袂沈淪，會得著永活，伊疼世間到按呢(3:16)。因為上帝差囝入世間，呣是欲審判世間；是欲互世間對伊得著救(3:17)。 2 信伊的人，無受審判；呣信的人，已經受審判，因為伊呣信上帝獨生囝的名(3:18)。所審判的，就是光入世間，亦人愛暗卡過頭佇光，因為伊所行是歹(3:19)。     照舊約聖經，上帝為著人創造世界，互人來管理、享受。 1 上帝創造的人受引誘，無照上帝的吩咐行，受趕出埃甸樂園。 2 上帝應允拯救，揀以色列做選民，彌賽亞對大闢的後裔出。 3 上帝將彌賽亞、聖囝耶穌賞賜世間，擔當人的罪，替人死。 4 上帝是公義，犯罪的人著受刑罰。通過上帝的囝、無瑕疵的替贖，上帝才接受，赦免人的罪，恢復人和上帝的關係。 5 人受引誘背離上帝以後，罪惡進入人的心，世界滿滿罪惡。 6 有人佇驚惶中過日，驚過去的錯誤會有報應；有的人生空虛，無方向，呣知死後會怎樣。甘單相信耶穌，就欲有新的向望。 7 舊約講以色列人埋怨上帝，致到互蛇咬；上帝吩咐摩西造一隻銅蛇，攑(gia̍h)高，凡是互蛇咬著的，攑頭看，就得著醫好。     相信耶穌，誠心反悔，上帝就無記得伊的歹。聖經講上帝是疼。 1 設使婦仁人袂記得、無憐憫伊生的囝，我無袂記得你(賽49:15) 。 2 雖罔以色列拜濟濟偶像，猶久通歸佇我(耶3:1) 。 3 耶穌對行姦淫的婦仁人講，著悔改，我無定你的罪(約8:3-11)。 4 耶穌及抽餉的閣歹人同坐桌，講，伊來是欲招歹人(太9:10-13)。         上帝雖然有豐盛的慈愛，赦免罪過過失，總是伊亦是公義，無掠有罪的做無罪(民14:18)。人佇死後有審判(希9:27)，照逐人的所行來報應(羅2:6)。若有人無記名佇活命冊的，欲受㧒(hiat)落佇火湖，這是第二擺的死(啓20:13-15)，永遠的刑罰。

      約4:5-42記載耶穌經過撒瑪利亞，嘴乾，向一個婦仁人討水。 1 到撒瑪利亞一個城，名叫敘加，佇遐(hia)有雅各的水井。(4:5) 2 耶穌行路𤺪(siān)，就坐佇井邊。彼時約略日中晝(tàu)。(4:6) 3 一個撒瑪利亞的婦仁人來汲水，耶穌給伊講：請互我啉(lim)。(4:7) 4 因為伊的學生已經入城去買物通來食。(4:8) 5 婦仁人給伊講：「你是猶太人，怎樣對我撒瑪利亞的婦仁人討水啉啊？」因為猶太人及撒瑪利亞人無往來。(4:9) 6 耶穌應講：設使你捌(bat)上帝的恩賜，及對你講「互我啉」的是啥人，你的確求伊，伊就用活水互你。(4:10) 7 婦仁人講：主啊，你無汲(chhiūⁿ)水的器具，井閣深，對叨(toh)落有彼個活水啊(4:11)？ 阮祖雅各留這個井，伊家己及囝兒及精牲攏飲這個井的水，你敢比伊卡大嗎？(4:12) 8 耶穌應講：啉這個水的攏欲閣嘴乾(4:13)； 獨獨啉我所欲互伊的水的永遠袂嘴乾。因為我所互伊的水，欲佇伊的內面成做水泉，直直沖(chhèng)起來到永遠活。( 4:14)     一個撒瑪利亞的婦仁人(簡稱S)追求真愛，最後揣(chhoē)著活水泉。 1 S換5個翁，今和第六個蹛(toà)，名聲無好，無愛出現佇公共場合。 2 做一個猶太的查埔人，耶穌對這個撒瑪利亞的查某人討水；按呢做拍破當時種族、宗教、社會(性別、身分)所設的界線。 3 耶穌討水，S感覺奇怪。耶穌欲互伊活水，啉了會佇內面成做水泉，沖到永遠活，袂閣嘴乾。S欣羨，向望會得著。 4 耶穌愛伊𤆬翁婿作伙來享受活水，伊躊躇(tiû-tû)，這是伊內心的疼。 5 耶穌明白講出S的人生狀況，S著驚，稱呼耶穌先知。(4:17-19) 6 S問耶穌，著怎樣，才會揣著疼的源頭—上帝。耶穌講，敬拜上帝著出佇內心(神)、和真實，閣講，伊就是彌賽亞。(4:20-26) 7 S迷失佇世俗的心，瞬間揣著一個方向，性命的活水滿伊的心到溢出，今伊愛報揚，無閣只有關心家己(4:28,29,39-42)。

      約翰福音3:1-15記載尼哥底某來和耶穌談道。 1 有一個法利賽人，名尼哥底某，是猶太人的官(3:1)。 2 暝時來就近耶穌，對伊講：拉比，阮知你做先生是對上帝來的；因為若呣是上帝及你佇啲，你就袂會行遮個神跡(3:2)。 3 應講：我實實給你講，人若無重頭生，就袂看見上帝的國(3:3)。 4 閣問：人已經老，汰會重頭生？豈閣入老母的腹肚來生嗎(3:4)。 5 應講：我實實講，若無對水對聖神來生，就袂入上帝的國(3:5)。 6 對肉體生的是肉體；對神生的是神(3:6)。恁的確著重頭生，你莫得掠做奇怪(3:7)。風出在意思來吹，你聽見伊的聲，呣知伊對叨落來，叨落去；見若對神生的，亦是按呢(3:8)。 7 問講：怎樣會按呢啊？(3:9) 8 耶穌應伊講：你做以色列的先生，也呣知這嗎？(3:10) 9 我實實給你講，阮講阮知的；干證所看見的；若是恁呣接納阮的干證(3:11)。地上的事，恁猶呣信，何況天頂的事(3:12)。 10 無人捌(bat)上天，只有佇天裡的人子，對天降落的若定。(3:13) 11 閣親像摩西舉起蛇佇曠野，人子亦的確著按呢受舉起(3:14)，互見若信的人踮佇伊有永活(3:15)。     耶穌重視人的性命，講，著重頭生，才會得永活(3:3,15)。 1 尼哥底某(簡稱N)知，耶穌的教示、行的神跡，和上帝有關(3:2)。 2 N袂理解，猶太人是上帝的選民，為什麼著重頭生才算(3:4)。 3 耶穌講，重頭生是通過水和聖神，清氣人的外口和裡面(3:5)。 4 聖神佇人裏面做工，互咱成做新人，就是對聖神生(3:5,6)。 5 對聖神生的人，聖神影響伊親像風影響人。聖神照伊的意思施落恩典，人看袂著伊、伊無受控制，總是咱知伊的影響(3:8)。 6 N是先生，總是聖神的作為，超過N所經歷過的(3:9,10)。 7 猶太人呣信重頭生，呣信耶穌就是對天降落的人子(3:3,13)。 8 耶穌講到銅蛇醫好以色列人，讖語伊會按呢來救人性命(3:15)。

                        約翰福音2:13-17講耶穌出來傳道的第一項代誌，清氣聖殿。 1 猶太人的過節近啦，耶穌上耶路撒冷。(約2:13) 2 佇殿裡抵著有賣牛、羊、鴿仔，亦有換錢的咧坐，(約2:14) 3 耶穌用索做鞭，趕𪜶及羊牛攏出殿，閣捙倒換錢的人的錢，反輾轉(péng-lìn-tńg )𪜶的桌，閣給賣chíⁿ仔的講：帶遮個物去！呣通互我的父的厝變做買賣的厝。(約2:15, 16) 4 學生記得聖經有講：我為著你的厝，心內親像火𤏸(to̍h)。(約2:17)     頂面的經文講，聖殿已經變做世俗的所在，上帝已經無佇遐。 1 約翰福音講耶穌水變做酒的第一項神跡了後，就寫耶穌清氣聖殿。 2 水變酒顯明耶穌的疼心和權能，清氣聖殿講伊宣揚公義和審判。 3 人佇聖殿祈禱、謳咾上帝，亦佇遐獻祭，懇求上帝赦罪。 4 聖殿的外邦人院是欲互外邦人佇遐敬拜真神，聖殿掌權的互伊變做生理場，生理人佇遐做換錢、買賣獻祭的精牲的生理。耶穌看見聖殿變做菜市仔，受氣，連鞭採取行動。 5 伊捙倒換錢的人的錢，𪜶的桌，給生裡人以及牛、羊趕出聖殿。 6 學生想起聖經的話：我為著你的厝，心內親像火𤏸(to̍h) (詩69:9)。 7 因為溫柔的耶穌為著上帝的榮光、公義，佇這時大受氣，挑戰社會風俗，以及掌權的(祭司、經學士、長老)，伊無妥協。 8 另外三本福音書的尾尾，亦記載耶穌清氣聖殿(第二遍？)。 9 祭司互猶太人方便，叫生理人佇聖殿提供獻祭需要的。𪜶和生理人鬥空，求利益。佇這三本冊，耶穌講𪜶互聖殿變賊岫(siū)。 10 𪜶受責備，閣眾人趁耶穌的教示，致到當權的愛欲滅伊(可11:18)     耶穌時代的聖殿掌權者，表面上照禮儀，總是𪜶無照公義行。 1 聖殿是萬民祈禱的所在，人和上帝佇遮相見，無容允不法的路用。 2 教會是上帝的殿，殿若受人毀壞，上帝欲毀壞伊(林前3:16,17)。 3 個人亦是聖神的殿，著保持清氣，榮光上帝(林前6:19,20)。 4 基督徒呣通只有外表，著愛有屬靈的內容...

       路加福音24章有記載、去以馬忤(ngó͘)的路上發生的代誌。 1 二個學生去以馬忤，路上談論所經過的事(24:13, 14)。 2 耶穌近倚，二人袂認得伊。耶穌問𪜶辯論甚麼(24:15-17)？ 3 講：就是拿撒勒人耶穌，伊是先知，所講所行有權能。(24:19) 4 祭司頭及阮的序大掠伊，定伊死罪，釘伊佇十字架(24:20)。 5 阮平素向望伊贖回以色列。今伊死已經三日啦(24:21)。 6 幾若個婦仁人去墓裡，只有看見天使，講伊閣活啦(24:22, 23)。 7 耶穌講：無知的人，先知所講的話，恁怎樣許僫(oh)信(24:25) 8 就對摩西及眾先知，聖經中指伊的，攏給𪜶解明(24:27)。 9 日落，坐桌，主提餅祝謝，𪜶的目睭開，就認得伊(24:29-31)。 10 隨時倒去耶路撒冷，給學生及佇遐的講：主果然閣活(24:33-35)     對頂面以馬忤的記事，咱知學生 1 失望：有權能、救贖以色列的主，今已經離開𪜶。 2 困擾：所期待的救主、已經死，但是聽著、天使講伊閣活。 3 僥疑：主講伊會受害死、三日後閣活；總是無看著伊。 4 無知：知影、閣有經歷主做伙，總是心硬、心鈍，無接受。 5 轉機：耶穌知影𪜶著傷的心，陪伴𪜶、聽𪜶、閣教示𪜶。 6 心竅開：耶穌開拆聖經，講明上帝的救贖，點𤏸𪜶的信心。 7 經歷閣活的主：恢復信心，馬上行動，見證主閣活。 8 咱呣通做柴頭人：著拍開心門、墾求聖神，啟示聖經的真理。 9 咱行公義，是及主同行。咱若偏離正路，主及咱同行，挽回咱。     對以馬忤的事件，咱知咱的主 1 決斷陪伴咱一生的路途：咱若行離耶路撒冷，伊欲𤆬咱倒轉。 2 會敁(tháu)開咱的鬱卒：拔摩島的約翰，心憂悶，主啟示伊。 3 關心咱的性命：學生歸暝掠無魚，主問：恁有物配無？     閣活的主幫贊咱改變性命，用正面、積極的態度看人生。閣咱學主、好款待人，就欲體會及閣活的主同行。