Taigi 讀聖經

      馬太、路加福音攏有記載耶穌的家譜 。 1 兩個福音書攏連到大闢，到亞伯拉罕。  2 表明上帝應允亞伯拉罕的祝福，到佇伊的後代耶穌(創12:1-3) 3 表明上帝應允對大闢出義的後代，就是耶穌(耶23:5)。 4 大闢到亞伯拉罕的部分完全相像，耶穌到大闢的部分，就無。 5 事實上，馬太福音寫約瑟的家譜，路加福音寫馬利亞的家譜。     馬太福音講，耶穌屬大 闢 王室(太1:1-16)(代上3:10-19) 。 1 受掠到巴比倫了後的家譜說明。耶哥尼亞生撒拉鐵(太1:12)；耶哥尼亞就是受掠去巴比倫的猶大王約雅斤。 2 所羅巴伯是耶哥尼亞大囝撒拉鐵的囝(太1:12)。總是閣記載，所羅巴伯是耶哥尼亞第三囝(毗大雅)的囝(代上3:17-19)。 3 有可能大囝先死，第三囝娶大囝的某，然後生的囝屬大囝。     路加福音顯明，耶穌是上帝所講婦仁人的後裔(路3:23-38) 。 1 耶穌的家譜寫到亞當，應驗上帝的話，伊欲傷蛇(魔鬼)的頭。 2 比較兩份家譜 (1)是無仝人的家譜 (2)大闢以後的家譜攏有撒拉鐵、所羅巴伯，應該是仝名 (3)攏是大闢的後裔 (4)路加福音是馬利亞的家譜，約瑟是丈人希里的囝婿，通講 是 伊的囝。 3 馬利亞的祖先拿單是大闢的囝，老母拔示巴(拔書亞)(代上3:5)。     約書亞記和路得記載兩個女性，怹和耶穌基督家譜有關連 。 1 一個是喇合。耶利哥的喇合救以色列偵探，怹的家無受剿(châu)滅。 2  喇合嫁互撒門，生波阿斯，波阿斯是耶穌的祖先(太1:5)。 3 一個是路得。伊嫁互因為饑荒、徙去摩押的以色列人的囝。翁的家的查埔人攏死，伊綴大家倒去伯利恆，呣甘伊一人孤單。 4 波阿斯是路得的翁的親人，伊負起責任，娶路得做某。伊的囝俄備得是大闢王的阿公(書4:13-17)(太1:5-6)。     耶穌的家譜，表明上帝守伊的應允 。伊佇創世記所啟動的拯救計畫，通過和亞伯拉罕立的約、大闢的約，到佇新約得著成。

      畢業，是階段性任務的結束 。6月學生畢業，第三禮拜日是爸爸節。咱攏是老爸的囝兒，亦是囡仔的爸母。我的大漢查某囝已經有一個11歲的囡仔，兩個作伴。我敢畢業啦？下面是阮的故事。     伊細漢的時就趣味媒體 。伊愛看柴可夫斯基的重(tiōng)眠美女中的白貓跳舞，伊操作錄影機，重複看袂𤺪(siān)；後來有去學跳舞。彼時有出小教授電腦，伊愛耍附加𨑨迌(thit-thô)的程式；伊也愛看逐日固定時段的電視囡仔影片。四歲陪伊上Yamaha幼兒音樂班，上教會主日學。伊愛坐腳踏車，去厝附近的公園跙(chhū)流籠。     五歲的時做伙去美國 。幼稚園老師無愛家長陪囡仔，愛怹學習獨立。小學以後，固定去圖書館借冊，開始是尪(ang)仔掛幾字的冊，四冬後，伊看歸本攏是字的。伊和閣佇吃奶的小弟作伙上Yamaha特別音樂專修班，亦綴一個80外歲的先生埃小提琴；伊參加作曲、以及樂器演奏比賽。逐禮拜日，阮去教會禮拜，伊參加主日學。有一遍，暗時作伙去朋友的厝食飯、講話，中央伊無聊家己佇車頂等，結果警察查著，顧伊到大人講話結束出來。     小學四年下學期倒去台灣 。前半冬，外媽監督伊學華語。以後，伊的代誌家己來。初中的時，伊參加科學營，我幫忙對網路揣資料，伊整理做報告。高中，我𤆬(chhōa)伊去老師的厝上音樂課。大學，有一遍我幫忙伊編排系裡刊物的文章。大學三年，伊去歐洲作交換學生，我去揣伊，伊𤆬我去酒館，閣參觀彼個都市。     大學畢業，伊出國讀冊 。伊家己申請美國研究所，得著助教講學金。畢業了，倒來美國的厝，去律師事務所上班，練習駛車提著駕照。以後揣著學校去教冊，寫冊閣出版，結婚。     8冬後，伊獨立重新開始 。伊顧查某囝，讀護理，了後做護士，仝時讀大學、研究所，提著碩士學位。舊年，我搬去伊遐(hia)。     囝兒是耶和華所賞賜的產業 (詩127:3)。做老爸的，呣通激囝兒的受氣，獨獨著用主的警戒及教訓來培養怹(in)(弗6:4)。

      見若不義攏是罪，所有的罪佇上帝面前攏相像 (1約5:17)。 1 罪佇原文的意思：射無著目標，無達到上帝的標準。 2 犯罪就是有上帝看做歹、無正的行為、想法(1約3:4)。 3 上帝是聖潔，伊亦是公義，無掠有罪的做無罪(民14:18)。     對嚴重性來講，罪有分大小，也有罪無致到死 (1約5:17)。 1 看著別人錢袋仔有錢，想欲去搶，真正去搶，搶的時拍死人，逃走的時拍死逐(jiok)來的警察，逐(ta̍k)款的嚴重性攏無像。 2 許(hiah)個小膽、呣信、可惡、刣人、淫亂、行邪術、拜偶像，及白賊的人，怹(in)欲佇火及硫磺咧(teh)燒的湖受刑罰(啟21:8) 。 3 上帝賞賜恩典和救恩，人若拒絕，呣肯接受 ， 這是卡重的罪。   耶穌講，所多瑪所犯的，無比拒絕伊的伯賽大卡大(太11:20-24) 。 4 出佇邪惡的動機，抑是有計劃來犯罪 ， 這攏是卡重的罪。   有計劃的謀殺，和無小心刣死人，是無仝(kâng)的罪(出21:13)。 5 破壞上帝所創造的世界的倫理關係 ， 這是重罪。(羅1:18-32) 。   拜受造的物、取人的性命、同性戀、無順趁爸母攏是重罪。     罪惡謗瀆( pòng-to̍k )攏欲赦免，獨獨謗瀆聖神的，袂得著赦免 (太12:31) 。 1 講話攻擊聖神的，不論今世來世，永無受赦免(太12:32) 。 2 耶穌靠聖神的氣力(路4:18)，醫好一個青瞑掛啞口( é-káu )的(太12:22) 3 法利賽人知影醫病是聖神的氣力，總是講：耶穌靠鬼王趕鬼。耶穌回應講：刁(tiau)工謗瀆聖神，袂得赦免(太12:24-32) 。 4 拒絕所捌(bat)的真理，故意挑戰上帝的權柄，這款罪袂得著赦免。     認捌真道，閣棄捒的人，永永袂得著赦免 (來6:4-8) 。 1 參與佇教會，得著上帝的話、應允、聖神、恩賜、感動。以後若背離，就失去反悔的機會。因為怹閣釘基督佇十字架。 2 違背所熟熟的真理，就是徹底拒絕基督，完全無救贖啦。     上帝憐憫咱，欲赦免咱的罪 。伊差遣主耶穌為咱死、擔當咱的罪，咱若信伊、認罪悔改，公義的上帝會守伊的應允(1約1:9)。

      佇人生的路上，佇無像的坎(khám站，有時咱會陷佇無像的困境 。 1 空課(khang-khòe)、環境、人際關係，家庭的經濟、翁某關係、囝(   kiáⁿ )兒養育、大家(ta-ke)新婦(sim-pū)的問題，逐項攏是真大的挑戰。 2 逐款困境所帶來的挑戰和壓力，常常互咱僫(oh)得當，感覺無奈。     面對困境，咱有兩個態度通揀。咱的態度決定咱的人生 。 1 看困境若山遐(hiah)大，絕望、心冷，續咧(leh)捒(sak)責任，怪別人。   亞當給吃善惡果的責任捒互上帝和查某人，查某人也捒互蛇。   逃閃問題，問題袂(boe)無去，不過放棄機會，繼續受困境苦楚。   以色列人探迦南地以後，勼(kiu)退，呣(m̄)敢入去，繼續踅(se̍h)曠野40冬。 2 用積極、樂觀的態度來面對困境，看著的問題就無遐大。   抵(tuh)著困境，勇敢面對問題，解決問題，無去怪別人。   若準代誌袂當改變，好好仔收尾，亦是正面的做法。   解決問題，需要勇氣，需要時間、耐心、智慧，永永無放棄。   佇困境，重要的是愛有信心，閣有通倚靠的對象(賽41:10)。     保持正面的態度，人生就是彩色 。 1 接受：接受困境存在的事實，承認是必然的現象(林前10:13)。   咱的一生，上帝早就定著。伊定著萬般的時，互伊成做美妙。   人生呣是乾燥(sò)無味，佇逆(ge̍k)境中，咱學習用無像的方式生活。   人生若鹹酸甜，用感恩的心，感謝生活所排列的一切。 2 行動：面對事實，開拆代誌，檢討問題，揣(chhōe)求出路。   逐項代誌攏有正面、負面，呣通只有看著䆀(bái)的一面。   謙卑向上帝求，相信會得著，就得著，閣勇敢踏出去(太21:22)   上帝欲借聖經，祈禱，四周圍的人、閣各種的代誌來啟示咱。 3 信心：著相信上帝咧(teh)掌權。困境中，伊欲開路，互咱當會起。   著給每一個抵著的困境，看做是上帝互咱的訓練、考驗。   世上有苦難，總是咱通放心，因為耶穌已經卡贏世間(約16:33)。   上帝是信實，伊...

      Covid疫情期間，掛嘴掩、無揳(kheh)咧(teh)坐，教會保持聚會 。 1 無掛口掩禮拜的教會： 6%(2020.7)，43%(2022.3)。 2 掛口掩禮拜的教會：55%(2020.7)，47%(2022.3)。 3 無開放禮拜的教會：31%(2020.7)， 5%(2022.3)。     疫情期間，線上和TV敬拜，已經和禮拜堂敬拜相仝(kâng)重要 ；調查發現，採取遮(chia)個方式，禮拜的總人數，並無啥(siáⁿ)變化。 1 參加禮拜堂禮拜：13%(2020.7)，28%(2022.11)。 2 參加線上和TV禮拜：36%(2020.7)，24%(2022.11)。 3 參加禮拜總人數(1 & 2)：41%(2020.7)，40%(2022.11)。 4 只有參加禮拜堂禮拜16%，線上/TV12%，參加兩項12%(2022.11)。 5 65+的族群出席穩定，續落去64-50，49-30，29-18，愈來愈少。     因為疫情人受隔離，有人失去空課、性命，產生心理問題 。 1 驚惶：疫情致到有人喪失性命，有人經濟艱難，失去安全感。 2 壓力、扒腹：傳染病維持幾仔年，疫情反覆，未來無確定。   3 無聊：日常活動受限制，舊的活動取消，新的生活猶未建立。 4 孤單：鎖國、封城，人和人隔離，無社交生活。     疫情期間，教會用逐款的敬拜方式，提供屬靈的安慰、鼓勵 。 1 利用無線電提供聲音、影像(TV)的空中禮拜，抑是線上禮拜 。 2 掛嘴掩、座位隔開佇禮拜堂內禮拜，抑是佇禮拜堂外面、公園。 3 逐個教會，抑是聯合仝教派、無仝教派提供線上禮拜、主日學。 4 建立群組，抑是提供特別靈修節目，親像Pianoside Chat。     疫情了，著改變，行出隔離，用感情、溫暖來牧養 。  1 方式：佇禮拜堂、小組，亦佇通信群組、社交媒體來牧養。 2 對象：少年人的事工是第一優先，年紀大的著特別關心。 3 內容：著改變，有新的心、新的神。藉著人和人的交往(通信)，給人箍(kho͘ )做伙；藉著媒體，學習真道，堅固信心，便便為主做工。 4 行動：著踏出去，靠福音的大權能(羅1:16)...

         孤單是當咱向望和人接觸，總是無得著的感覺 。咱生活佇一個互通信網路連做伙的世界，社交媒體給咱和朋友連做伙，閣加濟濟新的朋友，總是咱有時猶原感覺孤單。咱給孤單分做四種： 1 感情上孤單：欠親密的同伴，通互相交換個人的想法、感受。 2 情境上孤單：佇生疏的所在，袂適應當地文化和生活方式。 3 社交上孤單：因為內向、自卑感，無經營人和人的交往。 4 慢性的孤單：長時間只有單獨一人，家己過生活。          孤單已經是流行病 。今仔日的社會強調"獨立、個性"，無鼓勵互相依倚、相及認同。這款的文化，互人誤會人通靠家己，無需要別人。下面是2021年Cigna調查美國成年人"感覺孤單的%"。 1 年歲：79%的18-24歲的少年人，66歲以上的老人只有41%。 2 族群：75%西班牙族群，68%黑人，全體美國人只有58% 3 經濟：63%年收入< $50,000的人，其他卡高的只有53%。 4 保險：72%接受Medicaid的弱勢，有頭家提供保險的55%。 5 男女：57%男性，59%女性，男女無啥差別。 6 孤單互員工生產力、工作滿足感降低，企業主通藉著下面的做法來補救 (1)通過開會、舉辦活動，增加員工做伙的機會 (2)提供帶薪水休假，互空課及生活平衡，提高心理健康 (3)提供公平、包容、安全及和睦的工作環境，互員工有目標和歸屬感。         上帝無愛咱陷佇孤單的艱難中，伊愛咱相及，閣和伊相結連 。 1 孤單是無好的物。上帝創造亞當以後，閣做夏娃，來幫贊伊。 2 以利亞認為只有伊抵敵亞哈，上帝講伊有留七千人無跪巴力。 3 使徒保羅深知怎樣處理孤單。伊揣伴做伙旅行傳道，最後佇羅馬，只有路加相及，伊請提摩太給馬可帶到伊遐(提後4:9-18)。 4 主耶穌設立七十人，一對一對，差怹(in)做頭去傳道(路10:1)。 5 主耶穌應允佇伊上天以後，保惠師會來及信徒永遠佇啲。 6 主是葡萄樹，咱是枝；及伊相離，咱就袂做甚麼(約15:5)。 參考資料： https://newsroom.thecignagroup.com/loneliness-epidemic-persists-post-pandemic-l...

      馬利亞生耶穌，是聖神的作為，欲應驗舊約的讖語 。 1 舊約的讖語：耶穌是大衛的後裔(太1:1-17)，上帝應允大闢，伊的國欲堅固到永遠 (撒下7:4-16)。馬利亞：在室女懷孕生囝(路1:26-38)，是上帝互猶大王亞哈斯的兆頭，閣一遍應驗(賽7:14)。 2 實現：約瑟猶未娶馬利亞過門，伊就對聖神有身孕(太1:18)。     馬利亞溫柔、順服上帝安排 ；有關主耶穌的事，伊"無明白"。 1 天使給馬利亞講，你得著大恩、欲對聖神懷孕生囝，伊欲續接大闢做王，伊講：我是主的女婢，願照你的話應驗佇我(路1:26-38)。 2 西面講嬰仔，亦講伊的心"欲有劍鑿透過"，伊安靜聽(路2:33)。 3 馬利亞問12歲的耶穌，為啥留佇殿裡互怹(in)揣，耶穌講"我應該佇我的父的厝"，馬利亞袂明白，給遮個話攏記佇心裡(路2:42-51) 。 4 耶穌佇加利利省傳道，馬利亞帶伊的兄弟去揣伊，伊講"我的老母及我的兄弟，就是遮個聽上帝的道理來行的人" (路8:20-21) 。 5 耶穌上天以後，學生聚集聽候聖神，伊恬靜和怹做伙(徒1:13,14)     天主教拜馬利亞，超過基督 。天主教接受羅馬人"多神"觀念，向馬利亞、天使、聖人祈禱，看怹(in)做神；遮個攏無合聖經。 1 第4世紀以前，信徒稱呼馬利亞"聖母"，亦用像來紀念。 2 天主教給伊升格。根據民間的"傳統"，放棄"基督的老母"的稱呼，叫伊" 上帝的老母、天后、中保、輔助救贖主 ..."。 3 天主教堅持罪人欲得著基督的恩典，需要伊做中保。 4 天主教跪拜馬利亞，用稱呼上帝的話來向伊祈禱，來揣求祝福。 5 天主教堅持耶穌是上帝、亦應該是馬利亞的獨生囝，所以伊"永遠是在室女"(553)，既然基督無罪出世，"馬利亞無罪懷孕"(1854) 。 6 天主教宣佈馬利亞"出世、活咧"攏無瑕疵，伊死以後，身體及靈魂受"迎接(ngiâ-chih)上天"(1950)，成做天后，和聖囝做伙統治(1954)。     高舉聖經，堅持宗教改革的精神，以外無權威 。無綴天主教，怹無照...