Taigi 讀聖經

    主是行動的主，伊趕鬼、醫病，傳福音，亦愛咱綴伊的腳步 。 1 主講：著疼厝邊親像家己。厝邊是到佇天邊海角。(路10：27) 2 耶穌遍行逐個城、鄉社，佇會堂教示人，傳天國的福音，醫好逐樣的症頭、病痛(太 9:35)，伊真正實踐"疼厝邊" 3 耶穌賞賜學生能力、權柄，差怹去趕鬼、醫病，傳福音(路9:1-2)。 4 為著達成目標、任務，著勇敢壯膽，付出行動。主耶穌通過受釘佇十字架的行動，才完成罪的替贖。 5 貴格會照主的命令行(約15:14)。怹(in)幫贊散赤、弱勢、抵著災難的地區，幫贊戰爭的時受關佇集中營的、閣著傷、受掠的。     人有信心，有行動，來求耶穌醫治，攏得著醫好 。 1 羅馬兵的百總求耶穌醫伊奴僕的半遂(piàn-suī)，伊無要求耶穌去怹兜，伊深信耶穌有權柄，耶穌講"好"，奴僕就會好。(太8:5-13) 2 迦南的婦仁人喉叫主，醫好伊患著鬼的查某囝，伊無因為家己是外邦人受看輕，相信恩典亦會到佇伊(太15:21-28)     這是大奧妙：咱向上帝求，咱若相信伊，就相信是已經得著 。 1 主應允，當咱向伊求，閣有行動(揣、拍門)，伊就給咱成(太7:7) 2 求、揣、拍門，是達到目標的三個坎站，鼓勵咱著有行動。親像欲去見一個朋友，著"揣"路，到著"拍門"，門開才會見著人。 3 上帝歡喜咱靠信心來求，無憢疑。咱若心無憢疑，相信代誌會成，就欲給咱成。咱信伊是，伊就證明伊實在是。(可11:23) 4 信心呣是在佇你的感覺，是佇任何都合，上帝攏"值得你信"。 5 咱求，咱若信上帝，就相信咱"已經"得著，呣是"咧欲"得著，因為上帝"已經"做啦。著開始照所啟示的計畫，向標來走。(可11:24) 6 舊約的信心英雄，相信上帝報賞揣求伊的人(亞伯、以諾)，確信在世是做人客(亞伯拉罕)，上帝是互人永活的上帝(雅各、喇合)。 7 著學習摩西，伊選擇彼個袂朽爛的(希11:24-26)，看著看袂著的(抵著主)(希11:27)，然後成彼個無可能的(希11:28-29)。

    人犯罪以後，黑暗勢力入世間，咱著儆醒做守望者 。   1 亞當犯罪彼日的尾暗仔，伊呣敢面對上帝，對這時人踏入黑暗。 2 入佇黑暗是通驚的，驚魔神仔、無平安，希望會緊過(賽21:11-12)。 3 上帝刑罰心硬的法老，歸埃及入黑暗，遮勘怹的日頭神(出10)。  4 主在世最後3點鐘，遍地黑暗。伊擔人的罪，全地哀傷(太27)。 5 佇末世，咱做顧暝的、做黑暗時的守望者，著儆醒祈禱(彼前4:7)，呣通親像先知約拿，船欲沉，閣著船主叫醒伊起來、祈禱上帝！著儆醒、著祈禱、著聖潔、帶向望、聽候天光。     主耶和華設立以西結，做以色列的守望者 (結33)。 1 守望者的角色 (1)保護人，免受傷害 (2)顧守上帝的產業 (3)守衛入口，檢查進入的人/物/時間/代誌 (4)維護事工，照規矩運作。 2 主設立你做守望的。你著聽主所講的話，代替主警戒以色列(33:7)。 3 你若無開嘴警戒歹人，致到伊死佇伊的罪，主欲討你的罪(33:8)。 4 設使你警戒歹人，伊呣越轉，伊欲死，你會救你活命(33:9)。 5 主斷斷無歡喜歹人死無，獨獨歡喜歹人離開所行的路來活(3:11)。     佇這消息爆炸的時代，教會和個人攏著做消息的守望者 。 1 消息的傳送方式：人、電台(聲音、影像)、網路(有線、無線)。 2 接收：收音機、電視機、電腦、手機、人，社交媒體閣轉送。 3 社會消息(影、音)：健康、醫藥、人生、娛樂、運動、文化...。 4 著分別無合教會倫理的消息：(1)魔鬼裝做假先知，假影傳上帝的話語 (2)包裝個人的觀點，假做聖經的教示 (3)利用取消文化，假影實施正義 (4)給世間的關懷(政治etc)，變做聖潔的事工。 5 教會著做守望者。言論自由受法律保護，袂當禁止。總是教會社群是相仝信仰的人的集合，著清楚分別教會內、外的消息。 6 逐人著做守望者。逐人逐日攏接收著真濟信息，著做時間、人生目標的守望者 (1)清楚列出逐項代誌使用的時間 (2)設定時間運用的原則，和優先次序 (3)無違背個人人生的目標。 **相關文章  取消文化 vs. 基督教      政治 vs. 教會     上帝的救贖計畫

      George Fox得著真光啟示，一生為這光做見證 。伊是老實人，少年時，頭家托伊管財務，伊誠實無作假數；富裕以後猶原心空虛。一日聽著有聲講：「有一位會解決你的問題」，按呢伊揣著耶穌。     1647年Fox設立貴格會(Quakers 起顫的)，貴格會強調 ： 1 人人佇上帝面前是平等的，無分社會地位、階級，攏是罪人。  2 逐人通直接祈禱上帝，強調內心的屬靈經驗。 3 真正的基督徒是拍開心門，接納耶穌，互聖神引𤆬(chhōa)的。  4 相信「基督的光」會炤光人的心神，帶互人生命、能力及喜樂。 5 若無聖神的光照，聖經永遠是一本無拍開的冊。 6 基督徒逐句話攏著實在，呣通白賊、虛(hu)假、咒誓(chiù - chōa)。 7 你佇社會上若準有影響力，閣卡著做老實人。     貴格會守主的教示，怹(in)也叫做朋友會(約15:14) 。怹 1 進入社區：呣是欲宣教，怹提供幫贊，用好行為做見證。 2 反對戰爭暴力：拒絕參加戰爭，總是去到戰場，照顧著傷的人。 3 尊重人的價值：反對奴隸制度、關心非法入美國受關的兒童。 4 無重外表的儀式：約10%的貴格會，無設牧師，聚會時，無唱詩歌、無講道，靜靜聽候聖神感動，才起來講話。     1947年貴格會得著Nobel和平獎，因為300年來好的行做 ： 1 戰時：18、19世紀世界真濟戰爭，貴格會去到每一個戰場，提供雙方醫療，閣幫贊受迫害的人(二戰時猶太人、日本血統美國人)。 2 戰後：提供食和穿，互集中營、戰俘營放出的囚犯、無國籍的、無厝通倒去的人，閣提供空課，互怹回復能力、自信、自尊。 3 平常：幫贊(1)散赤地區的教育和醫療 (2)社會弱勢：無厝蹛的、無空課的、受關監的 (3)扺著災難(饑荒、地動等)的地區。     貴格會實行SPICES ：簡單、和平、正直、進入社區、平等、管家的原則。內在的信心，互怹對人閣卡會吞忍、有耐心；照主所吩咐的，照顧有需要的人(太25:40)，直到今仔日。

      "摩西五經"記載一個合上帝旨意的政治制度 -共和制 。 1 行政、猶太公會、和教會三個獨立，用上帝律法統治(共和)。 2 猶太民族的憲政共和制 (1)上帝是君王，用契約方式(613條律法條文)統治 (2)君王下面設教會(祭司)及政府，二個無相交插。  3 政府下面設行政(摩西、士師、序大)和猶太公會，互相牽制。  4 猶太公會有領袖及長老，攏總70個，是議會和司法機構。     政教分離，自由、民主、法治、人權是美國建國的基礎 。 1 美國憲法規定：莫得立法設立國教，抑是禁止人民信仰自由。 2 宗教自由：該撒的物納互該撒，上帝的納互上帝(太22:21)。 3 政府、宗教性質相抵。政府管裡著用權，教會宣揚基督的疼。 4 政教分離 -立法原則 (1)袂使有宗教的目的 (2)莫得推動抑是限制宗教 (3)莫得推進 "政府及宗教的過頭連結"。 5 信仰自由 -"使用"的原則 (1)逐人攏有選擇信仰及敬拜的權利 (2)宗教的行為若和國家利益衝突，政府通限制、禁止。 6 公立學校的教職員，是"政府"的延長，所以學校莫得𤆬祈禱。 7 根據信仰自由的原則，佇公立學校 (1)先生、學生通私下個人祈禱、穿插宗教性服裝 (2)學生通成立宗教團契，總是袂使有先生帶領、指導 (3)學校非強制性的活動，學生有𤆬祈禱的權利。     教會著裝備信徒，互怹(in)明白上帝的旨意，差遣怹入世間 。 1 教會呣通參與政治，著專心佇主的大使命，造就信徒、傳福音 2 基督徒著參政 (1)上帝交代著管理地上，咱著保護伊賜互咱的產業(創1:26) (2)是基督徒行公義、好憐憫的具體行動(彌6:8)。 3 美國建國的時，基督徒用基督的心治理國家，得著上帝賜福。 4 佇現今自由競爭的時代，鼓勵自私、詭詐、惡毒，為著成功，無情無義，濫摻(lām-sám)使用自由。同性戀婚姻合法，黑命貴暴亂，拍撞搶燒刣，基督徒屈服佇暴力，綴咧講違背良心心的話。 5 著記得：上帝吩咐的呣做，連咱所有的也欲提去(路19:12-26)。

      無法律的時代，論斷一個人，是照彼個社區眾人的觀點 。 1 無符合彼個社區的價值觀的，會受其他的人欺負、刑罰、迫害。 2 這是謳咾-恥笑(honor-shame)文化，違背集體的價值觀就受刑罰 (1)貼條仔；永久的處罰，除非家己搧嘴䫌(phé) (2)牽連；厝內的人、朋友也掃著，若無切離離 (3)處罰無標準；看認同的程度。     佇現代，有名的人若有奇怪的言論、行為，可能會受取消 。 1 今仔日社交媒體透過分享，給消息快速送到逐個社群，逐人閣通表示意見，這就成做真大的力量，會決定一個人的死活。 2 無仝(kâng)的意見，攏欲除去，這就是取消(cancel)文化；受害者可能失去一切- 平靜的生活、空課、朋友。伊恐嚇個人著順趁，有無像的看法就是犯罪。佇美國，種族歧視、性別平等攏是議題。 3 取消文化強迫人遵守集體的觀點，佇網路公開進行處罰，互人驚惶，過去捌(bat) 發生 續接的"司法調查，偃倒歷史人物的像"。 4 一個公司若準有違背社會認同的行做，亦相像會受取消。 5 取消文化透過眾人的力量"審判"，互公眾人物負起法律以外的責任。總是，無周全的正義會造成是網路侮辱(cyberbully, 霸凌)。 6 網路侮辱就是佇網路恥(thí)笑某人的外表、穿插，詈(loé)罵，傳送漏氣、受欺負、無文雅的相片、影片，這可能有法律責任。     取消文化打擊無仝的意見、取消人，這呣是聖經的原則 。 1 上帝是審判者(羅14:4)：著照上帝的標準，呣是人的(徒5:29)。 2 聖經禁止：相議論，貼條仔，"取消"無照教示做的人(羅14)。 3 違背聖經教示的，呣是給伊取消，著苦勸互伊翻頭(雅5:19-20)。 4 著及世俗分離，並無叫咱離開世間，抑是侮辱、取消任何人。 5 聖經的原則：(1)代誌有對和呣對，著趁公義(約7:24)、照上帝賜的信心(羅12:3)判斷，無辯論聖經無明白講的(羅14:1) (2)接納無仝的觀點(羅15:7) (3)疼、憐憫和尊重，追求和平(羅14:19)。 6 著分別消息的真假，無發表、無轉發無確信的消息。

      馬太、路加福音攏有記載耶穌的家譜 。 1 兩個福音書攏連到大闢，到亞伯拉罕。  2 表明上帝應允亞伯拉罕的祝福，到佇伊的後代耶穌(創12:1-3) 3 表明上帝應允對大闢出義的後代，就是耶穌(耶23:5)。 4 大闢到亞伯拉罕的部分完全相像，耶穌到大闢的部分，就無。 5 事實上，馬太福音寫約瑟的家譜，路加福音寫馬利亞的家譜。     馬太福音講，耶穌屬大 闢 王室(太1:1-16)(代上3:10-19) 。 1 受掠到巴比倫了後的家譜說明。耶哥尼亞生撒拉鐵(太1:12)；耶哥尼亞就是受掠去巴比倫的猶大王約雅斤。 2 所羅巴伯是耶哥尼亞大囝撒拉鐵的囝(太1:12)。總是閣記載，所羅巴伯是耶哥尼亞第三囝(毗大雅)的囝(代上3:17-19)。 3 有可能大囝先死，第三囝娶大囝的某，然後生的囝屬大囝。     路加福音顯明，耶穌是上帝所講婦仁人的後裔(路3:23-38) 。 1 耶穌的家譜寫到亞當，應驗上帝的話，伊欲傷蛇(魔鬼)的頭。 2 比較兩份家譜 (1)是無仝人的家譜 (2)大闢以後的家譜攏有撒拉鐵、所羅巴伯，應該是仝名 (3)攏是大闢的後裔 (4)路加福音是馬利亞的家譜，約瑟是丈人希里的囝婿，通講 是 伊的囝。 3 馬利亞的祖先拿單是大闢的囝，老母拔示巴(拔書亞)(代上3:5)。     約書亞記和路得記載兩個女性，怹和耶穌基督家譜有關連 。 1 一個是喇合。耶利哥的喇合救以色列偵探，怹的家無受剿(châu)滅。 2  喇合嫁互撒門，生波阿斯，波阿斯是耶穌的祖先(太1:5)。 3 一個是路得。伊嫁互因為饑荒、徙去摩押的以色列人的囝。翁的家的查埔人攏死，伊綴大家倒去伯利恆，呣甘伊一人孤單。 4 波阿斯是路得的翁的親人，伊負起責任，娶路得做某。伊的囝俄備得是大闢王的阿公(書4:13-17)(太1:5-6)。     耶穌的家譜，表明上帝守伊的應允 。伊佇創世記所啟動的拯救計畫，通過和亞伯拉罕立的約、大闢的約，到佇新約得著成。

      畢業，是階段性任務的結束 。6月學生畢業，第三禮拜日是爸爸節。咱攏是老爸的囝兒，亦是囡仔的爸母。我的大漢查某囝已經有一個11歲的囡仔，兩個作伴。我敢畢業啦？下面是阮的故事。     伊細漢的時就趣味媒體 。伊愛看柴可夫斯基的重(tiōng)眠美女中的白貓跳舞，伊操作錄影機，重複看袂𤺪(siān)；後來有去學跳舞。彼時有出小教授電腦，伊愛耍附加𨑨迌(thit-thô)的程式；伊也愛看逐日固定時段的電視囡仔影片。四歲陪伊上Yamaha幼兒音樂班，上教會主日學。伊愛坐腳踏車，去厝附近的公園跙(chhū)流籠。     五歲的時做伙去美國 。幼稚園老師無愛家長陪囡仔，愛怹學習獨立。小學以後，固定去圖書館借冊，開始是尪(ang)仔掛幾字的冊，四冬後，伊看歸本攏是字的。伊和閣佇吃奶的小弟作伙上Yamaha特別音樂專修班，亦綴一個80外歲的先生埃小提琴；伊參加作曲、以及樂器演奏比賽。逐禮拜日，阮去教會禮拜，伊參加主日學。有一遍，暗時作伙去朋友的厝食飯、講話，中央伊無聊家己佇車頂等，結果警察查著，顧伊到大人講話結束出來。     小學四年下學期倒去台灣 。前半冬，外媽監督伊學華語。以後，伊的代誌家己來。初中的時，伊參加科學營，我幫忙對網路揣資料，伊整理做報告。高中，我𤆬(chhōa)伊去老師的厝上音樂課。大學，有一遍我幫忙伊編排系裡刊物的文章。大學三年，伊去歐洲作交換學生，我去揣伊，伊𤆬我去酒館，閣參觀彼個都市。     大學畢業，伊出國讀冊 。伊家己申請美國研究所，得著助教講學金。畢業了，倒來美國的厝，去律師事務所上班，練習駛車提著駕照。以後揣著學校去教冊，寫冊閣出版，結婚。     8冬後，伊獨立重新開始 。伊顧查某囝，讀護理，了後做護士，仝時讀大學、研究所，提著碩士學位。舊年，我搬去伊遐(hia)。     囝兒是耶和華所賞賜的產業 (詩127:3)。做老爸的，呣通激囝兒的受氣，獨獨著用主的警戒及教訓來培養怹(in)(弗6:4)。