Taigi 讀聖經

       上帝創造世界、創造人，伊的本意，是欲和人親近 。 1 上帝認人做朋友：伊互人有伊的形像，閣享受伊的創造。 2 上帝關心人：通過義人亞伯拉罕、先知、主耶穌。 3 上帝和人蹛：伊做埃甸園，摩西設會幕，知心的大闢欲起殿。 4 主耶穌道成肉體來到世間(約1:14) (1)傳講和上帝閣和的道 (2)通過伊，人通就近天爸(約14:6) (3)耶穌斷氣的時，聖殿至聖所的帳裂做兩爿(太27:50)，表示通過伊，人通直接及上帝相見。     著除去阻擋咱及上帝親近的塞礙，過新的生活 。 1 除罪：罪隔離上帝和咱，伊是聖潔公義，主替贖互咱得清氣。 2 綴耶穌：咱才會就近天爸，伊是路、真理、活命 (約14:6)。 3 著悔改 (1)無閣活佇罪惡、私慾和世俗內面 (2)無跤踏兩隻船，一方面想欲追求聖潔，一方面閣愛世上的榮華富貴(雅4:8)。     親近上帝，就是建立及上帝的親密關係 。因為人的軟弱，咱的生活充滿罪惡：無作為，貧惰(pîn-toān)，荏懶(lám-noā)，追求世間的權勢、肉體的快活，離開聖潔公義的上帝遠遠。 1 著改變：著有悔改、揣求真理的心，決心無閣做舊的我。 2 聽上帝講話：讀聖經，看屬靈的媒體，上帝通過這啟示咱。 3 和上帝講話：常祈禱，排列一切佇伊面前，伊隨時咧等待咱。     親近上帝，伊就親近你 。(雅4:8) 1 耶穌講：人疼我，就著守我的道理，我的爸欲疼伊(約14:23)。 2 亞伯拉罕做上帝的朋友(賽41:8)，上帝賜福，互伊做眾人的爸。 3 撒該親近主，上帝換新伊的心 (1)今伊關心四周圍的人 (2)伊慷慨救濟散鄉人，賠償以前受伊詐欺的 (路19:1-10)。 4 親像放蕩子，伊離開厝，用了所有的，悔改回頭，得著老爸完全的接納。咱若願意親近上帝，伊隨時咧等待，為咱準備，建立信心、改變性命、賞賜能力，幫贊咱解決拄著的問題。 5 常常親近上帝，你欲體會上帝永無離，閣時時幫贊。

       馬利亞袂嫁就懷孕，伊所生的囝耶穌是伊一世人所關心的 。 1 天使講你欲對聖神懷孕。你的囡仔欲接續大闢做王。馬利亞雖然著驚，會有壓力對社會、未婚夫遐來，伊順服、接受。 2 天使掛保證。伊的表姊也懷孕，雖然年老、早著超過生育的年齡。這攏是上帝的計畫，出佇伊的權能。                  3 伊相信上帝的權能。事實上，頭前的路，上帝給伊開好好。     我的囡仔出世，顧羊的、博士閣大自然攏來拜伊 。 1 約瑟娶馬利亞。伊接近產期的時，羅馬政府戶口普查，𪜶長途旅行到伯利恆，客館滿員，伊佇馬椆( tiâu )生產，嬰仔囥佇馬槽。 2 天使給城外顧羊的講，"恁的救主出世啦，包佇布、倒佇馬槽"。閣有星停佇伯利恆頂面，看星的博士對東方來朝見新生王。     耶穌一出世，就互約瑟和馬利亞心艱苦、俥(chhia)盤 。 1 𪜶做伙去聖殿獻祭，西面抱嬰仔講：伊是 "外邦人的光，以色列人的榮耀" "互濟濟人跋倒，妳的心欲有劍鑿過" (路2:28-35) 2 上帝啟示𪜶著覕(bih)去埃及，因為希律王欲刣死伯利恆所有兩歲以下的囡仔。等希律死，𪜶才倒去以色列的拿撒勒。     耶穌大漢，馬利亞給耶穌交互上帝，閣伊的同胞 。 1 耶穌十二歲彼年，綴父母去聖殿。父母離開了，伊閣佇遐和先生談論。𪜶來揣伊，伊應："我應該佇我父的厝"(路2:42-51) 2 耶穌三十歲開始傳道，伊和學生去參加婚宴。馬利亞給伊講酒沒啦，伊應講 "我有我的時" 。伊給甕內的水，變做上等酒。 3 耶穌佇加利利省傳道，馬利亞帶伊的兄弟去揣伊，伊講"聽上帝的道理來行的人，就是我的老母及兄弟" (路8:20-21)     馬利亞一世人關心耶穌，她顯出普世母親攏有的疼 。 1 馬利亞記牢耶穌的一點一滴：醫病、趕鬼、傳福音，眾人綴。 2 耶穌責備宗教領袖假好，伊承認伊是上帝的囝，𪜶判伊著死，逼羅馬官釘伊佇十字架。馬利亞陪佇十字架下到伊死。

      耶穌用譬喻講，上帝國已經臨到，會續到末日 。上帝國是 1 主求上帝國降臨，照上帝的旨意來運作的(主禱文，太6:9-13)。 2 有上帝的大權能，主在世已經臨到(耶穌趕鬼，太12：28)。 3 公義的國，呣是世間人設立的政權(應彼拉多，約18:36)。 4 伊的公民，是對內心受改造的人(山頂寶訓，太5-7)。 5 佇遐好歹人攏有，所以就是現在(稗仔的譬喻，太13:24~30)。 6 欲傳到逐款的人--欲接受抑是呣(撒種的比喻，太13:3~23)。 7 有無限的性命力(芥菜種的譬喻，太13:31~32)，對上微小的開始，直至遍滿全地(麵酵(kàn)的譬喻，太13:33)。 8 值著犧牲一切，為著欲得著(藏寶佇田及揣珠，太13:44~46)。 9 續到世界的路尾，有揀選和審判(撒網的譬喻，太13:47~50)。 10 只有儆醒有準備的人受揀選(十個童女的譬喻，太25:1~13)。     對上帝國的誤解，以及事實 。 1 "誤解- 耶穌佇地上的時，上帝國猶袂開始"。事實上，耶穌的一生和祂的事工就是上帝國臨在的記號(耶穌趕鬼，路11:20)。 2 "誤解- 上帝國佇末日降臨，發生超自然的代誌，死人閣活"。事實上，主行神跡，表明上帝國已經臨到(耶穌趕鬼，太12:28)。 3 "誤解- 上帝國只有佇人內心"。事實上，上帝國是真實，欲遍傳全世界(芥菜種、麵酵的譬喻)，直到末日審判(撒網的譬喻)。 4 "誤解- 道德齊備，上帝國就實現"。事實上，歹人和義人佇上帝國同時存在(稗子的譬喻)，欲入上帝國，完全靠上帝的恩典(葡萄園的譬喻，太20:1~16，娶某筵席的譬喻，太22:1-10)。     耶稣交代學生，著傳報上帝國的福音 (太28:20) 1 保羅批信宣揚上帝阈福音，使徒行傳記載傳福音的跤(kha)跡。 2 上帝國揀公義、有同情心的人(歹奴僕的譬喻，太18:23-35)。 3 教會為上帝的公義及疼痛做見證。教會呣是上帝國，是人所組成、用信心回應福音(徒11:26)，引𤆬人進入上帝國。

          羅得綴阿叔亞伯拉罕四界飼精牲 。𪜶(in)去迦南地、伯特利、埃及，最後佇伯特利伊和阿叔分開，伊的人生對遮(chia)改變。(創12, 13) 1 亞伯拉罕和羅得因為𪜶的牧者相爭來分開。羅得有羊、牛，伊選擇約但河的平原，因為土地肥，親像埃(ai)甸樂園、埃及。 2 羅得選擇和亞伯拉罕分開，因為 (1)經濟上已經獨立。阿叔無閣遐重要 (2)靈性上，阿叔無閣是伊的英雄，伊佇埃及亦失敗 (3)平原適合飼牛、羊 (4)欣羨城市物質享受，無愛蹛布棚。     所多瑪( Só͘-to-má) 和蛾摩拉( Gô-mô͘-la̍h) 的罪惡重，上帝欲毀滅𪜶，總是欲救羅得一 家。天使催迫羅得趕緊離開城，伊延迁(chhiân)，天使牽伊和伊的某、做伙蹛(toà)的兩個查某囝的手，𤆬(chhōa)𪜶到城外。(創18,19) 1 羅得對離開所多瑪真躊躇(tiû-tû)，顯出伊受物質世界影響 (1)呣甘放棄佇遐的財產、地位 (2)認為城市奢華的生活並無呣著。 2 羅得勸伊的囝婿綴(tòe)伊離開城，免得滅無，𪜶掠伊是講笑。佇𪜶心目中，放蕩的生活是正常，奇怪伊有"滅無"的想法。     天使警告離開城的羅得一家 。講："恁著逃命，呣通越頭看，呣通踮平洋，著走去山裡" 。天使答應𪜶去到附近較(kah)細的城，硫磺及火才對天降落，毀壞這兩個城及平洋的一切。(創19) 1 天使吩咐呣通停留、著走(cháu)，是欲逃命，離開邪惡的城市。 2 羅得的心猶原佇城，愛覕(bih)去較細的，通閣過奢華的生活。 3 伊的某或是呣信、好奇，抑是心呣願，越頭看，就變做鹽柱。 4 伊的某的結局，拍醒伊，𪜶三人離開城去踮佇山洞裡。     羅得踮邪淫的世界，為𪜶心苦楚，總是無作為 。(彼後2:6-8) 1 佇起頭，伊看著潤澤的約旦河平原，認為這是上帝的賞賜。看著財富，伊離開信仰上通靠的導師阿叔，踏著錯誤的第一步。 2 𪜶離開親人，孤單蹛他鄉，伊亦袂免得受物質生活的引誘。 3 伊的信袂當影響伊的某、查某囝，𪜶踮世俗，接受世俗。 4 羅得眼光無遠，掠家己真𠢕( gâu )，最後慘慘收尾(林前10:12)。 ...

     人若踮佇基督，就是做新創造的 。舊的代誌已經過去，今攏變成新的(林後5:17)。聖神幫贊咱成做新創造的人。 1 踮佇基督：主是咱生活的中心，咱一切照主教示，伊做咱性命的源頭。當咱佇基督內面，伊互咱一個新的性命，重新開始。 2 做新創造的：靠聖靈引𤆬，用新的眼光，來看逐日的行、做。 3 舊的代誌欲過去：放離過去活佇肉體的生活、習慣，無回頭看過去拄著的懊惱及痛苦，按呢才會除重擔，過新日子。 4 一切攏換新：當咱經歷重頭生，有聖神踮咱內面的時，咱欲開始日日換新的路程，呣是咱家己來換新，是互主來𤆬頭，因為前咱趁世間，照世間的法度，咱需要對起頭來改變。 5 上帝幫贊：為咱好，上帝試驗咱，鍛煉咱，親像鍛煉銀一樣(詩66:10)。上帝管教，是照伊的標準，呣是照咱所認捌的。     著獻家己的身軀做活的祭，閣心志換新來變化家己 。無及世間像款，著明白上帝善良、通歡喜、純全的旨意(羅12:1-2) 1 獻家己做祭：排列一切，獻做祭，拼空家己，才會出死入活。 2 拼空家己：看無家己，咱若無放家己煞，只有顧家己的立場，就會堅持講 "這是我的脾氣、我的原則、我的毛病...我就是按呢"。當咱自我做中心，咱會用"我是、我欲、我想、我愛、我認為..."。聖神啟示咱主耶穌的教示，愛咱放落家己的想法，學習順服。 3 心志換新來變化家己：無醉茫茫過日，無拍化(hoa)聖神的催逼、感動(帖前5:19)，逐日互伊來改變咱的心思意念。 4 莫( bo̍k )得及這世間像款：雖然活佇這世界，總是無綴世界。 5 明白上帝的旨意：就是善良、通歡喜、純全的旨意。 6 求上帝幫贊咱，呣但(nā)今仔日是新的，逐個明仔載也攏是。     新創造的人，只有看著頭前的路，無揹(phāin)過去的重擔 。咱信主以後，基督就踮咱內面，給咱換新。咱的行、做著和信心相四配，脫離血氣，義的上帝的神才會踮佇咱內面(創6:3)。

          法利賽人執訣佇傳統，著對內心改變才有出路 (可2:18–22)。 1 法利賽人給禁食當做表現敬虔的方式，每禮拜禁食兩遍。𪜶責備耶穌的學生無禁食，無虔誠。耶穌用三個譬喻來回應： 2 第一是新郎無佇啲，賀娶的人才憂傷；這才是適當的做法。 3 第二是給新布縫佇舊衫的譬喻，第三是新酒裝佇舊皮囊的譬喻，耶穌借這表示新舊無四配，舊的、呣對的，著完全除去。 4 耶穌做模樣 (1)招抽餉的利未，關心佇羅馬政府當職的兄弟 (2)安息日醫病，表明這日是互人做好事，呣是為著守律法(太9)。 5 法利賽人家己互律法束縛，閣要求所有的人著守𪜶所附加的條文做傳統，給活的信仰變做袂變通的文字。耶穌講𪜶著改變。 6 新約教會的挑戰：外邦人無守割禮，猶太人吃無清氣的物。 7 第6世紀教會的挑戰：拜殉道者、聖徒，修道士苦毒家己... 8 美國的挑戰：奴才制度、女性牧師、異族通婚、同性戀...        咱做耶穌的學生，著改變，活出基督的疼和公義 。 1 信仰著顯出佇逐日的生活中，佇所做的逐項代誌(雅2:22)。 2 世界咧變，教會的做法亦著變，總是無及世間像款。著心志換新來變化家己，趁上帝善良、通歡喜、純全的旨意(羅12:1,2)。         佇時代、教會變動的時，咱亦著有變化 。咱攏是教會百體中的一體，著相關懷、鼓勵，相召參與教會的事奉。除了禮拜日的敬拜，咱通利用週間、抑是禮拜日辦活動，大家相分享，來感受著佇教會中的溫暖和疼，是遐爾仔媠，上帝所歡喜的(詩133:1)。 1 身體關懷：舉辦健康講座，筋骨的活動，大家相扶持。 2 心理關懷：定期探訪慰問，常常相請安，提供及時的幫贊。 3 靈性關懷：通過查經班、信仰分享，增長屬天的智慧。 4 社交關懷：借團契、小組開設趣味班，畫圖、手工藝等，提供會友交流的機會，來融入教會的大家庭。 5 事奉：參加禮拜日服事、詩班、團契等，及主同工。

        加4:1-11講，為著咱，基督對律法中贖回咱，閣互咱認捌上帝和伊的法度，咱呣通閣執守傳統，做律法的奴僕，受伊管轄。         加4:4講基督出世的時機 ：若是到彼個時已經滿，上帝差伊的囝，對婦仁人來出世，出世佇律法下。遮提起3項 (1)時到基督才來 (2)顯明天頂對地上的疼 (3)人受律法苦楚的時，基督出世。        為著咱，上帝揀時互基督降世，完成拯救人類的計畫 。 1 亞當夏娃受蛇引誘，呣願受管教、欲自我做主，上帝就開始拯救的計畫。伊揀選以色列民族，用十條誡互怹(in)，通認捌人和上帝(創造天地的主宰)的關係，以及社會倫理(人和人的關係)。 2 當以色列人呣受管教，上帝興起眾先知，讖語(chhàm-gú)彌賽亞的拯救，和伊的一生，隔安排適當的時機，互讖語得著應驗。 3 上帝啟示但以理，讖語拯救者會來、閣受剪除的年。        基督在世，是當猶太人佇政治上、宗教上，極其鬱卒(ut-chut)的時 。 1 政治上：怹經歷巴比倫到羅馬的統治，期待彌賽亞降世。 2 宗教上：瑪拉基以後，有400冬上帝無差先知對怹講話。行洗禮約翰出來呼召，就去伊遐，接受反悔的洗禮，來得著赦罪。 3 律法上：怹執訣(koat)律法的文字，做表面功夫，其實內心無平安。        基督在世的時，整個地中海屬羅馬帝國，傳福音極其有利 。 1 羅馬帝國時代，交通發達，商業興旺，利便傳福音到逐四界。 2 語言統一，對思想的傳講有利，新約聖經就是用希臘文寫的。 3 希臘文化、哲學遍傳整個地中海，影響當時的世界。希臘的哲學家給人類思想寫佇冊，總是哲學猶原袂滿足人心神的需要。 4 路加醫生寫路加福音互希臘人，點出希臘哲學的欠缺；只有基督才是真正完美的人，人類的導師，對創造世界的上帝來的。         你的日子怎樣，你的氣力也欲按呢 (申33:25)。上帝有揀伊的時，伊亦定咱的日子，雖然有壓力和引誘，內心的憢(giâu)疑、軟弱，伊應允拯救，賞賜咱一世人有够額的恩典和氣力(林後12:9)。