Taigi 讀聖經

      面對"艱難"，迦勒猶原信靠，上帝應允互伊土地 (民13, 14)。 1 上帝𤆬( chho ā )以色列人出埃及，經過曠野，第二冬就接近迦南地。 2 摩西愛𪜶連鞭去給地取來，𪜶認為著先派人去探(申1:21, 22)。 3 上帝順𪜶，摩西揀12個族長(一支派一個)去探迦南地(民13:2)。 4 𪜶用四十工，遍行南北，挽(bán)水果倒去，互眾人看閣講：這確實是流奶及蜜的地；總是，遐的百姓比咱勇，城堅固闊大。 5 迦勒安慰𪜶，講：咱著隨去得彼所在！咱會卡贏(民13:30)。 6 去探的有10個講：阮看家己親像草蜢( meh) ，照𪜶看，阮也是按呢。 7 會眾喉( âu )叫、啼哭，怨摩西、亞倫講：呣值著死佇埃及、曠野。 8 約書亞及迦勒拆裂衫勸𪜶：耶和華歡喜咱，給( kā )地賞賜咱；呣通背叛伊，也莫得驚惶( hiâ n )。𪜶講：用石頭抌(tìm)死𪜶。 9 耶和華受氣，決意除去悖逆的百姓。摩西求上帝，上帝回心，講：傳歹消息的著死，20歲以上、出怨言的，袂入迦南地。 10 閣講：迦勒全心綴我，我欲𤆬伊入伊行到的地，互伊做業。     信心，經過45冬的考驗，迦勒提著伊的福分 (民14)。 1 以色列人流浪曠野38冬，才倒來迦南地。𪜶征服濟濟城，總是無全部。約書亞有歲，照上帝吩咐，伊分土地互無地的支派。 2 迦勒向約書亞求地 (1)上帝45冬前應允給希伯倫互伊做業 (2)伊佇曠野，爭戰、出入，到今85歲猶原勇健 (3)伊相信上帝的應允，有信心趕走有堅固山寨( chē )、勇壯的住民，得著彼個地。 3 迦勒 (1)給希伯倫的三個大漢族趕走 (2)為伊的查某囝揣(chhōe)著勇士做囝婿，互𪜶地、水泉 (3)伊的囝婿是第一個士師。 4 上帝、摩西、約書亞攏見證伊 "專心跟綴(toè)耶和華"。     迦勒全心信靠，上帝賞賜伊年歲、勇健、樂觀，閣土地 。 1 身體勇健：伊佇85歲，氣力親像45冬前摩西差伊的彼日。 2 靈命堅強：伊探迦南地，取希伯倫，深信耶和華及伊同行。 3 心神無老：雖罔(bóng)已經85歲，伊勇敢挑戰大漢族。

       上帝創造世界、創造人，伊的本意，是欲和人親近 。 1 上帝認人做朋友：伊互人有伊的形像，閣享受伊的創造。 2 上帝關心人：通過義人亞伯拉罕、先知、主耶穌。 3 上帝和人蹛：伊做埃甸園，摩西設會幕，知心的大闢欲起殿。 4 主耶穌道成肉體來到世間(約1:14) (1)傳講和上帝閣和的道 (2)通過伊，人通就近天爸(約14:6) (3)耶穌斷氣的時，聖殿至聖所的帳裂做兩爿(太27:50)，表示通過伊，人通直接及上帝相見。     著除去阻擋咱及上帝親近的塞礙，過新的生活 。 1 除罪：罪隔離上帝和咱，伊是聖潔公義，主替贖互咱得清氣。 2 綴耶穌：咱才會就近天爸，伊是路、真理、活命 (約14:6)。 3 著悔改 (1)無閣活佇罪惡、私慾和世俗內面 (2)無跤踏兩隻船，一方面想欲追求聖潔，一方面閣愛世上的榮華富貴(雅4:8)。     親近上帝，就是建立及上帝的親密關係 。因為人的軟弱，咱的生活充滿罪惡：無作為，貧惰(pîn-toān)，荏懶(lám-noā)，追求世間的權勢、肉體的快活，離開聖潔公義的上帝遠遠。 1 著改變：著有悔改、揣求真理的心，決心無閣做舊的我。 2 聽上帝講話：讀聖經，看屬靈的媒體，上帝通過這啟示咱。 3 和上帝講話：常祈禱，排列一切佇伊面前，伊隨時咧等待咱。     親近上帝，伊就親近你 。(雅4:8) 1 耶穌講：人疼我，就著守我的道理，我的爸欲疼伊(約14:23)。 2 亞伯拉罕做上帝的朋友(賽41:8)，上帝賜福，互伊做眾人的爸。 3 撒該親近主，上帝換新伊的心 (1)今伊關心四周圍的人 (2)伊慷慨救濟散鄉人，賠償以前受伊詐欺的 (路19:1-10)。 4 親像放蕩子，伊離開厝，用了所有的，悔改回頭，得著老爸完全的接納。咱若願意親近上帝，伊隨時咧等待，為咱準備，建立信心、改變性命、賞賜能力，幫贊咱解決拄著的問題。 5 常常親近上帝，你欲體會上帝永無離，閣時時幫贊。

       馬利亞袂嫁就懷孕，伊所生的囝耶穌是伊一世人所關心的 。 1 天使講你欲對聖神懷孕。你的囡仔欲接續大闢做王。馬利亞雖然著驚，會有壓力對社會、未婚夫遐來，伊順服、接受。 2 天使掛保證。伊的表姊也懷孕，雖然年老、早著超過生育的年齡。這攏是上帝的計畫，出佇伊的權能。                  3 伊相信上帝的權能。事實上，頭前的路，上帝給伊開好好。     我的囡仔出世，顧羊的、博士閣大自然攏來拜伊 。 1 約瑟娶馬利亞。伊接近產期的時，羅馬政府戶口普查，𪜶長途旅行到伯利恆，客館滿員，伊佇馬椆( tiâu )生產，嬰仔囥佇馬槽。 2 天使給城外顧羊的講，"恁的救主出世啦，包佇布、倒佇馬槽"。閣有星停佇伯利恆頂面，看星的博士對東方來朝見新生王。     耶穌一出世，就互約瑟和馬利亞心艱苦、俥(chhia)盤 。 1 𪜶做伙去聖殿獻祭，西面抱嬰仔講：伊是 "外邦人的光，以色列人的榮耀" "互濟濟人跋倒，妳的心欲有劍鑿過" (路2:28-35) 2 上帝啟示𪜶著覕(bih)去埃及，因為希律王欲刣死伯利恆所有兩歲以下的囡仔。等希律死，𪜶才倒去以色列的拿撒勒。     耶穌大漢，馬利亞給耶穌交互上帝，閣伊的同胞 。 1 耶穌十二歲彼年，綴父母去聖殿。父母離開了，伊閣佇遐和先生談論。𪜶來揣伊，伊應："我應該佇我父的厝"(路2:42-51) 2 耶穌三十歲開始傳道，伊和學生去參加婚宴。馬利亞給伊講酒沒啦，伊應講 "我有我的時" 。伊給甕內的水，變做上等酒。 3 耶穌佇加利利省傳道，馬利亞帶伊的兄弟去揣伊，伊講"聽上帝的道理來行的人，就是我的老母及兄弟" (路8:20-21)     馬利亞一世人關心耶穌，她顯出普世母親攏有的疼 。 1 馬利亞記牢耶穌的一點一滴：醫病、趕鬼、傳福音，眾人綴。 2 耶穌責備宗教領袖假好，伊承認伊是上帝的囝，𪜶判伊著死，逼羅馬官釘伊佇十字架。馬利亞陪佇十字架下到伊死。