Taigi 讀聖經

      基甸續接士師底波拉以前，以色列人行上帝看做歹的 。 1 底波拉互以色列人太平40年，以後𪜶受米甸人壓制七冬。 2 這期間，以色列人佇山裡挖空、起營寨。米甸人來攻擊，拍歹土產，無留食物互以色列人。𪜶困苦，就求叫耶和華。     耶和華 召伊出來救以色列，伊要求主的使者互伊證據 。 1 基甸要求兆頭，使者用拐拄(tuh)石磐頂的肉和餅，火就給𪜶燒了。 2 (1)上帝吩咐伊拆老爸為巴力起的壇，剉(chhò)壇邊的偶像，做柴燒 (2)給耶和華起壇，獻牛做燒祭 (3)伊的老爸，向受氣的以色列人講：巴力若是上帝，有人拆伊的壇，互伊為家己爭論。     基甸 向上帝求2個神跡，伊才心安招以色列人出戰 。 1 神跡：羊毛外口過暝，只有(1)羊毛澹(tâm) (2)塗跤(thô͘-kha)澹。 2 基甸招3.2萬人，有2.2萬人心驚惶，上尾上帝指示揀300人。     暝時，耶和華吩咐伊攻擊敵人。𪜶大贏，得著40冬的和平 。 1 為了壯伊的膽，上帝叫伊去探敵營。聽著一人講伊的夢：有大餅輾落來，給布棚衝倒。伊的同伴講，上帝給咱交佇基甸啦。 2 以色列人分3隊，提哨角和囥(khǹg)火把(pé)的甕，分佇敵營的四圍。三更到，就歕(pûn)哨角、提出火把，閣大聲喝(hoah)。 3 敵人大驚，家己相刣。以色列人對逐所在攻擊逃走的米甸人。     基甸脫袂出自卑感，愛欲把握濟濟，最後是空空 。(士6-9) 1 上帝的使者向伊顯現的時，伊無自信，亦憢疑上帝的攝理。 2 伊看著神跡，確信耶和華呼召伊。以後閣要求羊毛的神跡。 3 上帝叫伊出戰，伊聽著對方的兵做的夢，才行動(士7:13-14)。 4 攻擊的時，喝講"耶和華及基甸的刀"，高舉家己(士7:20)。 5 給搶來的金耳環，做以弗得(偶像)，後來以色列人去拜伊。 6 戰後倒去厝，無撙節，有70個囝，最後攏互小姨生的囝刣死。 7 基甸是當時以色列人的縮影。上帝揀伊，伊猶原憢疑。上帝幫贊伊，伊無榮光上帝。伊無引𤆬百姓，家己反離開上帝。

      人第一遍犯罪，就是憢(giâu)疑上帝的話 。 1 撒但互亞當、夏娃憢疑上帝，"食彼欉樹的果子，無的確會死"。 2 上帝通過歷代使者，白紙黑字寫的應允，咱有時亦會憢疑。 3 (1)上帝無用"心憢疑的"。伊給基甸講：驚惶懔懾(lún-neh)的，通離開倒去(士7:2,3) (2)主佇故鄉因為眾人呣信，無行神蹟(太13:58)。     因為咱憢疑 上帝的應允 ，驚惶和掛慮管轄咱 。 1 生活中有濟濟袂確定的代誌，互咱驚惶和掛慮，特別是病痛、死亡的威脅、經濟無穩定、失業等等的問題。 2 有人為著袂發生的代誌煩惱，不時有"萬一…"的念頭。 3 若準心裡面常常有驚惶和掛慮，咱的生活就無平安。 4 (1)上帝賞賜咱能力、仁愛、守己的心神，呣是驚惶(提後1:7) (2)咱雖然行過死蔭的山谷，亦呣驚災害，因為上帝及咱佇啲；伊的槌，伊的枴，安慰咱(詩23:4) (3)免驚忽然來的危險，上帝的確堅固你，做你倚靠，無陷落羅網(箴3:25-26)。 5 (1)明仔日有明仔日的掛慮；一日的艱苦一日夠額(太6:34) (2)莫得掛慮，著用祈禱、感謝，將咱所求的排列佇上帝。(腓4:6,7)     因為咱憢疑上帝的信實，撒但利用咱的罪惡感，講咱袂得赦 。 1 撒但透過良心告咱，掠牢、放大、責備咱的過失，互罪惡感不時佇咱心肝頭轉踅(se̍h)，激咱責備、受氣、怨恨家己，致到凝(gêng)心、鬱卒，無平安，呣相信上帝會赦免咱的罪。(啟12:10) 2 咱若靠聖神的幫贊，相信上帝赦罪的應允，撒但就無作為。 3 (1)撒但的暗步，上帝攏監視，互伊無超過界限(林前10:13) (2)上帝容允撒但對人攻擊，因為信徒欲對遮個試煉，得著成長。 4 著信 (1)咱反悔，接受主耶穌，伊除去咱的罪，咱得著重頭生。 (2)因為軟弱，免驚惶，通不時倒轉到上帝的施恩座前，祈求幫贊、赦罪(希4:16) (3)咱若認家己的罪，上帝是信實、公義，欲赦免咱的罪，洗除咱一切的不義(1約1:9)。

    律法中最大的是"愛上帝"，第二是疼人 (太22:36-40)。 1 十條誡(律法)講人和上帝，以及人和人的關係，基礎攏是"疼"。 2 十條誡前4條講袂使有別的上帝、拜偶像、濫糝(lām-sám)稱上帝的名，著守安息日。後壁6條講親人、厝邊和四圍的人。(出20:3-17) 3 咱常常講疼厝邊、疼兄弟姐妹，閣講上帝怎樣疼咱，總是，咱亦著思考律法中最大的"愛上帝"，"怎樣愛上帝？"     檢討錯誤一：疼人就是愛上帝 。 1 對十條誡看，愛上帝、疼人所講的內容並無相像。 2 愛上帝、就著疼人，總是，疼人、無代表就是愛上帝。 3 講"我愛上帝"，閣怨恨他的兄弟，就是講白賊。(1約4:20)     檢討錯誤二："相疼"就完全實現一切律法 。 1 羅13:8-10講"疼人的，有盡律法"，舉的例是無行淫、刣人、偷提、貪心，所以講的"疼人"，只有盡律法中、人的部分。 2 律法呣但(m̄-nā)講"疼人"，律法亦講，無拜偶像、無拜受造的。     檢討錯誤三：人無辦法直接愛上帝 。 1 咱所信的、向望的、愛的是看袂著的上帝，伊是舊約以色列的上帝，新約耶穌是聖囝，佇聖經顯明是三位一體的上帝。 2 對上帝的話，閣聖神的幫贊，雖然看袂著伊，咱用信心信靠。 3 上帝先疼咱，差主耶穌贖咱的罪，互咱做伊的囝，伊歡喜和咱親近，咱通佇祈禱中直接表達感謝，守伊的誡命回應伊的疼。     愛上帝著"盡心、盡性、盡力" (申6:5)。 1 (1)咱愛上帝，著守伊的誡命(1約5:3)；欲知伊公義、純潔、憐憫的聖質，著讀聖經 (2)愛上帝著愛"盡心、盡性、盡力"，所以咱著愛有心、亦著有行動來配合；著思考怎樣做、閣做互好。 2 亦著借祈禱，將一切代誌排列佇上帝，建立和伊的親密關係。 3 彼得和耶穌有親密的關係，伊愛耶穌，耶穌愛伊用"照顧羊仔"來回應對伊的愛。咱愛上帝，著及伊親近，閣守伊的命令。

     約瑟善良正直，經過種種試煉，最後全家得著團圓 。 1 雅各年老、所疼的某生約瑟。伊夢著日、月閣 11 粒星攏拜伊。 2 約瑟將兄哥的歹品行給老爸講。伊亦對兄哥講伊的夢，𪜶就閣卡怨恨伊。𪜶趁約瑟來探𪜶出外有平安抑無，給伊賣去埃及。 3 佇埃及，伊拒絕主母的引誘，受誣賴，關佇法老王的監獄。 4 佇監獄，伊解法老酒政的夢，閣解法老的夢，高升做宰相。 5 約瑟趁伊的兄來埃及糴 (tia̍h) 糧，和𪜶相認，給老爸全家接來。     約瑟佇困苦中，猶原歸榮光上帝，上帝成伊少年的夢 。 1 (1)約瑟小漢的時老爸疼，兄哥怨妒 (2)以後受賣去埃及，佇監獄13 年，苦難中，操練忍耐、信靠上帝的信心，閣管理的能力。 2 約瑟根據法老的夢，建議佇 7 年豐收積貯糧食，通應付 7 年飢荒。法老講，上帝將遮的代誌指示伊、可見無人親像伊遐有聰明智慧。法老互約瑟管理伊的家，閣派伊管理埃及全地。 3 咱若認真、吞忍、踮真裡、囥向望，上帝欲賞賜豐盛的人生。     檢采賣約瑟去埃及是出佇歹，最後是成上帝的大計畫 。 1 約瑟互兄弟賣去埃及，是為著成上帝及亞伯拉罕立的約。 2 (1)上帝透過伊治理埃及，互家族 70 人移民到遐，無死佇飢荒。430 冬後成長到 200 萬 (2)迦南地無開墾，無可能生湠 200 萬的以色列人，所以上帝互𪜶徙去埃及，直到摩西𤆬𪜶出埃及。 3 上帝透過約瑟做較大的代誌，伊離開故鄉是計劃的一部分。 4 無論境遇好歹，咱攏盡心盡力，上帝才會當佇遐為咱來安排。     約瑟受怨恨、冤枉，伊堅持對上帝的信心，無抾(khioh)恨 。 1 伊的囝 (1)瑪拿西=袂記得，放落兄哥的冤仇 (2)以法蓮=興旺，上帝賞賜。伊知，少年的夢，破碎和目屎，攏出佇上帝。 2 當伊高升做宰相，伊體會上帝的攝理。伊和兄弟相認的時講：呣免因為賣伊來憂悶。是上帝差伊代先來，欲保全𪜶的活命。 3 老爸死了，伊閣一遍對兄哥講：呣免驚，前恁的意思是歹，總是上帝的意思是好，欲保全濟濟人的性命。

       參孫的時，以色列人已經互非利士人管轄、同化 40 冬 。 1 參孫的老母袂懷孕。上帝差天使對伊講：你欲懷孕生囝，伊欲歸上帝做拿細耳人，拯救以色列人脫離非利士人的手。 2 當時 (1)以色列人佇"文化上"已經受同化，無閣求叫上帝 (2)𪜶呣知參孫是保護𪜶的"士師"，甚至給參孫交互非利士人。     信，互參孫得著力量；違背誓(sē)約，上帝離開伊 。 1 上帝的神 3 遍感動伊 (1)伊手無家私，拆裂獅，親像拆裂山羊仔(2)伊拍死 30 個非利士人，搶衫來互參加婚宴的人。𪜶臆著伊的謎，因為未婚妻漏答案 (3)非利士人威脅猶大人，縛參孫互𪜶。伊掣(chhoah)斷索。提驢仔骨，拍死一千個非利士人。 2 伊掠 300 隻狐狸，每 2 隻的尾縛火把，燒非利士人的五穀。 3 伊去親近妓女，非利士人佇城門口當伊，參孫半暝起來，拆城門的門扇、門框，下佇肩頭，扛(kng)去對面的山頂。(士 16:3) 4 伊戀愛一個查某人，伊騙伊講力量的來源 (1)查某人剃伊的頭毛，非利士人掠伊，挖出伊的目睭，鍊伊佇監挨磨(e-bō) (2)伊的頭毛漸漸長 (3)非利士人佇廟獻祭、宴樂，叫伊出監，創治伊 (4)伊要求囡仔互伊倚佇一枝柱仔，伊求上帝賜伊氣力，一手攬一枝柱仔，出力，厝就倒，硩(teh)死厝內、厝頂 3,000 外人。 5 參孫做士師，伊的力量對上帝來，頭毛是誓約、記號若定。     參孫是信心的英雄 (希 11:32)。伊求上帝，顯出伊的信心。 1 參孫有上帝的呼召、賜福、上帝的神感動，總是順家己的感覺，無撙節(chún-chat)，跋(poa̍h)落佇情慾、貪食、受氣、驕傲的陷坑。 2 參孫求上帝 (1)啄焦(chhuì-ta)求水(士 15:18) (2)求氣力(士 15:28)。 3 上帝應允參孫的祈求，因為 (1)伊對頭到尾行上帝吩咐的：攻擊非利士人 (2)伊的信心。伊相信上帝的權能，向上帝求。 4 參孫對抗非利士人，啟示咱 (1)只有一個人信靠主，亦會互對敵喪膽 (2)咱存信心謙卑祈求，上帝互咱成閣較大的事。

       亞居拉及百基拉接待傳道者：保羅和亞波羅 。 1 亞居拉及百基拉夫婦搬去哥林多，因為羅馬皇帝趕猶太人離開羅馬。保羅第二遍旅行傳道到哥林多，拄著𪜶夫婦，因為仝是織布棚，𪜶提供伊蹛、工課(khang-khoè)，閣友情(徒 18:1-3)。 2 保羅干證耶穌，受猶太人謗瀆，才去別人的厝蹛(徒 18:5-7)。 3 保羅第二次宣教結束路上，帶𪜶夫婦同行(徒 18:18)，伊通專心傳道，亦有人幫贊。𪜶夫婦放落一切，陪伴保羅去旅行傳道。 4 保羅捌(bat)拄(tú)著性命的危險，𪜶拼命去救伊(羅 16:4)。 5 佇以弗所，𪜶拄著亞波羅。伊有學問，會講解聖經，總是伊知約翰的洗禮若定。𪜶向亞波羅分享、保羅講的真道(徒 18:26)。 6 亞波羅前傳悔改，今傳耶穌是彌賽亞。佇哥林多，伊"灌沃"保羅所"栽種的"(林前 3:6)。伊成做福音有力的辯護者(徒 18:28)。     百基拉及亞居拉為著宣教來搬厝，閣拍開厝做教會 。 1 佇哥林多，保羅佇𪜶的厝傳福音，受猶太人毀謗，伊才離開。 2 𪜶綴保羅去以弗所，留佇遐，開放家庭做教會(林前 16:19)。 3 羅馬換新皇帝，𪜶搬倒去羅馬，佇遐的厝傳福音(羅 16:3)。 4 𪜶對羅馬閣徙去以弗所，及提摩太同工(提後 4:19)。     接待為主的名出外的，是和𪜶同受紀念 (約三 7-8)。 1 亞伯拉罕(創 18:1-19)，羅得(創 19:1-3)接待出任務的天使。 2 守寡人養飼以利亞(王上 17)，書念婦人接待以利沙(王下 4)。 3 耶穌招呼抽餉的撒該，伊就歡喜 "接待" 耶穌(路 19:2-6)。 4 耶穌在世，常常去伯大尼的馬大、馬利亞的厝(路 10:38-42)。 5 檢采咱無認為家己是傳道者，總是咱通做一個同工，陪伴、幫贊、付出、供應、指導、祈禱的人。     保羅感謝百基拉及亞居拉翁某 (羅 16:4)。𪜶夫婦提供保羅家庭的溫暖，𪜶同心佇福音事工，同齊勞苦。保羅寫互提摩太最後的批，猶原切切數念𪜶，這對相捌 16 冬的老朋友(提後 4:19)。

        仁愛著佇日常的生活中活出來 。(林前 13:4-7) 1 仁愛是 𠢕 (gâu)寬容、慈悲；仁愛是無怨妒；仁愛無誇口，無品捧(phóng)，無行見笑的事，無求家己的利益，無快受氣，無記得人的歹，無歡喜不義，是及真理相及歡喜；(13:4-6) 2 凡事忍受，凡事相信，凡事向望，凡事吞忍(lún)。(13:7)       生活中，無疼心的行做；無張持(tî)、抑是刁(tiau)工做的 。 1 怨妒：不滿別人有、家己無，就受氣，甚至攻擊，若冤仇人。怨妒希望家己無的，別人也無；甚至家己有的，別人袂使有。 2 誇口：歕家己偌爾(loā-nī)𠢕，欲引起別人注意，期待別人謳咾。誇口的人認為家己比別人巧，自高、驕傲，天使因為按呢墮落。 3 品捧：痟(siáu)狂、膨(phòng)風，講話過頭佇真正的家己。看無別人，講大聲話，歕(pûn)牛皮，總是若歕風的雞胿(kui)仔。 4 行見笑的事：做了無應該做、歹勢講的代誌。 做了粗魯、無禮貌、無尊重人、無合宜的代誌。 5 求家己的利益：為著家己的好，執死訣、無相讓。 堅持家己的看法，看重家己的權利，無放棄應該得的。 6 快受氣：感覺得家己是對，別人呣對，閣袂當忍受。袂當忍受受委屈、受刺激、代誌超出家己的原則的。 7 記得人的歹：抾(khioh)恨，給別人所做的歹代記椆椆(tiâu)。給別人犯的錯誤(檢采是家己的看法)，逐件攏囥(khǹg) 佇心內。 8 歡喜不義：掠"做歹"做快樂。家己行歹，也歡喜別人行歹。挖別人的見笑的事，私人的事，閣四界傳。     勇敢面對別人無疼心的行為，因為聖神用疼灌沃咱 (羅 5:5)。 1 歡喜忍受、做伙背重擔，做伙面對問題，呣是去四界傳。 2 相信對方、正面看代誌，無隨便定人的罪，想辦法揣出問題。 3 囥向望、相信上帝的攝裡，面對問題，代誌上尾會得著解決。 4 吞忍、總是心亦著放互開，因為這一切攏欲過去。

    主耶穌招人來得著活命，亦招人做學生 (約10:10)。 1 主招著磨擔重擔的。無閣暝日追求地位、錢財，來學習伊溫柔謙卑，交託伊、常常感謝，心神得著安歇(太11:28-30)，享受做囝兒的福氣。咱若願意負起做囝兒的責任，就著綴主做工。 2 主招人綴(toè)伊。你看無家己，伊贊你揹十字架(可8:34)。     綴主的人，就是看無家己 ；趁上帝疼、憐憫、公義的心意。 1 看無家己(捨己)呣是完全否定家己、棄捒家己，為著欲綴主。 2 捨己的誤解 (1)著放下家己所有的想法、趣味，甚至性命 (2)著否認自我的願望，親像成功、愛情、理想的工課。 3 耶穌幫贊咱改變家己 (1)為別人設想，得著較豐盛的性命(約10:10) (2)回復咱受造的時的本性，互世界因為咱變較媠。 4 怎樣改變 (1)詳細檢驗自我，誠實面對家己、面對上帝 (2)體貼上帝的心意，除去舊的人無合上帝的部分，棄捒著棄捒的。 5 保羅綴主以後，追求真理、對性命的熱情猶原保持。 6 因為順趁上帝，所以亦著關心家己，才會有力做好的工。     十字架代表苦難，為著救人忍受艱苦，甚至失去性命 。 1 人生的苦(病痛、憂愁、死亡...)，呣是主所講的十字架。 2 十字架亦代表救贖、赦罪、恩典和疼，紀念主為咱受釘。 3 十字架亦是榮耀、向望、得勝的記號，紀念主閣活。     揹(phāin)十字架是為別人、願意擔重擔、犧牲，主欲贊你 。 1 綴主的挑戰 (1)咱有濟濟責任：家庭、職場、教會服事，著做安排 (2)綴主是一世人，著佇逐時準、逐場合攏保持咱的決心。 2 主佇客西馬尼園祈禱以後，就給爸交代的，做伊的十字架。 3 綴主的付出 (1)看無家己，無為家己，覺悟可能會失去世間的享受(太16:24) (2)揹咱的十字架，咱可能會失去朋友、事業...。 4 主應允 (1)有伊的恩典，當我軟弱，我反有氣力(林後12:9-10) (2)奉獻無惜力，贊人免人知。事後的喜樂無通比。

        佇這快速變化的時代，有一寡代誌緊袂起來，咱著等待 。 1 嬰仔出世、結婚、手術、搬厝...攏著等待；雖然咱無愛等。 2 網路、人工智慧(AI)、應用程式，互咱生活的跤步愈來愈緊。 3 現代人計較時間，做代誌著緊、馬上，咱常常無耐心聽候。 4 主無延延(chhiân)所應允的，伊看千年若一日(彼後3:8-9)。     以色列第一個王掃羅對上帝無信心，無耐心聽候 。 1 掃羅做王的第2年欲和非利士人相戰，先知撒母耳會𤆬眾人獻祭，撒母耳慢7日到，伊就家己獻(撒上13:9-14)。 2 伊無相信上帝咧攝(liap)理，驚上帝誤代誌，就無等待。     檢采咱會等久久，才得著回應；著有信心 。 1 聽候、等待上帝的，的確無見誚(詩25:3)、有福氣(賽30:18)。 2 挪亞600歲，伊一家和精牲、蟲豸(thoā)、飛鳥入所造的方舟。雨落40暝日，150日後水退。到地焦(ta)，已經超過一冬。 3 亞伯拉罕75歲，上帝召伊離開故鄉，應允伊的後裔會成做大國。伊等候久久，伊的某撒拉生以撒的時，伊已經100歲。 4 約瑟互兄哥賣，佇埃及做奴才。互主人提拔，反互主母誣賴關佇監。伊替酒政解夢，等待酒政救伊出監，已經超過2冬。 5 哈拿無生囡仔受激，逐冬去耶和華的厝，伊佇遐下願，所生的囝欲歸上帝。上帝憐憫伊，伊生撒母耳，以色列第一個先知。耶和華眷顧哈拿，她閣生三個囝、兩個查某囝(撒上2:21)。 6 約伯失去親人、財產，伊等待上帝，開拆人生汰會遐歹過。 7 拉撒路破病，著急的阿姐馬大、馬利亞，等待耶穌來醫治伊。     著壯膽聽候上帝，伊是全能，呣通只有看著家己的有限 。土地欲出產，著聽候秋霖春雨(雅5:7)。咱亦著忍耐到主來。 1 亞伯蘭拄著饑荒，就去埃及，無等上帝的指示。(創12:17-19) 2 亞伯蘭驚互人刣，稱呼媠某做小妹，致到撒萊受𤆬去王宮。 3 雖然亞伯蘭無法度保護撒萊，上帝出手，刑罰法老。      

      爸母留財產互囝兒，是出佇疼 ；全世界攏是按呢。人佇世間，辛辛苦苦，累積錢財、經驗，向望給遮個傳互囝兒。 1 (1)逐人著磨、趁錢、享受，攏是照上帝賞賜的份額(傳5:19) (2)用合上帝的心意去趁錢，上帝賜福；貪財才是萬惡的根源(提前6:10) (3)真理及財富衝突的時，咱甘單會當揀一個(太6:24)。 2 人愛錢，過頭疼耶穌，就僫(oh)得入天國(太19:21-24)。 3 (1)處分財產有智慧，才是真祝福。財產互囝兒是需要智慧。起頭緊緊得著的產業，路尾呣是做伊的福氣(箴20:21)  (2)佇適當的時機，正確的用途，贊助囝兒。囝兒初初入社會，需要創業基金，需要徛家的厝等等，爸母的幫贊是真大的祝福。 4 遺產互爸母確信，佇𪜶過往以後，厝內的人猶原得著照顧。 5 (1)囝兒無應該給爸母積貯錢財，爸母著(林後12:14)，爸母亦呣通為按呢忽略家己 (2)囝兒是耶和華賞賜的產業(詩127:3)，爸母是上帝產業的管家，爸母期待的供應是對主人來，呣是囝兒。 6 飼囝防老？培養和囝兒的感情，𪜶會幫贊你度過年老。     互囝兒上好的產業是敬虔的心、德行和智識，上帝歡喜的 。 1 (1)教示細漢囝兒行正路，伊到老也袂歪斜(chhoa̍h)(箴22:6) (2) 行做正直，做好的模樣互囝兒看，是上好的遺產(箴20:7)。 2 無管教，會致到爸母和囝兒攏見笑(箴10:1)。耶和華審判祭司以利的家，因為伊無禁止伊的囝犯罪(撒上3:13)。 3 爸母有責任互囝兒體會，跟綴基督，欲得著人搶袂去的遺產。 4 信仰的傳續："亞伯拉罕的上帝"，是"以撒、雅各的上帝"(出3:6)；摩西傳互約書亞，保羅傳互提摩太。     性命的傳續。做一個台美人，咱希望囝兒 1 著記得台灣是咱的故鄉。是咱心內永遠的母親。 2 照聖經的教示行。互細漢囝兒上主日學，幫贊𪜶捌真道。 3 傳續家庭傳統。留好的人生體驗、態度互後代。

                                                                Nineveh 尼尼微城      上帝是赦免的源頭，伊有豐盛的慈愛，無放拺(sak)咱 。 1 上帝為世間人預備豐盛、永遠的性命，咱認罪，就欲得著。 2 上帝歡喜赦免人，有憐憫、有恩典，無快快受氣。(尼9:17) 3 罪得著赦，心中的壓力及重擔無去，咱欲有平安，閣有平靜的力量入咱的心，咱的心欲得著潤澤、充實、寬闊。 4 上帝差遣主耶穌，用伊的血贖咱的罪，信的人，罪欲得著赦。 5 上帝赦免過失，及罪惡，伊決斷袂掠有罪的做無罪(出34:7)。     雖然上帝願意赦免咱的罪，咱猶原著擔當犯罪的後果 。 1 亞當夏娃無順趁上帝，雖然得著上帝的赦免，𪜶受趕出埃甸園，以後亞當著勞苦才有通食，夏娃著承受生產的苦。 2 大闢犯姦淫，伊禁食悔改，雖然得赦罪，伊失落伊的囡仔。 3 以色列人去迦南地路中，不時埋怨，上帝罰𪜶40冬佇曠野。 4 主所疼的，伊欲警戒(希12:6)。咱若犯罪，著承受"後果"，通給這看做上帝出佇疼的"管教"，看做上帝互咱的鍛鍊。 5 主已經為咱的罪賠性命，所以咱袂有第二遍的死(啟20:14)，總是，咱的社會檢采會要求咱為咱所犯的，付出代價。     無赦免伊的兄弟的，天父也欲按呢對待伊 (太18:21-35)。 1 有一個欠千萬銀的，主人憐憫伊，免伊的債。伊出去，拄著欠伊一百個銀的，雖然仆咧求伊寬容，伊呣肯，給伊關落監。 2 主人召這個歹奴僕，講：你求，我就赦免你欠的。你呣憐憫你的同伴，親像我憐憫你。我給你交給掌刑的、等你還所欠的。     法利賽人講耶穌借鬼趕鬼，伊講：謗瀆聖神的，袂得赦免 。 1 法利賽人為著毀謗耶穌，運用所有的手段，謗瀆聖神亦敢用。 2 文士及法利賽人自高是信仰權威，耶穌傳講的，對𪜶是挑戰。 3 主耶穌醫好好青暝閣啞口(é-káu)的，法利賽人講伊借鬼趕鬼，耶穌講，鬼趕鬼無合理。聖神的權能𪜶知，為著打擊耶穌，𪜶竟然講白賊，顯出𪜶內心的邪惡(太12:22-32)。  

         Jana Harmon訪問50個基督徒，𪜶以前相信無神論。     結論1：無神論者佇信基督以前，對基督教的看法 。 1 無啥思考就接受四周圍、以及權威人士、所講反基督教的觀點，靠直覺拒絕基督教，總是講袂出家己所相信的。 2 認為信仰是迷信、戇想、無智識，無綴時代，無合科學。 3 教會和教會領袖的行為、主張，互𪜶失望。認為基督徒無寬容、固執、虛假，是愛議論人的人。     結論2：無神論者需要人的關心，親像一般的人 。 1 理想的衝突，對現狀的不滿，致到遮的無神論者轉向基督教。 2 對待𪜶若朋友，雖然𪜶堅持想法，亦會吐出內心的困擾。 3 互𪜶參與咱的生活，借著活的例，除去𪜶對教會的歹印象。 4 參與佇𪜶的生活，閣保持耐心，佇𪜶態度開放的時，就會接受福音。預先準備𪜶有趣味的主題，才會有效交換意見。 5 為𪜶祈禱，通過聖神的感動，改變𪜶的想法。     結論3：接受基督教信仰以後，𪜶的態度，閣面對的挑戰 。 1 基督教的思想較保守、執訣，造成𪜶和人的疏遠，互人拒絕；甚至朋友和親人。講著"耶穌" "去教會"，就換來對敵的眼光。 2 1/3的人無受親人朋友歡迎。佇基督的喜樂和平安，支持𪜶。 3 2/3的人認為，雖然𪜶會繼續保持無神論的觀點，基督教提供𪜶過去的世界觀以外的想法，通來比較、思考。     邪惡的戇人，安慰家己"無上帝"，愛欲逃過審判 (詩14:1)。 1 上帝受氣呣信伊的人，𪜶不虔不義、壓制真理(羅1:18-21)。 2 基督教無神論者綴耶穌佇四福音的教示，總是呣信超自然。聖經講：加添、刪除聖經的話的，欲失去福分(啟22:18-19)。 3 世界顯明上帝的法則，觀察、默想，就會體會。(羅1:20) 4 人內面的"靈"互咱和上帝相連，知伊的法則、旨意。(羅1:19) 5 向上帝求的、揣真理的，上帝向𪜶顯明(太7:7-8)。 ** 參考 https://www.christianitytoday.com/ct/2023/july-web-only/atheists-finding-god-jana-harmon-stories-faith-zh-hant.html

    人生的逐方面，攏著有準備，互家己有機會、安心 。 1 咱常常厝內會留真濟物，因為呣知抵時會用著。 2 林肯講：互我6點鐘去剉(chhò)樹，我會先用4點鐘磨斧頭。 3 讀冊、學技術，是欲為將來吃頭路、服務社會做準備。 4 買癌、年金等等的保險，是欲減少以後可能的負擔。 5 設立信託，是為臨終醫療，過身以後的財產處分等等做準備。 6 暗時等待新囝婿的在室女，燈無油，就受拒絕(太25:1-13)     逐項代誌著準備，閣踏出去；相信上帝會攝(liap)理 。咱若出外去演講，除了真早著做準備，前一日著設鬧鐘仔，安排交通...。其實閣有真濟，呣是咱會當保握；親像前一暝的睏眠，鬧鐘仔正常運作，上帝保守我的性命...。上帝的攝理，超出咱的想像。 1 (1)上帝有至高的主權，伊互萬物正常運作(來1:3)，咱著信靠伊 (2)咱袂當給代誌攏捒(sak)互上帝，貧惰(toān)的受伊棄捒。 2 人生的路途，著有智慧做計畫、做準備，亦著照上帝所啓示，來變動，閣給家己和所疼的人交托上帝，勇敢向標走 (2)咱通向上帝求(太7:8)，總是，家己著做，家己著負責(加6:5)。 3 雅各書4:13-15按呢寫：恁講 "今仔日阮欲去...蹛一冬，做生理趁錢"。 明仔日的事，恁呣知。...恁是雲霧暫時出現...。恁較好按呢講："主若願意，阮就會活，也欲做這項、彼項。"     機會，是留互有準備、閣願意互家己機會的 。 1 大闢平時顧羊，就操練趕野獸的技術。當伊去戰場送吃物互伊的兄弟，伊互上帝使用，拍贏對敵的大漢人。(撒上17:45-47) 2 彼得和約翰綴耶穌3冬，以後聖神相及，滿滿信心、能力。𪜶去耶路撒冷聖殿，拄著出世就軟腳的，就醫好伊(徒3:1-9)   3 保羅深知舊約聖經，主召伊，伊順趁，成做外邦人的使徒。 4 著運用你的恩賜，做好的管家；親像運動員，需要練習、參加比賽，才會發揮能力。亦記得：你的力量是對上帝來。

    保羅和巴拿巴壁畫[塞浦勒斯(Cyprus)的教堂]       巴拿巴全心事奉，通過伊的性命及事工，濟濟人信主 。 1 奉獻金錢。巴拿巴賣伊的園，將所得的銀，做教會路用。 2 熱心傳福音 (1)司提反殉教，耶路撒冷教會受逼害．學生四散，有到安提阿的 (2)有不止濟人接受福音來信主，耶路撒冷派巴拿巴去幫贊 (3)伊溫柔、熱心，有聖神及信滿滿，勸眾人用心志，結聯佇主。對按呢，濟濟人接受福音(徒11:19-24)。 3 團隊事奉。伊揣掃羅，做伙佇安提阿教示人(徒11:25-26)。 4 海外佈道 (1)聖神啟示，安提阿教會派巴拿巴、掃羅海外佈道 (2)𪜶去到塞浦路斯、土耳其內陸幾個城市(徒13:2-3) (3)保羅第二次海外佈道，伊和馬可去塞浦路斯(徒15:36-41)。     保羅和馬可得著巴拿巴接納，重新徛起來 。巴拿巴溫柔、用行動熱心幫贊人，人叫伊巴拿巴，"𠢕(gâu)安慰的人" 的意思。 1 接納翻頭信主的保羅 (1)巴拿巴𤆬伊去見使徒，𪜶才接納伊 (2) 安提阿教會需要牧養，伊招保羅去，教會得著興旺 (3)保羅傳福音到外邦的土耳其、希臘、意大利，通講是伊起的頭。 2 互馬可第二次機會 (1)保羅第一遍旅行佈道的時，馬可中途離開(徒13:13) (2)第二遍旅行佈道保羅呣帶伊去，巴拿巴和保羅相諍(sio-chèn)，最後巴拿巴𤆬(chhoā)馬可去別位佈道(徒15) (3)馬可以後成做彼得親切的助手(彼前5∶13) (4)互保羅重用(提後4∶11)。     安提阿教會顯出基督的性命，出對巴拿巴和保羅的牧養 。 1 安提阿教會出先知及教師、活潑有性命力(徒13∶1)。 2 彼時天下有饑荒，教會捐錢互耶路撒冷的信徒(徒11∶28-30)。 3 聖神感動，教會派巴拿巴、保羅、馬可出外傳道(徒13∶1-6)。 4 綴耶穌基督的人稱呼做基督徒，對安提阿開始(徒11:26)。     咱亦會成做一個巴拿巴 。巴拿巴有聖神的模樣及特質，挽回失迷的，接納心神變換回頭的(徒11:24)。咱感謝接納咱的 "巴拿巴"，咱亦著做一個"巴拿巴"，互人機會，重新出發。

       得救的秘訣：及基督同釘十架，"放棄家己" 。 無閣是 我 活咧，是基督踮佇我(加2:20)。咱重頭生以後，著拍拼做新的人！ 1 及上帝閣和。主給咱勘(khàm)印，及上帝和好，做上帝囝兒。 2 互聖神充滿。前無明白屬靈的事，今得著屬靈的智慧和能力。 3 活出基督的性命。充滿疼、喜樂、平安、謙卑的生命。 4 脫離罪惡。無閣過虛假痛苦的生活，無閣互罪惡控制。     以色列王亞哈"出賣家己"，事奉魔鬼 ，伊無閣是伊。伊 1 拜偶像、鬼神：(1)出在百姓拜金牛仔來代替耶和華 (2)娶外邦拜巴力的某以後，聽某指揮，起巴力廟、起壇、拜魔鬼。閣作亞舍拉，出在王后耶洗別刣耶和華的先知。(王上16, 18)   2 屬靈摃龜：迦密山上 (1)看見上帝的權能(降火燒祭物、落雨) (2)百姓徛佇上帝彼爿(pên)(刣巴力先知)，伊無受感化。(王上18) 3 利己害人：(1)為著愛拿伯的葡萄園，由在耶洗別去害死拿伯 (2)請猶大王幫忙，收回亞蘭人搶去的地。準備出戰的時講：我穿一般人的戰甲，你猶原穿王服；結果家己戰死。(王上21, 22) 4 伊親像哥德所寫的"浮士德"，賣靈魂互魔鬼，換家己的欲望。 5 亞哈王無做著做的，伊順家己的欲望，出賣家己(王上21:25)。     得救的我，無閣是我 ，是自由的，呣是孤單咧活 。 1 揹(phāin)十字架是一個 "我" 咧揹，咱若給舊的我及基督同釘十字架，新的我 "及上帝合一"，"我" 無閣是單獨一個咧活。 2 "無閣是我" 的性命是 (1)上帝佇咱內面做工、咱亦和上帝同工 (2)無閣越頭看過去，互過去束縛，互罪管轄，得著真自由。現在的我，捌真理，照主教示(約8:31~32)。 3 為主放捒(sak)"舊的" 性命的，反欲得著"新的"性命(太10:39)。 4 作穡(sit)人犁田、除草、種好種、灌水，暝日著磨；種子本身的能力，大自然的照顧，就欲結實。稻仔長大，這幾項攏需要。 5 咱讀聖經、祈禱、追求靈命成長，上帝就欲做工改變咱。

       以色列人探著迦南人懸(koân)閣城勇，怨慼(chheh)上帝 ，哀怨摩西、亞倫。上帝受氣講：𪜶試探、呣聽趁我有十遍，行淫(拜偶像)、埋怨、對敵我，閣看輕賞賜𪜶的迦南地(民14:22-35)。 1 前有紅海，後有埃及兵，吐氣：服事埃及人比死佇曠野較好。 2 曠野行三日無水，到瑪拉埋怨水苦，袂當啉(lim)(出15:22-25)。 3 佇曠野數( siàu )念佇埃及有肉食，今到這曠野欲枵(iau)死(出16:2)。 4 有人呣聽上帝通過摩西的吩咐，給嗎哪留到隔早起(出16:20)。 5 有人呣聽上帝通過摩西的吩咐，安歇日出去收嗎哪(出16:27)。 6 佇利非訂無水啉(lim)，吵講，𪜶和精牲欲焦(ta)死(出17:1-7)。 7 摩西佇西乃山頂久久，𪜶要求亞倫做像，互𪜶拜(出32:1)。 8 佇他備拉，眾百姓埋怨，𪜶的歹話到耶和華(民11:1-3)。 9 佇基博羅，外族的人起貪心，啼哭無魚無肉通食(民11:4-34)。 10 探著迦南地有大漢族，餒( loé )志，啼哭欲倒去埃及(民14:2-10)。     認為受著歹對待，抑是不滿現狀，消極的就埋怨來吐氣 。 1 若準爸母大細心，偏小弟，大姐受冷淡，檢采伊就會怨嘆。 2 埋怨的人 (1)認為別人做呣對，家己是受誣賴、受牽連、受害 (2)顧埋怨，心艱苦，產生苦毒和受氣 (3) "埋怨"互大家心情變䆀(bái)，拍歹人和人的關係，代誌袂變好。 3 埋怨、雜唸，是呣信和無感恩的表現，信仰上無轉大人。 4 注目佇得著的，感謝所得著的，就會知足，無怨慼(ch heh )咱無的。 5 疼的團體，就袂相埋怨。有疼心，就袂埋怨家己的損失，反轉甘願為所疼的受克虧。埋怨是疼心冷淡的記號(彼前4:8-9)。     凡事莫得埋怨，莫得相諍(chèn) 。(腓2:14) 1 相埋怨就是相批評，批評人的，隨時受主審判(雅5:9)。 2 有埋怨，就有人欲追責任、推(the)責任、辯解。相諍無解決問題，愈諍磺火愈𤏸(to̍h)，互相譴責，造成人和人愈疏遠。 3 常常喜樂、祈禱和感謝，就會心平氣和(帖前5:17)。

       " 著孝敬你的老爸你的老母"是十條誡的第五誡 (出20:12)。 1 古早人講：孝有三等：大孝尊敬爸母，中的無互𪜶受侮辱，上細是會奉待。所以奉待爸母，互𪜶吃穿用無欠是上基本，進一步是無做歹，致到𪜶互人笑，上有孝的是尊敬𪜶、順趁𪜶。 2 聖經講孝敬(honor)爸母，是尊重爸母，無論𪜶敢會堪得。 3 華人講有孝(filial)爸母，一般是講盡心奉待爸母，順趁𪜶。 4 忤逆(ngó͘-gek)爸母的、無親人情的，上帝擬斷𪜶著死。(羅1:28-32) 5 十條誡講人和人的關係(第5-10誡)，孝敬爸母列第一。 6 上帝應允，尊敬爸母的，欲得著亨通，長歲壽(弗6:2,3)。    有人推辭主的呼召，講：我先去埋( tâi )我的老爸 。(路9:57-62) 1 伊表示 "等我老爸死，我會來綴你"，這是推辭(the-sî)的話。佇古早，人死隨時安葬。伊閣四界趖(sô)，所以老爸猶(i á u)活咧(teh)。 2 "出在死人埋葬𪜶的死人" 是講互(屬靈死、呣信的人)埋葬(肉身死的)，意思是"世俗的代誌互呣信的人做"，你著去傳上帝國。 3 因為咱攏有真濟責任，著做安排，然後做上重要的(路9:60)。 4 "無時間" 孝敬爸母，因為時間攏用佇"事奉主"，這呣是理由。 5 有人欲綴(toè)主，主講伊著放棄物質的享受，著想清楚(路9:58)。 6 綴主，著放落人情世事、以及過去，才會入上帝國(路9:62)。     聖經記載照顧爸母 "靈、魂、體" 需要的，得著上帝賜福 。 1 掃羅的老爸拍無幾隻驢仔，伊帶奴僕去揣，揣到真遠的所在。伊驚老爸反為𪜶操煩，伊的貼心，上帝揀伊做王。(撒上9) 2 摩押女子路得伴孤單一人的大家(ta-ke)倒去以色列。伊體貼，犧牲(故鄉、信仰)。翁婿的族人收伊做某，伊生大闢的阿公。(得) 3 猶大為饑荒去埃及糴(tiah)糧，著帶老爸疼的細囝去，伊知老爸的心，用智慧的話安慰。大闢、主耶穌對伊出。(創43) 4 約瑟做宰相以後，接老爸、全家去埃及，細膩照顧，互老爸安享年老。伊的囝占以色列兩個支派。(創45-47)   --------------------------------

     波斯亞哈隨魯王的王后呣配合伊，伊揀以斯帖做新王后 。 1 猶大人受掠去巴比倫，波斯的時，真濟繼續留佇外國。 2 亞哈隨魯做王，猶大人末底改認叔伯小妹以斯帖做查某囝。 3 王辦桌請全國首領，煞(soah)閣請京城百性，和王宮的人。王啉(lim)酒心爽，請王后來互大家看，王后拒絕，王就廢掉王后。 4 王揀新王后，以斯帖入王宮，伊無講伊的族。伊面貌媠，宮內的人歡喜伊，王疼伊、寵愛伊贏過眾女子，揀伊做王后。 5 因為按呢，末底改佇王宮當職，伊知影兩個顧門的太監欲害王，伊通知以斯帖互王知，王給末底改閣這件代誌記佇冊。     猶大人末底改呣拜首相哈曼(亞瑪力人)，哈曼圖謀報復 。 1 王高升哈曼，王宮內的攏著跪拜伊。末底改呣，哈曼滿腹受氣，佇王遐誣賴猶大人，伊願意獻銀，來除去全國的猶大人。 2 末底改給以斯帖的差用講，哈曼獻銀互王，用王的命令欲滅猶大人；閣講"你得著王后的位，敢呣是為著今仔日"(斯4:14)。     以斯帖命令猶大人禁食了，伊去見王，求王救猶大人 。 1 以斯帖、伊的宮女、京城的猶大人為伊無食無啉(lim)三日。 2 然後伊去到王的內院，王恩待伊，答應和哈曼赴伊的筵席。 3 筵席了，伊請𪜶第二日閣來。彼暝，王聽末底改救伊的記事。 4 第二日，王互末底改坐王的馬、穿王的衫遊京城，哈曼𤆬( chho ā )路。 5 彼日筵席，以斯帖請王救伊閣伊的宗族，對敵就是哈曼。 6 哈曼受處死，末底改得著高升，命令猶太人通攻擊𪜶的對敵。 7 王后、末底改命令猶大人守"普珥(jíⁿ)日"，紀念𪜶得著拯救。     猶大人流亡佇波斯，上帝安排二人，救𪜶脫離滅無 。 1 末底改有智慧，吩咐王后以斯帖藏身分，𠢕(gâu)用伊的地位。 2 以斯帖認真準備，賰(chhun)的交託上帝。雖然著死，無後悔。 3 末底改深信，上帝安排以斯帖做王后，閣有萬一的第二步...。 4 以斯帖記無上帝兩字，總是伊的作為出現佇逐位。