Taigi 讀聖經

           待降節第四主日主題是仁愛，因為疼，主耶穌來到世間。         上帝是公義的，當亞當夏娃無聽上帝的吩咐、犯罪 (1)照約束，in著死 (2)查某艱苦生囝、查埔勞苦討食 (3)受趕出埃甸園。         上帝也是疼、憐憫，伊(1)譴責蛇 (2)應允施落拯救，開始救恩的計畫 (3)做皮衫互in穿。         亞當夏娃犯罪，致到死入到世間，人的罪性傳到後代。人佇老母懷胎的時，已經有罪(詩51:5)；出世以後，趁世間的風俗，及空中掌權的魔鬼(弗2:2)；保羅講：我所呣愛的歹，反轉去行(羅7:19)。對以上的說明，人需要上帝的拯救，除去in的罪。          整個救恩的計畫，對亞當犯罪開始。上帝應允賞賜彌賽亞(先知、祭司、君王)，照舊約聖經記載： 1 上帝講，婦仁人的後裔欲傷蛇的頭(創3:15)，應允彌賽亞拯救。 2 上帝揀亞伯拉罕，賜福伊，地上萬族也按呢得著福氣(創12:1-3)。 3 雅各臨終前講，賜平安的對猶大出，萬民攏欲歸順(創49:1,10)。 4 上帝對摩西講，欲對以色列中，興起一個先知親像伊(申18:17-19) 5 上帝欲對大衛的後裔中興起公義的王，拯救以色列(耶23:5-6)。 6 以賽亞講，有在室女欲懷孕生囝，給伊號名以馬內利(賽7:14)。 7 以賽亞讖語，有囝賞賜咱，伊是全能的上帝、伊是王(賽9:6)。 8 彌迦讖語，伯利恆，有王欲對你出，伊對起頭就有的(彌5:2)。        主耶穌來到世間，伊有先知、祭司、君王的身份： 1 先知啟示：伊宣布上帝國的信息，今閣藉聖經和聖神，啟示咱。 2 祭司閣和：伊為萬民求，閣獻家己，贖萬民的罪。伊作中保，互咱和上帝閣和。今仔日伊繼續佇上帝面前替咱求，賜福氣互咱。 3 君王治理：伊治理咱的心，改變咱的性情、價值觀。佇五旬節伊建立教會，管理咱閣世間人；影響社會、環境，彰顯上帝的榮耀。         最後，主耶穌降世帶光來世間(賽9:2)，閣為著咱的罪，獻家己作挽回祭，這著(tio̍h)是疼(約一4:10)。  

         待降節第三主日的蠟條表示歡喜，用歡喜的心聽候主降臨。         醫學、心理學講，人受起毛(khí-mo͘ )影響，加5:16-26列出聖神的果子(9項包含歡喜)，肉體的歹品行(16項包含怨恨)，鬱卒、慒(cho)心也無健康，互人歡喜袂起來。         歡喜(喜樂)是聖經的命令，下面列出一寡聖經節： 1 歡喜的心是好藥；憂傷的心神互骨枯焦(ko͘-tâ)(箴17:22)。 2 著常常踮佇主來歡喜。我欲閣講伊，著歡喜(腓4:4)。 3 著常常歡喜，祈禱無息，凡事感謝；...上帝的旨意(帖前5:16-18)。         保羅講，常常「歡喜、祈禱、感謝」是上帝所愛。咱因為祈禱、感謝，心欲開闊，也會得著內心的平靜、歡喜。詳細來看： 1 祈禱：祈禱是人和上帝中間的橋，橋若有通，時時刻刻領受對上帝來的啟示、能力和恩典，就會贏過試探，常常歡喜。 2 感謝：所有的警戒、責備，攏是為著咱的利益(希12:5-11)，著學習感謝父上帝，靠主來歡喜(弗5:20)。 3 歡喜：減采抵著憂慮、悲傷、絕望，踮佇主裡面，藉著祈禱、感謝，也欲克服，心得著安然、歡喜。         下面是得著喜樂的秘訣，咱通參考： 1 信靠上帝：這是力量、喜樂的來源。上帝安排一切，欲互疼伊的人得著利益(羅8:28)；咱雖然有啼哭，早起時就有歡喜(詩30:5)；雖然佇逆境中，猶然歡喜、快樂，無受外在環境影響（哈3:17-18）。 2 讀聖經：明白上帝的旨意、救恩，心欲安穩自在、喜樂。 3 認罪、悔改：憂傷痛悔的人，得上帝赦免，心無閣沉重(詩32:1-5)。 4 行動：參與上帝的事工，關懷軟弱、牧養肢體。出對內心來做的，會得著上帝歡喜，咱的心也會歡喜滿滿。         咱著祈禱、感謝，數念真實的、公義的，閣去行，也將所求的排列佇上帝，就伊的平安欲及咱佇啲(腓4: 6-10)。結論來講，咱倚靠伊，就欲有安穩、平靜、歡喜。  

            待降節第二主日的蠟條表示信心，用信心聽候主降臨。          信就是所向望的的實在，及未看見的事的憑準(希11:1)。對向望、未看見的事攏需要有信心。對基督徒，信和信心，就是相信、相信主耶穌的話，閣佇生活中實踐主耶穌的話，互信心閣卡踏實。         佇「相信、接受」的代先，著先「知影、明白」，著是先佇頭腦才到內心。啥時人的信心才會得完全？著愛「行動、實踐、經歷」。佇這考驗中，持守主的教示，這才是真正的信心；所以信心有幾何(kúi-ā)層的意思。馬太福音14:32-42記載主的學生的信心考驗。學生佇船頂，主佇山頂祈禱煞，暝時行水面去見in；來看這個過程： 1 學生面對超自然的事(學生講：怪物，生驚，喉叫。) 2 主耶穌隨時安慰in(耶穌講：安恁的心，是我，免驚。) 3 挑戰自我的彼得(彼得應講：主啊！命令我行水面就近你。) 4 得著應允、信心滿滿(伊講：來。彼得落船，行水面，欲就耶穌) 5 信心擋無久(看見風，就驚，欲沈落去，喉叫：主啊，救我！) 6 主是隨時的幫贊(耶穌隨時牽伊講：小信的人，啥事僥疑？) 7 有主佇船頂，安然自在 ( In上船，風就定。) 8 主掌管，歸榮光互伊(船裡的人拜伊講：你真正是上帝的囝。)         信心著要經歷考驗。希伯來書11章所排列的信心英雄，in經歷久長吞忍、苦難的考驗。有的在世所向望的、干單(kan-ta)會當遠遠看著。有的所抵著的苦難，是世間袂堪得有的。In相信上帝有備辦閣卡好的、雖然在世無得著所應允的。In是勝利者。          咱的信心，上帝欲保守伊，這是伊的公義，伊的應允(羅1:17)。    佇疫情期間，教會的關懷、牧養，和過去攏無仝，教會閣有聘牧的空課啲進行；等疫情解除、倒去教會，閣是另外一款新的狀況。遮(chiah)濟挑戰佇頭前，咱著囥信心佇主，徛出來；互主來掌管、使用。主有應允，踮佇伊的，就結果子濟濟(約15:5)。相信逐坎站，主會佇頭前𤆬(chhōa)路，咱著持守信心到彼日。  

      「待降節」(Advent)是聽候耶穌基督的降臨。Advent是拉丁文，來臨的意思。「待降節期」對十一月最後的一個主日開始，連續四個主日，直到聖誕節。一般人佇「待降節期」，用心準備慶祝聖誕。     佇待降節期，咱準備迎接主耶穌降臨世間。待降節期的妝娗，是一個葉仔環和五支蠟條：三支紫色、一支粉紅色佇四周，一支白色佇中央。待降節第一主日點一支(紫色)，第二主日點兩支(紫色)，第三主日點三支(加粉紅色)，照按呢，聖誕節加中央的白色蠟條。蠟條照順序代表希望、信心、喜樂(粉紅)、仁愛和世界的光(白)。     佇第四個禮拜日是聖誕禮拜，通常會特別提起聖誕的意義： 1主降生(聖誕)是舊約聖經中，先知籤語的彌賽亞的應驗。 2上帝差伊的聖囝，道成肉體，實現伊的救世計畫。 3聖囝擔當世間人的罪，閣做中保，互人和上帝閣合。     待降節期不但互咱準備聖誕紀念日，也是提醒咱等待主的第二次再臨。對下面太：24、25章的譬喻，咱通知末世是怎樣審判。 1主人的管家：無行正直、倚靠權勢、欺負弱小，欲受重重處罰。 2十個在室女：無準備夠額的燈油，是無接納聖神，欲受拒絕。 3管理財務：人的才調無分大小，若懶爛無使用，欲受譴責、定罪。 4綿羊和山羊：對有需要的人無疼心、無伸手幫贊，主無欲認伊。     既然待降節期也是等待主二次再臨，咱是呣是著按呢做： 1準備慶祝主降生，也傳報好消息互咱四周圍的人。 2認真三思，主對末世的譬喻，重新檢討咱的信仰、行做。 3清氣咱的心，摒掃垃圾，親像迎接上好的朋友來到。 4準備禮物來獻互主，親像早時東方的博士，獻上上寶貴的。 5學習主，做有意義的代誌，帶互人希望、信心、喜樂和仁愛。     教會年曆有兩個重心，「聖誕節」和「閣活節」，紀念主的出世、死、閣活。佇待降節期，咱不但準備慶祝主初次降臨，也著認真反省，認罪、悔改，準備迎接主的再臨。  

     英國Nottinghamshire縣Scrooby的加爾文(Calvin)教派信徒，為著宗教自由，搬去荷蘭的Leyden，但是佇彼個世俗的城市做勞工，生活甘苦。爲著前途，佇1620年in決定去北美洲。35個教徒和66個冒險家佇英國Plymouth搭五月花(Mayflower)的船出發，抵著暴風船駛到Massachusetts，無到預定的Virginia。這個新開墾地，需要制定法度，建立自治政府，41個成人佇船頂簽《五月花號協約》。     《五月花協約》(Mayflower Compact)大概的意思是按呢： 為著上帝的榮耀、基督教信仰、英國的光榮，阮來遮建立殖民地。 佇上帝的面前、阮誓約，阮欲合做一個有秩(tia̍t)序的住民政治團體。 阮欲制定正直、平等的法律、法規，設公職，阮保證遵守和服從。     《五月花協約》的內容及影響： 1創造出一個住民協商、訂契約，住民議事、自治的民主體制。 2 這款政治體制是得著住民的許可來成立的，閣以法治理。 3 住民制定對群體有利的法律，來管家己，閣選人來監督政府。 4 根據聖經的倫理，建立正直、平等、有道德約束的社群。 5 這款協約的精神佇其他新殖民地、州和聯邦憲法中出現。     五月花這隻船的清教徒(puritan)的決心互咱的啟示： 1 In相信，抵著的困難是信心的考驗，上帝會給in開另外一條路。 2 In到北美洲是欲榮耀上帝，建立一個符合聖經教示的教會群體。 3 揣(chhoē)仝(kāng)理念的同伴做陣行，建立疼的群體。 4 認bat上帝善的本質，照伊的法度，人和人才會真正和解。 5 In去新大陸朝聖(pilgrim)，無閣倒去，囝孫成做永遠的朝聖者。 6 基督教利他主義，和發財、冒險的精神，通同時存在、互相平衡。     400年前，《五月花號》載102個受苦楚、愛冒險的人到美國，in帶來基督教倫理(保守主義)、民主憲政、奮鬥競爭(個人主義、資本主義)，造就今仔日超級強的美國。今年武漢肺炎、選舉亂象，美國閣一遍面對危機，減采也是閣一遍奮起的時。  

         十個在室女 的譬喻。 主耶穌在世最後講的一個 (太25:1-13) 1 這是世界結尾的譬喻、等新囝婿是講等主閣來 (天國欲比並…) 2 十個在室女通講是教會內的人，因為in作伙 (出去迎接新囝婿) 3 信徒攏有準備，但是準備敢有夠 (戇的攑in的燈，無另外帶油) 4 著謹慎，咱敢是真濟無智識中的一個 (五個戇的，五個智識的) 5 主猶袂來，是欲互咱好好準備(彼後3:9)(新囝婿延遷(chhiân)) 6 真濟時陣，無論有智識抑無，攏有失去儆醒的時 (就攏盹瞌睡) 7 主的再臨，佇人所想袂著的時 (半暝有大聲叫講：新囝婿來啦) 8 緊急的時，只有給人求情、姑情(chiân) (請將恁的油分阮) 9 死活相關的代誌，竟然隨隨便便 (因為阮的燈欲hoa啦) 10 時機䆀䆀(bái)、隨人顧性命？(智識的應講：驚了恁、阮攏無夠) 11 上重要的時，你敢有在場？(去買的時，新囝婿到) 12 完美的結局 (遐個準備便的，及伊入婚姻的筵桌) 13 萬項事攏有伊的時、伊的期 (傳3:1) (門就關) 14 想欲把握最後的機會 (其餘的在室女搭著油，緊倒來) 15 跋(po̍ah)感情、求憐憫，敢有效？(主啊，主啊，給阮開) 16 天國有天國的規矩，呣開、就呣開 (新囝婿應講：我呣捌恁) 17 最後的提醒 (著張持 (tiun-tî)，因為恁呣知，彼個日，彼個時)      智識的無分油互無夠油的 。自私？無憐憫的心？( 頂面第10項 ) 1 著看前後文，這是世界結尾的譬喻，講天國的規矩。 2 佇審判，逐人著為所作的來負責，家己作、家己當(林後5：10)。 3 親像學生人，平常減采有別人的作業通抄，考試的時著家己寫。       智識的有另外帶油 。戇的無，為啥物無帶？( 上頂面第3項 ) (1)傷巧，算抵抵好 (2)凊(chhìn)彩，有油著好 (3)萬一無夠才來買 (4)知影，無現處理，等等。咱呣通學戇的、著做有智識的！      基督徒(在室女)著佇信心、行踏做光的見證 。愛得著能力著讀聖經、知影主的話，閣求聖神光照、得著頂面來的氣力。失去這兩項，欲親像燈無油，受拒絕佇主(新囝婿)的筵桌。

          台灣人認為「命」是「天」所定，但是對「天」所定的「命」呣甘願，想辦法欲脫離「命運的束縛」。所以，民間產生真多的兆頭、撿日、風水等等的慣俗和禁忌，來閃避兇事求「好運」。「算命」回應人這方面的需要，莫怪愈來愈興。下面是葉明翰牧師對命運的看法： 1 甚物是「命」「運」? 天，台灣人相信的是天公，基督徒相信的是創造萬物的主宰。對一般人來講，「命」是先天的，「運」是出世以後所抵著的。葉牧師認為「命」是袂勉強、上帝所定著的。「運」是運用、是後天的，看人怎樣運用上帝所賜的自由意志，發揮上帝所賜的才調，佇所定著的時間和空間，完成上帝所定著的旨意。 2 人的命是對上帝、宇宙的主宰來。逐人生存的時間、空間 (1)上帝代先定著(徒17:26) (2)人受限定(伯14:5) (3)凡事攏有伊的期和時(傳3: 1/2 /11)  (4)人的一生登錄佇冊。詩139:16講：「我袂成形的體質，你的目睭已經看見；所定著的日，猶袂有一日，攏記佇你的冊。」咱的一生有上帝媠的旨意和安排，呣是偶然的。 3 人重頭生以後，「命」就改變啦(約3:3/5/6)。信主、重頭生以後，咱的罪得赦免，閣「聖神」入咱裡面，改變咱的人生觀、價值觀、生活態度、做代誌的原則(多3:5)。咱成做新的人(弗4:23 /24)。 4 重頭生的人無受慣俗和禁忌管轄。耶和華是有能力、遐的上帝的上帝(申10:17，詩95:3)，加添人歲壽和平安(箴3:2)。信耶穌的人逐日攏是好日，奉耶穌的名，通化解各種的禁忌，脫離束縛。 5 重頭生的人無需要去算命。研究命學的觀察人的一生，分類、統計，產生「相命」、「排八字」等。算命的根據遮個律互逐人一個命盤。總是上帝管理人的「律」是多叉路，呣是人整理出來的單行道，何況基督徒是新造的人(林後5:17)，無需要去算舊的人的命。         上帝定「性命律」愛人享受人生，性命充滿喜樂、和平；閣定「因果律」，互人著為家己的行為負責，袂當推辭；掖甚麼，收甚麼；為家己的肉體掖的，欲收成敗壞(加6:7)。  

           Amish (阿米希人)重視宗教自由、和平、家庭、團契、兄弟姐妹，呣做兵、無參與政治，和世上無插。In有特別的價值觀。 1 和平主義者：新教的重洗派 (Anabaptist) 無贊同嬰仔洗禮，成人著閣重洗，也反對教會插政治。後來Menno Simons繼續帶領，叫做Mennonite (門諾派)。1693年Jakob Ammann無贊同和互教會趕出的人來往，就分裂出去，叫做Amish。Amish遵行和平主義，拒絕做兵，佇歐洲受天主教和新教國家逼害。18世紀in對瑞士移民美國賓州，19世紀閣有一批移民去Ohio、Illinois、Iowa。In到美國，揣著合(kah)意的所在起厝，並無去趕原來蹛的印第安人。美國南北戰爭的時，南北方對in攏厭惡。 2 樸素：Amish的穿插攏是素色、無變化，衫無用紐仔、拖鍊仔，查埔人穿吊帶的褲，查某人穿衫連裙，親像19世紀的人。無用電火、無駛自動車、無翕相、無用面鏡，免得相比。 3 踏實：Amish的社區家己生產欠用的。in是做穡(sit)人和木匠，盡量無用自動機械，靠人的手作工。Amish的囡仔受8冬學校教育，以後學做農、做木、家事。14歲以後通去體驗外面的世界 – 穿插、駛車、繼續讀書，若一般的人，呣免爸母的同意。最後若欲做Amish，就洗禮、加入教會；也通選擇離開。 4 互助：Amish強調協力，無鼓勵競爭。無加入社會安全，有代誌的時，大家相幫贊。無禮拜堂，佇個人住宅做禮拜。 5 家庭第一：空課以外，in讀聖經、陪伴厝裡的人，專心佇家庭，婚姻非常踏在。無用電話、電視、電腦產品，免致到分心、受色情和暴力影響。Amish的人口一代增加一倍。 6 堅固理念：Amish用組織來固守信仰。社區內分教區，逐個教區約有30個家庭，遵守家己教區的教條。用所遵守的教條(包含接受的科技)來分，Amish有40外個團體，屬仝團體的才會交換講壇。in認為科技引誘人墮落，所以小心選用。         Amish寶貴靈性贏過物質，in堅持和世俗分開(林後6:17)。In堅持信仰，佇北美洲建立”上帝應允的地”。  

          葉明翰綴師傅學命學、算命，也有出名；總是命學無法度改變伊大「剋星」的「命」。當伊著癌症想欲自殺，伊向小漢的時所bat的上帝祈禱，彼時有光照伊，伊就醒悟、悔改。         葉明翰講：當伊給家己交互上帝，伊一生的命運就改變啦。悔改以後伊無閣給人算命，認真讀聖經，參加教會聚會、事奉。婦女會會長和一個老姊妹鼓勵伊獻身做主的工，婦女會準備全額的獎學金互伊。老姊妹講：聖神感動阮，一定也會感動你。         伊呣愛做傳道人，講：「這個以外、我甘心做任何事奉。」總是，老姊妹的話一直佇伊心內。為了確定這是上帝的旨意，佇禱告中，伊給上帝要求五個憑據：(1)家己的胃病得著醫治 (2)老母贊同 (3)上帝供應厝裡的需要 (4)做兵緩期 (5)有學校通讀。         結果：(1)第二日胃就袂痛 (2)老母鼓勵伊，講：伊小漢洗禮的時，已經給伊奉獻互主 (3)上帝用奇妙的方法供應厝裡的生活 (4)有老師來探訪，互伊答案：因為伊著飼家、小弟閣小漢，通延到十幾年後才做兵 (5)有揣著長老教會聖經學院通讀。         五個憑據攏得著回應，伊心內充滿感恩，將一生奉獻互主。1970年葉明翰受按立做牧師。伊有心去向海外的台灣人宣教，1975年受差派去巴西、巴拉圭、阿根廷及美國擔任宣教師。2006年退休以後，猶原常常去世界逐所在，巡迴培靈和佈道。         2015年葉明翰牧師倒去台灣蹛，佇伊甸基金會逐冬有欲百場的活動。其他民間的節日、清明、肉粽節等等，伊也攏會去佈道傳福音。歸個台灣，伊走透透，小、偏僻的教會，伊攏去！         葉牧師對聖經的角度，掀開民間的算命、風水、撿日等等風俗的神秘面殼，互民俗不但呣是傳福音的阻礙，反轉成做傳福音的橋梁。葉牧師有寫《祭祖與輪迴》、《禁忌與沖煞》、《好風好水何處覓》等等的冊，幫贊人了解民間的信仰。         2020年葉牧師煞地上的日子，伊不但改變家己的命，閣互濟濟人得著新的性命。咱也因為伊，通卡清楚民間的信仰，卡知咱袂信的同鄉的想法，知影怎樣和in對話。      

        葉明翰做過算命仙，總是袂當改變家己的「命」。伊受天頂來的光照以後，認真讀聖經，閣對聖經找著「改命」的方法。         出世的時，厝的人替伊排八字、算過命，知影伊會剋父、剋母、剋兄哥、剋小弟、剋某、剋囝，是一個大「剋星」。         伊的老母懷伊的時，兄姐著急病過身、老母也破病。出世以後，厝的人給伊送互奶母飼，到奶媽閣有身孕，才接倒去。老母生伊以後，閣連續生兩個小弟、兩個小妹，攏佇一歲的時就死去。         以後老父著胃癌、拖五冬就過身，留老母、兩個年紀小的小妹和閣佇包尿被的小弟。彼時伊15歲。     伊綴師傅，認真研究命學，想欲改變自己的命運，也袂閣剋死人。有一日算命的師傅生重病，對他說：「我互你剋死啦。」五冬後，伊也著胃癌，知影無辦法贏過命運，就決定自殺。         伊想著父母對小漢所教示、著敬拜的上帝，伊向這個上帝禱告講：「我的父母所相信、敬拜的上帝啊！若準你是真神，閣是慈悲的上帝，請向我顯現！若無，我就欲結束自己的生命... 」         話袂講了，忽然有光照來，伊的目睭拸(thí)袂開，閣聽著有聲講：「啥人教你按呢做？」伊聽見，親像互人摃一下，講：「主啊！無！呣bat有人教我用這款殘忍的方法，來結束家己的生命。」         伊忽然曉悟，講：「有！是撒旦。」當主互伊看清楚是撒旦的詭計，彼個控制伊生命的力量，瞬間對伊身上消失，內心的重擔、壓力和捆縛也得到敨(tháu)放。聖神的光照伊，伊看著家己的驕傲、敗壞，對上帝、對人的怨恨、不滿和僥疑，伊跪落佇上帝面前認罪悔改。         葉明翰見證講，彼時耶穌感動伊去禮拜堂，欲指示他著行的路。伊佇禮拜堂認真提聖經來讀，「歹命囝為著活命，半年內就給歸本聖經讀了！」然後，葉明翰發現「改命」的答案。         葉明翰講：「當伊給家己交互上帝，伊一生的命運就改變啦。」葉明翰以後去讀聖經學院，閣做牧師，海外宣教50外冬。2015年倒去台灣傳道，用真實的例，對聖經來解釋民間信仰。

          2020.9.15 以色列、 巴林 (Bahrain) 、 阿拉伯聯合酋長國 (United Arab emirates) （阿聯酋）佇白宮簽關係正常化協議。巴林外交部長(左一)、以色列總理(左二)、阿聯酋外交部長(正一)。          1948年以色列獨立以後，和阿拉伯國家發生5擺大的戰爭 (1)宣布獨立隔日，受中東五國攻擊 (1948)  (2)英、法抗議埃及收回蘇伊士運河，以色列參加 (1956)  (3)埃及、敘利亞、聯合約旦戰以色列 (1967)  (4)埃及(為西乃半島)、敘利亞(為戈蘭高地)攻以色列 (1973)  (5)以色列清除黎巴嫩的巴勒斯坦游擊隊 (1982)。         以色列及阿拉伯國家的戰爭，主要是領土的問題。1947聯合國(UN)分割巴勒斯坦做兩國，阿拉伯國家呣接受。1948戰後，以色列取著加薩走廊 (Gaza Strip) 和約旦河西岸 (West Bank) 兩個外圍地區(原來UN安排互巴勒斯坦人) 。1967中東戰後，以色列取著所有耶路撒冷、加薩走廊、約旦河西岸以及戈蘭高地(Golan Heights)(原敘利亞土地)。         1964巴勒斯坦解放組織 (PLO)成立，其中上大的派是阿拉法特 (Arafat)創立，叫Fatah。PLO強調使用武力的恐怖主義，上先佇約旦，1970公然和政府作戰，暗殺國王、劫機，最後受趕走。以後去黎巴嫩，閣和黎巴嫩民兵衝突，最後以色列出兵趕走 (1982) 。         PLO的主席Arafat在早堅持武力鬥爭，1982以後，重點囥佇政治和外交。1993和以色列簽《Oslo協議》，照協議，PLO成立過渡期的自治政府PA (Palestine Authority)，五冬後簽最後合約，成立國家。雙方的期待是：以色列無受恐怖攻擊，巴勒斯坦成立國家。         2000年雙方無完成簽最後合約。因為過去7冬來，以色列無管制開發屯墾區，PA無辦法管制恐怖攻擊；雙方無辦法互相信任。         以色列1949年加入聯合國，和世界國家建立外交關係。中東戰爭了後，以色列和阿拉伯國家簽和平條約 (1)埃及，以色列撤出西乃半島，換著自由通過蘇伊士運河 (1978)  (2)約旦，兩國佇國界、安全、水資源合作 (1994) (3)阿拉伯聯合大公國(United