Taigi 讀聖經

                          2021/2/14是主佇山頂變貌紀念日，這日是大齋節期的前一個禮拜日，第40日就是閣活節。大齋節期是欲準備、紀念主的閣活。         主耶穌佇山頂變貌(路9:27-36)、顯出伊的榮耀以後，就遵趁天父的旨意，行十字架的路。變貌以及前的宣告，記佇下面： 1 問學生：若是恁講我是是誰(9:20)？學生知影主有權能，但是... 2 彼得講：是上帝的基督(9:20)。猶太人認為基督是欲𤆬in建國。 3 主的禁戒：莫得將這給人講(9:21)。主呣是猶太人所想的基督。 4 初次宣告：人子會受濟濟艱苦...閣受害死，第三日閣活(9:22)。 5 怎樣綴主：著看無家己，夯(giâ)家己的十字架來綴(9:23)。 6 主讖語：有人猶未死，欲看見上帝的國(9:27)。講主佇山頂變貌。 7 顯出榮光：主帶彼得、約翰、雅各上山。佇遐伊的面貌有各樣，衫白閣光爁(nà)爁(9:28,29)。當主顯出榮光，上帝國就佇遐。 8 摩西、以利亞及耶穌講話(9:30)。𪜶來講起主欲成的事(9:31)。 9 彼得對耶穌講：阮來搭三間寮仔，一間互你...(9:33)。彼得認為三個人平大，其實，主是上帝的囝，上帝愛𪜶聽伊(9:35)。     摩西、以利亞代表律法、先知，也代表建立、維持律法的角色。 1 摩西和以利亞代表律法，主來是欲互律法得著完全(太5:17)。 2 人無辦法遵守攏總的律法，所以，主宣布性命的法。 3 舊約律法講外在、講"呣通..." "著..."，性命的法講人內面的性命。 4 人袂當真正行出摩西的律法，但是改變人的內心，就做會到。     上帝講：恁著聽伊。主講：著看無家己，夯(giâ)家己的十字架。 1 主所講的十字架就是生活中的苦難，十字架是重擔、會互人死。 2 性命的法講，偏見、濫摻使用權力等等，攏是重擔、欲致到死。 3 主已經贖咱的罪，夯十字架是愛咱面對舊的重擔，揣出閣除去。 4 揣出、除去的過程，會有緊張、驚惶、受棄捒、減采受攻擊。         當咱信靠主，伊的榮光欲向咱顯明，加倍堅固咱；真正綴主的人，著清掃內心的重擔，倚靠聖神，就欲除到盡。

      平地寶訓(路6:17-49)講，基督徒佇日常生活，著有新的態度 。 1 我給恁講，對敵恁的，著疼怹！怨恨恁的，著好款待怹！(6:27) 2 詈罵恁的，著給怹祝福！凌辱(lêng-jio̍h)恁的，著替怹祈禱(6:28) 3 人搧(siàn)你這旁的嘴䫌(chhuì-phé)，著閣越另外一旁向伊。人提恁的外衫，連內衫也莫得擋伊 (6:29) 。 4 凡若求你的，著互伊。提你的物的，莫得閣給伊討 (6:30) 。 5 恁愛人怎樣款待恁，也著按呢款待人 (6:31) 。 6 恁若疼遐個疼恁的，好款待、好款待恁的，有甚麼恩惠？   因為歹人也按呢行。恁若借互有向望還恁的，有甚麼恩惠？因為歹人 也借歹人， 愛怹照數額(siàu-gia̍h)來還 (6:32-34) 。 7著疼恁的對敵，好款待怹，借人也無絕望，恁的報賞就大(6:35) 8 恁的父好款待忘恩及歹的人，恁著有憐憫，親像伊( 6:35, 36 ) 。 9 莫得批評人、責罪人，就無抵著批評、責罪；放人煞，就欲放恁煞；互人，就欲互恁，用足額的斗，扼(jih)、搖，互伊實(cha̍t)到滿出來；因為恁用甚麼來量(niû)，也欲按呢量互恁(6:37, 38) 。     主耶穌佇平地寶訓教示咱，萬項事著用和平的態度來處理 ，無論面對對敵、抑是批評；這亦是山頂寶訓 (太5-7)所教示的。 1 著積極、主動去疼人、好款待人、給人祝福、替人祈禱，雖然對方對敵你，怨恨、詈(lóe)罵、凌辱你(6:27, 28) 。 2 抵著受壓制的代誌，綴主的人，呣是去對敵，是主動送出疼心。 3 主耶穌提出極端的兩個例：人搧你的嘴䫌(phé)、搶你的衫。 4咱的反應，呣通受別人的行為來影響，著順趁上帝佇咱內面的聲 5 上帝做主，伊欲興起咱的的良心，發出超出人想像的決定和力量 6當咱認捌上帝對咱的疼，就欲體會伊的性情，對人寬容有耐心。 7 咱放人煞、無批評人、責備人，上帝亦相仝按呢對待咱。 8 主講：對敵咱的，呣通和怹觸(tak)，也呣通去批評，著放怹煞。上帝愛咱憐憫人，審判和賞賜在佇伊(6:38)，呣是咱。

          耶5:7-9講主耶和華無放耶路撒冷煞，欲審判伊的百姓。 1 我豈會赦免你啊？你的囝兒離開我，閣指遮的呣是上帝的、來咒誓(chōa)。我互𪜶飽足，𪜶就行姦淫，歸陣聚集佇娼妓的厝(5:7) 。 2 𪜶若飼飽的馬四界跑，向𪜶厝邊的某嘰嘰哮(ki-ki-háu)(5:8) 。 3 耶和華講：我欲因為遮個事，對這號的國民來報讎(siû)(5:9) 。         佇耶利米第5章，先知列出猶大國犯的罪。 1 𪜶知影耶和華愛誠實，閣作假的咒誓，也對假神咒誓(5:2, 7) 。 2 知影耶和華是獨一的上帝，閣去拜外邦人的上帝(5:7, 19) 。 3 行為上，放縱無道德的性的行為(5:7, 8) 。   上帝互𪜶得著飽足，飽足了，竟然數(siàu)想拜偶像、揣廟妓。   𪜶若脫索的馬(5:8)，揣妓女(5:7下)，甚至引誘別人的某(5:8) 。   行姦淫成做社會所時行(kiâⁿ)(5:5)，上帝無掠𪜶做無罪(5:6) 。 4 背叛上帝，呣bat、閣否認伊 (5:4, 5, 12, 21-25) 。   無守上帝的法度，無論是無智識的(5:4)，抑是尊貴的(5:5) 。   尊貴的掠上帝的法度做軛(taⁿ)、索，愛欲遏折(at-chi̍h)，拍斷(5:5)   𪜶否定上帝的主權，親像精牲想欲脱離主人的束縛(pa̍k)。   呣願作「義的奴僕」(羅6:18)，反轉「互罪捆縛」(羅6:20) 。   呣是無知，是悖逆(pōe-ge̍k)。明明知，閣堅持做歹；無通辯解(5:4-5)。 5 社會無公義(5:26-28) 。[無守律例、誡命，受咒詛(申27:15-26)]。 6 假先知、惡祭司、愛虛假的百姓，滿滿是(5:31) 。         上帝願意赦免，總是百姓刁(tiau)工行姦淫和拜偶像，罪袂得赦免。 1 大自然的律，顯明上帝的作為，總是𪜶呣看也看無(5:22, 24) 。 2 𪜶受拍也無憂傷，無受督責，面比石卡碇，知影閣堅持犯罪(5:3)。 3 悖逆、呣守主的話，啼笑先知的話是風，上帝出在𪜶去(5:13, 23)。 4 𪜶聽假先知的話，相信”災禍、刀劍及飢荒袂到”的白賊話(5:12)。 5 𪜶佇猶大服事別款的上帝，上帝刑罰𪜶去外邦服事外邦人(5:19)。 6 𪜶欲受咒詛，流浪萬國，抵著艱苦，受凌辱、譏刺(24:9)。

         路5:1-11講耶穌幫贊討海人掠魚。 1 佇加利利海邊，眾人狹揳(e-kheh)耶穌，愛聽上帝的道(5:1)。 2 耶穌看見二隻船佇湖邊，討魚人離開船啲洗網。耶穌上去屬彼得的彼隻船，請伊互船離開岸，就坐佇船裡教示眾人(5:2, 3)。 3 講煞，伊對西門講：船駛到深的所在，拋(pha)網討魚。西門講：先生，阮通暝著磨，討攏無。總是因為你的話，我就欲拋網(5:4, 5)。 4 網拋落去，就圍著真濟魚，到網仔欲裂，就拽(ia̍t)別隻船的同伴來鬥相共(kāng)。𪜶拾魚滿二隻船，到欲沈落去( 5:6, 7)。 5 西門彼得為著一下拋落就掠著遐濟魚昂愕(gông-ngia̍h)，仆佇耶穌的腳下，講：主啊，離開我，我是有罪的人( 5:8, 9)！ 6 伊的同伴雅各、約翰也是按呢。耶穌對彼得講：莫得驚！對此霎了後，你欲得著人。已經拖船倚岸，𪜶放拺一切來綴伊( 5:10,11)。         對遮個有經驗的討海人所抵著的，咱通得著啟示。 1 彼得勞碌歸暝閣掠無魚，耶穌教彼得叨位有魚。咱靠家己的智慧和力量來事奉，有時會空空；著記得，互主參與咱的空課。 2 水深的所在，減采有大風湧，也有濟濟魚。表示有主𤆬路，雖罔佇危險的環境，也欲有大大的收成。 3 彼得是經驗豐富的討海人，伊接納先生的建議，結果網著滿滿的魚；表明耶穌超越內行人，咱的專業，閣加主的引𤆬，欲有豐收。 4 彼得佇拋網以前，稱呼耶穌”先生”，船頂滿魚以後，伊看著主的權能，換叫伊”主” ，閣講家己有罪，信心無夠，倒去掠魚。 5 彼得受主鼓勵，對掠魚討生活的，變作得著人、互人得著活命的。 6 主受釘以後，彼得閣去掠魚，閣掠無魚；主出現互𪜶得著豐收。主三遍問伊：你疼我卡贏遮個？主的權能，閣一遍堅定伊的信心。         主耶穌對掠無魚的討海人，指示𪜶駛去水深的所在，拋網，掠的魚竟然滿二隻船。這給咱講，著裝備家己，聯合人、用工具，接受主引𤆬，踏出去揣失喪的人，就欲得著。