Taigi 讀聖經

  腓利門及阿尼西謀( Onesimus )       和平及平安是世間人普遍期待的 。西3:15講，著互基督的和平佇恁心內做主；恁受召成做一體，也是為著這個；閣著感謝。    希伯來文Shalom有和平和平安的意思。和平就是人及人、族群及族群，國和國相好做伙；平安是個人內心的平靜及安穩。     真正的平安對至高的上帝來 ，欲互伊歡喜的人(路2:14)。 1 咱因為信，就借著主耶穌基督及上帝閣和(羅5:1)，得著上帝賞賜的平安(腓4:7)，按呢，咱欲經歷、體會著心神的安穩。 2 保羅勸咱，呣通順家己的心情、感情，反轉著靠基督的平安來引𤆬。歌羅西三章講，著數念頂面的事，拍死歹的私慾、貪心...除去怨恨、誹謗...褪去舊的人的行做，日日換新，親像咱的主。 3 咱減采為著生活、家庭、種種的問題來憂愁，失去安全感！耶穌講：我留平安互恁；恁的心莫得迫腹，莫得驚惶(約14:27) 4 咱若心亂亂，心就互茫霧遮截，看袂著上帝的恩典和應允。著求聖神幫贊，開咱的心目，迵(thàng)過黑雲暗霧，閣將一切交託主。保羅講，一概莫得掛慮，萬事著用祈禱、懇求，及感謝，將所求的排列佇上帝。就上帝的平安、𨃟過一切人所想會到的，欲佇基督耶穌保守咱的心、咱的念頭(腓4:6,7)。     有個人的心神安寧，才會有團契的和平 。穿仁愛，相寬容，相赦免，大家成做一體，就欲有基督賞賜的和平佇彼中間。 1 佇團契內面，著互基督做主，基督就是平安，伊做咱行事的準則、判斷的根據。著致意及眾人和睦(希12:14)，抵著衝突，著祈求聖神賞賜智慧來恢復合一，總是無犧牲義及心的平安。 2 做和睦的人。親像保羅和巴拿巴雖然意見無像(徒15:36-41)。 3 做"互人和平"的人。親像保羅互主人及奴僕和好(門1:10-12)。     互人和平亦著顧著心安，閣徛佇真理 。八福的清氣心、義、和平攏重要，若為著和平，放棄清氣心和義，就呣是真正的和平，因為清氣心是和平的基礎，義亦比和平卡重要(太5:8-10)。

      路10:25-37記載怎樣做才會得著永遠活。 1 一個教律法的先生來試耶穌，怎樣做才會得著永活？耶穌問伊律法有記甚麼？伊應講：你著盡心、盡性、盡力、盡意疼主─你的上帝；也著疼厝邊親像家己。耶穌講：著；行這個就會活。(10:25-28) 2 若是伊愛顯明家己做著，就對耶穌講：啥人是我的厝邊？(10:29) 3 耶穌應伊講：有一人對耶路撒冷落去耶利哥，抵著賊剝(pak)伊的衣裳(i-chiûⁿ)，拍 到半死，放下做𪜶去(10:30)。 4 抵好有一個祭司對彼條路落去，看見伊，就閃對彼旁過去。(10:31) 5 閣有一個利未人到彼所在，看了，猶原對彼旁過去(10:32)。 6 一個撒瑪利亞人經過，看見就憐憫伊，用酒斟(thîn)佇著傷喙...導到客店。隔日提銀互店主，講：照顧此人；無夠我會來還(10:33-35) 7 此三人中叨(tá)一個是抵著賊彼人的厝邊？(10:36) 8 伊講：憐憫伊的就是。耶穌給伊講：你去照按呢行(10:37)。     欲得著永遠活，著學好的撒瑪利亞人，疼上帝亦著疼厝邊。 1 律法教師無講撒瑪利亞人的名，伊猶原無接受𪜶做厝邊(10:37)。 2 "抵好"祭司經過，"抵好"抵著賊，亞伯拉罕招待上帝使者等；厝邊常常是抵好碰(pōng)著、短時間的，無通揀，揀袂著，著保握 3 主耶穌講，咱是"需要咱的人"的厝邊，所以，𪜶亦是咱的厝邊。 4 有做厝邊的對象，著閣有感動，才會建立關係。祭司和利未人減采是無閒聖殿的事務，這並呣是疼上帝，𪜶亦失去對人的疼心。 5 有感動，閣著有行動。撒馬利人"主動""照顧""出錢"...。 6 行出仁愛是著有心，觀察，用到智識、時間、金錢，閣呣驚艱難 7 撒馬利亞人疼厝邊親像家己：盡伊的醫學常識，會堪得的財力。 8 行仁愛是著負責，做完全(10:35)，若保羅幫贊阿尼西母(門18,19) 9 著給別人、受害者看做是家己，才會體會著疼厝邊親像家己。 10 咱有疼的動力和能力，因為聖神給上帝的疼灌沃咱的心(羅5:5) 11 把握機會，盡心、盡力，疼上帝疼人，這是永活的路。

                         太25:14-30講，所得的恩賜，若無運用，就袂當入天國。 1 親像一人欲去外國，就將所有的交伊家己的奴僕(25:14) 2 一個互伊銀五千，一個二千，一個一千，各照𪜶的才調(25:15) 3 領五千的隨時去做生理，閣趁五千。領二千的亦閣趁二千。獨獨彼個領一千的去掘地，來囥密伊的主人的銀(25:16-18)。 4 久久，遮個奴僕的主人到，及算數(siàu)。(25:19) 5 領五千的講，伊閣趁五千。主人講：好閣盡忠的奴僕，你佇少的盡忠，我欲設立你來管濟的；通入你的主人的快樂(25:20-21) 6 領二千的講，伊有閣趁二千。主人對伊講相像的話(25:22-23) 7 領一千的亦來，講：我知你是嚴轄(hat)的人，未撒(iä)的所在就欲收割，所以我將你一千銀埋佇地裡。今你的物還你(25:24-25) 8 主人講：歹閣貧憚(tōaⁿ)的奴僕，你知按呢，著將銀下佇錢店，我通得著本銀及利息。提伊的一千互有十千的。趕彼個無利益的奴僕去外面黑暗的所在。佇遐欲有啼哭咬牙切齒(25:26-30)。     主人託奴僕銀仔的譬喻講，主愛咱誠心、拍拼做所交代的。 1 等待主的時，亦著做工，有成長，主來的時欲 算數 (25:19,27) 2 上帝無互逐人相像、平濟的恩賜。彼兩個做了真好的奴僕得著無像金額的獎勵。總是𪜶攏得著相像的謳咾(25:28, 21, 23)。 3 受召著 緊緊 行動，趁咱勇壯、有能力的時，為主做工(25:16)。 4 欲有收成著 付出 (25:21)，著磨佇主的袂空空(林前15:58)。 5 用敬虔的心，正當的方式來投資，投資就是敬虔的代誌。 6 恩賜若無提來用，無作為，是會受 責罰 (25:30)。 7 貧憚是無盡本份，求安樂，呣願出力流汗，辜負主人交託的。 8 貧憚是裝巧，認為無做就無錯誤，呣願冒險，擔責任。 9 領一千的對主人的認捌不足，有偏差，看輕家己的才調，認為主人嚴轄，驚失敗。伊求平安，總是放棄責任，反失去平安。 10 主所關心的是，咱的態度和行為的表現( 盡忠 )(25:21,23

      太 5:17-20講律法袂得廢無，咱的義著贏過法利賽人的義。 1 我來是欲廢無律法抑是先知？呣是欲廢無，是欲應驗(5:17)。 2 天地廢無，律法的一點一畫亦決斷袂廢無，攏總欲成(5:18)。 3 毀壞諸個誡命至微細的一條，續按呢教示人的，佇天國欲稱伊做至微細。獨獨見若行續教示人的，佇天國欲稱伊做大(5:19)。 4 恁的義無贏過經學士及法利賽人的義，決斷袂得入天國(5:20)。     經學士(文士)及法利賽人代表律法及誡命。 1 法利賽是第二聖殿時期的教派，𪜶保持純潔，和世俗分離。第二聖殿毀壞以後，𪜶改做拉比猶太教，就是今仔日的猶太教。 2 法利賽人認真讀聖經，衫結(kat)聖經節，守禮儀，認為傳統、慣例和聖經平平重要，𪜶給上帝和咱的關係變做律法的條文。 3 經學士(文士)是研究律法、抄寫律法閣教律法的學者，𪜶給條例和傳統加入律法。𪜶忽略律法的精神，律法只有佇𪜶頭殼內。 4 法利賽人的罪：1自我中心，認為家己是義；2認為家己的行為比別人好，就驕傲，看輕別人(路18:10-14)    上帝賞賜以色列人律法，是欲防止𪜶犯罪。 1 律法照光人的心，教人做對的事(義)。律法互人知罪(羅3:20)，給歹判罪，互人知家己並呣是遐爾好。先知勸人悔改認罪，耶穌為人類的罪來到世間(太1:21)。 2 罪就是罪，無論犯著大抑是細的罪，攏是犯罪，對一條跋倒，就是有瑕疵，就是犯著眾條(雅2:10)。猶太人對摩西五經整理出613條誡命，遮爾濟誡命，真僫(oh)得全部遵守。 3 若準我因為有讀聖經，無講人閒仔話，就祈禱講 "上帝啊，我無親像親像某乜(mí)人...。"這就是自己稱做義，現代的法利賽人。 4 上帝的救恩洗咱的罪，耶穌的義做咱的衫，互上帝看咱是義，無人通靠靠家己佇上帝面前稱做義。信主以後若繼續犯罪，上帝的忍耐有限，伊是袂得侮慢的(加6:7)

      閣親像摩西舉起蛇佇曠野，人子亦的確著按呢受舉起(約3:14)。主耶穌借以色列人的歷史，指示尼哥底某，重頭生的秘訣是信。     摩西攑(gia̍h)起旗杆(koaⁿ)頂的蛇的代誌，記載佇民數記21章： 1 著踅(se̍h)過以東，百姓為著所行的路，心不止餒志(21:4)。 2 嫌上帝及摩西：啥事𤆬𪜶(in)來死佇曠野?𪜶厭賤清淡的食物(21:5)。 3 耶和華就差火蛇入百姓的中間，咬百姓(21:6)。-上帝公義的刑罰。 4 百姓到摩西遐，講：阮有犯罪，摩西就替百姓求(21:7)。 5 耶和華講：你做一尾火蛇，掛佇旗杆頂(21:8)。-上帝憐憫、醫治。 6 摩西做一尾銅蛇；見若互蛇咬著的，一下看此個銅蛇就活(21:9)。      主耶穌受舉起，是預告伊會受釘佇十字架頂、閣高升。受舉起的蛇，醫好互蛇咬著的；相仝(kâng)，受舉起的主，會拯救互罪苦楚的。        互罪苦楚的人欲得著拯救，著有覺悟，閣確信主會拯救： (1)知影家己真正犯罪 (2)知影犯罪一定會死 (3)知影家己無辦法通救家己 (4)相信、仰望釘佇十字架頂的耶穌基督會救伊。     互蛇咬著的人得著醫好，也是經過相像的、這幾個(kúi-ê)階段。摩西的銅蛇醫好以色列人事件，啟示咱： 1 試煉：In佇曠野，吃穿無欠，路途歹(pháiⁿ)行，就埋怨、想欲倒去。 2 醫治：In內心苦毒，上帝差蛇，呣是欲互in受苦，是欲醫治。 3 上帝是公義、閣憐憫：用蛇咬百姓，是公義；賞賜治療，是慈悲。 4 甘單(kan-nā)攑頭：背叛的人攑頭看銅蛇，就得著活。上帝赦罪，閣醫治。 5 只有信：攑頭看銅蛇表示相信、順服上帝，願意接受上帝的恩典。 6 治療的原理：毒蛇咬，上帝用銅蛇來醫治(病原也是解毒劑)。 7 超越理性：罪的刑罰的工具─毒蛇，也是治療的工具─銅蛇。     尼哥底某去見耶穌，伊認為in是亞伯拉罕的後裔，遵守律法，相信神蹟，應該有份佇上帝國。耶穌講：著重頭生、才會入上帝國。     重頭生是上帝的賞賜，只有信才會得著。耶穌用聖經中、信心影響到死活的記載，表明「看、仰望、信」就會成。

      禮拜是信仰的團契用語言、藝術、音樂敬拜上帝，獻感恩、謳咾、認罪、懇求，閣回應上帝的話及公義的挑戰，立志用行動來回應。咱常常無照上帝疼的命令去行，閣通面對公義的上帝，因為(1)上帝是疼和救贖 (2)聖神的引𤆬、感動 (3)主耶穌做咱的中保。     照PC(USA)，禮拜分五部份，挈咱教會禮拜的順序來講： 1 聚集、謳咾上帝(Gathering)：前奏、頭首歌、宣召、聖詩。 2 認罪、赦罪確認(Confession)：祈禱、主禱文、使徒信經。 3 領受上帝的話(Words)：啟應、謳咾、聖經、講道。 4 回應(Response)：聖餐、聖詩、奉獻、奉獻詩、報告、歡迎。 5 差遣、進入世間(Sending)：頌榮、祝禱、阿們頌、後奏。     咱著明白這逐項的意義，尤其禮拜司會者，對彼日的內容，親像所讀的聖經、所欲傳的信息，著有簡單說明，互會衆通充分參與。     加爾文認為禮拜是人對上帝的回應，禮拜著有 1 完整性：儀式、作法著根據聖經，閣有神學的基礎。 2 使命：起造「疼上帝，閣對伊信任、盡忠，也疼厝邊」的團體。 3 目的：利用講道來教導，伊認為講道是上重要的。     加爾文認為禮拜的內容、安排，著 1 有整體性：內容著愛「有意識和負責任」，目的是為了「教導」。 2 互會衆會理解：用在地語言(方言、母語)，宗教語言無過份使用。 3 樸素：無重妝娗(thāⁿ)，除去偶像(圖、像、歷史文物)，免得影響敬拜。     台灣基督長老教會聖詩裡面有印主禱文、新的誡命、使徒信經、尼西亞信經、信仰告白、上帝十條誡，遮個攏是咱信仰的要點。禮拜中，佇認罪、赦罪確認(念主禱文等)以後，為著提醒咱著照上帝的法度行，通續落去念新的誡命，抑是十條誡。     基督徒的信仰人格，主要是經過「一再重複」的禮儀來塑造，閣佇重複中，得著啟示、換新。因為禮拜反映一個信仰團體的神學和倫理觀念，所以禮拜程序是「極其要緊」的事。