Taigi 讀聖經

       以色列人探著迦南人懸(koân)閣城勇，怨慼(chheh)上帝 ，哀怨摩西、亞倫。上帝受氣講：𪜶試探、呣聽趁我有十遍，行淫(拜偶像)、埋怨、對敵我，閣看輕賞賜𪜶的迦南地(民14:22-35)。 1 前有紅海，後有埃及兵，吐氣：服事埃及人比死佇曠野較好。 2 曠野行三日無水，到瑪拉埋怨水苦，袂當啉(lim)(出15:22-25)。 3 佇曠野數( siàu )念佇埃及有肉食，今到這曠野欲枵(iau)死(出16:2)。 4 有人呣聽上帝通過摩西的吩咐，給嗎哪留到隔早起(出16:20)。 5 有人呣聽上帝通過摩西的吩咐，安歇日出去收嗎哪(出16:27)。 6 佇利非訂無水啉(lim)，吵講，𪜶和精牲欲焦(ta)死(出17:1-7)。 7 摩西佇西乃山頂久久，𪜶要求亞倫做像，互𪜶拜(出32:1)。 8 佇他備拉，眾百姓埋怨，𪜶的歹話到耶和華(民11:1-3)。 9 佇基博羅，外族的人起貪心，啼哭無魚無肉通食(民11:4-34)。 10 探著迦南地有大漢族，餒( loé )志，啼哭欲倒去埃及(民14:2-10)。     認為受著歹對待，抑是不滿現狀，消極的就埋怨來吐氣 。 1 若準爸母大細心，偏小弟，大姐受冷淡，檢采伊就會怨嘆。 2 埋怨的人 (1)認為別人做呣對，家己是受誣賴、受牽連、受害 (2)顧埋怨，心艱苦，產生苦毒和受氣 (3) "埋怨"互大家心情變䆀(bái)，拍歹人和人的關係，代誌袂變好。 3 埋怨、雜唸，是呣信和無感恩的表現，信仰上無轉大人。 4 注目佇得著的，感謝所得著的，就會知足，無怨慼(ch heh )咱無的。 5 疼的團體，就袂相埋怨。有疼心，就袂埋怨家己的損失，反轉甘願為所疼的受克虧。埋怨是疼心冷淡的記號(彼前4:8-9)。     凡事莫得埋怨，莫得相諍(chèn) 。(腓2:14) 1 相埋怨就是相批評，批評人的，隨時受主審判(雅5:9)。 2 有埋怨，就有人欲追責任、推(the)責任、辯解。相諍無解決問題，愈諍磺火愈𤏸(to̍h)，互相譴責，造成人和人愈疏遠。 3 常常喜樂、祈禱和感謝，就會心平氣和(帖前5:17)。

       " 著孝敬你的老爸你的老母"是十條誡的第五誡 (出20:12)。 1 古早人講：孝有三等：大孝尊敬爸母，中的無互𪜶受侮辱，上細是會奉待。所以奉待爸母，互𪜶吃穿用無欠是上基本，進一步是無做歹，致到𪜶互人笑，上有孝的是尊敬𪜶、順趁𪜶。 2 聖經講孝敬(honor)爸母，是尊重爸母，無論𪜶敢會堪得。 3 華人講有孝(filial)爸母，一般是講盡心奉待爸母，順趁𪜶。 4 忤逆(ngó͘-gek)爸母的、無親人情的，上帝擬斷𪜶著死。(羅1:28-32) 5 十條誡講人和人的關係(第5-10誡)，孝敬爸母列第一。 6 上帝應允，尊敬爸母的，欲得著亨通，長歲壽(弗6:2,3)。    有人推辭主的呼召，講：我先去埋( tâi )我的老爸 。(路9:57-62) 1 伊表示 "等我老爸死，我會來綴你"，這是推辭(the-sî)的話。佇古早，人死隨時安葬。伊閣四界趖(sô)，所以老爸猶(i á u)活咧(teh)。 2 "出在死人埋葬𪜶的死人" 是講互(屬靈死、呣信的人)埋葬(肉身死的)，意思是"世俗的代誌互呣信的人做"，你著去傳上帝國。 3 因為咱攏有真濟責任，著做安排，然後做上重要的(路9:60)。 4 "無時間" 孝敬爸母，因為時間攏用佇"事奉主"，這呣是理由。 5 有人欲綴(toè)主，主講伊著放棄物質的享受，著想清楚(路9:58)。 6 綴主，著放落人情世事、以及過去，才會入上帝國(路9:62)。     聖經記載照顧爸母 "靈、魂、體" 需要的，得著上帝賜福 。 1 掃羅的老爸拍無幾隻驢仔，伊帶奴僕去揣，揣到真遠的所在。伊驚老爸反為𪜶操煩，伊的貼心，上帝揀伊做王。(撒上9) 2 摩押女子路得伴孤單一人的大家(ta-ke)倒去以色列。伊體貼，犧牲(故鄉、信仰)。翁婿的族人收伊做某，伊生大闢的阿公。(得) 3 猶大為饑荒去埃及糴(tiah)糧，著帶老爸疼的細囝去，伊知老爸的心，用智慧的話安慰。大闢、主耶穌對伊出。(創43) 4 約瑟做宰相以後，接老爸、全家去埃及，細膩照顧，互老爸安享年老。伊的囝占以色列兩個支派。(創45-47)   --------------------------------

     波斯亞哈隨魯王的王后呣配合伊，伊揀以斯帖做新王后 。 1 猶大人受掠去巴比倫，波斯的時，真濟繼續留佇外國。 2 亞哈隨魯做王，猶大人末底改認叔伯小妹以斯帖做查某囝。 3 王辦桌請全國首領，煞(soah)閣請京城百性，和王宮的人。王啉(lim)酒心爽，請王后來互大家看，王后拒絕，王就廢掉王后。 4 王揀新王后，以斯帖入王宮，伊無講伊的族。伊面貌媠，宮內的人歡喜伊，王疼伊、寵愛伊贏過眾女子，揀伊做王后。 5 因為按呢，末底改佇王宮當職，伊知影兩個顧門的太監欲害王，伊通知以斯帖互王知，王給末底改閣這件代誌記佇冊。     猶大人末底改呣拜首相哈曼(亞瑪力人)，哈曼圖謀報復 。 1 王高升哈曼，王宮內的攏著跪拜伊。末底改呣，哈曼滿腹受氣，佇王遐誣賴猶大人，伊願意獻銀，來除去全國的猶大人。 2 末底改給以斯帖的差用講，哈曼獻銀互王，用王的命令欲滅猶大人；閣講"你得著王后的位，敢呣是為著今仔日"(斯4:14)。     以斯帖命令猶大人禁食了，伊去見王，求王救猶大人 。 1 以斯帖、伊的宮女、京城的猶大人為伊無食無啉(lim)三日。 2 然後伊去到王的內院，王恩待伊，答應和哈曼赴伊的筵席。 3 筵席了，伊請𪜶第二日閣來。彼暝，王聽末底改救伊的記事。 4 第二日，王互末底改坐王的馬、穿王的衫遊京城，哈曼𤆬( chho ā )路。 5 彼日筵席，以斯帖請王救伊閣伊的宗族，對敵就是哈曼。 6 哈曼受處死，末底改得著高升，命令猶太人通攻擊𪜶的對敵。 7 王后、末底改命令猶大人守"普珥(jíⁿ)日"，紀念𪜶得著拯救。     猶大人流亡佇波斯，上帝安排二人，救𪜶脫離滅無 。 1 末底改有智慧，吩咐王后以斯帖藏身分，𠢕(gâu)用伊的地位。 2 以斯帖認真準備，賰(chhun)的交託上帝。雖然著死，無後悔。 3 末底改深信，上帝安排以斯帖做王后，閣有萬一的第二步...。 4 以斯帖記無上帝兩字，總是伊的作為出現佇逐位。

     人生逐坎( khám )站的選擇，對咱有深閣遠的影響 。咱是照上帝的形像造的，咱有自由意志。佇( tī) 咱的吃、穿、交朋友、學校讀冊、工作、嫁娶等等，咱攏著做選擇，選擇影響咱的人生和生活。 1 生活方向：放棄學業，提早入社會，可能一生為生活操勞。 2 生活品質：放縱家己，可能染著病，綴一世人。 3 人生幸福：無適當的婚姻，可能影響家庭親密、感情的生活。 4 人生高度：無人生目標，可能茫茫渺渺(biáu)過一世人。     上帝計畫咱的一生，咱是上帝的作品 (弗2:10)。所以 1 人生有價值：人有上帝的形象，有能力和疼心，來改變世界。 2 人生有目的：是欲榮耀上帝、利益人。過上帝所歡喜的生活，運用所得的才調，服事別人，幫贊有需要的，來榮耀上帝。 3 人生有向( ǹg )望：相信上帝的引𤆬( chho ā )和保守，佇基督內面有永活。     基督徒的信仰，表現佇伊的生活，影響伊的選擇 。因為人的選擇和伊的價值觀相關，價值觀受信仰影響。基督徒 1 掠上帝做中心：伊創造世界，疼世界，咱著趁伊的心，互世界變較媠；著行公義，心存憐憫，謙卑及伊相及行(彌6:8)。 2 疼厝邊親像家己：咱逐人攏是照上帝的形像造的，逐人攏有尊嚴和價值，無論是朋友、生份人、抑是敵人，攏著相疼。學基督，行做顯出疼、謙卑、寬容的性命。 3 傳福音救人：回應上帝的疼，報傳疼、包容、憐憫的福音，招普天下信耶穌，互人得活命。咱是及上帝同工。     著揀活路，閣佇欲去的逐位，積極、樂觀、盡心 。 1 選擇著有智慧，透到活的門狹、路細條，揣著的人少(太7:14)。 2 𫞼(chhāi)根佇基督，認真持守，就袂佇人生的雙叉路口失迷。 3 相信人生逐個轉換攏有意義，接受挑戰，性命會較豐盛。 4 摩西講：你著守耶和華的誡命...呣聽趁、欲滅無...我用生死，祝福咒詛(chiù-chó͘)，排列佇你的面前，你著揀活命(申30:15-19)。