Taigi 讀聖經

        我欲對父求，伊欲用閣一個保惠師互恁，互伊永遠及恁蹛(tòa)(約14:16)，就是真理的神，世間所袂(bōe)接納的；因為無看見伊，閣呣(m̄)捌(bat)伊。獨獨恁捌伊，因為伊及恁相及蹛，閣欲踮佇恁(約14:17)。       耶穌的一生 是和聖神同工，有聖神無限的的能力(約3：34)。 (1)耶穌受浸禮了後，聖神親像粉鳥對天降落佇伊頂面(約1:32)。 (2)上帝用聖神及才能抹耶穌，互伊醫好受魔鬼壓制的(徒10:38)。 (3)耶穌佇會堂讀以賽亞的冊：主的神臨到我，伊用油抹我，互我傳福音互喪鄉人，受掠的會得敨(tháu)放，青瞑(chhiⁿ-mî)的得著閣光。讀了講：這個聖經的應驗，恁今仔日聽見啦(路4:16-21)。 (4)耶穌受釘死，上帝差聖神互伊對死閣活(羅8:11)。       約14:16,17講，主耶穌上天以後， 聖神 來到地上幫贊咱，伊 1 是真理的神 ：引𤆬(chhōa)咱明白一切的真理，知欲來的事(約16:13)。 (1)上帝的道理就是真理，耶穌求上帝用真理互咱成聖(約17:17)。 (2)保惠師是真理的神，對天父出，為基督作見證(約15:26)。伊是真實的神無傳差謬(biū)；假神呣認耶穌，呣是對上帝來(約壹4:3,6)。 (3)所有的讖(chhàm)語，是人互聖神感動來講出的(彼後1 :21)。 2 是保惠師 ：是咱的導師，幫贊者，保護者；亦是朋友，安慰者。 (1)伊根據真理，佇罪、義、審判三項來指正世間(約16:8-11)。伊欲將一切的事教示咱，閣互咱記得主一切所講的(約14:26)。 (2)伊感動咱，拍開咱的心門接受主(帖後2:13)。引𤆬咱，互咱行出仁愛、喜樂等等的好德行(加5:22-23)。催逼咱著合一，用和平相結聯(弗4:3)。賞賜逐人有無像的恩賜(林前12:7-11)。 3  是踮佇咱的上帝 ：是咱隨時的幫助，及時的安慰。 (1)咱歸屬基督以後，聖神就踮(tiàm)佇咱裡面(羅8:9)，用上帝的疼灌沃(ak)咱，無離開咱，給咱勘(khàm)印，做咱承接產業的準當(tǹg)(弗1:13-14)。 (2)咱軟汫(chiáⁿ)，聖神為咱祈求(羅8:26)，呣通拍hoa聖神的感動(帖前5...

    希10:21-25講咱著踮佇上帝的家，大家相扶持，相勸勉。 1 有大祭司治理上帝的家，閣咱的心受𫝺(hiù)免互良心責備，身軀亦受清水洗，著用真實的心，充滿的信，親近上帝(10:21,22)； 2 已經承認所向望的，今著堅固無搖動，因為應允是信實(10:23)。 3 著大家相眷顧，激起仁愛，及行好。呣通放捒(sak)聚會，親像有人慣勢按呢，著相勸勉，既然看見彼日近，閣卡著按呢(10:24,25)。     頂面的聖經節講， 咱著有三個堅持 ：1 用誠心和充足的信心親近上帝 2堅固所向望無搖動 3相眷顧，激起仁愛，及行好。頭兩個講著相信閣親近上帝，第三個講著佇教會中，過團契生活。     呣通放捒聚會，親像有人慣勢(sì)按呢。 1 2020年初開始的Covid瘟疫，致到教會停止聚會，改做網路禮拜，直到一冬後才回復佇教會聚會；總是無閣親像疫情以前。 2 網路互大家亦通相關心、分享，總是網路袂(bē)當代替團契生活。 3 一旦習慣無聚會，閣感覺真自由，其實是陷落佇世界，跋(po̍ah)落撒旦的羅網。雖然參加聚會，若是所想、所做背離，亦是按呢。 4 著誠實面對家己，用疼心相關心，相勸勉、相替祈禱，佇物質上及精神上提供實際的幫贊，互疼心互相感染、激發，佇實體聚會中過團契生活，就是同心、同甜同苦的親密同伴關係。 5 無聚會，就無團契生活，亦無可能學習怎樣相疼、對照學習。 6 近末日，若無團契生活，就無信徒的相扶持，容易受撒旦控制。     基督徒著佇主裡面聚集，同心志同仁愛，互主歡喜(腓2:1,2)。 1 聖徒佇光明中交陪、成做團契，主和咱就是按呢(1約1:6,7)。 2 真正的聚會，是有主佇中間的聚集(太18:20)，聽趁上帝的的旨意和上帝的話。聖經講咱著成做一個團契，用仁愛用仁慈相安慰、相服事、相親愛、相讓、相接納、相教示、相苦勸，敬重人，存憐憫的心，大家相赦免。存信心來聚集，得著祝福。 3 同心來聚集，真正行天父的旨意，做天國的國民(太7:21)。

        上帝是聖潔公義，咱敢會當和伊作 朋友 ，建立親密的關係？ 當然會當！上帝的疼超越一切，伊憐憫咱，伊愛人來接近伊。 1 咱著認罪：伊無愛咱沉淪，咱若悔改，就會當和伊親近(彼後3:9)。 2 伊有恩典：咱若誠心悔改，清氣咱的手和心，伊欲接納咱(雅4:8)。 3 伊的疼無窮：咱袂出世，伊就揀選咱(詩139:16)。    咱欲做耶穌的朋友，著 明白 閣接受伊啟示的真理、教示(約15:15)。 1 學習聖經：用心、用時間，讀、閣思考上帝的話。 2 誠實：無騙家己，老實面對家己和上帝標準的差別，日日求進步。 3 全心倚靠：認捌(bat)家己的有限、欠缺，接受上帝做主，互伊引𤆬。 4 懇求聖神幫贊：伊應允及咱佇啲，閣提醒咱主耶穌的教示。     做耶穌的朋友，著接受伊的教示，閣 行 伊所命令的(約15:14)。 1 心神換新：趁上帝的話，轉變想法，褪(thǹg)去舊的人(弗4:22-24)。 2 相信：無論大小事，攏通給上帝講，上帝會安排，超出咱所會想像。著互伊來𤆬，呣是上帝照咱的意思來成。若失去對伊的信心，關係就斷去。(腓4:6, 7) 3 呣通停：逐日、逐時刻攏著警醒，體會、經歷上帝的作為。 4 耐心：咱通排列懇求，繼續求，著聽候，注神聽彼個輕閣細的聲。 5 加入教會：信徒通/著相(saⁿ)眷顧，來激起仁愛，閣去行(來10:24)。 6 有行動：做對的代誌，結果子。無驚做無好，著對錯誤中來學習。 7 跟綴基督：基督家己做互咱看，閣要求咱著按呢做(約13:15)。 8 結果子：著和基督結連，結好果子，伊欲互咱清氣，結閣卡濟；離開基督，咱袂會做啥物。無結果子，就無得救。(約15:2,5,6)    親近 上帝，伊就親近咱(雅4:8)。祈禱，互咱和上帝親密做伙。 1 交託：通將一切對伊講，伊欲啟示、敁(tháu)放咱，互咱無掛慮。 2 信任：咱若祈求、閣相信會成，伊會回應，伊的話欲臨到。 3 行公義，心存憐憫，謙卑及上帝相及行(彌6:8)。行正路、無假好；對弱勢、欠缺的有同情心、同理心，呣通喙(chhùi))恬恬(tiām)、手虯虯(khiû)。

        約翰福音有記載下面九個事件。 1 尼哥底某：一個做官的法利賽人，專心揣求上帝國(3:1-15)。 2 撒瑪利亞的婦仁人：經歷失敗的婚姻、揣求愛情的人(4:16-18)。 3 大臣的囝：王的人臣求主耶穌救伊破病、咧欲死的囝(4:46-54)。 4 破病38年的人：聽候畢士大池的水陣動，通落去得醫治(5:5-9)。 5 枵餓的眾人：主用五塊餅二尾魚的神蹟，飼缀伊的人 (6:2-13)。 6 嘴乾的猶太教徒：主講：信的人，欲有活水對腹內流出(7:1-52)。 7有罪的婦仁人：行姦淫的時，互人掠著，主無定伊的罪(8:3-10)。 8 睛暝的：主攪土糊(kô͘ )伊的目睭，閣去西羅亞池洗，得著好(9:1-41)。 9 拉撒路：主佇伊死四日、閣囥佇墳墓了後，互伊閣活(11:1-45)。     約翰福音這九個事件的啟示： 咱需要主賞賜性命、賞賜閣活 。 1 重頭生的例，人著愛重頭生，才會得著永遠活(，看著上帝的國)。 2 討活水的例，人呣若需要活水，閣卡需要閣活的主入咱的性命。 3 大臣的囝的例，醫治死傷，需要閣活的大能，分性命互咱人。 4 袂振動的人的例，主的閣活臨到咱，會互咱活起來、強壯起來。 5 枵餓的眾人的例，救主活命的話，欲成做咱活命的米糧。 6 嘴乾的例，主得榮耀以後，賞賜性命的聖神，成做咱活水的溪。 7 行姦淫的例，主欲敁放咱，加添咱的氣力，互咱脫離罪的箝制。 8 睛暝的例，主為著屬伊的羊放拺性命，咱才會得著醫好。 9 拉撒路的例，主呣那醫治咱，伊將家己賜互咱，互咱活起來。     主耶穌講：閣活及活命是在佇我(約11:25)。KJV聖經翻譯做「我就是閣活及性命」。整個約翰福音講， 主耶穌是閣活及活命 。 1 人存在是因為有性命，死亡搶去人的性命，閣活徹底刣贏死亡。 2 主呣但(m̄-nā)互人閣活，伊家己就是閣活，死亡袂當禁伊。 3 主互頂面逐個死失的情景，變做活潑、有力的性命，脫離死失。 4 主贊咱褪去舊的人，看無死失，佇人生逐站，得勝有偆(chhun)。 5 閣活的主，今藉著聖神，引𤆬閣活的咱為伊做見證。

      凡事莫得為著結黨，為著空空的榮光來做；獨獨大家用謙遜的心，看別人卡贏佇本身(腓2:3)。咱著謙卑，才會和人相和。     腓立比書第2章講，咱著學基督。(腓2:5-11)是基督的歌： 1 著有基督耶穌的心做心(2:5)。咱的心思、意念、態度，著學基督。 2 伊本有上帝的形狀(2:6)，基督袂到世間時，伊的本性是神性。 3 無掠及上帝平等(2:6)。基督降世，屈低、謙卑，放棄地位。 4 反轉摒空家己，取奴僕的形狀，成做人的樣相(2:7)。伊是人。 5 親像人的款式，就屈家己，順服到佇死，甚至死佇十字架(2:8)。     基督看無家己， 咱著有基督耶穌的心做心 ： 1 基督耶穌的心：是三節經文(2:6-8)所講的，謙卑、順服。 2 咱的心思、意念和態度，愛學基督，謙卑、順服，榮耀上帝。 3 有基督耶穌的心思、行做，才會有真實、甘甜的交陪及合一。 4 態度著謙卑、真實，無固執。總是做工著拍拼、堅持、無勼(kiu)退。 5 伊本有上帝的形狀：雖然降世，伊猶原保持上帝的本性。 6 摒空家己：雖然有上帝的本性，伊放下上帝的權柄、榮耀。     主耶穌摒空家己， 咱著學習伊的謙卑、順服 。 1 主耶穌無求家己的榮耀，伊服侍人、受苦、忍受侮辱。 2 伊會悿(thiám)、會痛、會甘苦、會憂傷，這攏是人的限制。 3 咱著順服上帝、謙卑學習，活命才會流入來，才會進步。 4 摒空家己，才有空位，會接納新的代誌、無𫝛(siâng)的想法。 5 摒空家己的人，袂自高，會看著別人欠缺，顧著別人的利益。     自高的，欲互伊卑微 ；家己卑微的，欲高升伊(路14:11)。 1 人的法度：爭取、攻擊；高升、無放下，踏別人、提高家己。 2 上帝的法度：摒空、才有充滿，呣是損失、是榮耀的充滿。 3 上帝高升伊極高(2:9)。著安心，上帝的報賞，超越咱的想像。     咱著順服上帝、謙卑及伊相及行 (彌6:8)。 為著偏見來結黨，無公正的講話、驕傲，攏會破壞教會的合一。

      一粒麥無落佇地裡來死，就猶原一粒若定，死，就結實濟濟(約12:24)。主耶穌用麥仔死、結實，表明伊的死，將性命互信伊的人。     基督若麥仔，落佇地裡來死，"死"的意思： 1 死是棄捒舊的人(相爭..)，換做新的人(撙節..)(加5:19-23)。 2 死是放棄一切世上的纏絆，無為著家己的性命、利益拍算。 3 死是為著拍破麥仔殼，互內面的性命得著敁(tháu)放。 4 死呣是結束，是對一款性命、變做另外一款性命的交界。     麥仔是種子，拍破外殼，生命就露現 。咱著變換親像種子。 1 外殼：是舊性命的罪性；親像冷淡、怨恨、追求享樂、富貴等。 2 麥仔落佇土以後，外殼朽爛，裏面的性命才會敁放。 3 落佇地、死、破殼，一切重新開始，才袂會受舊的人所影響。 4 破外殼，脫離罪及死，是靠活命聖神的法，感化閣引𤆬(羅8:2)。 5 破殼以後暴出的芛(新性命)，軟勢閣有韌性，有智慧克服阻礙。     麥仔死、才來結實 的譬喻，啟示咱： 1 落在地裡死，外殼才會破，才會結出濟濟麥實。 2 無落在地裡，抑是外殼無破，麥仔永遠是一粒。 3 高舉的十字架，引𤆬眾人就近主(約12:32)。眾人是麥仔結的實。 4 主的死、呣但(nā)贖罪，閣卡積極的目的，是為了互咱新的性命。 5 主流血，除咱的罪；麥仔結實，進一步講，伊的性命入到咱內面。 6 咱也是種子，土是做工的場所，互咱佇遐來結實濟濟。 7 人子受舉起，若摩西舉起銅蛇；表示主的死，也刣贏彼隻古蛇。     著惜新的性命 ，若閣疼家己的舊性命，就欲喪失伊(約12:25)。 1 舊的性命：人的心思、意志等等，就是人的自我，肉體的性命。 2 疼舊的性命：就是順家己所愛的，放縱去做、無站(chām)節。 3 喪失伊：失去來世、失去永活、失去真正的享受和喜樂。     咱也是別人所結的果子，向望咱也會跋(po̍ah)落地，結果子，用百般的吞忍，盡職，互活命的道相绁(saⁿ-sòa)。

      約翰福音20章有記載主的閣活。 1 彼日(七日的頭一日)已經暗，學生因為驚猶太人，就關門。(20:19) 2 耶穌徛佇𪜶(in)中間，講：願恁平安！用手及脅下互𪜶看。(20:19,20) 3 閣給𪜶講：願恁平安！對𪜶歕(pûn)氣，講：恁受聖神！(20:21,22) 4 多馬彼時無佇啲，講：無探伊的手、脅下，我呣信。(20:24,25) 5 過八日，學生及多馬佇厝內，關門。耶穌到，講：願恁平安！(20:26) 6 給多馬講：看我的手，探我的脅下。莫得做呣信的，著信！(20:27) 7 多馬應講：我的主啊！我的上帝啊！(20:28) 8 耶穌講：你看見才信；許個無看見來信的人，有福氣。(20:29)     對頂面的經文，咱看見幾項代誌通思考： 1 學生關門，因為驚猶太人。咱蹛美國，敢會也驚有人會侵入厝來？ 2 主講三遍平安，伊知，學生驚惶、失望、餒志、無力，需要平安。 3 多馬的信是建立佇親目看見、親手摸著，來建立心目中的上帝。 4 雖然逐日及主做伙，領受教示，多馬對新的狀況，猶原愛有確信。     主耶穌愛多馬注意到伊的空喙，講：看我的手，探我的脅下。因為這是建立多馬的信心所需要的。咱來看一寡相關的代誌。 1 多馬老實講伊所關心的代誌-空喙，對建立伊的信心真重要。 2 伊是講理氣的人，當主著去猶太看拉撒路，雖然有危險，伊贊同。 3 多馬的態度：認真觀察、思考，勇敢面對新的挑戰，提出問題。 4 主處理多馬心內的疑問：面對空喙，關心，轉換問題成做力量。 5 醫治美國的空喙：恢復家庭 信仰 負責任 無依賴別人的價值觀。     親像多馬揣出問題，疫情了，著思考教會禮拜，和頭前的路。 1 人的爛性：教會久久無聚會，怎樣將羊仔閣呼(kho͘ )倒來。 2 教會運作：教會的事奉、教養、關懷、事工安排、揣牧者。 3 教會傳承：怎樣互TTPC繼續落去，作台灣人後代的教會。     咱著學習主耶穌關心、同情、鼓勵多馬，面對問題，解決問題，轉換危機，開拓新的路程。