Taigi 讀聖經

      天國、上帝國、上帝的家攏是講相仝(kâng)的代誌 。 1 "天國"今部分實現佇地上，"天堂"是離開世間欲去的所在！ 2 上帝國(天國)是上帝咧掌權、統治，義是治理的柱(thiāu)石。 3 恁的義無贏過...決斷袂得入天國(太5:20)，上帝國和義呣使分開 。 4 馬太福音用天國的詞，亦用上帝國，其他福音書用"上帝國" (1)耶穌講："富人入天國僫啊"(太19:23)，太19:24用"上帝國" (2)行洗禮約翰講：著反悔，天國近啦(太3:1,2)，可1:15用"上帝國" 。 5 上帝國亦是上帝的家，以色列人、外邦人攏通佇內面(弗2:19) 。 6 上帝設立地上的家庭，是實現上帝的家的基礎。 7 白色大寶座審判以後，新耶路撒冷對天頂上帝遐降落，只有名佇羊羔的活命冊的會得入，這就是天國完全的實現(啟21:2, 27) 。     "接受福音到進入天國"有4個階段 (太13:18-52)。 1 掖( iā )種： 掖 好種(福音)亦會 掖 去路邊、淺土、刺柿(phè)地，致到無生長。魔鬼亦 掖 稗(phē)仔，濫佇麥仔(教會)中(太13:18-30, 36-43)。 2 成長："芥(kòa)菜籽性命的長大"及"酵(kàⁿ)互麵粉虛假的膨大"(太13:31-33) 。 3 付出：買"藏寶的園"及"好珠"，綴主亦得付出代價(太13:44-46)。 4 成聖："分開網裡歹水族"及"棄捨庫房舊物"的選擇(太13:47-52)。     "天國"是"新約"的主要信息！天國已經佇地上！ 1 教會見證上帝的公義及慈愛，上帝國實現上帝的救贖(太6:9-13) 。 2 天國開始降臨地上：耶穌醫病、趕鬼、互死人閣活(太11:5) 。 3 天國上大的喜樂：罪人、抽餉的、散鄉人、囡仔得著接納，回復自信。罪人悔改，浪子回頭， 怹(in) 的性命得著改變。 4 天國國民：聖神感動，閣回應、行上帝旨意的，欲進入(太7:21) 。 5 天國的奧妙：信靠主就得著啟示，硬心的，看亦看無(太1...

120歲的摩西佇尼波山 遠看迦南地     有歲的時，欲有健康、長歲壽閣快樂的人生，亦著用心經營 。 1 終身學習：學習新的趣味、科技產品、個人生理、心理、經濟的變動，及社會、世界的情勢，建立新的生活內容。 2 健康：運動、做義工來保持健康！坐久久抑是久久倒眠床，會互身軀的肉消溶，肉的力量和耐力減少，致到酸痛疲勞，活動受限制，容易閃著腰。骨及關節欠肉支持，人會失去平衡、跋倒。 3 醫療：定期接受體檢、預防注射，身體有變化著揣醫生。 4 生活方式：調整心理，以及個人及社會生活，來配合變化。     笑是活泉，著有歡喜、快樂的心，做和平的人、感恩的人 。 1 正面的人生：歡喜的心是好藥；憂傷的心神互骨枯焦(箴17:22)。 2 積極的人生：培養新的趣味，做義工，關懷、參與社區活動。 3 有疼的人生：除去固執、歹脾氣、凍霜、刻薄、孤僻的個性，著慈愛、寬容大量，無計較，無快受氣，無堅持呣參詳，無影無跡的話無講，講話著造就和鼓勵人，嘴甜心甜，為人設想，祈禱。     有歲的人佇人生的後半，猶原著持守信仰、結果子 。 1 有信仰，人生有方向。年老、衰弱的時，上帝無離(詩篇71:9) 。 2 上帝愛亞伯拉罕獻伊100歲才有的囝，伊相信上帝有媠的安排。 3 信的人雖然老，伊的智慧和經驗猶原欲結果子(詩篇92:13,14)。 4 80歲以後的摩西極溫柔，為人民排解糾紛、裁決案件、互人尊敬 5 迦勒40歲受派去探迦南地，面對困難信心滿滿。38冬後倒去迦南地，猶原信心勇壯，得著上帝應允賞賜的地(書14:6-12)。     求上帝賞賜咱智慧，知影算家己的日子，閣堅固咱所做的工 。 1 和上帝同行：孤單欲得著醫治，閣安穩、有希望和感恩的人生。 2 知老：徛居有安排，老本著儉用，生活有規律，身體著顧惜，靠主的恩典，無看後壁，努力頭前，後事安排好，感恩每一日。 3 上帝保守：你的日子怎樣，你的氣力也欲按呢(申33:25)。摩西年老，目睭無花，精力無衰退(申34:7)。迦勒年老亦勇健。  

       人的一生，對嬰仔到老，逐時準攏有無像的挑戰咧(teh)等咱。 1 人生出問題，有人悲傷絕望；有人完全放棄(心死啦)；有人揣朋友敨(tháu)氣；有人抽籤卜卦；有人用腦筋揣出路。 2 面對困境，無論佇身軀、心神，抑是婚姻、事業，若袂當揣著出路，心志會漸漸消溶，親像著血漏，性命一步一步踏入死亡。 3 人佇困境，心神軟弱，無影的亦信，容易互對敵攻擊，亦會互黑暗的權勢來迷惑，陷入閣卡慘的光景。     保羅特殊的造就和特質，互伊雖然受苦難，猶原無凜懾 (lún-neh) 。 1 充分準備：綴拉比學律法，閣用9冬的時間，揣求上帝的旨意 。 2 有屬靈的同伴：巴拿巴接納伊、做伙事奉，旅行宣道有巴拿巴、提摩太和西拉同行；受關監，有以巴弗提和路加來照顧。 3 無纏拌：無越倒頭，全心致意頭前的事，向標來走(腓3:12-14)。 4 目標專一：做外邦人的使者(徒22:21)，死活攏為主(羅14:8) 。 5 交託主：深信人若承認軟弱，上帝的的氣力就欲顯出(林後12:9) 。 6 堅強的性命：雖然互人拍、石頭抌(tìm)、船破...，閣掛慮眾教會(林後11:23-29)，伊相信主，主亦為伊開路(林後4:8,9)。 7 信靠主：伊用心求、揣路、踏出去(太7:7-8)，主成伊的心願。     佇逆(ge̍k)境，心神著積極、樂觀，用正面的態度面對挑戰 。 1 信靠是信心(心相信)，閣加倚靠(實際行動)。信靠主就贏絕望。 2 約書亞相信上帝會分開約旦河的水，伊就踏入約旦河。 3 但以理相信上帝會救伊脫離獅穴，堅持敬拜主、祈禱的生活。 4 睚魯相信耶穌會互查某囝活起來，就堅持耶穌去怹(in)兜救伊。 5 患血漏的婦仁人相信耶穌會醫好伊，就想辦法去摸耶穌的衫。 6 舊約信心的英雄，雖然無得著應允的；怹遠遠看見，就歡喜來接 。     人生無順利，呣通勼(kiu)退，山溝底就是希望的開始 。抵著困境，著分別內心的感覺，抑是實際的狀況，安靜心，排列一切佇主面前來祈禱，伊欲贊咱揣出轉踅(se̍h)的路，咱亦著勇敢踏出去。

      人受時間、空間的限制，汰會有永遠的性命 ？ 1 咱一生的年日是七十歲，所誇口的不過是勞苦憂愁(詩80:10)。 2 上帝是創造者：伊造萬物，各照伊的時，成做美妙(傳3:1-8, 11)。伊預先定著人佇地面的期限，及徛起的地界(徒17:26)。 3 永活的意識：人是照上帝的形象所造(創1:27)，伊給揣求永活的意念囥佇咱的腦(傳3:11)，咱的內心對暫時的存在，並無滿意。 4 人生的矛盾：人是有限的存在，閣意識到"無限"的觀念。 5 永活的醒悟：頭腦清的人看著變化無常、無通測度的人生，愛欲揣出人活啲的目的，人生的奧秘；一般人為著漸漸老悲傷。 6 人的無奈：既然咱無法度進入永活，就接受限制，快樂過日，享受勞碌得著的福份，過一個有智慧的生活(傳9:7,9)。     人生呣是無出脫，是會迵(thàng)到永遠 。 1 上帝的存在：上帝永遠的權能及聖質，凡看見伊的創造的，想了就明白，互 怹 (in) 無路通推託(羅1:20)。 2 上帝預先計畫：咱猶未出世，伊已經安排咱的一生(詩139:16) 。 3 上帝互咱永活：咱呣但(nā)活佇地上，是到萬世代(詩33:11)。 4 世上以外的家：地上的厝若毀壞，咱欲去天裡的(林後5:1)。 5 主來𤆬路：伊拍破時間、空間的限制，伊是路、真理、活命，伊𤆬咱就近父(約14:6)，信伊的人會得著永活(約3:16)。     你欲對上帝講：願你的旨意成，抑是伊對你講：出在你？ 1 永活只有兩個所在通揀 (1)天堂：信聖囝耶穌的，欲踮新天新地 (2)地獄：白賊的、呣信的，會入永遠的火刑(啟21:1-3,8)。 2 咱佇老母腹肚九個月，是為著性命的開始作準備；佇地上的日子，是為著進入永活作準備；入永活以前會有審判(希9:27)。 3 咱呣通只有顧目前，著好好運用地上的日子，時刻存永活的心及價值觀。咱逐人著承擔佇世上所做的一切，到時攏欲露現，見若行好、求袂敗壞的，欲享受永活(羅2:6,7) 。    

      倫理學是用來討論善惡的道德原則，"無講白賊"和"講白賊"來救人是互相衝突的道德問題，下面是處理衝突的六種方法。 1 無原則論：完全個人主觀做決定，"講白賊"無對、抑是呣對。 2 一般論：無講白賊是原則，呣是絕對真理，為著救人通講白賊 3 處境論：只有一個道德原則"疼"，若出佇疼"講白賊"，就是對。 4 無條件絕對論："講白賊"就呣對，設使會"救人"，也袂使。 5 相抵絕對論："講白賊"來救人和"無講白賊"的道德原則相衝突，莫守卡輕的"無講白賊"的原則，著"講白賊"來救人(雖然犯罪)。 6 分級絕對論："無講白賊"和"救人"的道德原則攏著守，衝突的時，守卡高的原則"救人"，犯著"講白賊"卡低的原則算無罪。     無條件絕對論，就是完全順趁真道，普遍受基督教界接受 。 1 咱若有一遍講白賊，以後別人呣知敢通信任咱。因為上帝是聖潔，無講白賊，咱才會相信伊，伊也要求咱著老實(利11:45)。 2 莫得講白賊(西3:9)是論說性(講道理、命令、規定)的經文，是真理、著守；總是故事，歷史、事件記錄，袂當看做真理。     用無條件絕對論的"著守所有的道德律"，來解讀歷史事件 。 1 但以理祈禱上帝，伊的三個朋友呣拜金像，𪜶趁上帝的律法，無守王的命令。𪜶盡本分，其他交託上帝，上帝有救𪜶。 2 亞伯拉罕驚人為著搶伊的媠某來刣伊，二遍講撒萊是伊的小妹。伊無白賊，對無相關的人只有講部分的事實。 3 撒母耳藉獻祭的機會去膏大闢，互掃羅無起僥疑。對歹人，伊猶原無講白賊，亦無必要將所有的代誌傳出。 4 產婆敬畏上帝，無照法老王的命令，互希伯來查甫嬰仔死，上帝好款待𪜶。法老問，𪜶應講：猶未到，嬰仔已經生啦。上帝袂贊同白賊，總是產婆憐憫人，上帝因為按呢亦憐憫𪜶。     上帝的法度著完全守 。倫理學提供判斷善惡的方法，懇求聖神賞賜智慧，互咱對現今的倫理問題，行出上帝看做善的。

      奧古斯丁(Augustine)一生若保羅，伊接受主以前並無心安。 1 伊真巧、有才情，綴主以前順趁肉體的情慾，過奢華的生活 。 2 伊受著一本哲學冊的影響，決心一生欲揣求智慧，追求真理。 3 上先摩尼教吸引伊，𪜶認為善惡是對立的萬世原則，靈魂對善來，肉體對惡來，犯罪對惡的原則來，人無需要負道德責任。 4 影響上大的Plato學派講，惡善攏是非物質，上帝是善的本源。 5 最後伊到米蘭，抵著一個有才調、學術飽、虔誠正直、𠢕講道的天主教主教Ambrose，伊聽伊講道，亦開始研究聖經。 6 聖經解除伊對宇宙、善惡、罪的疑問，閣上帝是袂變的真理。 7 佇朋友米蘭的花園，伊得著完全的改變。當時伊和朋友作伙讀聖經，伊的心忽然受感動，目屎直直流，伊去仆倒佇一叢無花果樹腳。伊的嘴重複念：主啊，欲等到抵時？求你無記念我過去的不義，除去我一切的罪。忽然伊聽見囡仔的聲重複講"提起來念！提起來念！"伊想，這是主的指示。伊翻開聖經，看著羅馬書13:13-14："所行著端正，莫得放縱酒醉...著穿主耶穌基督，莫得為著肉體圖謀..."這就是伊的狀況和互伊的藥方。 8 得著上帝的光照，伊決心綴耶穌。伊倒去非洲開修道會、寫冊。佇思想上，伊是對保羅到馬丁路得中間，上有影響力的人。     今仔日，咱比奧古斯丁抵著閣卡濟的引誘，亦僫(oh)得安歇 。   1 猶原重視肉體的享受，親像情慾、娛樂、宴會。 2 為著滿足慾望和安全感，拼命追求地位，積貯財富。 3 時間用佇電子批、社交媒體、好耍的程式、發布消息、分享。     咱著守主安歇的命令，伊是安歇日的主 (太12:8)。奧古斯丁佇主內面得著安歇，重新出發，咱亦著學習安歇的功課 (1)無論抵時，通揣時間歇睏，抑是一禮拜至少歇一日，放落空課，做互靈魂得著精英，性命恢復活力的代誌 (2)佇這時間，感謝上帝的賞賜，享受吃物，和親人做伴、朋友相交陪，重新得著氣力。

        上帝是疼，無疼的，呣捌上帝 (約壹4:8) 1 聖神給上帝的疼灌沃咱的心(羅5:5)，除非上帝先疼咱，咱無可能去疼伊(約壹4:19)。疼是上帝的恩典，呣免去買。 2 上帝疼不義的，除去𪜶的不義；疼病人，互𪜶得康健(結 33:11) 3 上帝疼咱：伊將獨生囝賞賜咱，為咱死，互咱得著永活(約3:16) 4 無疼上帝的，就是外人，是對敵基督，有可能就佇教會內。     有疼，然後做你想欲做的 (聖奧古斯丁約壹4:4-12的講章) 1 有疼，閣會做歹人，是無可能的。 2 有疼的根佇你內面，你干單會出好果子，袂產生歹的。 3 若準你是出佇疼，你通保持恬靜；仝款，你通對人嚴肅、苦勸別人、和人分享、抑是喉叫，若準你是出佇愛。 4 疼心的行為著主動，呣通驚驚呣敢做，抑是認為是見笑的事。 5 呣通認為無責罰奴僕就是疼伊，無管教就是疼囝，無責備就是疼厝邊；這呣是疼，是軟弱(希12:6)。疼人，呣是吞忍錯誤。 6 著疼上帝創造的，呣是人造出來的。     咱敢看會著疼 ？ 1 呣捌有人看過上帝(約壹4:12)。伊是看未著的，著用心目去看。 2 清氣心肝的人有福氣，𪜶欲看見上帝(太5:8)；人的心目常常互世間茫霧遮閘，只有心清，才會看見上帝的榮光和伊的作為。 3 咱僫得想像上帝的形象，伊是全知、全能，超越時間、空間，遍滿全宇宙。減采咱通按呢講：上帝就是疼。 4 咱欲怎樣去形容疼？真歹形容！總是，疼有腳，伊給人𤆬到教會；疼有手，伊援助散赤人；疼有目睭，伊互咱看著有欠缺的人；疼有耳仔，伊互咱聽著福音；有疼的人會看著這全部。     有疼，然後做你歡喜的 ；這是佇上帝的疼內面享受的自由，你所做的會利益人，閣榮光上帝。受過上帝的疼感化的靈魂，袂去傷害互你疼的人，你會去幫贊𪜶、保護𪜶，閣歡喜去做。