Taigi 讀聖經

  Rev. Yeh Rev Yeh (uploaded by Katty Yeh)

      天爸上帝，阮感謝祢，賞賜阮逐人有一個媽媽。今仔日是母親節，提醒阮著記念老母的養育，著感恩、有孝𪜶。佇這個母親節 阮閣一遍來數念伊的疼、感謝伊、為伊祈禱。     阮感謝老母對阮無條件的疼 ， 伊無求阮來報答。伊忍受生產的苦 ， 互阮來到世間。伊儉腸凹肚(khiām-tn̂g-neh-tōo) 攏是因為阮是伊的囝兒 ， 對伊腹肚出的。若想著過去，逐頓燒烙(lō)的飯、換穿的衫，阮看著伊的疼。伊𤆬(chhōa)阮去耍，學習才藝，互阮有豐富的生活。當阮鬱卒、起性地的時，伊安慰、苦勸。伊給家己的甘苦 ， 委屈攏藏起來，家己吞落去。遮個代誌阮攏會記牢牢。     老母對囝兒無時無陣的疼親像一面鏡，互阮看見、閣體會天爸你的疼，是遐爾(hiah-nī)闊、遐爾深，不時咧(teh)包圍阮。當阮體會著老母的溫暖，阮也摸著你超越時間、空間，無時停的彼個疼。你的神永永和阮做伙，無放阮家己一個。     阮欲永遠感謝阮的媽媽，數念伊的疼。阮欲為世上所有的媽媽祈禱，求你賞賜 𪜶 忍耐、智慧，來養飼、教示 𪜶 的細囝。求你加添𪜶肉體上、精神上的力量，尤其佇𪜶孤單的時，抑是有歲、衰荏(soe-lám)的時。也求你幫贊作囝兒的，賞賜𪜶耐心，會曉來陪伴、安慰。閣給對老母承受的善良、吞忍、慈悲，對待家己的序細，以及四周圍的人，閣 𪜶 的社區。     現準時的社會，人口買賣、兒童拐騙的案件不時發生，求聖神幫贊老母，互𪜶有警覺的心，保護囝兒免受害；也求聖神安慰失去囝兒的老母；為著建立安全、安樂的社會，求聖神激動所有的人，譴責、棄捒(sak)這款的罪，閣徛(khiā)出來，配合執法單位，做伙出力。也為著政府執法機構祈禱， 𪜶 有充足的人額、 專業的能力，有預防、監視的系統，來打擊犯罪。 金句 以弗所書 6:1 做囝兒的，恁踮佇主著順趁恁的爸母，因為這是應該的。 1 漢字的台語發音。"爸(pē)母、老爸" ，"父母(hū-bió)、父親 "， “阿爸(pa)、 阿爸(pâ)”  2 "踮佇主"著順趁爸母 (1) 第一優先- 踮佇主上帝，第二 - 順趁爸母  (2) 順趁爸母的前提，合佇真理、合佇主的教示 (3)當時羅馬社會，老爸對囝兒有絕對的...

      感謝天爸上帝，你的恩典和憐憫，帶領阮平安進入新的一年。      你是大權能、公義的上帝，無掠有罪的做無罪，阮佇舊年所種的種種的歹( pháinn )，著家己收。總是，你有豐盛的慈愛，無快受氣，因為阮主耶穌做中保，阮若悔改，你欲赦免阮的罪過、過失。     佇( tī )過去的一冬，阮有拄( tú )著種種的試探，以及僫(oh)擔當的代誌。阮檢采肉體病疼，抑是有經濟上、家庭、職場、人際關係的壓力，為著囝兒孫來甘苦心，致到精神上鬱卒、驚惶、感覺孤單等等。     拄著遮(chia)個，阮敢采( kiam-tshái )會用無像的態度來面對，或(he̍k)是自高、軟弱、無知，抑是清清采采。 有時阮認為家己蓋𠞪( gâu )，代誌家己擔，閣家己想、家己對。 有時阮認為家己真軟弱，認為家己啥物攏袂( bē )曉，逃閃責任。 有時阮無知，無清楚認捌( bat )真理，致到無堅持真理，和歹來妥協。 有時阮凊( ch hìn )凊彩彩，想欲"代誌有做、會當交代、著好。"     檢討遮( chia )個，阮清楚，阮無真正明白聖經的教示，無真正接受真理。阮立志，無論代誌大細，阮攏( lóng )欲學習屈( k hut  ) 低、交託，學習堅持、堅強，學習認真對待逐項代誌。     佇新的一冬，懇求聖神引𤆬( Cho ā )，一日一日會那進步。 金句 徒13:47 因為主捌按呢命令阮講：我已經設立你做外邦的光，互你做拯救的到佇地極。 1 徒13, 14章 講保羅的第一遍旅行傳道。 2 保羅受設立、伊也確實做 "福音的執事"  "外邦的使徒"。 3 TTPC 2026年的目標：信仰傳承 福音永續。福音對內、也著對外傳講。 4 學習保羅做傳福音的使者。

        保羅所歡喜的，是信徒同心合意 。(腓2:2) 1 家和就國治，行政、監督部門相鬥，國家受害。 2 同心合意的實際：逐人一切的心思意念袂攏相仝，重要的是，心思、意念向相仝的方向和目標。學習同心合意，是逐日的功課。 3 有2、3人同心，奉主的名聚集，天爸欲給𪜶成所求的(太18:19-20)          逐人無綴(toè)世俗，才會同心合意 (腓2:14-18)。 1 這個世界是邪僻橫逆(siâ-phiah-hêng-ge̍k)：世俗用自私的觀點來看一切的真理，引誘人行彎曲(khiau)閣悖(poē)逆的路。(2:15) 2 學習同心合意：逐人講的、做的會有偏徙，莫(mài)埋怨，爭辯、相爭。 3 著同心合意：心思、意念完全相仝是真困難，若保持相仝的方向、目標，向著性命真道，就袂空空跑走，空空著磨。(2:16) 4 保羅和信徒同心： 拒絕世俗需要信心、決心，信徒用上媠的、信心的增長做祭來獻，保羅歡喜陪伴，用家己的血做酒來祭 。 (2:17) 5 關心是同心合意的表現：出佇對腓利比教會的關心，保羅差提摩太、以巴弗提就近𪜶。伊互其他教會的批信，攏會向濟濟人請安。          信徒同心合意，得著祝福 。兄弟姊妹相和好，教會成長。 1 耶穌的門徒同心合意：佇目的、疼心和事工頂面合一，認捌家己的身份，知影著做的代誌，疼上帝、疼人，催逼𪜶向前進。 2 耶穌上天了，伊的門徒聚集，同心專務祈禱。𪜶佇五旬節受聖神充滿，講外國語。彼得講道，約3千人信閣接受洗禮。(徒2:1-41) 3 聖神降臨了，信的人聚集，照使徒的教示，相交陪，擘(peh)餅，祈禱，所有的物公家用。謳咾上帝，得救的人日日加添。(徒 2:42-47) 4 尼希米倒去耶路撒冷，帶領百姓專心修理城牆、起城門，無分男、女、祭司、官員，逐個家族、逐款專業攏有份，閣逐人修理厝附近的城牆。雖罔對敵恥(thí)笑、攻擊，𪜶用52日給城牆修好。          逐人著有基督耶穌的心做心，才會做到心意合一 。基督耶穌的心就是，謙卑，順趁天爸，榮光爸上帝(腓2:5-8)  。 所以咱著有謙遜的心，真實無...

      耶穌互猶太人和外邦人合做一個 。 1 猶太人的自我優越感 (1)認為家己是上帝選民 (2)𪜶(In)有家己的律法、禮儀和傳統 (3)𪜶認為外邦人無清氣，亦比𪜶卡贏 (4)致到雙方有一堵無形的牆仔給𪜶隔開，甚至對敵。 2 基督拆去這堵牆仔 (1)廢除律法：救恩是出對恩典，呣是律法。猶太人和外邦人相仝( kâng) 得著恩典 (2)創造新人：得著救恩的猶太人和外邦人成做新人，屬佇新的團體－教會。(弗2:15 ) 3 外邦人及猶太人合一是奧祕( ò-pì ) (1)舊約時代雙方明顯無交插(chhap) (2)上帝的心意是互雙方合一，確實是奇妙 (3)新約的使徒( 彼得 )、(安提阿教會)先知、以及耶路撒冷大會( 徒 15 )，攏得著這個啟示。     保羅敨( tháu )放基督的奧妙 。佇基督耶穌，無分猶太人、外邦人，攏得著上帝的恩典，同做後嗣，同做一個身體，相及有份佇所應允的(弗3:4-6)。這款福音，前的世代無人得著啟示。受揀選的雙方 1 同做一個身體：著和睦，無因為意見、外形、傳統無仝來分別。 2 同做後嗣：因為基督的救贖，攏做上帝的囝，承受天爸的產業。 3 相及有份佇所應允的：攏享受上帝一切的應允、及屬靈的福氣。 4 成做新人：基督互信徒有一個新的性命，成做一個新的創造，無閣分猶太人和外邦人，攏屬佇新創造的"教會"。     上帝的奧祕就是基督 (西2:2)。咱的上帝有一個隱藏的奧秘    1 上帝的一切攏是為基督。為伊，伊創造宇宙、創造人類(弗1:10)。 2 上帝本性齊備踮佇基督(西2.9)，是看袂著的上帝的像(西1:15)。 3 上帝的工課成的時，就是萬物攏歸佇基督，合一佇基督(弗1:10)。     基督的奧秘就是教會 ，基督及教會聯合，成做一體(弗5.32)。 1 基督降世來啟示伊家己，教會受設立做伊的身體，啟示伊互世界。  2 基督借教會互萬有歸佇伊，完成上帝創世的目的。(弗1:10)     保羅深知基督的奧祕 。伊一生為這拍拚：伊傳福音到土耳其、希臘、羅馬，期待早一日福音傳到地極，全人類歸基督。

      猶太人的拉比給律法寫做條文 ，法利賽人 1 注重守律法、傳統，以及外在的儀式、行為，總是無出對內心。 2 對律法的規定真熟，但是對屬靈的事，欠真正的認捌。 3 是摩西律法的教師，智識飽。尼哥底某謙卑，向耶穌求教示。     尼哥底某是法利賽人，羅馬帝國的猶太人自治公會的官 。 1 伊是成功的人；有學問(法利賽人)，有地位(猶太公會的官)。 2 伊有世間人所追求的一切，總是，伊的上愛是智識、追求智識。 3 伊知耶穌有能力，行神跡、醫病、教示人，相信伊是對上帝來的。 4 伊求學問，耶穌對伊欠缺的切入，愛伊注目上帝國、閣重頭生。 5 耶穌講 (1)欲知上帝國，就著通過人內面的靈 (2)人的靈需要聖神的洗來換新，就是重頭生 (3)欲得著聖神的洗，著信上帝的囝。     尼哥底某求耶穌的教示 。耶穌講伊無欠智識，伊需要新的性命。 1 咱是靈、魂、體三部分所組成，體是咱看會著的身軀，魂就是咱心理主要的三部分機能，心思、意志、感情，靈互咱感受上帝的同在、接受聖神的恩賜。著互靈引𤆬咱的思想(魂)、行做(體)。 2 重頭生呣是閣對老母出世，是用水洗做屬主的宣告，閣上帝的靈換新咱內面的靈，互咱有伊聖的性地，有新的性命，若閣出世。 3 重頭生是一個奧秘的過程，是對頂頭來的經歷，呣是人所會當控制。耶穌用風來形容聖神做工的方式，是超出人的想像。     回應耶穌對尼哥底某的啟示 (約3:1-21)， 重新開始 。 1 人無法度救家己。上帝是疼，差囝入世間，拯救世間人。 2 人著有屬靈的性命。人在世追求世上的成就，總是過往就無去。著記得舊約的讖語，回應上帝的拯救、閣永遠活的應允。 3 救恩的奧秘：接受上帝的恩典，信人子，重頭生，互聖神引𤆬。 4 著行真理、就近光。做歹、呣信人子的，欲受審判。     伊成做耶穌的學生 。祭司頭及法利賽人欲掠耶穌，尼哥底某爲伊辯護(約7)。伊帶沒藥、沈香，來包耶穌的身屍(約19)。

      管會堂的睚魯來見耶穌，切切求耶穌，救伊的查某囝 。 1 伊仆(phak)佇耶穌的跤(ka)下，求耶穌扞(hoān)手佇伊的查某囝，來救伊。 2 耶穌及伊去。歸大陣的人綴伊，真挨𤲍(e-kheh)。(可5:24) 3 (1)一個血漏12冬婦仁人，對耶穌後面來摸伊的衫 (2)伊想：我干焦(kan-na)摸伊的衫，就會好；果然血漏隨止 (3)耶穌知有權能對伊出，越轉身，講：啥人摸我的衫？ (4)婦仁人驚惶，仆佇伊的面前，攏照實講 (5)耶穌講：婦仁人啊，你的信已經救你，通安然倒去！ 4 有對管會堂的家來的，對睚魯講：你的查某囝死啦！ 5 耶穌邊仔聽見所講的話，給睚魯講：莫得驚，只有著信！ 6 到𪜶兜；聽見嘩嘩哮，就講：啥事啼哭？囡仔呣是死，是睏若定。 7 伊趕眾人出去，𤆬囡仔 (gín-á) 的爸母和及伊來的人，入囡仔蹛(toà)的所在。 )8 耶穌牽囡仔的手，講：查某囡仔，我命令你起來！伊連鞭起來行。     睚魯管理會堂，伊代表，猶太民族精神的傳承和復興 。 1 猶大國滅無了後，會堂是猶太人宗教、法律、文化和生活的中心。 2 會堂是記號，是猶太人做上帝囝兒的驕傲，以及對彌賽亞的期待。     睚魯克服宗教、社會、文化等等的壓力，求耶穌的醫治 。 1 睚魯因為信，為破病久久的查某囝來求耶穌 (1)耶穌和猶太教的權力者已經有衝突，睚魯管會堂，竟然去揣耶穌 (2)伊是猶太教的守護者，竟然轉向耶穌 (3)伊無因為身分地位來驕傲，眾人面前仆落佇耶穌的跤下 (4)伊對查某囝的疼心，超過個人的面子。 2 耶穌醫好血漏婦仁人，講：你的信已經救你。加添睚魯的信心。 3 睚魯厝內的人來講，查某囝已經死，耶穌對伊講：只有著信！ 4 耶穌互伊、伊的某、綴去的學生，見證"咧睏的查某囡仔"起來。     睚魯看著主的權能，接受耶穌做救主，伊揣著得救的路 。 1 耶穌捌佇會堂講，伊來是欲敨(tháu)放受掠、受壓制的(路4:18)。 2 咱若自高家己，無屬遮個類，就及上帝的拯救無緣。 3 12歲的囡仔，血漏12冬的婦仁人，拄著耶穌，性命就改變。

      世間的代誌，互咱心操煩，給咱掠牢，著一盡除去 。 1 (1)拜偶像就是看人、事、物，比上帝閣較重要 (2)偶像檢采是金錢，一段感情， 抑是生活中，咱暝日擔憂、掛慮的。 2 手掠牢偶像，你就無手來接上帝欲互你的豐盛及祝福。 3 給"偶像"對性命中除去，才會享受上帝欲互你的平安及安穩。     著感謝上帝所賞賜的，歸榮光互伊，伊做主𤆬咱行世間路。 1 (1)上帝賞賜的，無論是某、囝、厝、空課、地位、金錢，伊期待咱做好的管家 (2)人生互上帝做頭，逐項有優先次序。一旦順序錯誤，所得的福分，反成做咱和上帝中間的窒(that)礙。 2 一個富人，起大栗倉、積聚財物，欲互靈魂快樂。(路12:15-21) 3 上帝講這個人是"無知"的，因為伊呣知會活偌久，所掠牢的，離開世間就無去。只有想著家己，上帝原先的祝福，亦攏失去。     凡事攏著認真，負起應該擔的責任，其他的就 交託上帝 。 1 交託上帝以後，呣是"無需要做任何代誌"。上帝無替人擔責任，貧惰(toān)、荏懶(lám-noā)是伊所譴責的。(太25:14-30) 2 交託上帝以後，呣是"保證代誌一定會成功"。咱著相信，無論啥款結果，攏有上帝媠的安排；咱亦欲收"咱所種的"。     建立和上帝的親密關係，放手交託， 伊做主 ，心安然 。 1 上帝賜福以撒，伊大發達。非利士人為井水和以撒相爭，伊就離開𪜶遠遠。上帝應允及(kap)伊同在，伊佇遐給上帝獻祭。(創26) 2 (1)上帝做中心的生活，是逐日及伊講話，給伊講咱的想法、計畫、期待，揣求伊的旨意，伊的啟示 (2)放開所扲(gīm)牢牢的，祈禱上帝講：上帝啊，呣是照我所愛，是照你所愛，無論你提去甚(sím)物，抑是互我甚物，我攏願意接受。 3 (1)你放手，上帝才會出手 (2)咱若願意放手、互耶穌做頭，伊欲幫贊咱，互代誌有好的安排，你免家己擔擔(tan-tàn)。 4 互耶穌佇你的人生掌權，這款的人生才是真正有福氣。

      路加18章講一個好額的少年官，19章講好額的撒該 。 1 少年官認為伊有守10條誡，問耶穌，怎樣做才會得永活？ 2 講：你猶欠一項；著賣你一切所有的，互散鄉人，閣來綴我。 3 彼人真好額，就憂悶。耶穌講：富人入上帝的國噁(oh)啊！ 4 聽見的問：按呢，啥人會得著救？講：人袂會(boē-oē)的，上帝會。 5 抽餉的頭人撒該、歡喜接納耶穌去𪜶兜。伊講：我給所有的一半互散鄉(sàn-hiong)人；我有彎甚麼人，就四倍賠伊。 6 耶穌對伊講：今仔日拯救到這個家，伊也是亞伯拉罕的囝孫。     少年官問：怎樣"做"才有永活？伊認為"做好事"通換永活 。 1 耶穌問少年官"敢有愛上帝"？欲得永活著愛上帝，愛上帝就著疼厝邊(幫贊散食人)。所以，袂當疼厝邊，汰會當講愛上帝。 2 耶穌講：守十條誡以外，伊閣欠一項，就是信心。得著永活是靠信心，呣是"靠錢財"。若準心所想攏是錢財，就袂得著永活。 3 (1) 耶穌講："駱駝穿過針鼻"比富人入上帝的國較快。駱駝的原文接近索仔，原文可能講"用索仔穿過針鼻" (2)這個譬喻，表示富人入上帝的國真噁 (3)欲入上帝國，著放棄對錢財的貪戀。 4 人若無注目地上，上帝會幫贊伊進到天國，無可能變做可能。 5 彼得講：阮放拺一切來綴你，阮欲得著啥物？這是功利主義。     耶穌給撤該講，我欲去踮恁兜，伊受感動，決心重新做人 。 1 (1)耶穌講：伊是亞伯拉罕(信心英雄)的囝孫，表示今伊所做是靠信心 (2)閣講這是上帝的恩典，是講呣是靠家己的力做會到的。 2 (1)撤該領受救恩，亦脫離錢財的勢力 (2)今伊事奉上帝，無閣事奉金錢 (3)伊佇耶穌基督內面，看著性命的意義，得著永活的確信，甘心樂意用所有的一切來榮耀上帝。 3 上帝給伊創造清氣的心，換新正直的神，閣互伊用行動表達。 4 撒該做的，少年官做袂到。仝(kāng)是財主，少年官認為會得著永活，最後無得著；撒該認為袂堪(kham)得，最後有得著。

  　　 挪亞的時代，社會道德墮落 。地上統治者(上帝的囝)，看著媠查某囝，就娶做某。人想的攏是歹，上帝就用大水毀滅𪜶 ( 創 6) 。 1 亞當到挪亞攏總10代(包含亞當)，挪亞500歲生大囝。 2 挪亞是義人，佇彼世代是完全的人。挪亞及上帝相及行。 3 上帝講：你著做大船，你一家，以及逐樣活物，欲入船來活。 4 挪亞用7日，給上帝吩咐的活物帶入船，然後(600歲)雨落40暝日，淹過懸(koân)山。過150日水漸漸消，1冬10日土地攏焦(ta)。 5 挪亞給耶和華起壇，取逐樣清氣的精牲、飛鳥，獻做燒祭。 6 耶和華給挪亞及伊的囝講：見有肉體的，我無閣用大水滅無，亦無閣毀壞土地；虹(khēng)欲做永遠的約的記號。 　　 大水過了，挪亞的三個囝面對伊酒醉的挑戰 。(創9:20,21) 1 含(迦南的老爸)看見𪜶老爸酒醉褪腹裼(thǹg-pak-theh)，就去給兩個兄弟講。 2 閃和雅弗提一領衫搭佇肩頭，倒退行，給𪜶老爸嵌咧(khàm-leh)。 3 (1)挪亞酒醉醒，知𪜶所做，講：迦南著受咒詛，伊欲做兄弟的奴僕 (2)以色列人(閃族)統治迦南地，含後代(迦南人)做𪜶奴僕(書16:10) (3)面對別人的過失，咱呣(m̄)是四界講，著用疼遮嵌。 4 雖罔咱講事實，無白賊，上帝鑒察咱的動機，看咱敢有疼心？ 5 律法及先知講：愛人款待咱的，咱亦著按呢款待人。(太7:12) 　　 挪亞的時代，人類無守道德規律，犯罪滿滿，上帝出手 。 1 上帝顧道德的紅線 (1)挪亞的時，人類充滿暴力、淫亂，伊做大船，亦無法度感動當時的人 (2)上帝決定用大水洗清世界。 2 上帝保留受造的 (1)挪亞佇上帝面前是義人，聽趁上帝的命令造大船，救著全家 (2)逐樣精牲、飛鳥，亦入船，得著活命。 3 上帝揀信心英雄挪亞 (1)挪亞的信心，互伊堅持，起造大船 (2)佇罪惡的世界，挪亞一家保持對上帝的信心，上尾得著拯救。 4 上帝換新世界 (1)大水過後，世界換新，得著重新建立道德秩序的機會 (2)咱若犯罪，著及時悔改，無就傷 (siu n ) 慢啦。

   　　" 取代神學 "講，新約信徒(教會)才是真正的選民。𪜶認為 1 以色列(猶太人)呣信和叛逆上帝，上帝棄捒𪜶，𪜶無閣是選民。 2 上帝對以色列列祖(亞伯拉罕、大衛..)的應允，攏轉到教會。 　　 教會拄(tú)建立，就出現全面的反猶太運動 。 1 第2世紀濟濟教會領袖攏認為猶太人著死，給耶穌死的責任，捒互整個猶太民族。甚至，"教會博士"奧古斯丁亦按呢講。 2 歷史上，歐洲教會敵視猶太人，迫害𪜶 (1)英國開始趕走猶太人(1026年) (2)十字軍及回教的戰爭，刣死濟濟猶太人(1099年)。 3 1543年，馬丁路德因為猶太人無接受基督，用惡毒的話攻擊𪜶，提議燒𪜶的學校、會堂，沒收𪜶褻瀆(siat-to̍k)的冊，𪜶的財產。 4 希特勒屠殺6百萬猶太人，教會恬恬(tiām)，應該是路德的影響。 5 1982年，路德宗世界聯合會聲明："基督徒著除去對猶太人的怨恨，以及任何看輕猶太教的教義"。否定反猶太言論。 6 2015年天主教宣佈，無向猶太人傳耶穌，否定主的大使命。 　　 外邦人若野橄欖接枝佇橄欖，救恩對猶太人來 。(羅11:17-18) 1 橄欖枝指猶太人，野橄欖指外邦人。橄欖根指以色列祖先。 2 猶太人呣信，上帝刑罰，若枝受遏(at)斷，機會讓互外邦人。 3 外邦人得著救恩，若野橄欖接枝，得著橄欖的根及肥汁。 4 呣信的以色列人若回頭，上帝會給𪜶接倒去(羅11:23)。 　　 當預定的外邦人攏得救，通以色列亦欲得救 。(羅11:25-27) 1 外邦人得救是上帝的旨意，無需要遵守 猶太 禮儀。(羅9:25-26) 2 上帝無棄捒(sat)伊的百姓。伊的恩賜和選召攏無後悔。(羅11:29) 3 以色列會得著救 (1)成上帝及𪜶列祖立的約。𪜶著：信救主、罪得赦免。(羅11:26-27) (2)是少數的"賰的百姓"若定(羅9:27-29)  4 "賰的百姓" (華語：餘民)是經歷苦難、猶原盡忠、得著活的人 (1)挪亞一家，倒去耶路撒冷的猶太人攏是 (2)逐時代，有信心的是少數。親像以利亞和彼七千人(王上19:18)。

      基督徒攏知，人生是短、暫時，咱是寄腳、過路的 。 1 人在世時間短。人的日子親像影，無長長佇啲(代上 29:15)。 2 人在世是暫時(利25:23)。咱是過路客，亦是天路客(pilgrim)。 3 咱有一個祖家，咱對遐出，就欲閣倒轉去(希11:13-15) 。 4 呣通趁私慾，通佇鑑察的日榮光上帝(彼前2:11-12)。 5 託咱的，著𠢕運用，成做別人的祝福；主欲檢驗。(路12:48)     無論咱有去聖地抑無，基督徒的人生就是朝聖的人生 。 1 朝聖者(pilgrim)就是去特殊的宗教事件的場所，來親身體驗。 2 逐冬攏有成億的人咧朝聖，去𪜶認為神聖的所在，接受祝福。 3 基督徒的人生就是一個朝聖的路程 (1)倚靠主、心意向主，若朝聖者 (2)人生的起落，若去聖地路中，有拄著"流目屎"的山谷，亦有"福氣"的秋雨，愈行，和上帝愈親近。(詩84:5-7)      為著信仰自由，第一批的清教徒坐"五月花"去北美洲 。 1 清教徒(puritan)反對天主教，反對 𪜶 無合聖經的儀式、傳統。 2 清教徒 (1)實踐比社會上較嚴格、較純潔的道德準則 (2)只有信靠聖經 (3)𪜶出現佇16-17世紀，以後散去其他基督教教派。     清教徒佇新大陸，建立基督化的社會，過朝聖的人生 。 1 婚姻：牽手是通一世人做伙，相疼、上親密的人，佇上帝面前誓約欲相扶持的。牽手呣是瞬間產生戀愛的感情來結連的。 2 囝兒：教育囝兒著行的路，關心𪜶的靈、魂、體，教育𪜶過踏實、敬虔的生活，做一個對社會有貢獻的人。 3 家庭生活：家庭著有基本的規矩 ， 互相尊重，相和好，忍耐，互相鼓勵，言行一致。佇厝裡就著操練傳福音和事奉。 4 學校教育：兒童著接受文字的教育。通過 "強迫看冊"，囡仔大漢，就會守法律，維持社會制度，袂變野蠻、無講理氣。     朝聖的生活，就是棄捒(sak)世俗的生活 。朝聖的路親像出外人倒去祖家，經歷艱難、經歷上帝的攝理，最後進入聖城。

      基甸續接士師底波拉以前，以色列人行上帝看做歹的 。 1 底波拉互以色列人太平40年，以後𪜶受米甸人壓制七冬。 2 這期間，以色列人佇山裡挖空、起營寨。米甸人來攻擊，拍歹土產，無留食物互以色列人。𪜶困苦，就求叫耶和華。     耶和華 召伊出來救以色列，伊要求主的使者互伊證據 。 1 基甸要求兆頭，使者用拐拄(tuh)石磐頂的肉和餅，火就給𪜶燒了。 2 (1)上帝吩咐伊拆老爸為巴力起的壇，剉(chhò)壇邊的偶像，做柴燒 (2)給耶和華起壇，獻牛做燒祭 (3)伊的老爸，向受氣的以色列人講：巴力若是上帝，有人拆伊的壇，互伊為家己爭論。     基甸 向上帝求2個神跡，伊才心安招以色列人出戰 。 1 神跡：羊毛外口過暝，只有(1)羊毛澹(tâm) (2)塗跤(thô͘-kha)澹。 2 基甸招3.2萬人，有2.2萬人心驚惶，上尾上帝指示揀300人。     暝時，耶和華吩咐伊攻擊敵人。𪜶大贏，得著40冬的和平 。 1 為了壯伊的膽，上帝叫伊去探敵營。聽著一人講伊的夢：有大餅輾落來，給布棚衝倒。伊的同伴講，上帝給咱交佇基甸啦。 2 以色列人分3隊，提哨角和囥(khǹg)火把(pé)的甕，分佇敵營的四圍。三更到，就歕(pûn)哨角、提出火把，閣大聲喝(hoah)。 3 敵人大驚，家己相刣。以色列人對逐所在攻擊逃走的米甸人。     基甸脫袂出自卑感，愛欲把握濟濟，最後是空空 。(士6-9) 1 上帝的使者向伊顯現的時，伊無自信，亦憢疑上帝的攝理。 2 伊看著神跡，確信耶和華呼召伊。以後閣要求羊毛的神跡。 3 上帝叫伊出戰，伊聽著對方的兵做的夢，才行動(士7:13-14)。 4 攻擊的時，喝講"耶和華及基甸的刀"，高舉家己(士7:20)。 5 給搶來的金耳環，做以弗得(偶像)，後來以色列人去拜伊。 6 戰後倒去厝，無撙節，有70個囝，最後攏互小姨生的囝刣死。 7 基甸是當時以色列人的縮影。上帝揀伊，伊猶原憢疑。上帝幫贊伊，伊無榮光上帝。伊無引𤆬百姓，家己反離開上帝。

      人第一遍犯罪，就是憢(giâu)疑上帝的話 。 1 撒但互亞當、夏娃憢疑上帝，"食彼欉樹的果子，無的確會死"。 2 上帝通過歷代使者，白紙黑字寫的應允，咱有時亦會憢疑。 3 (1)上帝無用"心憢疑的"。伊給基甸講：驚惶懔懾(lún-neh)的，通離開倒去(士7:2,3) (2)主佇故鄉因為眾人呣信，無行神蹟(太13:58)。     因為咱憢疑 上帝的應允 ，驚惶和掛慮管轄咱 。 1 生活中有濟濟袂確定的代誌，互咱驚惶和掛慮，特別是病痛、死亡的威脅、經濟無穩定、失業等等的問題。 2 有人為著袂發生的代誌煩惱，不時有"萬一…"的念頭。 3 若準心裡面常常有驚惶和掛慮，咱的生活就無平安。 4 (1)上帝賞賜咱能力、仁愛、守己的心神，呣是驚惶(提後1:7) (2)咱雖然行過死蔭的山谷，亦呣驚災害，因為上帝及咱佇啲；伊的槌，伊的枴，安慰咱(詩23:4) (3)免驚忽然來的危險，上帝的確堅固你，做你倚靠，無陷落羅網(箴3:25-26)。 5 (1)明仔日有明仔日的掛慮；一日的艱苦一日夠額(太6:34) (2)莫得掛慮，著用祈禱、感謝，將咱所求的排列佇上帝。(腓4:6,7)     因為咱憢疑上帝的信實，撒但利用咱的罪惡感，講咱袂得赦 。 1 撒但透過良心告咱，掠牢、放大、責備咱的過失，互罪惡感不時佇咱心肝頭轉踅(se̍h)，激咱責備、受氣、怨恨家己，致到凝(gêng)心、鬱卒，無平安，呣相信上帝會赦免咱的罪。(啟12:10) 2 咱若靠聖神的幫贊，相信上帝赦罪的應允，撒但就無作為。 3 (1)撒但的暗步，上帝攏監視，互伊無超過界限(林前10:13) (2)上帝容允撒但對人攻擊，因為信徒欲對遮個試煉，得著成長。 4 著信 (1)咱反悔，接受主耶穌，伊除去咱的罪，咱得著重頭生。 (2)因為軟弱，免驚惶，通不時倒轉到上帝的施恩座前，祈求幫贊、赦罪(希4:16) (3)咱若認家己的罪，上帝是信實、公義，欲赦免咱的罪，洗除咱一切的不義(1約1:9)。

    律法中最大的是"愛上帝"，第二是疼人 (太22:36-40)。 1 十條誡(律法)講人和上帝，以及人和人的關係，基礎攏是"疼"。 2 十條誡前4條講袂使有別的上帝、拜偶像、濫糝(lām-sám)稱上帝的名，著守安息日。後壁6條講親人、厝邊和四圍的人。(出20:3-17) 3 咱常常講疼厝邊、疼兄弟姐妹，閣講上帝怎樣疼咱，總是，咱亦著思考律法中最大的"愛上帝"，"怎樣愛上帝？"     檢討錯誤一：疼人就是愛上帝 。 1 對十條誡看，愛上帝、疼人所講的內容並無相像。 2 愛上帝、就著疼人，總是，疼人、無代表就是愛上帝。 3 講"我愛上帝"，閣怨恨他的兄弟，就是講白賊。(1約4:20)     檢討錯誤二："相疼"就完全實現一切律法 。 1 羅13:8-10講"疼人的，有盡律法"，舉的例是無行淫、刣人、偷提、貪心，所以講的"疼人"，只有盡律法中、人的部分。 2 律法呣但(m̄-nā)講"疼人"，律法亦講，無拜偶像、無拜受造的。     檢討錯誤三：人無辦法直接愛上帝 。 1 咱所信的、向望的、愛的是看袂著的上帝，伊是舊約以色列的上帝，新約耶穌是聖囝，佇聖經顯明是三位一體的上帝。 2 對上帝的話，閣聖神的幫贊，雖然看袂著伊，咱用信心信靠。 3 上帝先疼咱，差主耶穌贖咱的罪，互咱做伊的囝，伊歡喜和咱親近，咱通佇祈禱中直接表達感謝，守伊的誡命回應伊的疼。     愛上帝著"盡心、盡性、盡力" (申6:5)。 1 (1)咱愛上帝，著守伊的誡命(1約5:3)；欲知伊公義、純潔、憐憫的聖質，著讀聖經 (2)愛上帝著愛"盡心、盡性、盡力"，所以咱著愛有心、亦著有行動來配合；著思考怎樣做、閣做互好。 2 亦著借祈禱，將一切代誌排列佇上帝，建立和伊的親密關係。 3 彼得和耶穌有親密的關係，伊愛耶穌，耶穌愛伊用"照顧羊仔"來回應對伊的愛。咱愛上帝，著及伊親近，閣守伊的命令。

     約瑟善良正直，經過種種試煉，最後全家得著團圓 。 1 雅各年老、所疼的某生約瑟。伊夢著日、月閣 11 粒星攏拜伊。 2 約瑟將兄哥的歹品行給老爸講。伊亦對兄哥講伊的夢，𪜶就閣卡怨恨伊。𪜶趁約瑟來探𪜶出外有平安抑無，給伊賣去埃及。 3 佇埃及，伊拒絕主母的引誘，受誣賴，關佇法老王的監獄。 4 佇監獄，伊解法老酒政的夢，閣解法老的夢，高升做宰相。 5 約瑟趁伊的兄來埃及糴 (tia̍h) 糧，和𪜶相認，給老爸全家接來。     約瑟佇困苦中，猶原歸榮光上帝，上帝成伊少年的夢 。 1 (1)約瑟小漢的時老爸疼，兄哥怨妒 (2)以後受賣去埃及，佇監獄13 年，苦難中，操練忍耐、信靠上帝的信心，閣管理的能力。 2 約瑟根據法老的夢，建議佇 7 年豐收積貯糧食，通應付 7 年飢荒。法老講，上帝將遮的代誌指示伊、可見無人親像伊遐有聰明智慧。法老互約瑟管理伊的家，閣派伊管理埃及全地。 3 咱若認真、吞忍、踮真裡、囥向望，上帝欲賞賜豐盛的人生。     檢采賣約瑟去埃及是出佇歹，最後是成上帝的大計畫 。 1 約瑟互兄弟賣去埃及，是為著成上帝及亞伯拉罕立的約。 2 (1)上帝透過伊治理埃及，互家族 70 人移民到遐，無死佇飢荒。430 冬後成長到 200 萬 (2)迦南地無開墾，無可能生湠 200 萬的以色列人，所以上帝互𪜶徙去埃及，直到摩西𤆬𪜶出埃及。 3 上帝透過約瑟做較大的代誌，伊離開故鄉是計劃的一部分。 4 無論境遇好歹，咱攏盡心盡力，上帝才會當佇遐為咱來安排。     約瑟受怨恨、冤枉，伊堅持對上帝的信心，無抾(khioh)恨 。 1 伊的囝 (1)瑪拿西=袂記得，放落兄哥的冤仇 (2)以法蓮=興旺，上帝賞賜。伊知，少年的夢，破碎和目屎，攏出佇上帝。 2 當伊高升做宰相，伊體會上帝的攝理。伊和兄弟相認的時講：呣免因為賣伊來憂悶。是上帝差伊代先來，欲保全𪜶的活命。 3 老爸死了，伊閣一遍對兄哥講：呣免驚，前恁的意思是歹，總是上帝的意思是好，欲保全濟濟人的性命。

       參孫的時，以色列人已經互非利士人管轄、同化 40 冬 。 1 參孫的老母袂懷孕。上帝差天使對伊講：你欲懷孕生囝，伊欲歸上帝做拿細耳人，拯救以色列人脫離非利士人的手。 2 當時 (1)以色列人佇"文化上"已經受同化，無閣求叫上帝 (2)𪜶呣知參孫是保護𪜶的"士師"，甚至給參孫交互非利士人。     信，互參孫得著力量；違背誓(sē)約，上帝離開伊 。 1 上帝的神 3 遍感動伊 (1)伊手無家私，拆裂獅，親像拆裂山羊仔(2)伊拍死 30 個非利士人，搶衫來互參加婚宴的人。𪜶臆著伊的謎，因為未婚妻漏答案 (3)非利士人威脅猶大人，縛參孫互𪜶。伊掣(chhoah)斷索。提驢仔骨，拍死一千個非利士人。 2 伊掠 300 隻狐狸，每 2 隻的尾縛火把，燒非利士人的五穀。 3 伊去親近妓女，非利士人佇城門口當伊，參孫半暝起來，拆城門的門扇、門框，下佇肩頭，扛(kng)去對面的山頂。(士 16:3) 4 伊戀愛一個查某人，伊騙伊講力量的來源 (1)查某人剃伊的頭毛，非利士人掠伊，挖出伊的目睭，鍊伊佇監挨磨(e-bō) (2)伊的頭毛漸漸長 (3)非利士人佇廟獻祭、宴樂，叫伊出監，創治伊 (4)伊要求囡仔互伊倚佇一枝柱仔，伊求上帝賜伊氣力，一手攬一枝柱仔，出力，厝就倒，硩(teh)死厝內、厝頂 3,000 外人。 5 參孫做士師，伊的力量對上帝來，頭毛是誓約、記號若定。     參孫是信心的英雄 (希 11:32)。伊求上帝，顯出伊的信心。 1 參孫有上帝的呼召、賜福、上帝的神感動，總是順家己的感覺，無撙節(chún-chat)，跋(poa̍h)落佇情慾、貪食、受氣、驕傲的陷坑。 2 參孫求上帝 (1)啄焦(chhuì-ta)求水(士 15:18) (2)求氣力(士 15:28)。 3 上帝應允參孫的祈求，因為 (1)伊對頭到尾行上帝吩咐的：攻擊非利士人 (2)伊的信心。伊相信上帝的權能，向上帝求。 4 參孫對抗非利士人，啟示咱 (1)只有一個人信靠主，亦會互對敵喪膽 (2)咱存信心謙卑祈求，上帝互咱成閣較大的事。

       亞居拉及百基拉接待傳道者：保羅和亞波羅 。 1 亞居拉及百基拉夫婦搬去哥林多，因為羅馬皇帝趕猶太人離開羅馬。保羅第二遍旅行傳道到哥林多，拄著𪜶夫婦，因為仝是織布棚，𪜶提供伊蹛、工課(khang-khoè)，閣友情(徒 18:1-3)。 2 保羅干證耶穌，受猶太人謗瀆，才去別人的厝蹛(徒 18:5-7)。 3 保羅第二次宣教結束路上，帶𪜶夫婦同行(徒 18:18)，伊通專心傳道，亦有人幫贊。𪜶夫婦放落一切，陪伴保羅去旅行傳道。 4 保羅捌(bat)拄(tú)著性命的危險，𪜶拼命去救伊(羅 16:4)。 5 佇以弗所，𪜶拄著亞波羅。伊有學問，會講解聖經，總是伊知約翰的洗禮若定。𪜶向亞波羅分享、保羅講的真道(徒 18:26)。 6 亞波羅前傳悔改，今傳耶穌是彌賽亞。佇哥林多，伊"灌沃"保羅所"栽種的"(林前 3:6)。伊成做福音有力的辯護者(徒 18:28)。     百基拉及亞居拉為著宣教來搬厝，閣拍開厝做教會 。 1 佇哥林多，保羅佇𪜶的厝傳福音，受猶太人毀謗，伊才離開。 2 𪜶綴保羅去以弗所，留佇遐，開放家庭做教會(林前 16:19)。 3 羅馬換新皇帝，𪜶搬倒去羅馬，佇遐的厝傳福音(羅 16:3)。 4 𪜶對羅馬閣徙去以弗所，及提摩太同工(提後 4:19)。     接待為主的名出外的，是和𪜶同受紀念 (約三 7-8)。 1 亞伯拉罕(創 18:1-19)，羅得(創 19:1-3)接待出任務的天使。 2 守寡人養飼以利亞(王上 17)，書念婦人接待以利沙(王下 4)。 3 耶穌招呼抽餉的撒該，伊就歡喜 "接待" 耶穌(路 19:2-6)。 4 耶穌在世，常常去伯大尼的馬大、馬利亞的厝(路 10:38-42)。 5 檢采咱無認為家己是傳道者，總是咱通做一個同工，陪伴、幫贊、付出、供應、指導、祈禱的人。     保羅感謝百基拉及亞居拉翁某 (羅 16:4)。𪜶夫婦提供保羅家庭的溫暖，𪜶同心佇福音事工，同齊勞苦。保羅寫互提摩太最後的批，猶原切切數念𪜶，這對相捌 16 冬的老朋友(提後 4:19)。

        仁愛著佇日常的生活中活出來 。(林前 13:4-7) 1 仁愛是 𠢕 (gâu)寬容、慈悲；仁愛是無怨妒；仁愛無誇口，無品捧(phóng)，無行見笑的事，無求家己的利益，無快受氣，無記得人的歹，無歡喜不義，是及真理相及歡喜；(13:4-6) 2 凡事忍受，凡事相信，凡事向望，凡事吞忍(lún)。(13:7)       生活中，無疼心的行做；無張持(tî)、抑是刁(tiau)工做的 。 1 怨妒：不滿別人有、家己無，就受氣，甚至攻擊，若冤仇人。怨妒希望家己無的，別人也無；甚至家己有的，別人袂使有。 2 誇口：歕家己偌爾(loā-nī)𠢕，欲引起別人注意，期待別人謳咾。誇口的人認為家己比別人巧，自高、驕傲，天使因為按呢墮落。 3 品捧：痟(siáu)狂、膨(phòng)風，講話過頭佇真正的家己。看無別人，講大聲話，歕(pûn)牛皮，總是若歕風的雞胿(kui)仔。 4 行見笑的事：做了無應該做、歹勢講的代誌。 做了粗魯、無禮貌、無尊重人、無合宜的代誌。 5 求家己的利益：為著家己的好，執死訣、無相讓。 堅持家己的看法，看重家己的權利，無放棄應該得的。 6 快受氣：感覺得家己是對，別人呣對，閣袂當忍受。袂當忍受受委屈、受刺激、代誌超出家己的原則的。 7 記得人的歹：抾(khioh)恨，給別人所做的歹代記椆椆(tiâu)。給別人犯的錯誤(檢采是家己的看法)，逐件攏囥(khǹg) 佇心內。 8 歡喜不義：掠"做歹"做快樂。家己行歹，也歡喜別人行歹。挖別人的見笑的事，私人的事，閣四界傳。     勇敢面對別人無疼心的行為，因為聖神用疼灌沃咱 (羅 5:5)。 1 歡喜忍受、做伙背重擔，做伙面對問題，呣是去四界傳。 2 相信對方、正面看代誌，無隨便定人的罪，想辦法揣出問題。 3 囥向望、相信上帝的攝裡，面對問題，代誌上尾會得著解決。 4 吞忍、總是心亦著放互開，因為這一切攏欲過去。

    主耶穌招人來得著活命，亦招人做學生 (約10:10)。 1 主招著磨擔重擔的。無閣暝日追求地位、錢財，來學習伊溫柔謙卑，交託伊、常常感謝，心神得著安歇(太11:28-30)，享受做囝兒的福氣。咱若願意負起做囝兒的責任，就著綴主做工。 2 主招人綴(toè)伊。你看無家己，伊贊你揹十字架(可8:34)。     綴主的人，就是看無家己 ；趁上帝疼、憐憫、公義的心意。 1 看無家己(捨己)呣是完全否定家己、棄捒家己，為著欲綴主。 2 捨己的誤解 (1)著放下家己所有的想法、趣味，甚至性命 (2)著否認自我的願望，親像成功、愛情、理想的工課。 3 耶穌幫贊咱改變家己 (1)為別人設想，得著較豐盛的性命(約10:10) (2)回復咱受造的時的本性，互世界因為咱變較媠。 4 怎樣改變 (1)詳細檢驗自我，誠實面對家己、面對上帝 (2)體貼上帝的心意，除去舊的人無合上帝的部分，棄捒著棄捒的。 5 保羅綴主以後，追求真理、對性命的熱情猶原保持。 6 因為順趁上帝，所以亦著關心家己，才會有力做好的工。     十字架代表苦難，為著救人忍受艱苦，甚至失去性命 。 1 人生的苦(病痛、憂愁、死亡...)，呣是主所講的十字架。 2 十字架亦代表救贖、赦罪、恩典和疼，紀念主為咱受釘。 3 十字架亦是榮耀、向望、得勝的記號，紀念主閣活。     揹(phāin)十字架是為別人、願意擔重擔、犧牲，主欲贊你 。 1 綴主的挑戰 (1)咱有濟濟責任：家庭、職場、教會服事，著做安排 (2)綴主是一世人，著佇逐時準、逐場合攏保持咱的決心。 2 主佇客西馬尼園祈禱以後，就給爸交代的，做伊的十字架。 3 綴主的付出 (1)看無家己，無為家己，覺悟可能會失去世間的享受(太16:24) (2)揹咱的十字架，咱可能會失去朋友、事業...。 4 主應允 (1)有伊的恩典，當我軟弱，我反有氣力(林後12:9-10) (2)奉獻無惜力，贊人免人知。事後的喜樂無通比。